3. 1) ¿La akxilhli chu tuku tlawalh Jesús xlakata política? 2) ¿Tuku xlakata Biblia kawani palakachuwinanin kstalaninanin Jesús nema kalaksakkanit? (Na kalichuwinanti tuku wan nota.)

³ Akxni Jesús xlama kkatiyatni ni makgtanulh kpolítica, wata lichuwinalh xTamapakgsin Dios, tamapakgsin nema xʼama tawila kʼakgapun chu Jesús mapakgsina xʼama wan (Daniel 7:13, 14; Lucas 4:43; 17:20, 21). Wa xlakata tlan wanilh mapakgsina Poncio Pilato: «Wa kinTamapakgsin ni xala uma kakilhtamaku» (Juan 18:36, TNM). Akinin kstalaninanin Cristo tiku ni makgatsankgananiyaw Jesús, nachuna tlawayaw. ¿La tlawayaw? Akxni ni makgxtakgaw xTamapakgsin Dios chu xmapakgsina Jesucristo chu lichuwinanaw uma tamapakgsin xlikalanka katiyatni (Mateo 24:14). Apóstol Pablo tsokgli: «Xpalakachuwinanin nCristo liwanitaw, [...]. Kkaliskiniyan litlan kxtukuwini nCristo mpi katalakatsuwinitit Dios» (2 Corintios 5:20).a

4. ¿La limasiyakgonit xaxlikana kstalaninanin Cristo pi ni makgxtakgkgo xTamapakgsin Dios? (Kaʼakxilhti recuadro «Xapulana kstalaninanin Cristo ni xmakgtanukgo kkakilhtamaku».)

⁴ Min kilhtamaku chatum mapakgsina malakgacha kʼalakatanu kachikin chatum tiku napalakachuwinan o napalakachuwinan xkachikin. Xlakan nimakgtanukgo kxtaʼakglhuwitkan kachikin niku kamalakgachakan. Pero, palakachuwinankgo tuku lakaskin xmapakgsina tiku kamalakgachalh o xkachikinkan. Kstalaninanin Cristo “tiku tapakgsikgo kʼakgapun” nachuna tlawakgo (Filipenses 3:20). Uma palakachuwinanin tiku lu lichuwinamakgolh xTamapakgsin Dios, kalimakgtayamakgolh natalakatsuwinikgo Dios lhuwa millones tiku kawanikan «amakgapitsi borregos» xla Cristo (Juan 10:16; Mateo 25:31-40). Xnatalan Jesús tiku kalaksakkanit, kapulalinkgo kstalaninanin tiku kawanikan «amakgapitsi borregos» chu umakgolh litaxtukgo la tiku kamalakgachanit Cristo. Uma pulaktiy akxtum lakgo chu lichuwinankgo xTamapakgsin Jesús chu nipara tsinu makgtanukgo kpolítica xla kakilhtamaku (kalikgalhtawakga Isaías 2:2-4).