Dios waniyan xʼamigo nawana

Dios lakaskin xʼamigo nawana. ¿Katsiya wix pi tlan mi amigo natlawaya ama Persona tiku tlakg xlakaskinka xlikalanka kakilhtamaku? Abraan tiku lumakgasa latamalh; xʼamigo Dios lilakgapaska (Santiago 2:23). Anta kBiblia lichiwinan atanu lakchixkuwin chu lakpuskatin pi xʼamigo Dios xwankgonit chu makglhtinankgolh laklanka tasikulunalin. Lanchiyu, lhuwa latamanin xlipaks Katiyatni xʼamigo Dios litaxtukgonit. Wix natlan xʼamigo Dios nawana.

Tlakgtlan xʼamigo Dios nawana nixtachuna xʼamigo katiwa kristiano. Dios ni kaʼakgskgawi xʼamigo tiku nikxni makgxtakgkgoy (Salmo 18:25). Xʼamigo Dios nawana tlakgtlan nixtachuna lhuwa tuku nakgalhiya. Akxni niy tiku lhuwa tuku kgalhiy, atanu litamakgxtakgkgoy xtumin. Tiku xʼamigo Dios kgalhikgoy tuku lulhuwa xtapalh chu niti katikamakglhtilh (Mateo 6:19).

Max wi tiku ninalakaskinkgoy pi wix tlakg nakatsiniya tuku Dios masiyay. Max namamakgxtakgniputunkgoyan tiku mi amigo chu mi familia (Mateo 10:36, 37). Kon wi tiku nalilitsinan chu namakgakglhaputunan, kalakapastakti tiku makgapaxawaputuna: ¿Wa Dios o latamanin? Kalakapastakti uma: pi wi tiku xwanin niaj nawayana, ¿xkgalhakgaxpatti? Kana pi ni, kon ni nawayana naniya. Lukana, ¡Dios tlan maxkiyan xaxlipan latamat! Wa xpalakata tlakg kakatsini lantla tlan xʼamigo Dios nawana chu nikxni kamasta talakaskin tiku namamakgxtakgniyan (Juan 17:3).