¿Xlikana David xkatsi pi Dios xlilakgaputsa? ¿Lilakgaputsayan Dios? Lhuwa latamanin tuwa makgkatsikgo nakanajlakgo pi Dios tiku kgalhi putum litliwakga kalilakgaputsa. ¿Tuku xlakata?

Wankgo pi xlakata Dios lu lanka ni xtachuna la latamanin. Xla lu lanka, chu kaʼakxilha laklanka kachikinin la akgtum slankgat o stajat kʼakgtum cubo, la pokgxni nema ni lu tasiya kʼakgtum balanza (Isaías 40: 15). Chatum tsokgna tiku ni kanajla pi wi Dios wa: «Kanajlakan pi wi chatum Dios tiku kinkalilakgaputsayan xtachuna la kaj lankajwanankan».

Nachuna, wilakgolh tiku lakpuwankgo pi ni kaminini nakamakgtaya Dios xlakata nitlan tuku tlawakgo. Akgtum liʼakxilhtit, chatum chixku tiku wanikan Jim wan: «Putum kilhtamaku xakskini Dios pi xkimaxkilh litliwakga xlakata ni lakapala xaksitsilh, pero lakgachunin kaj lakapala xaksitsi. Milh kilhtamaku akxni klakpuwa pi lu nitlan xaklikatsi chu nipara wa Dios tlan xkimakgtayalh».

¿Makgat kinkawilanin Dios chu ni katsi pi lamaw? ¿La kinkaʼakxilhan Dios xlakata akinin makglakgalhinanin? Natekgsaw xtakgalhtin uma takgalhskinin komo nakinkamakgtayayan Dios. Anta natekgsaw xtakgalhtin kxtachuwin, kBiblia, xla kinkawaniyan pi lakatsu wi chu kinkalilakgaputsayan. Hechos 17:27 wan: «[Dios] ni makgat kinkawilanin nchatunu nkin». Kʼakgtati artículos nema aku mima naʼakxilhaw tuku masiya Biblia xlakata uma chu la limasiya Dios pi kalilakgaputsa latamanin.

TUKU XLAKATA MAKGAPITSI NI LU KANAJLAKGO: Nina makgas tiku lakputsanankgo wankgolh pi kʼgalaxia niku lamaw kgalhi max 100 mil millones xlilhuwa planetas. Xlakata lu lanka, lhuwa latamanin kakgalhskinkan: «¿Tuku xlakata naʼakxilha Dios tuku tlawakgo latamanin kʼakgtum planeta nema nitu litaxtu?».

TUKU MASIYA BIBLIA: Jehováa ni kajwatiya kinkamaxkin Biblia, chu nialh kuenta kinkatlawan. Xla kinkawaniyan: «Nakmasiniyan tijia latani natlawana» (Salmo 32:8).

Kalakpuwaw xliʼakxilhtit Agar, chatum puskat xalak Egipto tiku latamalh ksiglo XX akxni nina xmin Cristo. Xla nitlan likatsinilh xmalana, Sarai, puskat tiku kskujnani, chu xla malakgaxokgelh. Wa xlakata Agar tsalalh kdesierto. ¿Dios nialh kuenta tlawalh xlakata nitlan tuku xtlawanit? Biblia wan pi «xʼángel Jehová tekgsli» chu wanilh: «Jehová kgaxmatnit mintalipuwan». Agar kgalhtilh: «Wix chatum Dios tiku kiʼakxilha» (Génesis 16:4-13, nota).

Dios na akxilhan. ¿Tuku wamputun uma? Uma liʼakxilhtit kinkamakgtayayan naʼakgatekgsaw. Chatum tse xatapaxuwan kakuentajtlawa putum xkamanan, pero tlakg kaʼakxilha tiku tlakg xalakstsujku, xlakata tlakg lakaskinkgo nakakuentajtlawakan. Nachuna, Jehová tlakg kinkakuentajtlawayan akxni xlajwananaw. Xla wan: «Kkatalhman chu niku xasanto anta kwi, nachuna akxtum ktatawila tiku lipuwama chu tiku ni laktlanka, xlakata nakkamatliwakglha tiku nitu kgalhikgo chu nakmatliwakglha xnakujkan tiku katlajamaka» (Isaías 57:15).

Pero max akstu kgalhskinkana: «¿La kiʼakxilha Dios? ¿Kaj watiya akxilha la ktasiya, o akxilha tuku wi kkinaku chu kiʼakgatekgsni o kimakgachakgxi?».

TUKU XLAKATA MAKGAPITSI NI LU KANAJLAKGO: Lhuwa latamanin lakpuwankgo pi Dios kaʼakxilha la makglakgalhinanin chu ni kaminini pi Dios kuenta nakatlawa. Kendra, tiku xkgalhi depresión xmakgkatsi pi nila putum xmakgantaxti tuku skin Dios. Wan: «Wa xlakata nialh ktlawanilh oración Dios».

TUKU MASIYA BIBLIA: Jehová ni kaj wa akxilha kintalakgalhinkan chu kinkaʼakgatekgsniyan. «Katsi tuku litsukunitaw —wan Biblia—, chu katsi xlakata akin pokgxni.» Wa xlakata, ni kinkamalakgaxokgeyan chuna la xlilat xlakata kintalakgalhinkan; kinkalakgalhamanan chu nakinkatapatiyan komo nialh natlawayaw tuku nitlan (Salmo 103:10, 14).

Kalakapastakwi mapakgsina David tiku lichuwinaw kxapulana artículo. Xla wanilh Dios: «Wix akxilhti kimakni akxni aktina ixwanit, lata xakama tasij, ixtsokgnitata nak milibro». Chu, na wa: «Tanks kakilikgalhtawakga, y kalakgapasti kinakuj» (Salmo 139:16, 23). Maski xtlawanit makgapitsi lu laklanka talakgalhin, David liwana xkatsi pi Jehová xʼakxilhli pi xlikana nitlan xlimakgkatsi kxnaku tuku xtlawanit.

Liwana kakatsi pi Jehová akgatekgsniyan, ni xtachuna latamanin. Biblia wan: «Chixku kaj akxilha tuku tasiya; pero Jehová, xla akxilha tuku wi knaku» (1 Samuel 16:7). Xla katsi tuku xlakata chuna kgalhiyaw kintayatkan. Katsi la tatlawanitaw, la kinkamakgastakkanitan, niku lamaw chu la kgalhiyaw kintayatkan. Na akxilhma la liskujpat xlakata tlakg tlan latamat nalipina, maski xmilh kilhtamaku xlakgalhinanti.

Pero, ¿la limaklakaskin Dios xlakata lakgapasan chu tlan nalimamakgkatsiniyan?

TUKU XLAKATA MAKGAPITSI NI LU KANAJLAKGO: Makgapitsi lu putsamakgolh tlan nakamamakgkatsinikan, pero lakpuwankgo pi nalimasiyakgo pi kaj xakstukan kapaxkikan, komo naskinikgo xtamakgtay Dios nakatalakkaxtlawa xtaʼakglhuwitkan. Chatum puskat wanikan Raquel wan: «Akxni klakapastaka la xlilhuwa latamanin lamakgolh kkatiyatni chu la xlilanka xtaʼakglhuwitkan nema kgalhikgo, kintaʼakglhuwit nipara tsinu tatalakxtumi xtaʼakglhuwitkan, uma tlawa pi ni nakskini xtamakgtay Dios».

TUKU MASIYA BIBLIA: Dios lhuwata tuku tlawanit xlakata tlan nakamamakgkatsini latamanin. Kinchatunukan kgalhiyaw «la akgtum tuwa tajatat»: talakgalhin. Wa xlakata nila makgantaxtiyaw putum tuku kinkaskiniyan. Pero, Dios «nkintikapaxkin, na malakgachalh xKam [Jesucristo], nakinkapalakgaxokgoyan xpalakata kintalakgalhinkan» (1 Juan 4:10). Xlakata Jesús mastalh xlatamat, Dios kinkatapatiyan kintalakgalhinkan, tlawa pi tlan natawila kintalakapastaknikan, chu nakgalhiyaw latamat nema ni kgalhi xlisputni kkatiyatni niku naʼanan takaksni.a Pero, ¿ama tamakamastan limasiya pi Dios kalilakgaputsa putum latamanin o na lilakgaputsayan?

Kaʼakxilhwi xliʼakxilhtit apóstol Pablo. Tsokgli xlakata xtamakamastan Jesús: «Wa [...] xKam Dios, wa nti nkintipaxkilh na kiakstu tamastalh nkintipalakanilh» (Gálatas 2:20). Maski Jesús nilh akxni Pablo nina kstalanina Cristo xwanit, Pablo akxilhli ama tamakamastan la akgtum xtamaskiwin Dios nema xmaxkinit.

Nachuna xtamakamastan Jesús xtachuna la akgtum tamaskiwin nema mila xlakata nalimasiyaniyan pi lu paxkiyan. Uma tamaskiwin tlan: «nkintikapaxkin, chu na kintikamaxkin xlipan takgtsiyajni» chu «na kamatliwakglhan ntu kxatlan tachuwin, chu ntatlaw» (2 Tesalonicenses 2:16, 17).

Pero, Jesús mastalh xlatamat, chu takgatsimaja akgtiy mil kata. ¿La likatsiyaw pi Dios chuntiya kinkalilakgaputsayan la uku?

TUKU XLAKATA MAKGAPITSI NI LU KANAJLAKGO: Lhuwa latamanin kanajlanikgo Dios pero lakpuwankgo pi makgat wi. Christina, chatum puskat xalak Irlanda tiku xʼan kpusikulan putum semana, wan: «Xakkatsi pi wa Dios tiku tlawanit putum tuku anan, pero ni xaklakgapasa. Nikxni kmakgkatsilh pi lakatsu xakwilanilh».

TUKU MASIYA BIBLIA: Max namakgkatsiyaw pi makgat wilaniw Dios, pero xla nikxni kinkamakgxtakgan. Jesús wililh xliʼakxilhtit xlakata la kinkakuentajtlawayan Dios xlakata wa: «Lapi wi nti nchatum nchixku xkgalhilh akgtum ciento xkalhniluj, na xtsankgalh ntantum, ¿tu xtialh mputsay nkakiwin wa ntu ntsankganit, na wata xmakgaxtakgli wa xatatipuxamakunajatsa?». ¿Tuku wamputun uma? Jesús wa: «Pus na chuna ni xtalakaskin minTlatkan nti wi nkakgapun natsankgay nayuma nchatum laktsu kaman» (Mateo 18:12-14).

Dios xlakaskina kaʼakxilha putum «laktsu kaman». ¿La putsa lataman tiku «[...]tsankgalh»? Chuna la wan texto nema litsuku uma artículo, Jehová kalimin latamanin.

Dios kalimin latamanin tiku xlikana katsiputunkgo xtachuwin. Xapulana siglo, malakgachalh chatum kstalanina Cristo xwanikan Felipe xlakata xlakgchalh chatum etíope chu xwanilh tuku xwamputun nema xlikgalhtawakgama (Hechos 8:26-39). Atanu kilhtamaku, Dios malakgachalh apóstol Pedro kxchik Cornelio, tiku xtlawanit oración chu xliskujma natlawa xtalakaskin Dios (Hechos 10:1-48). Dios na malakgachalh apóstol Pablo chu tiku xkataʼankgo xlakata xʼankgolh kkgalhtuchokgo kxkilhtin kachikin Filipos. Anta lakgapaskgolh Lidia chatum puskat tiku xkakninani Dios «wa xnaku malakkinilh nkimPuchinakan, lakimpi nakanajlaniy wantu xwan mPablo» (Hechos 16:9-15).

Putum uma liʼakxilhtit, limasiya pi Jehová lakkaxwililh pi latamanin tiku xputsamakgolh tlan xlakgapaskgolh. Chu la uku, ¿tiku kalakgankgo latamanin kxchikkan, o kalakgtalakatsuwikgo latamanin ktiji xlakata nakalitachuwinankgo Dios? Xtatayananin Jehová. Miʼakstu kakgalhskinka: «¿Wa kalimaklakaskima Dios xlakata naktalakatsuwini?». Kawani Dios pi kamakgtayan xlakata natalakatsuwiniya.a