TAKGALHTAWAKGA 08
Wix tlan xʼamigo Jehová nawana
Jehová lakaskin kalakgapasti. ¿Tuku xlakata? Xlakata Dios katsi pi akxni tlakg nalakgapasa, nakatsiya la likatsi, tuku xlakata wi tuku tlawa chu tuku lakpuwanit natlawa, tlakg natalalipimputuna. ¿Pero xlikana tlan xʼamigo Dios nawana? (Kalikgalhtawakga Salmo 25:14). ¿Tuku militlawat xlakata tlan xʼamigo Dios nawana? Biblia kinkawaniyan xtakgalhtin umakgolh takgalhskinin chu na kinkawaniyan tuku xlakata ni anan atanu tiku tlakg tlan natalalinaw komo ni wa Jehová.
1. ¿Tuku waniyan Jehová pi tlan natlawaya?
«Katalakatsuwinitit Dios, chu xla nakatalakatsuwiniyan» (Santiago 4:8). ¿Tuku wamputun umakgolh tachuwin? Pi Jehová waniman xʼamigo kawanti. Max makgapitsi lakpuwankgo pi tuwa natalalinkgo Dios xlakata nila akxilhkgo. Pero xla kinkamaxkinitan xTachuwin, Biblia, xlakata tlan nalakgapasaw chu tlan natalakatsuwiniyaw. Akxni likgalhtawakgayaw tuku xla kinkawaniyan kBiblia, tlakg talalinaw Jehová maski nila akxilhaw.
2. ¿Tuku xlakata Jehová wa tiku tlakg xatlan amigo nema nakgalhiya?
Ni anan atanu tiku tlakg paxkiyan la Jehová. Xla lakaskin pi wix kapaxuwa chu lakaskin kaskini xtamakgtay akxni namaklakaskina. Tlan namakamaxkiya “putum mintalakgaputsit xlakata xla lilakgaputsayan” (1 Pedro 5:7). Jehová putum kilhtamaku skgalalh wi xlakata nakamakgtaya, nakakgaxmatni chu tlan nakamamakgkatsini xʼamigos (kalikgalhtawakga Salmo 94:18, 19).
3. ¿Tuku lakaskin Jehová pi katlawakgolh xʼamigos?
Jehová kapaxki putum latamanin. Pero xla «lu tlan katalalin tiku xaʼakgstitum» (Proverbios 3:32). Jehová lakaskin pi xʼamigos katlawakgolh tuku xla tlan akxilha chu kalakgmakgankgolh tuku xla ni akxilhputun. Max makgapitsi lakpuwankgo pi tuwa namakgantaxtikgo tuku Jehová lakaskin. Pero xla kinkaʼakgatekgsniyan chu xla kamakgamakglhtinan putum tiku xlikana paxkikgo chu liskujmakgo xlakata natlawakgo tuku xla lakgati (Salmo 147:11; Hechos 10:34, 35).
TLAKG KALAKPUTSANANIW
Tlakg kakatsiw xlakata la tlan xʼamigos Jehová nawanaw chu tuku xlakata Jehová wa tiku tlakg xatlan amigo nema nakgalhiyaw.
4. Abrahán xʼamigo Jehová xwanit
Tuku lichuwinan Biblia xlakata Abrahán, (tiku na lilakgapaskan Abrán) kinkamasiyaniyan tuku kilhchanima xʼamigos Dios litaxtukan. Kalikgalhtawakgatit xlakata Abrahán anta kʼGénesis 12:1-4 chu kalichuwinantit uma:
¿Tuku wanilh Jehová pi xtlawalh Abrahán?
¿Tuku malaknunilh Jehová?
¿Tuku tlawalh Abrahán akxni wanikgoka tuku xlitlawat xwanit?
5. ¿Tuku lakaskin Jehová pi katlawakgolh xʼamigos?
Putum akinin lakaskinaw pi kiʼamigoskan wi tuku katlawakgolh.
¿Tuku lakaskina wix pi xtlawakgolh miʼamigos mimpalakata?
Kalikgalhtawakgatit 1 Juan 5:3 chu kalichuwinantit uma:
¿Tuku lakaskin Jehová pi katlawakgolh xʼamigos?
Xlakata nakgalhakgaxmataw Jehová, max natalakaskin nalakgpaliyaw kintayatkan o la likatsiyaw. Kalikgalhtawakgatit Isaías 48:17, 18 chu kalichuwinantit uma:
¿Tuku xlakata Jehová kaskini xʼamigos pi wi tuku kalakgpalikgolh kxlatamatkan?
Chatum tlan amigo kinkawaniyan tuku kilitlawatkan xlakata ni nakinkaʼakgspulayan tuku nitlan. Jehová nachuna tlawa xpalakata xʼamigos.
6. Jehová kamakgtaya xʼamigos
Jehová kamakgtaya xʼamigos xlakata natayanikgo tuku tuwa titaxtukgo kxlatamatkan. Kaʼakxilhtit VIDEO chu kalichuwinantit uma:
Chuna la akxilhwi kvideo, ¿la makgtayanit Jehová uma tsumat xlakata natayani akxni lakapastaka tuku nitlan titaxtulh makgasa chu nitlan mamakgkatsini?
Kalikgalhtawakgatit Isaías 41:10, 13 chu kalichuwinantit uma:
¿Tuku wan Jehová pi natlawa xpalakata xʼamigos?
¿Kanajlaya wix pi Jehová wa tiku tlakg xatlan amigo nema tlan nakgalhiya? ¿Tuku xlakata chuna lakpuwana?
Xatlan amigos namakgtayakgoyan akxni wix namaklakaskina. Jehová nachuna natlawa mimpalakata.
7. Xʼamigos Jehová tachuwinankgo chu kgaxmatnikgo
Akxni katachuwinanaw kiʼamigoskan tlakg katalalinaw. Kalikgalhtawakgatit Salmo 86:6, 11 chu kalichuwinantit uma:
¿La tlan natachuwinanaw Jehová?
¿La kinkatachuwinanan Jehová?
Akinin tachuwinanaw Jehová akxni tlawaniyaw oración chu xla kinkatachuwinanan akxni likgalhtawakgayaw Biblia.
MAKGAPITSIN WANKGO: «Nila xʼamigo Dios nawanaw».
¿Tuku texto xmaklakaskinti xlakata nalimasiyaya pi tlan xʼamigos Jehová nawanaw?
TUKU KATSINIW
Jehová lakaskin pi wix xʼamigo kawanti chu xla namakgtayayan xlakata tlan natalalipina.
¿Tuku xkgalhtinanti?
¿La kamakgtaya Jehová xʼamigos?
¿Tuku xlakata Jehová kawani xʼamigos pi wi tuku kalakgpalikgolh kxlatamatkan?
¿Lakpuwana wix pi Jehová lu tuwa tuku kinkaskiniyan xlakata xʼamigos nawanaw? ¿Tuku xlakata chuna lakpuwana?
TLAKG KAKATSINI
¿La namakgtayayan kmilatamat komo xʼamigo Dios nawana?
“Jehová, un Dios que vale la pena conocer” (La Atalaya, 15 xla febrero kata 2003)
Kaʼakxilhti tuku militlawat xlakata tlan natalalipina Dios.
Kaʼakxilhti tuku xlakata chatum puskat wan pi Jehová lakgmaxtulh xlatamat akxni tsukulh talalin.
Kakgaxpatti tuku lakpuwankgo makgapitsi kamanan xpalakata Jehová.