AKGLHUWA kachikinin xalak Canaán tsukukgolh takaxkgoy xlakata nakatatlaway guerra li Israel. Lakpuwankgoy pi natlajanankgoy. Pero kristianos xalak Gabaón tiku ni lu makgat wilakgolh ni chuna lakpuwankgoy. Li Gabaón lakpuwankgoy pi Dios kamakgtayama li Israel, chu ni tatlawaputunkgoy guerra Dios. Wa xlakata, ¿katsiya wix tuku tlawakgolh li Gabaón?

Tlawakgolh pi katasiyalh la lu makgat xalanin. Wa xlakata makgapitsi lhakgakgolh xataxtitni xlhakgatkan chu xalakgwan xtatunutkan. Kamakukikgoy xburrojkan kuxtalh xalakgwan chu linkgolh kaxtalanchu xalamakgasa chu palha. Chu ankgoy niku xwi Josué chu wankgoy: Lu makgat kachikin niku kminitanchaw, xlakata kkgaxmatwi pi mi Dioskan Jehová lu xalanka. Kkgaxmatwi putum tuku mi Dioskan tlawalh minpalakatakan kʼEgipto. Wa xlakata kinpulalinaninkan kinkawanikgon pi xakmakaxwi taway xlakata xakmiw kkawaniyan: «Miskujnanin akinin. Kakinkamaxkitit mintachuwin pi ni nakilatatlawayaw guerra». Wixin akxilhpatit pi ay sputmaja kinlhakgatkan xlakata lu makgat kminitanchaw chu kaxtalanchu lu xamakgasa chu xapalha.

Josué chu amakgapitsi xpulalinanin li Israel kakanajlanikgoy li Gabaón. Wa xlakata kamaxkilh xtachuwin pi nitu katikatlawanilh. Pero akgtutu kilhtamaku xtitaxtunitta katsikgolh pi ni xlikana makgat xalanin, lakatsu xalanin.

Josué kakgalhskilh: ¿Tuku xlakata kinkawanitit pi makgat kachikin tanitantit?

Li Gabaón kgalhtinankgoy: Xlakata kinkawanikan pi mi Dioskan Jehová kawaninitan pi nakamaxkiyan paks katiyatni xalak Canaán. Chu xakpekuanitaw pi wixin xpinpatit kilamakgniyaw. Pero li Israel makgantaxtikgolh chuna la xkawaninit li Gabaón chu ni kamakgnikgoy. Wata kaskujnin litaxtukgolh.

Chu mapakgsina xalak Jerusalén snun lisitsilh xlakata li Gabaón katalakkaxlalh li Israel. Wa xlakata kawaniy amakgapitsi kgalhtati mapakgsinanin: Katantit chu kakilamakgtayaw natalachipayaw Gabaón. Chuna tlawakgoy tama kgalhkitsis mapakgsinanin. ¿Lakgskgalalan wankgolh li Gabaón akxni talakkaxlakgolh li Israel, xlakata chu uma mapakgsinanin mimakgolh katatlaway guerra? Kaʼakxilhwi.

KAʼAKXILHTI Josué. Xla wan: ¡Chichini nikatatsuwi! Chu Chichini tantaku tamakgxtakgli kxitat akgapun. ¡Wa Jehová tlawalh pi chuna kalalh! Pero kaʼakxilhwi tuku xlakata Josué lakaskin pi chuntiya kachichinalh.

Akxni kgalhkitsis xalaklixkajni xtayat mapakgsinanin xalak Canaán tsukukgolh tatlawakgoy guerra li Gabaón, li Gabaón malakgachalh chatum chixku xlakata naskiniy tamakgtay Josué. Tama chixku wan: ¡Lakapara katantit! ¡Kakilamakgtayaw! Putum mapakgsinanin tiku wilakgolh xkachikinkan kxlakni kasipijni tatlawamakgolh guerra miskujnin.

Josué chu putum soldados lakapara ankgolh. Tantaskaka tlawankgolh. Akxni chankgolh kGabaón, xsoldados kgalhkitsis mapakgsinanin pekuankgolh chu tsukukgolh tsalakgoy. Akxni tama kilhtamaku Jehová Dios tlawalh pi kamokgosli kʼakgapun laklanka chejet la chiwix, tlakg lhuwa kamakgnilh chejet nixawa tiku nikgolh kguerra nema tlawalh Josué.

Josué akxilhli pi nialh makgas natsankgay chichini. Chu natsiswan, chu lhuwa xsoldados xla kgalhkitsis mapakgsinanin natsalakgoy. Wa xlakata Josué tlawaniy oración Jehová chu wan: ¡Chichini lakatum katawila! Chu xlakata xchichinamajku li Israel tlan tlajakgoy guerra.

Pero ananparakgoyku lhuwa mapakgsinanin tiku lixkajni xtayatkan anta kCanaán wantiku niʼakxilhputunkgoy xkachikin Dios. Josué chu xsoldados kalinilh akgchaxan kata xlakata na katlajalh putum xtalamakgasitsin, 31 mapakgsinanin xalak Canaán. Akxni xmakgantaxtikgonitta uma, Josué mapitsinilh xtiyat Canaán chu kamaxkilh kgatunu xalhuwa familia tiku ni xkgalhikgoy.

Akglhuwa kata titaxtulh chu chalh kilhtamaku Josué nilh akxni xkgalhiy 110 kata. Akxni Josué xlama chu xtalalinanin xlamakgolh, kristianos tlawakgolh xtalakaskin Jehová. Pero akxni nikgolh, kristianos tsukukgolh tlawakgoy tuku nitlan chu kgalhikgolh takglhuwit. Chu uku lakaskinkgoy xtamakgtay Dios.