¿La nalakkaxwiliya xlakata natamunuya?

1, 2. 1) ¿Tuku xlakata tlan nawana pi tamunukan ni kaj takgaman? 2) ¿Tuku liwana milikatsit akxni nina tamunuya?

¿WIX kgawasaku chu tamunuputuna? Tamunukan wa tlakg tlan talakgalhaman nema kgalhikan. Chuna la akxilhwi kʼartículo nema titaxtulha, tamunukan ni kaj takgaman. Akxni natamunuya, kalimasiyaniya amakgapitsin pi makamastanipat milatamat Jehová. Uma wamputun, limasiyanipat pi waninita Dios pi putum kilhtamaku naskujnaniya chu uma tlakg xlakaskinka naʼakxilha kmilatamat. Uma tamalaknun lu xlakaskinka, akxni nina tamunuya liwana milikatsit pi tliwakga wi mintakanajla, chu xlakata wix chuna tlawaputuna natamunuya chu liwana nakatsiya tuku kilhchanima natamakamastaniya Dios.

² ¿Makgkatsiya pi tlantiya natamunuya? Max nalakpuwana pi nina. O max wix makgkatsiya pi tlantiya natamunuya, pero minatlatni nawanikgoyan pi talakaskin pi tlakg nakgalhiya kata chu tlakg milikatsit. Ni kalitaxlajwani. Kaliskujti xlakata tlan chuna ni makgas tlan natamunuya. Kʼuma artículo namakgtayayan pulaktutu tuku tlan natlawaya. Pulana, xlakata tuku kanajlaya. Xliʼakgtiy, xlakata tuku tlawaya. Chu xliʼakgtutu tuku wix makgkatsiya xlakata Jehová.

WANTUKU KANAJLAYA

3, 4. ¿Tuku tlan nakatsinikgo kamanan xlakata Timoteo?

³ Katlawanika umakgolh takgalhskinin: «¿Tuku xlakata kkanajla pi wi Dios? ¿Liwana kkatsi pi Biblia wa xtachuwin Dios? ¿Tuku xlakata kgalhakgaxmata xlimapakgsin Dios chu ni wa xlimapakgsin kakilhtamaku?». Natlawanikana uma takgalhskinin namakgtayayan natlawaya uma xtastakyaw nema apóstol Pablo wa: «Chuna naliʼakgatakgsatit xanima xatlan, chu lilakgatit, chu xalakatanks xtalakaskin Dios» (Rom. 12:2). Uma tachuwin wamputun pi wix milikatsit pi lu tlan nakitaxtuniyan natlawaya tuku wan Dios. ¿Tuku xlakata milikatsit?

⁴ Kalilakpuwanti xliʼakxilhtit akxni kgawasaku xwanit Timoteo. Xla liwana xlakgapasa xtamasiy Biblia xlakata xtse chu xnana xmasiyanikgonit. Pero Pablo wa: «Wampi tliwakglh katapini yuma ntu nkatsininita, chu na lu[...] lakatanks kanajlanita» (2 Tim. 3:14, 15). Akxni Pablo wa pi Timoteo «lakatanks kanajlanit», tachuwin nema maklakaskilh na kilhchani pi Timoteo liwana xkanajla pi xtachuwin Dios xaxlikana. Pero ¿tuku xlakata chuna xkanajla? ¿Kaj xlakata tuku xtse chu xnana wanikgonit xlakata xaxlikana? Ni. Wa xlakata limaklakaskilh xtalakapastakni. Uma kilhchanima, pi Timoteo xakstu lakapastakli tuku xkatsininit chu liwana xkatsi pi xaxlikana (kalikgalhtawakga Romanos 12:1). Kamanan lhuwa tuku tlan nakatsinikgo xlakata Timoteo.

5, 6. ¿Tuku xlakata xlakaskinka milikatsinit maklakaskina la uku mintapuwan chu mintalakapastakni?

⁵ Max nachuna wix makgasata katsini tuku masiya Biblia. Komo chuna, katlawa la Timoteo chu kalakpuwanti tuku xlakata chuna kanajlaya. Akxni liwana nakatsiya tuku xlakata kanajlaya, tlakg tliwakga natawila mintakanajla. Nachuna, namakgtayayan xlakata ni namatlawikgoyan tuku nitlan mincompañeros, tuku wi kakilhtamaku chu xlakata tuku makgkatsiya.

⁶ Lu xlakaskinka pi milikatsit la nalimaklakaskina mintalakapastakni, uma wamputun mi akstu nalakapastaka. ¿Tuku xlakata? Xlakata tlan nakakgalhtiya xtakgalhskininkan mincompañeros, la uma: «¿Tuku xlakata liwana katsiya pi wi Dios? Komo Dios tapaxkit, ¿tuku xlakata mastama talakaskin pi kaʼanalh tuku nitlan? Komo Dios putum tlawalh, ¿tiku tlawalh Dios?». Akxni nakatsiya liwana nalimaklakaskina mintalakapastakni, uma takgalhskinin ni katitlawalh pi naxlajwanan tuku kanajlaya. Wata natlawa pi tlakg nalikgalhtawakgaputuna Biblia.

7-9. Kalichuwinanti la tlan namakgtayayan namatliwakglha mintakanajla guías de estudio ¿Qué enseña realmente la Biblia?

⁷ Komo liwana nalikgalhtawakgaya Biblia, tlan nakgalhtinana takgalhskinin, nakatsiya tuku ni xkatsiya chu liwana kakatsi tuku kanajlaya (Hech. 17:11). Xtatayananin Jehová kgalhiyaw tipalhuwa likgalhtawakga nema tlan namakgtayakgoyan nakatsiya xlakata uma. Akgtum liʼakxilhtit, lhuwa kamanan litamakgtayakgonit folleto El origen de la vida chu libro ¿Existe un Creador que se interese por nosotros? Lhuwa nachuna kamakgtayanit sección xla jw.org ¿Qué enseña realmente la Biblia? Uma anta wi ksección ENSEÑANZAS BÍBLICAS > JÓVENES. Uma makgtaya tlakg naʼakgatekgsa tipalhuwa tuku masiya Biblia.

⁸ Xlakata likgalhtawakgaya Biblia, max katsiya xtakgalhtin makgapitsi takgalhskinin nema wilakgolh klikgalhtawakga. Pero ¿liwana kanajlaya umakgolh takgalhtin? Likgalhtawakga namakgtayakgoyan xlakata nalakapastaka textos xalak Biblia chu makgpuwantinikgoyan natsokga tuku wix kanajlaya. Na namakgtayayan liwana nalakapastaka la tlan nakamaʼakgatekgsniya latamanin. Komo kgalhiya umakgolh likgalhtawakga, tlan liwana nalimaklakaskina akxni nakgalhtawakgaya chu xlakata namatliwakglha tuku katsininita kBiblia.

⁹ Lu xlakaskinka pi liwana nakanajlaya pi putum tuku katsinita kBiblia xlikana. Uma namakgtayayan xlakata tlan natamunuya. Chatum tsumat xtatayana Jehová wa: «Akxni nina xaklakkaxwilinit naktamunu, makglhuwa klikgalhtawakgalh Biblia asta akxni kkanajlalh pi wa uma xaxlikana takanajla». Xla wan pi lata titaxtutilha kilhtamaku tlakg chuna kanajla.

TUKU TLAWAYA

10. ¿Tuku xlakata xlakaskinka pi xtatayana Jehová tiku tamununita nalimasiya pi kgalhi takanajla akxni wi tuku natlawa?

¹⁰ Biblia wan pi «ntakanajla, lapi ni xkgalhilh lakwan xtatlaw, ni tu xlakgasi» (Sant. 2:17). Wa xlakata, komo kgalhiya takanajla chu liwana katsiya tuku kanajlaya, nalimasiyaya xlakata tuku natlawaya. Natlawaya chuna la wan Biblia «wa lantla xasantujlani mililatamatkan nakgalhiyatit, chu xkakninanin Dios nawanatit» (kalikgalhtawakga 2 Pedro 3:11).

11. ¿Tuku wamputun tachuwin «xasantujlani mililatamatkan nakgalhiyatit»?

¹¹ ¿Tuku wamputun «xasantujlani mililatamatkan nakgalhiyatit»? Uma wamputun pi xaʼakgstitum nalinaw kilatamatkan. Akgtum liʼakxilhtit, kalilakpuwanti tuku tlawanita uma akgchaxan papaʼ nema titaxtulh. Akxni xtlawaputuna tuku nitlan, ¿katsi tuku tlan chu tuku nitlan? (Heb. 5:14). ¿Lakapastaka akxni tayani tuku nitlan xtlawaputuna o akxni atanu kamanan xmatlawiputunkgoyan tuku ni tlan? ¿Tlan liʼakxilhtit litaxtuya kʼescuela? ¿Tlawaya tuku wan Jehová, o tlawayaw tuku wanikgoyan mincompañeros xlakata ni nalikgalhkgamanankgoyan? (1 Ped. 4:3, 4). Xlikana, putum kgalhiyaw talakgalhin. Asta tiku linkgoya kata skujnanimakgolh Dios min kilhtamaku limaxanankgo nawankgo pi xtatayananin Jehová. Pero tiku makamastanikgonit xlatamatkan Dios ni namaxanankgo akxni nawakgo pi xtatayananin Jehová chu nalimasiyakgo akxni akgstitum nalinkgo xlatamatkan.

12. 1) ¿Tuku kilitlawatkan xlakata nalimasiyayaw pi kakninaniyaw Dios? 2) ¿La miliʼakxilhat umakgolh?

¹² ¿Tuku wamputun «xkakninanin Dios nawanatit»? Wa tuku tlawaya kmincongregación, la akxni pina ktamakxtumit chu pina lichuwinana Dios. Pero nachuna tuku miʼakstu tlawaya, chuna la natlawaniya oración Jehová chu nalikgalhtawakgayaw Biblia. Tiku makamaxki xlatamat Jehová xatapaxuwan tlawa chu ni la akgtum taskujut liʼakxilha. Makgkatsiya la mapakgsina David, tiku wa: «Oh Dios, akit snun klakgati ktlawa tu wix lakgatiya» (Sal. 40:8, SXP).

13, 14. 1) ¿Tuku namakgtayayan nalimasiyaya pi kakninaniya Dios? 2) ¿La kamakgtayanit uma makgapitsi kamanan?

¹³ Xlakata tlan nalimasiyaya pi «xkakninanin[a] Dios» litaxtuya, tlan nalilakpuwana makgapitsi takgalhskinin nema namakgtayayan. La umakgolh: «¿Wana tuku maklakaskina akxni tlawaya oración? ¿Litasiya xlakata tuku wana pi paxkiya Jehová?». «¿Tuku akxilha akxni miʼakstu kgalhtawakgaya?». «¿Pina lichuwinana Dios maski minatlatni ni ankgo?». Katsokgwili takgalhtin nema maxki umakgolh takgalhskinin. Uma namakgtayayan nalakkaxwiliya tuku tlawaputuna xlakata tlakg tlan natlawaya mioración, akxni miʼakstu nalikgalhtawakgaya Biblia chu la lichuwinana Dios.

¹⁴ Lhuwa kamanan tiku tamunuputunkgo wankgo pi natsokgwilikgo uma lu kamakgtayanit. Chatum xtatayana Jehová tiku tsumatku nema wanikan Tilda wan pi akxni tsokgwililh xtakgalhtin umakgolh takgalhskinin lu makgtayalh xlakata nalakkaxwili tuku natlawa. Xla wan: «Tsinu tsinu kmakgantaxtilh chu akxni xtitaxtunita akgtum kata tlan ktamunulh». Chatum xtatayana Jehová nema wanikan Patrick nachuna wan: «Akit xaklakkaxwilinita makgapitsi tuku xaktlawaputun, pero akxni ktsokgwililh kimakgtayalh xakliskujli xlakata xakmakgantaxtilh».

15. ¿Tuku xlakata kaj wix tlan nalaksaka komo namakamaxkiya Jehová milatamat?

¹⁵ Akgtum lu xlakaskinka takgalhskinin wa uma: «Komo minatlatni o miʼamigos xmakgxtakgkgolh takanajla, ¿chuntiyaku naskujnaniya Jehová?». Kalakapastakti pi niti katimafuerzajnin naskujnaniya Jehová. Akxni namakamaxkiya milatamat Jehová chu natamunuya, natalalipina Jehová chu natalakkaxlaya xlakata tuku natlawaya. Wa xlakata tuku wix natlawaya xpalakata Jehová ni wa tuku nawanikgoyan minatlatni o atanu latamanin. Komo la uku xasanto lipina milatamat, nalimasiyaya pi kanajlaya uma xaxlikana takanajla chu kgalhakgaxpata xlimapakgsin Dios. Komo chuna, ni makgas kilhtamaku natitaxtu tlan natamunuya.

TUKU MAKGKATSIYA XPALAKATA JEHOVÁ

16, 17. 1) ¿Tuku xlakata wi tiku natamunu chu kstalanina Cristo nalitaxtu? 2) ¿Tuku namakgtayayan tlakg xtapalh naʼakxilha talakgmaxtut? Kalichuwinanti akgtum liʼakxilhtit.

¹⁶ Akgtum kilhtamaku, chatum chixku tiku liwana xlakgapasa xlimapakgsin Moisés kgalhskilh Jesús tuku limapakgsin tlakg xlakaskinka xwanit. Jesús wanilh pi wa uma: «Milipaxkit Jehová miDios xliputum minaku chu xliputum milatamat chu xliputum mintalakapastakni» (Mat. 22:35-37, TNM). Chuna la akxilhaw, komo wi tiku tamunuputun chu kstalanina Cristo litaxtuputun, natamunu komo xlikana paxki Jehová. ¿Tuku tlan natlawaya xlakata tlakg napaxkiya Jehová? Pulaktum tuku lu makgtayanan wa nalilakpuwanaw xlakata xtalakgmaxtut Jesús (kalikgalhtawakga 2 Corintios 5:14, 15 chu 1 Juan 4:9, 19). Komo nalimaxtuya kilhtamaku nalilakpuwana uma lu xlakaskinka tamaskiwin nema Dios maxkinitan, tlakg lhuwa xtapalh naliʼakxilha.

¹⁷ Kalilakpuwanti uma liʼakxilhtit. Jikswapat chu wi tiku lakgmaxtuyan. ¿Tuku xtlawa? ¿Xpit kminchik, xlakgpalinanti chu ni xpaxtikatsini tiku lakgmaxtun? Ni chuna xtlawa. Max, putum milatamat xpaxtikatsini. Nachuna, xlakata talakgalhin chu linin xtachuna la putum akinin jikswamaw. Pero Jehová chu Jesús kinkalakgmaxtun xlakata lu kinkapaxkikgoyan. ¡Kinkalakgmaxtukgon! Xpalakata xlakan kgalhiyaw takgalhkgalhin pi tlan nalatamayaw xliputum kilhtamaku kparaíso unu kKatiyatni. ¿Ni xlikana pi lu kilipaxtikatsinitkan?

18, 19. 1) ¿Tuku xlakata ni milipekuanat namakamaxkiya milatamat Jehová? 2) ¿Tuku xlakata tlakg tlan natawila milatamat komo nalakpuwana naskujnaniya Jehová?

¹⁸ ¿Paxtikatsiniya Jehová tuku tlawanit mimpalakata? Komo chuna, tuku tlakg tlan natlawaya wa namakamaxkiya milatamat Jehová chu natamunuya. Wix katsiya, pi natamakamastaniya Dios kilhchanima pi putum kilhtamaku natlawaya tuku xla lakaskin. Pero ni milipekuanat xlakata namalaknuniya uma. ¿Tuku xlakata? Xlakata Jehová lakaskin lu tlan natawilayaw chu wanit pi nakasikulunatlawa tiku kgalhakgaxmatkgo (Heb. 11:6). Akxni namakamaxkiya milatamat Jehová chu natamunuya, milatamat ni tlakg tuwa nawan, ¡wata tlakg tlan nawan! Chatum xtatayana Jehová tiku kgalhi 24 kata chu tamunulh akxni nina kstakkgo wan: «Komo xaktikgalhkgalhilh makgapitsi kata, tlakg liwana xakʼakgatekgsli tuku xaktlawama. Pero xlakata ktamunulh kimakgtayalh ni naktlawa tuku nitlan anan kkakilhtamaku».

¹⁹ Chuna la lichuwinaw, Jehová lakaskin pi lu tlan kakitaxtunin. Pero Satanás nitu liʼakxilhan, xlakata kaj xakstu paxkikan. Komo natlawaya tuku xla lakaskin, ni katimaxkin tuku tlan. ¿La tlan namaxkiyan, komo nitu kgalhi? Ni kgalhi lakwan tamakatsin chu takgalhkgalhin nema nakamaxki latamanin. Nila tlawa pi lu tlan kakitaxtunin kkilhtamaku tuku aku mima xlakata xla nitlan katikitaxtunilh (Apocalipsis [Revelación] 20:10).

20. ¿Tuku tlan natlawaya xlakata tlan natamakamastaya chu natamunuya? (Na kaʼakxilhti recuadro «Tuku namakgtayayan tlakg tlan natalalipina Dios»).

²⁰ Namakamaxkiya Jehová milatamat wa tuku tlakg tlan nema natlawaya. ¿Makamaxkiputunata? Komo chuna, ni kapekuanti chuna natlawaya. Pero komo lakpuwana pi nina chuna militlawat, kastalani tastakyaw nema min kʼuma artículo xlakata tlakg nastaka mintakanajla. Pablo kastakyawalh natalan kcongregación xalak Filipos pi chuntiya xtaliwakalh xtakanajlakan (Filip. 3:16). Komo nastalaniya uma tastakyaw, nialh makgas namakgkatsiya pi tlan namakamaxkiya milatamat Jehová chu natamunuya.