• Lakastakwanan Jesús
    Biblia chu tuku lichuwinan
    • Jesús ama kʼakgapun

      SECCIÓN 21

      Lakastakwanan Jesús

      Jesús katasiyanilh kstalaninanin xlakata nakamatliwakglha chu nakamaxki xalaksasti limapakgsin

      XLIʼAKGTUTU kilhtamaku la xninit Cristo, chalhuwa lakpuskatin tiku kstalaninanin Jesús xwankgonit, ankgolh niku xtamaknukanit pero xmalakikanit. Wi tiku xmalakxijnit chiwix tuku xlilakgatalakanit, chu niti xtanuma.

      Akxni ama kilhtamaku katasiyanilh chatiy ángeles. Chatum kawanilh: «Mputsayatit Jesús xala kNazaret [...], lakastakwananitta» (Marcos 16:6). Lakpuskatin lakapala ankgolh kamakatsinikgo apóstoles. Ktiji tatanokglhkgolh Jesús chu xla kawanilh: «Ni tipikuanatit; kapitit, na kamakatsinikgotit nkinatalan, lakimpi naʼakgoy kGalilea; na anta nakiukxilhkgoyacha» (Mateo 28:10).

      Alistalh akxni chatiy kstalaninanin xʼamakgo kʼEmaús, chatum tiku ni xlakgapaskgo kalakgtalakatsuwilh chu kakgalhskilh tuku xlichuwinamakgo. Uma chixku Jesús xwanit pero ni lakgapaskgolh xlakata tanu xtasiya. Lu lipuwankgo wankgolh pi wa xlichuwinamakgo xMakgalhtawakgenakan chu uma chixku kalitachuwinalh putum tuku lichuwinan xTachuwin Dios xlakata Mesías. Xlikana, Jesús putum xmakgantaxtinit tuku xlichuwinankanit xlakata Mesías.a Akxni katsikgolh pi wa Cristo tiku xtachuwinamakgo nialh akxilhkgolh xlakata la uku espíritu xwanit.

      Chatiy kstalaninanin taspitparakgolh kJerusalén chu ankgolh kaʼakxilhkgo apóstoles tiku xtalakgchuwatanukgonit. Akxni xlichuwinamakgo tuku xlanit, putum tiku xtanumakgolh kaks lakawankgolh akxni katasiyanipa Jesús. Xla kakgalhskilh: «¿Tu wan nilay likanajlayatit minakukan pi kit klama xastakna?». Na kawanipa: «Chuna tatsokgtawilanit kLikgalhtawakga pi kit Cristo, juersa kilinit xwanit, wampi kaj xliʼakgtutu kilhtamaku naklakastakwanan kalinin» (Lucas 24:38, 46).

      Tipuxum kilhtamaku makglhuwa akxilhkgolh Jesús. Akgtum kilhtamaku, liwaka akgkitsis ciento latamanin akxilhkgolh. Max uma kilhtamaku akxni kaliyawalh kstalaninanin uma lu xlakaskinka taskujut: «Kapitit, na kamasiyunikgotit xlipaks akgmakgat chixkuwin, [...] namasiyunikgoyayatit mpi natlawakgoy xlipaks yuma ntu kkalimapakgsinitan. Na kakatsitit mpi xaliʼankgalhin nakkatalatamayan nchali chali, asta nasputa katuxawat» (Mateo 28:19, 20).

      Akxni xaʼawatiya katatamakxtumilh xʼapóstoles tiku ni xmakgatsankgananikgo, kamalaknunilh: «Wampi namakglhtinanatit litliwakga akxni namin Spíritu Santo kmiokgspunkan, na nalichuwinanatit [...] nkimpalakata [...] asta awatiya kxtankgenu tiyat» (Hechos 1:8). Akxni chuna wankgolh tsukulh tatalhmani chu akgtum puklhni tsukulh matsekga chu nialh akxilhkgolh.

      (Takilhtinit kMateo capítulo 28, kMarcos capítulo 16, kLucas capítulo 24, kJuan capítulo 20 chu 21 chu 1 Corintios 15:5, 6.)