Xalakgskgalala tastakyaw xla kilatamatkan

¿KINKAMAKGTAYAYAN nakgalhakgaxmataw Jehová? Xlakata tlan nakatsiyaw, xlakaskinka naputsananiyaw tastakyaw nema wilakgolh kxTachuwin. ¿Xlikana lu tlan tastakyaw? Klibro xla Proverbios, mapakgsina Salomón tsokgwililh lhuwa tastakyaw nema kinkamakgtayayan putum kilatamatkan. Kaʼakxilhwi makgapitsi.

Lipawankan Dios. Xlakata tlan natalalinaw Jehová, lu xlakaskinka nalipawanaw. Salomón wa: «Kalipawanti Jehová xliputum minaku, chu ni wa mintalakapastakni kalipawanti. Chu xliputum mintiji kuentajkatlawani, chu xla namatsaja mintiji» (Proverbios 3:5, 6). ¿La limasiyayaw pi lipawanaw Dios? Akxni tlawayaw tuku lakaskin chu kgalhakgaxmataw xlimapakgsin. Komo chuna tlawayaw wa uma tuku nakitaxtu kilatamatkan: namakgapaxuwayaw kinTlatkan xalak akgapun chu nalimasiyayaw pi Akgskgawini xaʼakgsanina (Proverbios 27:11).

Tastakyaw xlakata la nakatalalinaw amakgapitsi. La uku, familias tlakg maklakaskinkgo nakapulalin Dios. Dios wani xachixku: «Katapaxuwa puskat tiku tatamakgaxtokgti akxni kgawasaku xwanita», uma malakapastaka pi ni xlimakgxtakgat xpuskat (Proverbios 5:18-20). Proverbios 31 lu xatlan limasiyat wilini xapuskat xlakata xchixku chu xkamanan namaxkikgo kakni chu lu tlan naʼakxilhkgo. Nachuna, kamanan kawanikan pi nakgalhakgaxmatkgo xnatlatnikan (Proverbios 6:20). Uma libro lichuwinan pi lu tlan nakatalalinaw amakgapitsin, chu kinkawaniyan pi komo nakatamakgatliniyaw amakgapitsin kiʼakstukan nakinkapaxkikanan (Proverbios 18:1). Wa xlakata, maski tlan kgalhikan amigos, liwana nakalaksakaw tiku nakatalalinaw chu ni nakatalalinaw tiku nakinkamatlawikgoyan tuku nitlan (Proverbios 13:20; 17:17).

Tastakyaw xlakata la nalinaw kilatamatkan. Proverbios kgalhi lhuwa xalaktlan tastakyaw nema kinkamakgtayayan xlakata tlan nalatamayaw chu nalakgmakganaw nixatlan talakapastakni, la tiku wakgo lhuwa kuchu, kgalhikan xatlan talakapastakni chu tlakg tlan natlawayaw kintaskujutkan (Proverbios 6:6; 14:30; 20:1). Nachuna, kinkawaniyan tuku nitlan kitaxtu komo ni nastalaniyan talakapastakni xalak Biblia (Proverbios 14:12). Na kinkawaniyan pi ni natamaknuniyaw tuku nitlan kinakujkan xlakata «anta lakatsuku latamat» (Proverbios 4:23).

Umakgolh tastakyaw kamakgtayanit kxlatamatkan lhuwa millones latamanin, xlakan liwana katsikgo pi tlakg tlan nakgalhakgaxmataw Jehová.

(Takilhtinit klibro xla Proverbios.)

18. max kkata 717 a.n.J. Mamakgstokgkgoka Proverbios