Kakalakapastakwi tiku wilakgolh niku kakuentajtlawakan lakgkgolotsin
1. ¿Tuku xlakata talakaskin nakaliniyaw xalakwan xalaksasti latamanin tiku wilakgolh niku kakuentajtlawakan lakgkgolotsin?
1 La uku tlakg lhuwa latamanin tiku linkgoya kata (Ecl. 12:1-7). Lhuwa wilakgolh niku kakuentajtlawakan lakgkgolotsin, wa xlakata ni lu katachuwinankgoyaw akxni anaw lichuwinaw Dios kʼakgatunu chiki. Nachuna kpaíses niku kamanan ankgo katatawilakgo xnatlatnikan kxchikkan akxni kgolonkgo. Latamanin tiku linkgoya kata chu wilakgolh niku kakuentajtlawakan lakgkgolotsin, chu amakgapitsin tiku tlakg lakaskinkgo nakakuentajtlawakan, max ni lu la tatsuwikgo o nialh liwana lakpuwankgo, pero tlanku nakatsinikgo xlakata Jehová chu napaxkikgo. ¿Tuku tlan natlawayaw xlakata nakaliniyaw xalakwan xalaksasti xlakata lipaxuw takgalhkgalhin? (Tito 2:13.)
2. ¿La naputsakan lista niku kakuentajtlawakan lakgkgolotsin xlakata nakalakgapaxialhnankan?
2 La namatsukiyaw. Tlan naputsakan akgtum lista niku kakuentajtlawakan lakgkgolotsin anta kdirectorio telefónico niku wan «residencias de ancianos», «clínicas geriátricas» o «asilos». Tiku pulalin la lichuwinankan Dios kcongregación wa tlan nakalaksaka natalan tiku nakamalakgachakan niku kakuentajtlawakan lakgkgolotsin. Komo liwana nalakkaxwilikan chu nalipawankan Jehová, ni lu tuwa katikitaxtulh akxtum nakamakgalhtawakgekan makgapitsi latamanin (Prov. 21:5; 1 Juan 5:14, 15).
3, 4. 1) ¿Tiku natachuwinanaw xlakata tlan makxtum nakalimakgalhtawakgeyaw Biblia? 2) ¿La nawanaw xlakata la makgalhtawakgenanaw?
3 Talakaskin pulana nakatsiya la xlilanka niku kakuentajtlawakan lakgkgolotsin, xlakata nakatsiya la namasiyaya. Komo lhuwa tiku anta wilakgolh chu lhuwa tiku skujkgo, tlan pulana nakgalhskinkan tiku makgamakglhtinan komo tlan natachuwinanaw tiku pulalin taskujut. Pero komo lu aktsu (niku ni lhuwa wilakgolh lakgkgolotsin chu kaj chatiy o chatutu tiku kuentajtlawankgo), tlakg tlan nawan natachuwinankan tiku xmalana.
4 Kawanti pi wix xatapaxuwan kamakgtayaya latamanin tiku lakgatikgo likgalhtawakgakgo chu lichuwinankgo tuku min kBiblia. Kakgalhskininanti komo wilakgolh latamanin tiku lakgatikgo makxtum nakalitachuwinankan tuku wan Biblia, nema max namakgapala 30 minutos akgatunu semana. Tlan namaklakaskina lhuwa likgalhtawakga. Lhuwa natalan tiku lu tlan kakitaxtuninit maklakaskinkgonit Ki libro xla takgalhtawakga xalak Biblia chu El hombre más grande de todos los tiempos. Max tlan nawan pulana namasiyanikan tiku pulalin taskujut niku kakuentajtlawakan lakgkgolotsin tuku likgalhtawakga limaw. Natalakkaxlaya tuku hora, kilhtamaku chu niku nakatatamakxtupiya, uma nalhkawilikan kcalendario niku wan tuku natatlawa chali chali. Kawanti pi wix xtatayana Jehová. Kawani tiku pulalin taskujut pi ni katitlawa tamakxtumit la kmintakanajla, wata kawani pi lakaskina kaj kalikgalhtawakgakgolh Biblia.
5. ¿Tuku kinkawanikanan natlawayaw xlakata napaxuwakgo chu nakamakgtayayaw tiku kamakgalhtawakgemaw?
5 La nakamakgalhtawakgeyaw. Talakaskin pulana nakatsiyaw la wilakgolh chu la likatsikgo, wa xlakata nakaʼakgatekgsniyan chu nakalakgalhamanaw. Tiku napulalin takgalhtawakga nalin lhuwa likgalhtawakga nema natamaklakaskin chu natataspitpara akxni makgatunu namakgalhsputu takgalhtawakga. Max natalakaskin nakalini likgalhtawakga nema kgalhi xalaklanka letras tiku namaklakaskinkgo. Tlan nakawanikan tiku nalakaskinkgo chu katsinikgo kgalhtawakgakgo pi kalikgalhtawakgakgolh párrafos, chu alistalh natlawakan takgalhskinin chuna la tatlawa. Tlan kalikatsi chu kalimasiya tapaxuwan akxni makgalhtawakgenampat. Komo namaxkiyan talakaskin tiku pulalin taskujut, tlan namasiyaya akgtum video xla xtatayananin Jehová nema namatliwakglha xtakanajlakan o kalichuwinanti pulaktum tuku tlakg xlakaskinka masiya Biblia. Tlan nalimatsukiya chu nalimakgalhsputuya ni lanka oración. Nachuna makgapitsi natalan maklakaskinkgonit takilhtlin.
6. ¿Tuku natlawaya akxni wi tiku ni makgamakglhtinan tuku masiyapat?
6 ¿Tuku natlawaya komo tiku wi anta, ni makgamakglhtinan tuku likgalhtawakga o wanti akxni xkamasiyanipat? Liwana kalakpuwanti la nakgalhtiya (Col. 4:6). Max tlan namasiyaniya akgtum texto xalak Biblia nema nakgalhti xtakgalhskinin. Komo naʼakxilha pi nila tunkun namaxkiya takgalhtin, kamaxki paxtikatsinit xlakata tuku wanin chu kawani pi nakgalhtiya akxni namakgalhsputuya takgalhtawakga.
7. ¿Tuku natlawaya komo wi tiku kgalhi akgtum takgalhskinin o tlakg katsiputun?
7 Namin kilhtamaku, wi tiku natlawa takgalhskinin o tlakg nakatsiputun xlakata atanu tema. Akxni chuna titaxtu chatum tala puskat kgalhtinan: «Lu tlan mintakgalhskinin. Pero xlakata kaj wix tlawapat takgalhskinin, ¿tlan akxilha komo pulana namakgalhsputuyaw tuku likgalhtawakgamaw chu alistalh nalichuwinanaw mintakgalhskinin?». Na tlan nalimaxtuyaw kilhtamaku xlakata tlan nakamakgalhtawakgeya chatunu chatunu tiku nalakaskinkgo.
8. ¿La nalhkawilikan tiku makxtum kamakgalhtawakgemaka? chu ¿la nalhkawilikan akxni chatunu chatunu nakamakgalhtawakgekan?
8 Tlan nawan komo watiya naʼankgo natalan tiku mastakgo takgalhtawakga anta niku kakuentajtlawakan lakgkgolotsin. Putum tiku ankgo tlan nalhkawilikgo xkilhtamakujkan. Akxni kamakgalhtawakgemakaja, tala tiku napulalin takgalhtawakga tlan nalhkawili la akgtum takgalhtawakga, chu akxni makgatunu naʼan, nalhkawili la akgtum revisita. Tiku kaj xakstukan natsukukan kamakgalhtawakgekan, tiku liwana akgatekgskgo natsokgwilikan la akgtum takgalhtawakga.
9, 10. Kalichuwinanti tuku tayat xlikgalhitkan tiku napulalinkgo takgalhtawakga.
9 Putum kilhtamaku kapit. Kalakkaxwili tuku kilhtamaku chu tuku hora nakamakgalhtawakgeya. Tiku kgalhtawakgamakgolh chu tiku anta skujkgo max lakaskinkgo pi natlawakan takgalhtawakga chuna la lakkaxwilikanit chu nakgalhsputa hora la lhkawilikanit (Mat. 5:37). Wa xlakata liwana kaliskujti, kalakkaxwili la natlawaya chu kamakgantaxti. Tlakg tlan kitaxtu komo chatiy napulalinkgo takgalhtawakga (Ecl. 4:9, 10). Niku tlakg lanka niku kakuentajtlawakan lakgkgolotsin max natalakaskin tlakg lhuwa naʼankgo tiku lichuwinankgo Dios.
10 Na lu xlakaskinka tlan nakalikatsiniya chu nakalimasiyaniya pi kamakgtayaputuna (Filip. 2:4). Xapulana akxni napina, kalimaxtu kilhtamaku xlakata nakalakgapasa xchatunukan. Katsokgwili xtukuwanikan chu tlan xwa komo katsininitata nawan xtukuwanikan akxni nakalakgpimparaya. Kalakapastakti pi makgapitsin sitsikgo komo nakalimapakuwiya xtukuwanikan chu ni wa xʼapellidoskan. Komo ni lakapala nasitsiya chu nakalakgalhamana, putum tlan namakgkatsikgo.
11. ¿La nalimasiyakgo pi kamaxkikgo kakni tiku anta skujkgo chu xfamiliareskan lakgkgolotsin, natalan tiku makgalhtawakganankgo?
11 Tlan nakalikatsiniya chu nakamaxkiya kakni tiku anta skujkgo chu xfamiliajkan lakgkgolotsin. Akxni talakkaxwilinita takgalhtawakga, tlan nawan komo ni nalakgpaliya hora chu la masiyapat, komo nalakgpaliya pulana kawani tiku pulalin taskujut. Kakgalhskinti la akxilha takgalhtawakga nema tatlawama. Komo lakgapaxialhnamakgolh xfamilia akxni kgalhtawakgamakgolh, wix pulana kawanti la wanikana. Kakawani tuku xlakata kamakgalhtawakgepat. Kakawani pi kalakgalhamana xfamilia chu kawanikgo pi katamakgxtakgkgolh chu kakgaxmatkgolh.
12, 13. Kalichuwinanti makgapitsi liʼakxilhtit, niku tlan kitaxtunit xlakata lichuwinankanit Dios, niku kakuentajtlawakan lakgkgolotsin.
12 La kitaxtunit. Congregaciones tiku makgtayanankgonit uma taskujut chu superintendentes viajantes wankgonit pi lu tlan kitaxtuninit. Akgtum chiki niku kakuentajtlawakan lakgkgolotsin, max kgalhapuxum kilakgolh xapulana takgalhtawakga, uma tlawalh pi kgalhchaxan xkgalhtawakgaputunkgolh. Chatum puskat kgalhtawakgalh chu tamunulh. Alakatanu niku kakuentajtlawakan lakgkgolotsin, takgalhtawakga xalak Biblia tlawalh pi chatum puskat tiku xkgalhi 85 kata, tlawalh pi xʼalh ktamakxtumit chu xtamunuputulh. Alakatanu niku kakuentajtlawakan lakgkgolotsin tlawaka pi nialh lhuwa tuku xtlawakgolh chu nialh xtlawaka takgalhtawakga xalak Biblia nema xtlawakgo natalan, tiku xkgalhtawakgamakgolh wanikgolh tiku xpulalima taskujut pi nichuna xtlawaka. Kakgaxmatnika chu chuntiya kamakgalhtawakgeka, max tamakxtumikgolh puxamakitsis o puxamakaw latamanin.
13 Ni kajwatiya tiku kgalhtawakgamakgolh nila kanajlakgo tapaxkit nema limasiyayaw. Min kilhtamaku tiku anta skujkgo na anta tawilakgo chu na mastakgo xtakgalhtinkan. Xlakata liskujaw chu limasiyayaw pi kamakgtayaputunaw tiku anta wilakgolh, uma natlawa pi tlan nakinkalichuwinankanan (1 Ped. 2:12). Akxni wanika tiku pulalin taskujut niku kakuentajtlawakan lakgkgolotsin tuku xlakata tatlawa uma takgalhtawakga, xla kgalhtinalh: «¿Tuku xlakata makgapalanitantit? ¿Tuku kilhtamaku namatsukiyatit?». Puskat tiku xpulalin niku nakakuentajtlawakan lakgkgolotsin xla tsokgnalh: «Akit kwan pi tlan xwa xkamasiyanika putum niku wilakgolh niku kakuentajtlawakan lakgkgolotsin. Xtatayananin Jehová xatapaxuwan tlawakgo uma taskujut, ni matajinankgo kaj kamakgtayaputunkgo latamanin». Anta kʼHawái, niku kakuentajtlawakan lakgkgolotsin, kamaxkika maktum kapsnat natalan niku xlichuwinan pi lu «lanka xtapalh» xʼakxilhkgo tiku anta xwilakgolh chu tiku anta kskujkgo.
14. ¿Tuku xlakata kaliniputunaw tamakatsinin xalakwan xalaksasti tiku wilakgolh niku kakuentajtlawakan lakgkgolotsin?
14 Jehová kawani latamanin tiku linkgoya kata pi kamalankikgolh (Sal. 148:12, 13). Putum chuna kawanikan tiku wilakgolh niku kakuentajtlawakan lakgkgolotsin. Anta niku lichuwinana Dios, ¿wi niku kakuentajtlawakan lakgkgolotsin tiku tlan nalitamakgtayakgo xalakwan xalaksasti? Xtamakgtaykan lakgkgolotsin xalak congregación chu tiku pulalinkgo niku kakuentajtlawakan lakgkgolotsin, max tlan nakamakgtayayaw xlakata nakamaxkiyaw tlan tamakatsinin. Xlakata kalakapastakaw tiku linkgoya kata, nachuna tlawamaw la Jehová (Sal. 71:9, 18).