Carta xla Lakgkgolotsin tiku Pulalinkgo xTatayananin Jehová
Kinatalankan tiku kkapaxkiyan:
¡Lu lilakgatit tuku lama uku, chu lu paxuwayaw! Xlikana lu tlan klimakgkatsiyaw xlakata «makxtum skujmaw», lu lhuwa talichuwinama kinTlatikan Jehová xalak akgapun chuna la ni makgtum tatlawa (Sof. 3:9; Juan 14:12).
Xlakata paxuwayaw akxni skujnaniyaw Jehová ni wamputun pi ni kgalhiyaw laklanka taʼakglhuwit. Kata nema titaxtulh makgapitsi wixin titaxtutit talakgaputsit la akxni tachikilh tiyat, masputunalh sen, unisen, o huracan, chu atanu tuku masputunan (Mat. 24:7). Lhuwa anankgo tiku chali chali titaxtumakgolh lu tuwa tajatat chu kgolomakgo. Chu putum akinin patimaw «takatsanajwa» nema chuntiya talhuwima (Mat. 24:8). Nachuna, kmakgapitsi países la Armenia, Corea del Sur chu Eritrea, lhuwa kinatalankan kalitamaknukanit kpulachin xlakata xtakanajlakan (Mat. 24:9).
¿Tuku kinkamakgtayanitan xlakata ni naxlajwanan kintakanajlakan maski titaxtumaw lhuwa tuku nitlan? Texto xla kata 2010 kinkamalakapastakayan uma tuku lu xlakaskinka: “Tapaxkit putum tayaniy. Tapaxkit nikxni sputa” (1 Cor. 13:7, 8). Chuna, tapaxkit nema lakgalhiniyaw chu tapaxkit nema kgalhiniyaw Jehová kinkamakgtayayan xlakata natayaniyaw.
Lhuwa latamanin tiku nixaxlikana kstalaninanin Cristo kaks lilakawankgo xlakata la xlilhuwa lichuwinamaw Dios chu ni titaxtu lhuwa kilhtamaku kalakgapaxialhnamparayaw. Makgapitsi, maski ni lakgatikgo tuku kanajlayaw chu tuku masiyayaw, kinkawanikgoyan: «Wixin tlawapatit taskujut nema akinin kilitlawatkan». ¿Tuku kamakgtaya xtatayananin Jehová xlakata chali chali nalichuwinankgo Dios? Wa kamakgtaya tapaxkit. Chuna la kinTlatikan xalak akgapun, ni lakaskinaw pi ni para chatum namasputukan (2 Ped. 3:9). Kata nema titaxtulh takgatsiw 7,508,050 tiku lichuwinankgo Dios, uma litasiya pi ni lakaskinaw ni para chatum namasputukan. ¿Anan atanu takanajla niku wilakgolh tiku xatapaxuwan kamasiyaniputunkgo xlakata Dios xtalatamankan xlakata kapaxkikgo?
Lu kinkamatliwakglhan xlakata akxilhmaw pi putum kilhtamaku kgantaxtuma tuku tsokgli Isaías: «Kxaʼawatiya kilhtamaku nala pi ksipi niku wi xchik Jehová liwana nataya kxakgspun kasipijni [o sipi], chu xlikana natawila xakgspun laktsu sipi chu anta naʼankgo kachikinin» (Isa. 2:2-4). La uku lhuwa tiku talakatsuwimakgolh kxchik Jehová chu anta makgtanumakgo 294,368 tiku tamunukgolh kata nema titaxtulh chu lipaxuw kamakgamakglhtinanaw. Tapaxkit nema lakgalhiniyaw katlawalh pi kakamakgtayaw xlakata ni namastakgo talakaskin nakamakgatlaja kintalatlawanakan Satanás (1 Ped. 5:8, 9).
Martes 30 xla marzo kata 2010 akxni talakapastakli akxni tinilh Jesús tastokgkgolh 18,706,895. Uma litasiya pi wilakgolhku lhuwa millones latamanin tiku tlan natalakatsuwikgo xlakata makxtum nakinkatakakninanikgoyan Jehová. Lu lipaxuwayaw xlakata Jehová nina masputu uma xalixkajni kakilhtamaku. Xlakata nina chin uma kilhtamaku, tapaxkit nema kgalhiniyaw Dios nakinkamakgtayayan xlakata natayaniyaw (2 Tes. 3:5).
Tamakxtumit xaʼakgtutu kilhtamaku “Ni katamakgatliniw Jehová” nema tatlawalh xlikalanka kkatiyatni tlawalh pi tlakg tlan natalalinaw Jehová chu atsinu ni putum tatlawalh kata 2010. Kgantaxtulh xtachuwin salmista: «¡Snun lipaxaw talamana tachixkuwit ti talipawan xastaknan Dios wanikan Jehová!» (Sal. 144:15). Akinin ni pekuanaw maski katuwa tuku nakinkalakgminan xlakata katsiyaw pi wa Jehová kinkatawilan (Sal. 23:4). Nialh makgas, Jehová nalimaklakaskin xKgawasa, xlakata «namalakgsputuy xtatlaw Akgskgawini» (1 Juan 3:8). ¡Lu lakaskinaw pi kachilha ama kilhtamaku!, xlakata nina chin, lhuwa taskujut kgalhiyaw (1 Cor. 15:58).
Liwana kakatsitit pi «xaliʼankgalhin» kkalichuwinanan kkioracionkan (Rom. 1:9). Katlawatit litlan, «kxtapaxkit Dios nkatamakgaxtakgtit, xlimakgwa kgalhkgalhiyatit xtalakgalhaman [...] Jesucristo wantu nkitaxtuniy latamat wantu xlipan» (Jud. 21).
¡Mimputumkan lu kkapaxkiyan!
Minatalankan,
Lakgkgolotsin tiku Pulalinkgo xTatayananin Jehová