La nachanaw kxnakujkan kifamiliajkan tiku ni kgalhikgo kintakanajlakan

JESÚS wanilh chatum chixku tiku kstalaniputun: «Kapit kminchik, kalakgpinkgo militachiki. Kalixakgatlikgo lantla ntlanka litlan ntlawaninitan nkimPuchinakan, chu lantla nkgayaj katsanin». Max xwilakgolh lakatsu kkachikin Gadara, ksureste kpupunu xla Galilea. Tuku Jesús wa litasiya pi xʼakgatekgsa pi latamanin kalitachuwinamputun xfamilia tuku xlakaskinka akxilha (Mar. 5:19).

La uku, klhuwa kachikinin chu tachuwin chuna tlawakgo, maski wi niku tlakg chuna talismani. Wa xlakata, akxni wi tiku tsuku skujnani, Jehová, kalitachuwinamputun xfamilia xasasti xtakanajla. Pero, ¿la xlitlawat? ¿La nachan kxnakujkan tiku atanu takanajla kgalhikgo o ni kanajlanikgo Dios? Biblia masta lu tlan tastakyaw.

«¡KTAKGSNITAW MESÍAS!»

Kxapulana siglo, wa Andrés tiku na pulana katsilh pi Jesús, Mesías xwanit. ¿Tiku pulana alh wani? «Pulana titakgsli xtala Simón, wanilh: “¡Ktakgsnitaw Mesías!” Wa ntachuwin “Mesías” [...] wamputun, “Cristo”.» Alistalh lilh Pedro anta niku xwi Jesús, chuna makgtayalh na kstalanina xwa (Juan 1:35-42).

Max titaxtulh akgchaxan kata, Pedro tiku xwi kJope, wanika pi xʼalh knorte, kCesarea, kxchik chatum xapuxku soldado xwanikan Cornelio. ¿Tiku xwilakgolh akxni chalh? Biblia wan: «Cornelio xkgalhkgalhimakgo [Pedro chu tiku xtaminkgo], chu na xmamakxtumikgonit xlinatalan, [chu] laktalipaw xʼamigos». Chuna, Cornelio kamakgtayalh xfamilia xkgaxmatnikgolh Pedro chu xakstukan xlaksakkgolh tuku xtlawakgolh (Hech. 10:22-33, Hua Xasasti Talaccaxlan, TXS, 1999).

¿Tuku kinkamasiyaniyan la Andrés chu Cornelio kalikatsinikgolh xfamiliajkan?

Andrés chu Cornelio lakkaxwilikgolh tuku xtlawakgolh. Andrés lilh xtala xlakata xlakgapasli Jesús, chu Cornelio kamamakxtumilh xfamilia xlakata tlan xkgaxmatnikgolh Pedro. Pero ni kamafuerzajlinilh na kstalaninanin Cristo xwankgolh. ¿Tuku kinkamasiyaniyan uma? ¿La nachuna natlawayaw? Max tlan nakalitachuwinanaw kifamiliajkan tuku xlakaskinka akxilhaw, nalakputsayaw la nalakgapaskgo tuku xaxlikana o nakamalakgapasniyaw atanu natalan. Pero ni nakamafuerzajliniyaw natlawakgo tuku akinin lakaskinaw, xakstukan kalaksakkgolh tuku nakanajlakgo. Xlakata nakatsiyaw la nakamakgtayayaw kalichuwinaw Jürgen chu Petra, akgtum tamakgaxtokgat xalak Alemania.

Petra katakgalhtawakgalh xtatayananin Jehová chu tamunulh. Jürgen chatum xapuxku soldado kʼejercito xwanit, pulana ni lakgatilh tuku Petra tlawalh. Pero alistalh akxilhli pi xtatayananin Jehová masiyakgo xaxlikana xlakata Biblia. Wa xlakata, na tamunulh chu la uku litaxtu kgolotsin xalak congregación. ¿Tuku kinkawaniyan Jürgen xlakata la nachanaw kxnakujkan kifamiliajkan tiku atanu takanajla kgalhikgo?

Jürgen wan: «Ni kakamafuerzajliputu nakanajlakgo tuku wix kanajlaya chu ni lhuwa tuku kakalitachuwinanti xlakata Biblia. Uma natlawa pi natamakgatlikgo. Chuna la natitaxtu kilhtamaku, tlakg tlan nawan komo tsinu tsinu nalitachuwinantilhaya tuku xalak Biblia. Na namakgtayanan nakamalakgapasniya natalan tiku kgalhikgo kata la xlakan o na lakgatikgo tuku xlakan lakgatikgo. Uma natlawa pi natalakatsuwikgo».

Apóstol Pedro chu xfamilia Cornelio lakapala makgamakglhtinankgolh tuku xalak Biblia. Pero atanu latamanin xalak pulana siglo tlakg makgapalakgolh.

XNATALAN JESÚS

Makgapitsi xalak xfamilia Jesús kanajlanikgolh akxni xlichuwinama Dios unu kkatiyatni. Akgtum liʼakxilhtit, apóstoles Santiago chu Juan max xnatapuxnimatna xwankgonit chu Salomé xtse umakgolh apóstoles, max xnapa xwanit. Salomé max na xlitaxtu «lhuwa makgapitsin lakchajan» tiku «xlimakgtayalemakgolh [Jesús chu xʼapóstoles] pala tu xlakan xkgalhikgoy» (Luc. 8:1-3, TXS, 1999).

Amakgapitsin xalak xfamilia ni lakapala kanajlanikgolh. Akgtum kilhtamaku, akxni xtitaxtunita akgtum kata la xtamununit, lhuwa tiku tamakxtumikgolh kʼakgtum chiki xlakata xkgaxmatnikgolh. Biblia wan: «Akxni katsikgolh xnatalan Jesús tu xtlawama, lakgminkgolh lakimpi nalenkgoy, sampi xpuwankgoy pi kaj ni x[...]katsiy». Alistalh, akxni xtunatalan wanikgolh niku tlan xʼalh, xla ni liwana kawanilh tuku xʼama tlawa. ¿Tuku xlakata? Xlakata «xnatalan, ni xkanajlanikgo» (Mar. 3:21, TXS, 1999; Juan 7:5).

¿Tuku katsiniyaw xlakata la Jesús kalikatsinilh xfamilia? Ni sitsilh akxni makgapitsi wankgolh pi ni xkatsi tuku xtlawama. Asta akxni xmakgnikanita chu xlakastakwananita, Jesús matliwakglhli xfamilia xlakata tasiyanilh xtutala Santiago. Max wa tuku makgtayanalh pi Santiago chu amakgapitsi xtunatalan xkanajlakgolh pi Jesús Mesías xwanit. Wa xlakata, na anta xmakgwilakgolh akxni apóstoles makglhtinankgolh espíritu santo chu max xlikana pi namakgamakglhtinankgolh chu nachuna amakgapitsin tiku xtamakxtumikgonit kxlikilhmaktiy kʼakgtum chiki kJerusalén. Alistalh Santiago chu Judas, tiku na xtutala Jesús, kalakgayawaka xlakaskinka taskujut (Hech. 1:12-14; 2:1-4; 1 Cor. 15:7).

MAKGAPITSI LAKASKINKGO TLAKG LHUWA KILHTAMAKU

Chuna la kxapulana siglo, la uku makgapitsi xalak kifamiliajkan maklakaskinkgo lhuwa kilhtamaku xlakata natlawankgo ktiji nema linan klatamat. Kaʼakxilhwi tuku titaxtulh Roswitha, tiku lu católica xwanit akxni xchixku xtatayana Jehová litaxtulh, kkata 1978. Xlakata lu xkanajla tuku xmasiyanikanit, ni tlan akxilhli tuku tlawalh xchixku. Pero chuna la titaxtulh kata, talakgpalilh xtapuwan. Tsinu tsinu katsilh pi xtatayananin Jehová masiyakgo xaxlikana, chu tamunulh kkata 2003. ¿Tuku lakgpalilh xtapuwan? Pulaktum tuku xlakaskinka, wa la xlikatsi xchixku: ni xlisitsi akxni nitlan xlikatsini, wata xmaxki talakaskin nalakgpali tuku xlakpuwan. ¿Tuku tastakyaw masta Roswitha? «Lhuwa tuku tlan kitaxtu akxni lu kgalhkgalhinankan.»

Monika tamunulh kkata 1974, chu titaxtulh akgkaw kata chatiy xlakgkgawasan na xtatayananin Jehová wankgolh. Maski xchixku, tiku wanikan Hans, nikxni xkalisitsini xlakata xtakanajlakan, tamunulh asta kkata 2006. Xlakata tuku lakapastakkgo, ¿tuku tastakyaw mastakgo? «Ni kamakgxtakgti Jehová chu ni kamakgatsankganani kmintakanajla.» Atanu tuku na makgtayalh Hans, wa pi xfamilia xlimasiyanikgo pi xpaxkikgo. Chu ni lakpuwankgolh pi nikxni xʼama makgamakglhtinan xaxlikana.

LISKGAWIWINKGOLH CHUCHUT XLA XAXLIKANA

Akgtum kilhtamaku, Jesús wa pi tamakatsin xaxlikana litaxtu la chuchut nema masta latamat nema ni sputa (Juan 4:13, 14). Lakaskinaw pi kifamiliajkan kalikgotnankgolh uma xaskgawiwi chu xastalanka chuchut. Pero ni nakamafuerzaliniyaw lakapala nawakgo xlakata nalijikswakgo. Chuna la nakalitachuwinanaw tuku kanajlayaw uma natlawa pi naliskgawiwinkgo o nalijikswakgo. Biblia wan pi «xnaku tiku xaʼakgstitum liwana lakapastaka xlakata nakgalhtinan» chu «xnaku tiku skgalala tlawa pi nawan tuku liskgalala, chu tuku wan kanajlakan». ¿La tlan namakgantaxtiyaw uma tachuwin? (Prov. 15:28; 16:23.)

Puskat tiku lakaskin pi xchixku kakatsilh tuku xla kanajla «liwana lakapastaka xlakata nakgalhtinan», uma wamputun, laksaka tuku nawan chu ni akglakgwa chuwinan. Nikxni tlakg lanka namakgkatsikan nixawa xchixku o nalakpuwan pi tlakg xaʼakgstitum. Komo kuenta tlawa uma, tuku nawan namakgtayanan chu natlawa pi tlan natawilakgo. Chu xlakata «nawan tuku liskgalala», puskat tlan akstu nakgalhskinkan: «¿Tukuya hora tlakg tlan naktakgalhchuwinan kinchixku? ¿Tuku lakgati likgalhchuwinan? ¿Tuku temas lakgati likgalhtawakga? ¿Lakgati tuku xla cientificos, xla política o xla takgaman? ¿Tuku tlan naktlawa xlakata nakatsiputun tuku xalak Biblia pero chuntiya nakkuentajtlawa tuku makgkatsi chu tuku lakpuwan?».

Komo champutunaw kxnakujkan kifamiliajkan tiku nina xtatayananin Jehová ni kajwatiya talakaskin tsinu tsinu nakalitachuwinanaw tuku kanajlayaw. Tuku tlawayaw xlimasiyat pi xlikana tuku wanaw.

XATLAN KINTAYATKAN

Jürgen tiku lichuwinanitaw wan: «Katlawa tuku nawana chu chali chali nalilatapaya tastakyaw xalak Biblia. Chuna, kifamiliajkan tiku ni kgalhi kintakanajlakan naʼakxilha tuku xaxlikana, maski ni nawan». Hans, tiku tamunulh puxamakaw kata alistalh nixawa xpuskat na wan: «Xlakaskinka pi lu tlan tayat nakgalhiyaw. Uma natlawa pi kifamiliajkan tiku ni xtatayana Jehová, naʼakxilha pi lu tlan kitaxtu kkilatamatkan akxni katsiniyaw tuku wan Biblia». Kifamiliajkan xliʼakxilhatkan pi maski kintakanajlakan kinkalakgpaliyan, uma ni tlawa pi nitlan nalikatsiyaw, wata tlawa pi tlakg tlan nalikatsiyaw.

Apóstol Pedro kamaxkilh uma lu tlan tastakyaw natalan lakpuskatin tiku ni kstalaninanin Cristo xchixkukan xwankgonit: «Kalakgachixkuwitit minchixkukan; lakimpi [...] minchixkukan nti ni kanajlakgoy xtachuwin Dios, nalitlajakgoyatit [...] ni wa xpalakata mintachuwinkan, wampi xpalakata ntu ntlan milatamatkan [...] akxni naukxilhkgoy akgstitum milatamatkan, chu mpi maxkiyatit nkakni Dios. Wa ntu nalitakaxtayakgoy lakchajan, ni kaj anta kxmakni xlitlawat mpala [nataʼakgkgonkgxa], su [...]nawiliy laksuan xla oro, su xlhakgatkan. Wampi wa ntu makinit kxnakukan ntani nalitasiyu xkakni, wa yuma wa ntu ni katikgalhilh xlisputni, wa cha mpi xapaxuwa, chu wa ntu xlixasmalhwa nawan nchatum; wa yuma wa ntu lhuwa xtapalh kxlakatin Dios» (1 Ped. 3:1-4).

Pedro wa pi puskat, tlan namakanajli xchixku xlakata xtayat. Wa uma tuku tlawama Christa liskujma xlakata nalakgchan kxnaku xchixku lata akxni xtamununita, kkata 1972. Maski makgasa xchixku xkatakgalhtawakga xtatayananin Jehová, nina skujnanima Jehová. Kilanit kmakgapitsi tamakxtumit chu lu tlan katalalin natalan, tiku ni wanikgo tuku natlawa. ¿Tuku tlawa Christa xlakata nalakgchan kxnaku?

Xla wan: «Liwana klakpuwanit naktlawan kxtiji Jehová. Nachuna, kmakanajliputun kinchixku tuku xaxlikana xlakata la klikatsi, ni “wa xpalakata kintachuwin”. Ktlawa tuku naklimakgapaxuwa, komo ni lakatsala xlimapakgsin Dios. Nachuna, ni kwani tuku nalaksaka wata kmakgxtakga kxmakan Jehová».

Tuku titaxtuma Christa masiya pi xlakaskinka wi tuku nalakgpaliyaw komo natalakaskin. Maski xla lu skujnani Jehová, an ktamakxtumit chu lichuwinan Dios, pero na akgatekgsni xchixku. Katsi pi xchixku lakaskin kapaxkika, kakuentajtlawaka chu katatawilaka. Talakaskin nakaʼakgatekgsniyaw kifamiliajkan tiku ni xtatayananin Jehová chu wi tuku nalakgpaliyaw komo natalakaskin. Biblia wan: «Putum tuku tlawaputunkan xlikgalhit xkilhtamaku». Uma na kilhchanima nalimaxtuyaw kilhtamaku xlakata nakatatawilayaw kifamiliajkan tiku ni kgalhikgo kintakanajlakan, chu tlakg chuna natlawayaw komo wa kimpuskatkan o kinchixkukan. Akxni akxtum latatawilakan tlawa pi tlan nalatachuwinankan, chu tuku titaxtukgonit amakgapitsin masiya pi akxni latachuwinankan tlawa pi niti namakgkatsi pi xakstu wi, lakgmakgankan o nalalakgsitsikan (Ecl. 3:1).

CHUNTIYA KALISKUJTI

Holger, tiku xtlat tamunulh puxam kata alistalh nixawa amakgapitsi xalak xfamilia, wan: «Lu xlakaskinka pi kifamiliajkan nakatsi pi paxkiyaw chu kapalakaskiw kkioracionkan». Christa na wan: «Chuntiya naklakpuwan pi kinchixku ama makglhtinan tuku xaxlikana chu natataya Jehová». Putum kilhtamaku nalakpuwanaw tuku tlan xpalakata kifamiliajkan tiku ni xtatayananin Jehová. Chuntiya kaliskujwi.

Tlan katalalimputunaw kifamiliajkan, kamakgtayaputunaw nakatsikgo xaxlikana chu champutunaw kxnakujkan akxni nakalitachuwinanaw tuku wan Biblia. Chu talakaskin pi putum kilhtamaku “lakatitum, chu na takakswan nakakgalhtiyaw” (1 Ped. 3:15).