¿Tlan xlichuwinanti Dios domingos?
1. ¿Tuku kinkamasiyaniyan tuku tlawakgolh Pablo chu tiku xkataʼan anta kFilipos?
1 Sábado xwanit, kilhtamaku akxni lhuwa judíos xalak Filipos xjaxkgo, Pablo chu tiku xtaʼankgo anta xwilakgo xlakata xʼankgonit lichuwinankgo Dios. Komo xlakan na xtijaxkgolh uma kilhtamaku nitu xtikawanika. Pero xlakata xlakan xkatsikgo pi judíos xtamakxtumikgo lakatsu kxkachikinkan xlakata natlawakgo oración, limaklakaskinkgolh uma kilhtamaku chu ankgolh kalitachuwinankgo Dios. Wa xlakata, Lidia chu putum xchik tamunukgolh. ¡Lu paxuwakgolh uma tiku xlichuwinamakgo Dios! (Hech. 16:13-15.) Kinkilhtamakujkan, lhuwa latamanin jaxkgo domingo. ¿Tlan xwa komo xlimaklakaskiw kilhtamaku domingo xlakata nalichuwinanaw Dios?
2. ¿Tuku tlawanit xkachikin Jehová xlakata tlan nalichuwinankgo xtachuwin Dios domingos?
2 Wantuku tatlawalh xlakata xlichuwinanka Dios domingo. Kata 1927 kawanika xkachikin Jehová pi xmaklakaskinkgolh domingo xlakata xlichuwinankgolh Dios. Pero mapakgsinanin ni lakaskinkgolh tuku xtlawamakgo, kʼEstados Unidos katamaknuka kpulachin lhuwa kinatalankan xlakata ni xmakgantaxtimakgolh limapakgsin xla tajaxni kdomingo, xmakglhuwinamakgo chu nitu xkgalhikgo talakaskin nastanankgo. Pero uma ni tlawalh pi nataxtlajwanikgo. Kata 1930 tlawaka tuku xwanikan «campañas de las divisiones» niku tiku xlichuwinankgo Dios xʼankgo niku xkalakgchan. Xmin kilhtamaku akxni lhuwa tiku xlichuwinankgo Dios xtaxtukgo chu mapakgsinanin nialhla putum xkatamaknukgo kpulachin. ¿Lanka xtapalh akxilhaw tuku titlawakgolh kinatalankan xlakata akinin tlan nalichuwinanaw Dios domingos?
3. ¿Tuku xlakata tlan lichuwinankan Dios domingos?
3 Lu tlan kilhtamaku xlakata nalichuwinanaw Dios. Lhuwa latamanin ni skujkgo domingo chu ni lu lakapalamakgo. Asta tiku kanajlanikgo Dios, max nalakaskinkgo nakalitachuwinana uma kilhtamaku. Komo kgalhiyaw kintamakxtumitkan domingo, takaxtayanitawa xlakata nalichuwinanaw Dios wa xlakata, ¿tlan xlakkaxwiliw nalichuwinanaw Dios akxni nina tsuku kintamakxtumitkan o akxni kgalhsputnita? Komo talakaskin kalipi tsinu tuku nawaya.
4. ¿Tuku tlan nalipaxuwayaw komo nalichuwinanaw Dios domingo?
4 Maski nalichuwinanaw Dios domingo chuntiya nakgalhiyaw kilhtamaku xlakata najaxaw. Chu tuku tlakg tlan, nalipaxuwayaw xlakata tlawaw xtaskujut Dios (Pro. 19:23). Ni katsiyaw, ¡asta tlan xtekgswi chatum la Lidia!