Wantuku xwankanit pi nala asta la uku na kgantaxtuma

AKXNI xwi ksipi wanikan Olivos, niku liwana xtasiya Jerusalén chu xtemplo, kgalhtati xʼapóstoles xatsekg skinikgolh pi xkawanilh wantuku xwamputun tuku xlichuwinanit. Aku xwanit pi templo xʼamaka masputukan chu na xlichuwinanit «akxni nasputa kakilhtamaku» (Mateo 13:40, 49, TXC). Wa xlakata kgalhskinkgolh: «¿Tukuya kilhtamaku chuna nala, chu tuku xaliʼukxilhtit naʼanan akxni kinkatawila nawan chu akxni talakatsuwinita xlakata nasputa tuku lama kkakilhtamaku?» (Mateo 24:3, NM).

Jesús kawanilh tuku xʼama la akxni Jerusalén chu xtemplo nina masputukan nawan. Pero tuku lichuwinalh nikaj kJerusalén xʼama kgantaxtu, xlakata alistalh xʼama kgantaxtu xlikalanka katiyatni. Xlakata xkatsikgolh akxni xkatatawilapa Jesús, latamanin kuenta xlitlawatkan liʼakxilhtit: wa tuku xʼama la xlikalanka katiyatni chu akxnitiya kilhtamaku xʼamakgo kgantaxtukgo. Uma liʼakxilhtit limasiya pi Jehová wilinita Jesús xliMapakgsina anta kxTamapakgsin chu uma tamapakgsin nialh makgas namasputu tuku nitlan chu nawilipara takaksni xlikalanka katiyatni. Tuku lichuwinalh Jesús pi nala, limasiya pi namasputukan política, latamanin chu takanajla chu natawila xasasti kakilhtamaku.

Jesús wa pi akxni xtsukulh mapakgsinan kʼakgapun, xlikalanka Katiyatni xʼama anan guerra, tatsinksni, natachiki tiyat chu lhuwa tajatat. Nialhtiku xkgalhakgaxmatli limapakgsin. Nachuna, xaxlikana kstalaninanin xkalitachuwinankgolh putum kachikinin xalaktlan tamakatsin xlakata xTamapakgsin Dios. Wantuku nalisputa uma liʼakxilhtit nema lichuwinalh Jesús wa «tlanka takatsanajwat», tuku ni amakgtum chuna la (Mateo 24:21).

¿La xlikatsikgolh kstalaninanin Cristo pi talakatsuwinit uma lu lilakgaputsa kilhtamaku? Jesús kawanilh kstalaninanin: «Wa nkalikatsinitit xakiwi higo» (Mateo 24:32). Akxni akgapun xakiwi higo, takatsi pi verano talakatsuwinita. Nachuna, akxni nakgantaxtu putum tuku lichuwinalh Jesús, natakatsi pi lisputni talakatsuwinit. Pero Jesús wa pi kajwatiya xaTlat katsi tukuya kilhtamaku chu hora namin tlanka takatsanajwat. Wa xlakata makatsininalh: «Skgalalh katawilatit, [...] xampi ni katsiyatit akxni nakilakgchan nkilhtamaku» (Marcos 13:33).

(Takilhtinit kMateo capítulo 24 chu 25, kMarcos capítulo 13 chu kLucas capítulo 21.)

28. 14 xla nisán kata 33 a.x.J. Jesús niy kkiwi (Papaʼ xla nisán lakgchan marzo chu abril)

29. 16 xla nisán kata 33 a.x.J. Lakastakwanan Jesús