Jesús kʼGetsemaní

AKXNI taxtukgocha anta kxlikilhmaktiy chiki Jesús chu xʼapóstoles ankgolh kʼGetsemaní. Unu makglhuwata kichinkgonit. Jesús kawani pi ni nalhtatakgoy chu katlawakgolh oración chu Jesús atsinu tlakg makgat alh, tatsokgostalh chu talakatalh kkatiyatni chu tsukulh tlaway oración.

Titaxtulh hora, Jesús minpa anta niku wilakgolh xʼapóstoles. ¿Tuku lakpuwana wix pi tlawamakgolh? ¡Lhtatamakgolh! Makgtutu, Jesús kawani pi ni kalhtatakgolh pero akxni makgatunu xmin xlakan klhtatamakgolh. Akxni xaʼawatiya taspitli Jesús kawaniy: ¿La tlan lhtatayatit wixin, akgtum tsisni la uma? Ay chanit hora akxni nakimakamastakan kxmakankan tiku nikiʼakxilhputunkgoy.

Akxnitiya tama kilhtamaku takgaxmatli pi xmimakgolh lhuwa kristianos. ¡Kaʼakxilhtit! ¡Mimakgolh lakchixkuwin tiku liminkgoy espadas chu kiwi! Chu liminkgoy xmakgskgotkan. Akxni lakgtalakatsuwikgolh wintiku laktaxtulh niku xminkgoy amakgapitsi chu lakgmilh Jesús. Lakatsukli chuna laʼakxilhpat anta unu kdibujo. ¡Uma chixku wa Judas Iscariote! ¿Tuku xlakata lakatsuka Jesús?

Chu Jesús kgalhskilh Judas: ¿Judas kilakatsukpat xlakata kilimakamastapat? Chuna, akxni lakatsukli kalimasiyanilh tama lakchixkuwin pi wa Jesús tiku xputsamakgolh. Wa xlakata wantiku niʼakxilhputunkgoy Jesús tlakg lakgtalakatsuwikgoy xlakata nachipakgoy. Pero Pedro nixʼama mastay talakaskin kaj chuntiya nalinkan Jesús. Maxtulh xespada nema liminit chu kaʼaktinilh xtakgen tama chixku tiku lakatsu xya. Pero Jesús xamanilh xtakgen chu tunkun mapaksalh.

Jesús waniy Pedro: Kamaki mi espada. ¿Ni lakpuwana wix pi tlan nakskiniy kinTlat akglhuwa mil ángeles xlakata nakimakgtayakgoy? ¡Tlan kskinilh! Pero Jesús niskini Dios ángeles, xlakata katsiy pi ay chanit kilhtamaku akxni wantiku niʼakxilhputunkgoy nalinkgoy. Chu xla mastalh talakaskin chuna natlawakgoy. Kaʼakxilhwi tuku akgspulalh Jesús alistalh.