Katlawatit chuna la tlawakgolh palakachuwinanin: Oseas
1. ¿Tuku nakinkamatlawiyan xlakata tlan likatsi Jehová?
1 Lakpuwankan la tlan likatsi Jehová max tlan xtlawaw takgalhskinin: «¿Tuku naklixokgoni kinTikukan Dios wakg ixlitlan nima kintatlawanit?» (Sal. 103:2-4; 116:12). Xlakata nakgalhakgaxmatni Jehová, palakachuwina Oseas tlawalh tuku wanika chu xatapaxuwan tlawalh. ¿La tlan nachuna natlawayaw?
2. ¿Tuku xlakata lu tlan liʼakxilhtit Oseas, xlakata la lichuwinalh Dios?
2 Kalichuwinawaw Dios maski tuwa tuku titaxtumaw. Tamakatsin nema xlichuwinama Oseas wa xkawanima tamapakgsin xaʼakgkaw tribu xla Israel. Kaj tsinu tiku xkgaxmatnikgo Jehová. Mapakgsina Jeroboán II xtlawa tuku nitlan kxlakatin Jehová chuntiya xmatlawinan pi xkakninanikgoka laktsu toro tiku xmakilhtsukinit Jeroboán I (2 Rey. 14:23, 24). Chu tiku alistalh mapakgsinankgolh nitu tlawakgolh xlakata nialh xtlawaka tuku ni tlan, wa xlakata kata 740 akxni nina xmin Jesús malakgsputuka uma kachikin. Oseas skujnanilh tipuxamakunajatsa kata maski xʼanan ni xaxlikana takanajla. ¡Lu tlan liʼakxilhtit! ¿Natlawayaw la Oseas chu chuntiya nalichuwinanaw Dios maski latamanin ni nakgaxmatputunkgo? (2 Tim. 4:2.)
3. ¿La limasiyaka xlatamat Oseas pi Jehová xalakgalhamana?
3 Kalakpuwaw xtalakgalhaman Jehová. Jehová wanilh Oseas: «Katiya chatum puskat tiku tlawanit talakgxtumit ni xlitatlawat» (Os. 1:2). Xpuskat Oseas, Gómer, kgalhikgolh chatum kam; pero max kgalhipa chatiy kamanan tiku ni xkamanan Oseas xwanit. Xlakata xpaxki chu ni xmakgxtakgputun, tapatilh, chu xliʼakxilhtit limasiyalh pi lhuwa lakgalhaman Jehová, tiku makglhuwa xkatapatinit tamapakgsin xaʼakgkaw tribu xla Israel (Os. 3:1; Rom. 9:22-26). ¿Nalimakgxtakgaw tuku lakaskinaw o tlawamaw xlakata nakamasiyaniyaw latamanin pi Jehová chatum Dios tiku lu lakgalhamanan? (1 Cor. 9:19-23.)
4. ¿Tuku tlan natlawayaw komo paxtikatsiniputunaw Jehová?
4 Makgapitsi kskujnanin Jehová nialh kgalhtawakgakgolh chu makgxtakgolh xalaktlan taskujut nema lhuwa xkaxokgonikan xlakata tlakg tlan nalichuwinan Dios. Makgapitsi ni tamakgaxtokgkgonit o ni kgalhikgonit kamanan xlakata tlakg tlan nalichuwinan Dios. Xlikana max lakpuwanaw pi nila xtlawaw la Oseas. Komo paxtikatsiniputunaw Jehová xlakata kinkalakgalhamanan chu naskiniyaw xʼespiritu santo, nikatsiyaw la nakinkamaklakaskinan maski lu tuwa akxilhaw, chuna la kitaxtunilh Oseas (Mat. 19:26; Filip. 2:13).