Komo lakxlamaja tamakgaxtokgat

1, 2. ¿Tukuya takgalhskinin xlitatlawat akxni ktamakgaxtokgat anan taʼakglhuwit?

KATA 1988, chatum puskat xalak Italia wanikan Lucia lu xlipuwan.a Akxni xtitaxtunita akgkaw kata xlakxlamaja xtamakgaxtokgat. Makglhuwa litsakgsalh xlakata xatapaxuwan xtawilaparakgolh pero nitlan xkitaxtuni. Wa xlakata makgxtakgli xchixku xlakata nila latalalilh, chu uma puskat xakstu xʼama kakuentajtlawa chatiy xlaktsuman. Akxni lakapastaka uma kilhtamaku, Lucia wan: «Xakkatsi pi nialh xʼanan tuku xlakgmaxtulh kintamakgaxtokgat».

² Komo kgalhiyaw taʼakglhuwit kkintamakgaxtokgatkan, tlan akgatekgsniyaw Lucia. Max lakpuwanaw komo tlanku nalakkaxla kintamakgaxtokgatkan. Komo chuna, tlan naʼakxilhaw uma takgalhskinin: ¿Kmakgantaxtima xtastakyaw Dios nema masta kBiblia xlakata tamakgaxtokgat tlan natawila? (Salmo 119:105.)

3. Maski lhuwa tiku lakxtlawamakgo xtamakgaxtokgatkan, ¿la makgkatsikgo tiku chuna tlawakgo chu xfamiliajkan?

³ Akxni anan lhuwa taʼakglhuwit ktamakgaxtokgat, max namin kilhtamaku nalakpuwankgo nalamakgxtakga xlakata lakapala nalakkaxla xtaʼakglhuwitkan. Pero, maski klhuwa países tlakg lhuwa tiku lamakgxtakga, tlakg lhuwa tiku lakxtlawakgo xtamakgaxtokgatkan kxlakatin mapakgsinanin, lakchixkuwin chu lakpuskatin tiku lamakgxtakgkgo alistalh nitlan limakgkatsikgo. Tiku chuna tlawakgo tlakg litatatlakgo chu na nitlan tuku katlawani kxtalakapastaknikan nixawa tiku ni lamakgxtakga. Xkamanankan tiku lakxtlawakgo xtamakgaxtokgatkan lhuwa kata ni katsikgo tuku natlawakgo chu ni paxuwakgo. Xnatlatnikan chu xʼamigoskan na patinankgo. ¿Chu tuku tlan nawanaw xlakata la akxilha Dios, tiku malakatsukilh tamakgaxtokgat?

4. ¿La xlitalakkaxtlawat taʼakglhuwit ktamakgaxtokgat?

⁴ La akxilhwi capítulos nema titaxtukgolh, Dios lakkaxwililh tamakgaxtokgat xlakata putum kilhtamaku xtawi (Génesis 2:24). Pero ¿tuku xlakata lamakgxtakga lhuwa tamakgaxtokgat? Ni kaj lakapala lamakgxtakga. Wi tuku kalimasiyani pi nitlan wi xtamakgaxtokgatkan. Laktsina taʼakglhuwit nema anan ktamakgaxtokgat staktilha asta akxni natasiya pi nialh la nalakkaxtlawakan. Pero komo tunkun nalakkaxtlawakan chu natlawakan chuna la wan Biblia, ni katilamakgxtakgkgolh lhuwa tamakgaxtokgat.

TUKU XAXLIKANA XLAKATA TAMAKGAXTOKGAT

5. ¿Tuku liwana xlikatsitkan tiku tamakgaxtokgkgo?

⁵ Pulaktum nema min kilhtamaku limin taʼakglhuwit wa pi tiku tamakgaxtokgkgonit kgalhkgalhimakgo tuku nila katikgantaxtulh. Novelas nema lichuwinan tapaxkit, revistas nema lu lakgapaskgokan, tuku taxtu ktelevisión chu películas tlawa pi nakgalhkgalhikgo ktamakgaxtokgat tuku nila katikgantaxtulh. Akxni ni kgantaxtu, max namakgkatsikgo pi kaj taʼakgskgawikgolh, ni katipaxuwakgolh chu asta nalilipuwankgo. Wa xlakata, ¿la tlan chatiy tiku makglakgalhinanin napaxuwakgo kxtamakgaxtokgatkan? Talakaskin lu naliskujkgo xlakata xatapaxuwan natawilakgo.

6. 1) ¿Tuku lakatanks wan Biblia xlakata tamakgaxtokgat? 2) ¿Tuku limin taʼakglhuwit ktamakgaxtokgat?

⁶ Biblia lu makgtayanan. Lichuwinan pi tamakgaxtokgat limin tapaxuwan pero na kawani tiku tamakgaxtokgkgo «ntapatin nakgalhikgoy xchatuykan» (1 Corintios 7:28). Chuna la katsiyawa, xchatiykan lakgalhinanin chu max namin kilhtamaku natlawakgo tuku nitlan. Tanu tanu la lakpuwankgo, la makgkatsikgo chu la kamakgastakka. Tiku tamakgaxtokgkgonit min kilhtamaku likgalhikgo taʼakglhuwit xlakata tumin, kamanan chu xlakata xfamiliajkan tiku tamakgaxtokgkgo. Tuku na limin taʼakglhuwit wa xlakata ni lu kgalhikgo kilhtamaku wi tuku akxtum natlawakgo chu taʼakglhuwit xlakata talakgxtumit.b Lin lhuwa kilhtamaku nalakkaxtlawakan uma pero ni nataxlajwanikgo. Lhuwa tamakgaxtokgat tlan lakkaxtlawakgo putum taʼakglhuwit nema kgalhikgo.

XLITALAKKAXTLAWAT TAʼAKGLHUWIT

7, 8. Komo wi tuku lalimakgasitsi ktamakgaxtokgat, ¿tuku wan Biblia xlakata la xlitalakkaxtlawat?

⁷ Lhuwa lu tuwa makgkatsikgo ni nasitsikgo akxni wankgo pi nitlan kamamakgkatsinika, xlakata tuku ni liwana laʼakgatekgsnilh o tuku nitlan tlawa achatum. Nila lakatanks wankgo: «Akit klakpuwan pi ni kiʼakgatekgsniya», wata kaj sitsikgo chu malankikgo taʼakglhuwit. Lhuwa wankgo: «Kaj tlawaya tuku wix lakgatiya», o «Ni kimpaxkiya». Max xachixku o xapuskat ni katikgalhtinalh xlakata ni naʼanan taʼakglhuwit.

⁸ Tlakg tlan nakitaxtu natlawakan tuku Biblia wan: «Maski nasitsiyatit, wampi ni tililakgalhinanatit. Ni natsankgay nchichini lantla nkgalhiyatitku mintasitsinkan» (Efesios 4:26). Akgtum tamakgaxtokgat tiku tutupuxam kata xmakgatsima lata xtamakgaxtokgkgonit chu lu xpaxuwakgo kakgalhskinka tuku kamakgtayalh xlakata chuna xtawi xtamakgaxtokgat. Xachixku wa: «Klismaniw ni naklhtatayaw komo ni klakaxtlawaw kintaʼakglhuwitkan, maski ni laklanka taʼakglhuwit».

9. 1) ¿Tuku lu xlakaskinka lichuwinan Biblia xlakata la latachuwinankan? 2) ¿Tuku lu talakaskin natlawayaw tiku tamakgaxtokgnitaw, maski namakgkatsiyaw pi tuwa chu nataktujuyaw?

⁹ Akxni tiku tamakgaxtokgkgonit ni akxtum lakpuwankgo, chatunu chatunu “pulana liwana nalakgaxmatnikgo, pero ni lu lakapala nachuwinankgo chu ni lu lakapala nasitsikgo” (Santiago 1:19). Akxni liwana nalakgaxmatni, max xchatiykan nalakpuwankgo pi talakaskin nalaskini kalatapatilh (Santiago 5:16). Akxni wanaw: «Kintapati nichuna xaktlawaputun» talakaskin nataktujuyaw chu na lu tuwa chuna natlawayaw. Pero akxni chuna tlawayaw ni kaj namakgtayanan nalakkaxwiliyaw taʼakglhuwit wata na namakgtayanan tlan nalatalalinaw chu naʼanan tapaxuwan.

TALAKGXTUMIT

10. ¿Tuku kawanilh Pablo corintios pi xtlawakgolh nema na tlan natlawa kstalanina Cristo xala uku?

¹⁰ Akxni apóstol Pablo katsokgnanilh corintios, kawanilh pi xtamakgaxtokgkgolh, «xpalakata mpi lhuwa anan ntamakwan» o talakgxtumit nema ni xlitatlawat (1 Corintios 7:2). Kakilhtamaku lu nitlan wi chuna la xamakgan Corinto, o asta tlakg nitlan la wi. Tiku xalak kakilhtamaku ni limaxanankgo akxni lichuwinankgo talakgxtumit nema ni xlitatlawat, lu nitlan la lhakganankgo, tuku nitlan lichuwinankgo revistas, libros, televisión chu películas putum uma tlawa pi latamanin natlawaputunkgo talakgxtumit nema ni xlitatlawat. Pablo kawanilh corintios tiku nachuna xtitaxtumakgolh: «Xampi xaliwaka ntlan natapuchuwakgoy, ni xawa wa ntaji naʼakchichixwanankgoy» (1 Corintios 7:9).

11, 12. 1) ¿Tuku nalamaxki tiku tamakgaxtokgnit chu la xlitlawatkan? 2) ¿Tuku xlitatlawat komo natalakaskin pi kaj tsinu kilhtamaku ni nalatatalakgxtumi?

¹¹ Wa xlakata Biblia kawani kstalaninanin Cristo tiku tamakgaxtokgkgonit: «Wa xchixku mpuskat wa xlitlawat wa lantla xtapakgsit, o lakgchan, chu na chuna mpuskat, na wa xlitlawanit xchixku» (1 Corintios 7:3). Uma tachuwin limasiya pi talakaskin namastakan chu ni xafuerza naskinkan. Lipaxuwakan talakgxtumit ktamakgaxtokgat kaj akxni chatunu chatunu putsa la namakgapaxuwa tiku tamakgaxtokga. Kawiliw akgtum liʼakxilhtit, Biblia kawani lakchixkuwin pi «wa lantla xlilat lakatitum natatawilakgoyatit» milakpuskatinkan o nakalakgapasatit (1 Pedro 3:7). Chu uma chuna kitaxtu akxni latatalakgxtumikgo. Komo nitlan nalikatsini xpuskat max ni katilipaxuwakgolh talakgxtumit.

¹² Namin kilhtamaku akxni tiku tamakgaxtokgkgonit ni natalakgxtumikgo. Akgtum liʼakxilhtit, la akxni makgapitsi kilhtamaku xla papaʼ o akxni lu tlakgwanit o akgxuninit xapuskat (katamalakxtupi Levítico 18:19). Chu xlakata chixku, max akxni kgalhi akgtum lanka taʼakglhuwit kxputaskujut o akxni lu tlakgwanit. Komo natalakaskin ni lhuwa kilhtamaku ni natalakgxtumikgo, tlakg tlan komo xchatiykan lakatanks nalatachuwinan chu “akxtum nalalikatsinikgo mpala tu kilhtamaku” (1 Corintios 7:5). Chu xchatiykan ni atanu tuku nalakpuwankgo. Pero komo xapuskat ni natatalakgxtumiputun xchixku o ni lipaxuwa, max natatalakgxtumiputun atanu. Akxni chuna la ktamakgaxtokgat lakatsuku lhuwa taʼakglhuwit.

13. ¿La natlawakgo kstalaninanin Cristo xlakata xaskulunku natawila xtalakapastaknikan?

¹³ Chuna la putum kstalaninanin Cristo, xlakskujnin Dios tiku tamakgaxtokgkgonit ni xliʼakxilhatkan tiku ni lhakganankgonit, xlakata uma nalimin xalixkajni talakapastakni chu tuku ni xlilat (Colosenses 3:5). Na talakaskin kuenta natlawa xtalakapastakni chu tuku tlawa akxni katalalin tiku ni xchixku o ni xpuskat. Jesús makatsininalh: «Wanti maski kaj naʼukxilha chatum puskat, chu xla napuwan pi tunkan xla xtlawalh, pus tama chixku aya tlawanit talakgalhin kxnaku» (Mateo 5:28). Komo natlawakgo tuku wan Biblia xlakata talakgxtumit tiku tamakgaxtokgkgonit ni katitlawakgolh talakgalhin. Wata tlan nalipaxuwakgo talakgxtumit nema kamaxkinit Jehová, tiku malakatsukilh tamakgaxtokgat (Proverbios 5:15-19).

TUKU BIBLIA WAN NEMA TLAN NALILAKXTLAWAKAN TAMAKGAXTOKGAT

14. Min kilhtamaku, ¿tuku lu nitlan kitaxtu? ¿Tuku xlakata?

¹⁴ Lhuwa tamakgaxtokgat tiku kstalaninanin Cristo tlan lakkaxtlawakgo taʼakglhuwit nema kgalhikgo. Pero, min kilhtamaku nila lakkaxtlawakgo. Xlakata latamanin makglakgalhinanin chu lamakgolh kkakilhtamaku niku tlawakan talakgalhin nema akgchipanit Satanás, makgapitsi tamakgaxtokgat asta lamakgxtakga (1 Juan 5:19). ¿La tlan natlawakgo kstalaninanin Cristo xlakata tlan natayanikgo tuku nitlan anan?

15. 1) ¿Tuku wan Biblia pi kajwatiya tlan nalilakxtlawakan tamakgaxtokgat chu tlan natamakgaxtokgparakan? 2) ¿Tuku xlakata makgapitsi ni lakxtlawakgo xtamakgaxtokgatkan maski kaʼakgskgawilh tiku tamakgaxtokgkgo?

¹⁵ Chuna la talichuwinalh kcapítulo 2 xla uma libro, Biblia wan pi kajwatiya akxni wi tiku tlawa talakgxtumit nema ni xlitatlawat tlan lakxtlawakan tamakgaxtokgat xlakata natatamakgaxtokgparakan atanu (Mateo 19:9).c Komo liwana katsiyaw pi tiku tamakgaxtokgaw tatalakgxtumilh atanu, lu tuwa tuku kililaksakatkan natlawayaw. ¿Nalakxtlawayaw kintamakgaxtokgatkan o ni katilakxtlawaw? Ni anan akgtum limapakgsin xlakata tuku tlan natlawayaw. Makgapitsi kstalaninanin Cristo tapatikgonit tiku tamakgaxtokgkgo, xlakata xlikana nitlan limakgkatsi tuku tlawalh chu tlan tawilaparakgolh kxtamakgaxtokgatkan. Amakgapitsi ni lakxtlawakgonit xtamakgaxtokgatkan xlakata kgalhikgo xkamanankan.

16. 1) ¿Tuku xlakata makgapitsi lakxtlawakgo xtamakgaxtokgatkan akxni tiku tamakgaxtokgkgo akgskgawilh? 2) Akxni tiku akgskgawika nalaksaka komo nalakxtlawa o ni nalakxtlawa xtamakgaxtokgat, ¿tuku xlakata niti naliwani tuku tlawama?

¹⁶ Nachuna, uma talakgalhin max natlawa pi nakgalhi kskgata o napasa akgtum tajatat nema pasanan akxni talakgxtumikan. O max nakakuentajtlawakan kamanan xlakata xtlatkan kalekgamanan. Pulaklhuwa tuku xlitaʼakxilhat akxni wi tuku nalaksaka chuna natlawa. Pero komo natatalakgxtumi tiku tamakgaxtokga maski katsi pi tatalakgxtumilh atanu, limasiyama pi tapatilh chu ni lakxtlawaputun xtamakgaxtokgat. Nialhla katilakxtlawalh xtamakgaxtokgat chuna la wan Biblia xlakata tlan atanu tiku natatamakgaxtokga. Niti xlimakgtanut chu niti wani tuku natlawa tiku akgskgawika, chu na niti naliwani tuku laksakli natlawa. Tiku akgskgawinalh xlipatit tuku nitlan nakitaxtuni. «Xampi chatunu nkin, nkinkatapakgsiniyan [nalinaw] wantu luwa kintakukakan.» (Gálatas 6:5.)

TUKU TLAN LALIMAKGXTAKGKAN

17. Komo niti tatalakgxtumima achatum, ¿tuku wan Biblia pi nila katitlawakgolh tiku lamakgxtakga o lakxtlawakgo xtamakgaxtokgatkan?

¹⁷ ¿Wi tuku tlan nalalimakgxtakgkan o nalilakxtlawakan tamakgaxtokgat maski ni natatalakgxtumi atanu? Wi, pero kstalanina Cristo nila katitatamakgaxtokgli atanu (Mateo 5:32). Biblia masta talakaskin nalamakgxtakgkan pero wan pi tiku nalamakgxtakga «nialh natamakgstaparay, su kalakgampa xchixku» o xpuskat (1 Corintios 7:11). ¿Tuku lu nitlan anan nema tlan nalalimakgxtakgkan?

18, 19. ¿Tukuya taʼakglhuwit nakgalhi xapuskat nema namalakpuwani pi namakgxtakga xchixku kxlakatin mapakgsinanin o nalakxtlawa xtamakgaxtokgat maski nila natamakgaxtokgpara?

¹⁸ Max familia ni katikgalhikgolh tuku namaklakaskinkgo xlakata xachixku xalhkitit chu kgalhi nitlan talismanin.d Max xachixku nalilaktlawa xtumin familia ktakgaman, kuchu o drogas. Biblia wan: «Lapi winti ni kuintaj tlaway [...], wanti xala kxchik, kaj likgamananit xtakanajla, na tlakg xaliwaka nitlan xtayat, ni xawa ntini kanajlay» (1 Timoteo 5:8). Komo tiku chuna tlawa ni talakgpaliputun chu asta max lakgatiya xtumin xpuskat xlakata nalixokgo tuku smanipasanit, xapuskat tlan nalaksaka namakgxtakga kxlakatin mapakgsinanin xlakata tlan natawila chu nachuna xkamanan.

¹⁹ Tlan nalamakgxtakgkan xlakatin mapakgsinanin akxni xachixku lipekua nika xpuskat asta max namakgatatatla o kalipekua natawila xlatamat. Nachuna, komo putum kilhtamaku xafuerza tlawa xchixku nalakatsala xlimapakgsin Dios, na tlan nalakpuwan namakgxtakga xchixku, tlakg chuna xlitlawat komo kalipekua natawila xtakanajla. Max tiku lixkajni likatsinikan nalakpuwan pi xlakata “pulh wa nakgalhakgaxmata Dios, ni xawa nchixkuwin” natalakaskin namakgxtakga kxlakatin mapakgsinanin (Hechos 5:29).

20. 1) Komo wi tiku nalakxtlawa xtamakgaxtokgat, ¿tuku tlan natlawakgo natalan tiku tliwakga wi xtakanajlakan chu lakgkgolotsin, chu tuku ni xlitlawatkan? 2) ¿Tuku xlakata tiku tamakgaxtokgkgonit ni xlimaklakaskinatkan tuku wan Biblia xlakata nalamakgxtakgkgo o nalakxtlawakgo xtamakgaxtokgatkan?

²⁰ Akxni wi tiku lixkajni likatsinikan, niti nawani pi kamakgxtakgli tiku tamakgaxtokga o ni kamakgxtakgli. Natalan tiku tliwakga wi xtakanajlakan o lakgkgolotsin tlan namakgtayakgo o nalistakyawakgo Biblia, pero xlakan ni katsikgo la wi xtamakgaxtokgat. Kajwatiya Jehová tiku katsi. Xlikana, komo chatum puskat tiku kstalanina Cristo kaj tsinu tuku nalilakxtlawaputun xtamakgaxtokgat, ni limasiyama pi xlakaskinka akxilha tuku lakkaxwilinit Jehová. Pero komo chuntiya lu lixkajni nalikatsinikan, niti naliwani komo namakgxtakga xchixku. Nachuna kilitlawatkan akxni xachixku tiku kstalanina Cristo namakgxtakga xpuskat. «Paks nkin natamakamastayaw kxlakatin [Dios] mpi nakinkaputsananiyan.» (Romanos 14:10.)

LA TALAKKAXTLAWALH AKGTUM TAMAKGAXTOKGAT

21. ¿Tuku liʼakxilhtit limasiya pi xtastakyaw Biblia kamakgtaya tamakgaxtokgat?

²¹ Lucia tiku lichuwinaw xapulana, akxni akgtututa papaʼ xmakgxtakgnit xchixku, kaputsalh xtatayananin Jehová chu tsukulh katalikgalhtawakga Biblia. Xla wan: «Lu kaks klilakawa xlakata Biblia kimasiyanilh la xaklakkaxtlawalh kintaʼakglhuwit. Akxni kajku akgtum semana xakkgalhtawakgama, klakpuwa pi tunkun naklakgtaspitpara kinchixku. La uku tlan kwan pi Jehová katsi la kalakgmaxtu tamakgaxtokgat nema kgalhikgo taʼakglhuwit, xlakata tuku masiya kamakgtaya tiku tamakgaxtokgkgonit xlakata lu xlakaskinka nalaʼakxilha. Ni xlikana tuku wankgo makgapitsin, pi xtatayananin Jehová kamapitsikgo familias. Akit wata kimakgtayakgolh». Lucia katsinilh la namakgantaxti tastakyaw xalak Biblia kxlatamat.

22. ¿Tuku tlan nalipawankgo putum tiku tamakgaxtokgkgonit?

²² Pero ni kajwatiya Lucia makgtayanit tuku wan Biblia. Tamakgaxtokgat akgtum tasikulunalin xliwanat chu ni akgtum takuka. Wa xlakata Jehová mastanit tuku tlakg xatlan niku natekgsaw tastakyaw xlakata tamakgaxtokgat: wa tuku tlakg xlakaskinka, xTachuwin. Biblia wan, «maskgalali chatum ti nitu katsij» (Salmo 19:7-11). Kalakgmaxtunit lhuwa tamakgaxtokgat tiku atsinu xtsankga xlakata xlamakgxtakgli chu kamakgtayanit lhuwa tiku xkgalhikgo laklanka taʼakglhuwit. Putum tamakgaxtokgat xlikana kalipawankgolh tastakyaw nema Jehová Dios masta. Uma makgtayanan.