Anta kʼApocalipsis 20:11, 12, Traducción del Nuevo Mundo, apóstol Juan kinkawaniyan la nawan ama Kilhtamaku: «Chu kakxilhli akgtum lanka snapapa putawilh niku tawila mapakgsina, chu Tiku anta xwi. Kxlakatin tsalakgolh katiyatni chu akgapun, chu ni analh niku tlan xtawilakgolh. Chu kkaʼakxilhli ninin, tiku laklankata chu tiku laktsujku, xyakgolh kxlakatin xputawilh Dios chu talakkikgolh rollos. Pero talakkipa atanu rollo; wa rollo xla latamat. Chu ninin katalakkaxlaka chuna la xtatsokgnit krollos chuna la tuku tlawakgolh». ¿Tiku ama mapakgsina o Juez nema wi kputawilh?

Ama akgtum mil kata, Jesucristo “nakaputsanani tiku staknankgo, chu ninin” (2 Timoteo 4:1). Tachuwin tiku staknankgo kilhchanima «lhuwa» latamanin tiku nalakgtaxtukgo kʼguerra xla Armagedón (Apocalipsis 7:9-17). Apóstol Juan na akxilhli «ninin [...], wa nti xwilakgolh xlakatin Dios» xlakata nakaputsananikan. Chuna la wa Jesús, «xlipaks nti aknukgoy, nakgaxmatkgoy xtachuwin [Cristo] nataxtupalakgoy» akxni nakamalakastakwanikan (Juan 5:28, 29; Hechos 24:15). ¿Tuku naʼakxilhkan akxni nakaputsananikan ama latamanin?

Akxni apóstol Juan maʼakxilhnika, xla akxilhli pi «talakkipa atanu rollo» chu «ninin katalakkaxlaka chuna la xtatsokgnit krollos chuna la tuku tlawakgolh» (Apocalipsis 20:12, TNM). ¿Anta tatsokgtawilanit kʼuma libro putum tuku xtlawakgonit makgasa umakgolh latamanin? Ni, nitu tatsokgnit. Akxni nakaputsananikan ni katiʼakxilhka tuku xtlawakgonit akxni nina xnikgo. ¿Tuku xlakata chuna wanaw? Xlakata Biblia wan pi «wanti xanina, lakgtaxtulha ktalakgalhin» (Romanos 6:7). Tiku nalakastakwanankgo nialh katikalakapastaknika xtalakgalhinkan chu xasasti latamat namatsukiparakgo. Wa xlakata, umakgolh libros kilhchanimakgolh xasasti limapakgsin nema Dios namasta. Xlakata tlan xliputum kilhtamaku nalatamakgo tiku nakamalakastakwanikan chu tiku nalakgtaxtukgo kʼArmagedón, xlakaskinka nakgalhakgaxmatkgo xlimapakgsin Dios. Na natawilakgo xasasti xlimapakgsin Dios nema namasta chuna la natitaxtutilha akgtum mil kata. Chuna, chatunu chatunu naputsananikan chuna la natlawa kxlatamat akxni natitaxtutilha kilhtamaku akxni Nakaputsananikan.