Talakgatumi xTachuwin Dios kʼEspaña

APÓSTOL Pablo katsokgnilh uma tachuwin kstalaninanin Cristo xalak Roma lakatsu kata 56. Biblia ni kinkawaniyan komo kilalh o ni alh kʼEspaña. Maski chuna o ni chuna, xtaskujut Pablo chu amakgapitsin tiku xkamalakgachakan alakatanu xlakata xlichuwinankgolh Dios, makgtayanankgolh xlakata xtalakgatumilh xTachuwin Dios kʼEspaña ksiglo II.

Ni lhuwa kilhtamaku titaxtulh tsukulh talhuwi congregaciones kʼEspaña. Xlakata xlina lhuwa kata akxni romanos xkaʼakgchipakgonit chu tachuwin nema xchuwinankan wa latín, xtalakaskin pi xmatitaxtika Biblia kʼuma tachuwin.

BIBLIA KLATÍN

Xapulana kstalaninanin Cristo xalak España romana matitaxtikgolh Biblia klatín nema kalilakgapaska Vetus Latina Hispana. Uma tuku tlawaka akglhuwa siglos tamaklakaskilh, asta akxni Jerónimo makgalhsputulh Vulgata latina ksiglo V.

Traducción nema tlawalh Jerónimo masputulh kBelén (Palestina), lu lakapala chalh kʼEspaña. ¿La lakapala chalh? Akxni Lucinio, tiku xlikgalhtawakga Biblia chu lhuwa tumin xkgalhi, katsilh pi Jerónimo xtlawama akgtum traducción klatín, tunkun xkgalhiputun xacopia, wa xlakata kamalakgachalh kgalhchaxan tsokgnanin kBelén xlakata xcopiaxtukgolh. Ksiglos nema titaxtulh, uma traducción tsinu tsinu lilakgpalika Vetus Latina Hispana. Maski uma traducciones kamakgtayakgolh latamanin xlakata xʼakgatekgskgolh tuku wan Biblia, pero xtalakaskin atanu akxni sputli Imperio romano.

BIBLIA TSOKGKA KCHIWIX

Visigodos chu amakgapitsi tribus germánicas akgchipakgolh España ksiglo V chu liminkgolh tachuwin xwanikan: gótico. Xlakan xkgalhikgo akgtum takanajla nema xwanikan arrianismo, chu ni xkanajlanikgo Trinidad chu xkgalhikgo xBibliajkan nema xwanikan: Biblia gótica xla Ulfilas. Uma Biblia xlikgalhtawakgakan kʼEspaña asta akxni sputli siglo VI akxni mapakgsina visigodo Recaredo makgxtakgli arrianismo chu católico wa. Mapakgsina wa pi xkamasputuka xlibroskan arrianos, asta Biblia xla Ulfilas, chuna masputuka xlikgalhtawakgakan góticos kʼEspaña.

Maski chuna, xTachuwin Dios chuntiya xtalakgatumima kʼuma kilhtamaku. Nachuna, xchuwinankan akgtum tachuwin nema xminacha klatín chu uma matsukilh tachuwin romances xalak España.a Tatsokgni xala makgasa xtsokgkan kchiwix, chu xlilakgapaskan pizarras visigodas. Tsokgka ksiglo VI chu VII chu makgapitsi xliminkgo capítulos xla Salmos chu Evangelios. Akgtum Salmo xatakgatsin xlimin capítulo 16.

Xlakata xtsokgkan texto xalak Biblia kchiwix limasiya pi latamanin xlikgalhtawakgakgo chu xcopiaxtukgo xTachuwin Dios xalak uma kilhtamaku. Max makgalhtawakgenanin xlimaklakaskinkgo xlakata xkamasiyanikgolh kamanan nakgalhtawakgakgo chu natsokgnankgo. Uma tablillas ni lu tapalaxla xwanit, ni chuna la pergamino nema xmaklakaskinkan kmonasterios xlakata xtlawakan Biblia nema kgalhi dibujo.

Maktum nema lu lhuwa xtapalh, tlawaka kata 960 chu wi kpusikulan xla San Isidoro, kLeón (España). Kgalhi 516 hojas, 47 centímetros xlilanka chu 34 centímetros xlitilanka chu 18 kilos xlitsinka. Atanu, wa Biblia xla Ripoll nema wi kBiblioteca xla Vaticano chu tlawaka lakatsu kata 1020. Wa uma Biblia nema tlakg kgalhi dibujos. Kaj akgtum letra nema xlitsuku, akgtum kilhtamaku xlitlawa chatum monje chu akgtum título xla akgtum página akgtum semana xmaklakaskin. Maski uma lu lhuwa xtapalh, pero ni lu makgtayanankgolh xlakata xtalakgatumilh xTachuwin Dios.

BIBLIA KʼÁRABE

Kʼsiglo VIII tsukulh talhuwi akgtum xasasti tachuwin kʼEspaña xlakata kaʼakgchipalh árabes. Niku akgchipanankgolh musulmanes, tlakg tsukuka chuwinankan árabe ni xawa latín wa xlakata talakaskilh pi xmatitaxtika Biblia kʼuma tachuwin.

Lakpuwankan pi umakgolh kata kʼEspaña, xʼanan lhuwa traducciones xalak Biblia tachuwin árabe tuku tlakg xʼanan wa Evangelios. Max chatum obispo sevillano xla siglo VII tiku wanikan Juan, tlawalh traducción xamaktuminika Biblia kʼuma tachuwin. Pero la uku nialh anan uma traducciones nema tlawaka. Akgtum traducción xla Evangelios nema tlawaka kxʼitat ksiglo X wi kpusikulan xla León.

BIBLIA XAʼESPAÑOL

Akxni xkgalhsputma uma kata tsukulh anan castellano, o español. Uma xasasti tachuwin lu xʼama makgtayanan xlakata xmalakgatumika xTachuwin Dios.b Tatsokgni nema tlakg xalamakgasa xaʼespañol wilikanit La Fazienda de Ultra Mar (Hechos de ultramar), akxni xtsukuma siglo XIII. Uma lichuwinan akxni wi tiku kilalh kʼIsrael, chu Pentateuco chu makgapitsi libros Tatsokgni xaHebreo (Antiguo Testamento), nachuna Evangelios chu Epístolas.

Takanajla católico nitlan akxilhli xlakata xtlawaka uma traducción. Kata 1234, Concilio xla Tarragona limapakgsinalh pi putum Biblia nema xwilakgo ktanu tanu tachuwin (tuku chuwinankan kpaís) xmaxkika obispo tiku anta xwi xlakata xkalhkuyuka. Pero uma limapakgsin ni tlawalh pi nialh xtlawaka traducción. Mapakgsina Alfonso X (1252-1284), tiku xlilakgapaskan pi wa makilhtsukilh prosa española, xkgalhiputun Biblia xaʼespañol chu makgtayanalh xlakata tlan xtlawaka traducción. Na xwi atanu Biblia kʼuma kilhtamaku xwanikan Biblia prealfonsina, chu alistalh taxtulh Biblia Alfonsina nema tlakg xatakgatsin xwanit.

Umakgolh libros makgtayanankgolh xlakata tlakg kstakli uma tachuwin. Thomas Montgomery, tiku tlakg xkatsi xlakata uma wan xlakata Biblia Alfonsina: «Tiku matitaxtilh kxaʼespañol Biblia lu tlan la tlawalh, xlakata xlikana tuku wan chu maklakaskilh lu stlan tachuwin. [...] Ni tuwa tachuwin maklakaskilh chu ni tuwa akgatekgsnikan, chuna xtamaklakaskin Biblia xlakata tlan xlikgalhtawakgakgolh latamanin tiku ni lu katsinikgo latín».

Pero xapulana Biblias xaʼespañol ni anta kilhtika ktachuwin nema tsokgka Biblia, wata maklakaskinka tachuwin Vulgata latina. Ksiglo XIV, judíos tiku xtsokgnanin Biblia tsukukgolh matitaxtikgo kxaʼespañol tatsokgni xahebreo. Ama kilhtamaku, xliputum Europa anta kʼEspaña niku tlakg xwilakgolh judíos, chu judíos tiku xtlawakgo traducción tlan xlimaklakaskinkgo tatsokgni xala makgasa nema tlakg tlan xwanit.c

Akgtum lu tlan liʼakxilhtit wa Biblia de Alba, nema tatlawakgolh ksiglo XV. Chatum tiku lu xlakgapaskan kʼEspaña Luis de Guzmán wanilh rabino Moisés Arragel pi xtlawalh traducción kxaʼespañol castizo (nema ni talakgpalilh), wa tuku xlakata chuna skilh. «Chuna la tsokgkanit Biblia xala uku nialh chuna la xapulana» chu xlipulaktiy, «latamanin la akinin lakaskinkgo nawilikan notas kxkilhpan Biblia xlakata naʼakgatekgskgo tuku lu laktuwa». Uma tuku limapakgsinalh liwana tasiya pi lhuwa latamanin xlikgalhtawakgaputunkgo chu xʼakgatekgsputunkgo Biblia. Na liwana tasiya pi lhuwa xkgalhikgokan Biblia kʼEspaña ktanu tanu tachuwin.

Xlakata lhuwa skujkgolh traductores chu tiku xcopiaxtukgo, latamanin xalak España tiku xkatsinikgo kgalhtawakgakgo, tlan xlikgalhtawakgakgo Biblia kxtachuwinkan. Wa xlakata, «xalak España tlakg liwana xlakgapaskgo Biblia ni xawa xalak Alemania chu xalak Inglaterra akxni nina xlama Lutero», chuna wan tiku lichuwinan tuku lanit Juan Orts González.

Maski chuna, akxni ksputma siglo XV, Inquisición xalak España nialh mastalh talakaskin natlawakan Biblia chu nakgalhikgokan ktanu tanu tachuwin, chuna litsukulh uma kilhtamaku niku lhuwa latamanin xala anta ni lakgapaskgolh xtachuwin Dios. Akgtutu siglo xtitaxtulh xlakata xmastaka talakaskin nakgalhiparakgokan Biblia. Ama kilhtamaku niku lu katuwa xwanit, makgapitsi traductores tiku ni xpekuankgo tlawakgolh Biblia xaʼespañol kʼatanu países chu tsekg xmalakgachakgo kʼEspaña.d

Chuna la limasiya tuku akxilhwi xlakata la tlawaka traducción xla Biblia kʼEspaña, chu tiku ni xkanajlanikgo xTachuwin Dios xmasputuputunkgo, pero nila masputukgolh xtamakatsin Jehová (Salmo 83:1; 94:20).

Tiku lhuwa liskujkgolh xlakata xtlawakgolh uma traducciones, latín, gótico, árabe chu español makgtayanankgolh xlakata tlakg xlakgapaska Biblia, la uku traductores nachuna tlawakgo. Xlakata chuna tlawakgolh lhuwa millones latamanin tlan likgalhtawakgakgo xTachuwin Dios tachuwin nema lakgchan xnakujkan.