MOISÉS xminit kamapuswayani xborregos anta ksipi wanikan Horeb. Anta unu akxilhli ni lu xalanka kiwi xlakgpasama, ¡pero ni klhkuy!

¡Nikxni a kukxilha la uma!, lakpuwa Moisés. Liwana nakan akxilha lakpuwa. Akxni talakatsuwilh, anta kkiwi nema klhkuma taxtucha tachuwin chu wanilh: Ni tlakg katalakatsuwi. Katatuxtunanti, xlakata tiyat niku yat xasanto. Wa Dios xmachuwinama chatum ángel, wa xlakata Moisés talakgatlapalh.

Alistalh Dios wanilh: Kukxilhnit la kamapatinimaka kinkachikin kʼEgipto. Nakkalakgmaxtuy, chu wix kmalakgachaman xlakata nakalakgmaxtuya. Jehová xʼama kalin xkachikin anta kxastlan lanka kachikin Canaán.

Pero Moisés wa: Akit nituku klitaxtuy. ¿La nakkamaxtuy? Chu komo nakan nakiwanikgoy: ¿Tiku malakgachan? ¿Tuku nakkawani akxni chuna nakinkgalhskinkgoy?

Dios kgalhtilh Moisés, chuna nakawanikgoya: JEHOVÁ xDios Abrahán, chu xDios Isaac chu xDios Jacob kimalakgachalh xlakata nakkalakgminan. Chu Jehová amakgtum wampa: Uma kintukuwani chu nikxni ktilakgpalilh.

Pero Moisés kgalhtinalh: ¿Chu komo xlakan ni nakimakanajlanikgoy pi wix kimalakgachapat?

Dios kgalhskilh: ¿Tuku chipanita?

Moisés kgalhtinalh: Kgantum kiwi.

Dios wanilh: Kamapi kkatiyatni. Chu akxni Moisés mamilh xlixtokgo tantum luwa wa. Jehová masiyanipa Moisés akgtum tuku nilay tamakanajlay. Wanilh: Katamaknu mi makan kmilhakgat. Moisés chuna tlawalh, chu akxni maxtulh xmakan, ¡lu snapapa xwanit la mik! Xtasiyay la xkgalhiy tajatat wanikan lepra. Chu Jehová maxkilh Moisés litliwakga xlakata natlaway xliʼakgtutu tuku nilay takanajlay. Akxni wakg xmasiyaninit wanilh: Umakgolh tuku nilay tamakanajlay natlaway pi li Israel nalikanajlakgoy pi akit kmalakgachaman.

Akxni lakgolh uma Moisés alh kxchik chu wanilh Jetró: Kakimaxki talakaskin nakanparay kʼEgipto xlakata nakan kkaʼakxilhkgoy kinparientes. Jetró makgachipalh Moisés, chu Moisés alh kʼEgipto.

AKXNI Moisés taspitpa kʼEgipto, wanilh xtala Aarón putum tama tuku nilay tamakanajlay nema xmaʼakxilhkanit. Chu akxni Moisés chu Aarón kamasiyanilh li Israel tama tuku nilay tamakanajlay, putum makanajlakgolh pi Jehová xkamakgtayama.

Akxni xtlawakgonita uma, Moisés chu Aarón lakgankgolh Faraón. Chu wanikgolh: Jehová wa xDios Israel wan: Kamakgxtakgti akgtutu kilhtamaku kinkachikin xlakata naʼankgoy kinkakninanikgoy anta kxakaskakni tiyat. Pero Faraón wanilh akit nikkanajlaniy Jehová. Niktimakgxtakgli naʼankgoy li Israel.

Faraón snun xsitsinit xlakata li Israel xlimaxtuputun kilhtamaku nema xla taskujut xlakata nalikakninanikgoy Jehová. Wa xlakata tlakg tsukuka kamaskujukan. Li Israel limawakakgolh Moisés xlakata snun nitlan la xkatlawamaka chu Moisés snun lilipuwa. Pero Jehová wanilh pi ni kalipuwa. Akit naktlaway pi Faraón kakamakgxtakgli kinkachikin wan Jehová.

Moisés chu Aarón amparakgolh niku xwi Faraón. Chu akxni tama, tlawakgolh tuku nilay tamakanajlay. Aarón mamilh xlixtokgo katiyatni chu uma lanka luwa wa. Pero wantiku xtlawakgoy magia xla Faraón na mamikgolh xlixtokgokan chu taxtukgocha luwa. Pero, ¡kaʼakxilhti! Xluwa Aarón kawama xluwa tiku tlawakgoy magia. Nipara chuna Faraón kamakgxtakgli li Israel.

Wa xlakata chalh kilhtamaku akxni Jehová xmaxkilh tastakyaw Faraón. ¿Katsiya wix la tlawalh? Makaminilh pulakkaw tuku nitlan xʼama akgspula Egipto.

Akxni xtitaxtunitta akglhuwa tama tuku nitlan nema xkamakaminikanit, Faraón xtasaniy Moisés, chu xwaniy: Kamatakgenu uma tuku nitlan kinkalakgchinitan chu nakkamalakgachay li Israel. Pero akxni nialhtu xwi tuku nitlan, xlakgpaliy xtapuwan. Ni xkamalakgachay li Israel. Pero akxni chalh xapulakkaw tuku nitlan xkamakaminikanit, kamakgxtakgli naʼankgoy.

¿Lakgapasa kgatunu tuku nitlan tama akgkaw tuku kamakaminika? Kamatitaxtu atanu página chu kaʼakxilhwi tuku xwanit kgatunu kgatunu.

KAʼAKXILHTI kgatunu, kgatunu dibujo, masiyama kgatunu tuku nitlan nema Jehová makamilh kʼEgipto. Anta kxapulana akxilhpat Aarón lisnokgma xlixtokgo kgalhtuchokgo wanikan Nilo. Akxni chuna tlawalh kgalhtuchokgo kgalhni wa, chu skiti nema anta xtajumakgolh nikgolh, chu kgalhtuchokgo tsukulh lixkajni kankala.

Alistalh Jehová na tlawalh pi katakutkgolh anta kgalhtuchokgo wanikan Nilo lhuwa chichekg. Xwilakgolh khornos, kbandejas niku xwilikan skitit, kputama, lakaxtum xwilakgolh. Akxni nikgolh chichekg, li Egipto mamakxtumikgolh, chu lanka kachikin lixkajni kakankalalh.

Alistalh Aarón lilakgsnokgli xlixtokgo pokgxni chu jejenes wankgolh, laktsu kuxta nema kgoskgoy chu chawanankgoy. Wa uma xapulaktutu nitlan nema makaminika Egipto.

Amakgapitsi tuku nitlan nema kamakaminika, kaj li Egipto katlawanilh nitlan, chu nitu katlawanilh li Israel. Xlipulaktati tuku nitlan wa laklanka kuxta, tanukgolh kxchikkan li Egipto. Xlipulakkitsis tuku nitlan, kalakgchalh animales. Tanlhuwa wakax chu borrego chu cabras xla li Egipto nikgolh.

Alistalh xlakan, Moisés chu Aarón malakgachakgolh lhkaka kaunin, chu kamapulhnilh laklanka tsitsi kristianos chu animales. Wa uma xlipulakchaxan tuku nitlan kamakaminika.

Alistalh Moisés tamakayawalh kʼakgapun, chu Jehová makamilh jilina chu chijit. Nikxni aʼxmin chijit la milh kʼEgipto.

Xapulaktsayan nema tuku nitlan kamakaminika wa lhuwa xtuki. Nikxni aʼxmin chuna la milh nipara anampa lhuwa xtuki, tuku xmakgataxtunit chijit wakgolh xtuki.

Xlipulaknajatsa nema tuku nitlan kamakaminika wa pi lu katsiswalh. Akgtutu kilhtamaku nitsinu xtasiyay xlikalanka kachikin, pero niku xwilakgolh li Israel kxkgakganan.

Xlisputni, Dios wanilh xkachikin pi kamawakalh xkgalhni tantum aktsu cabra o aktsu borrego kxatalayaw xmalakchakan. Akxni chu xʼángel Dios titaxtulh kʼEgipto. Akxni ángel xʼakxilha tama kgalhni niti xmakgniy anta kchiki. Pero akxni ni xʼakxilha kgalhni, xmakgniy wantiku pulana xlakachinit kristiano chu na xmakgni animal. Wa uma xapulakkaw tuku nitlan kamakaminika.

Akxni xtitaxtunitta uma awatiya tuku nitlan, Faraón kamakgxtakgli naʼankgoy li Israel, xkachikin Dios xtakaxkgonitta chu tama katsisni taxtukgoy kʼEgipto.

¡KAʼAKXILHTI tuku lama! Wa uma Moisés limakama xlixtokgo anta kxkgalhni pupunu wanikan xaSpinini. Wantiku akxtum talayakgolh kxakilhtutu wa li Israel, ay lakgtaxtukgonit. Pero Faraón chu xsoldados muxtumakgolh. Kaʼakxilhwi tuku xlakata chuna lalh.

Chuna la katsiwa, akxni xtitaxtunitta xliʼakgkaw tuku nitlan nema xkamakaminikanit li Egipto, Faraón kawanilh li Israel pi kataxtukgolh kʼEgipto. Max akgchaxan ciento mil lakchixkuwin li Israel taxtukgocha, chu lhuwa lakpuskatin chu lakgskgatan. Chu lhuwa amakgapitsi kristianos tiku na xkanajlanikgonit Jehová na katataxtukgocha li Israel. Akxni taxtukgocha kʼEgipto xputumkan linkgolh xcabrajkan, xborregojkan chu xtorojkan.

Akxni niʼaxtaxtukgoyacha, li Israel skinikgolh li Egipto lhakgat chu amakgapitsi katuwa tuku litatlawanit oro chu plata. Li Egipto snun xpekuankgonit, xlakata xaʼawatiya tuku nitlan xkaʼakgspulanit. Wa xlakata kamaxkika li Israel tuku skinkgolh.

Ni akglhuwa kilhtamaku xtitaxtunit li Israel chankgolh anta kpupunu wanikan xaSpinini. Anta jaxkgolh. Akxni tama kilhtamaku Faraón chu lakchixkuwin tiku xkamapakgsiy tsukukgolh lakgpalikgoy xtalakapastaknikan xlakata xkamakgxtakgkgonit li Israel. Xwankgoy: ¡Tuku xlakata kamakgxtakgwi naʼankgoy kiskujnikan!

Chuna Faraón lakgpalipa xtalakapastakni. Lakapara makaxli xputlaw nema xlin kguerra chu xsoldados. Chu tsukukgolh kaputsastalaniy li Israel 600 putlaw xatalaksakni chu putum amakgapitsi putlaw xalak Egipto.

Akxni li Israel akxilkgolh pi xmima Faraón chu xsoldados snun pekuankgolh. Nixkatsikgoy niku naʼankgoy. Kxlakatinkan xwi pupunu chu li Egipto kxchakgenkan xmimakgolh. Pero Jehová wililh kxlakʼitatkan li Israel chu li Egipto akgtum puklhni. Wa xlakata li Egipto ni la xakxilhkgoy li Israel chu nila tuku xkatlawaniy.

Alistalh, Jehová wanilh Moisés pi kalimakaʼalh xlixtokgo kxkgalhni pupunu wanikan xaSpinini. Akxni Moisés chuna tlawalh Jehová makamilh akgtum lanka un, xlakata kasunulh. Chu chuchut nema xtlawama kpupunu tapitsikgolh chu antiya tamakgxtakgli.

Akxni chuna lalh, li Israel tsukukgolh tlawankgoy kxlakʼitat pupunu, kaskakni xwanit. Lhuwa hora kalinilh xlakata kxchankgolh kxakilhtutu, tama lhuwa millón kristianos chu putum animales. Asta akxni li Egipto kaʼakxilhparakgolh li Israel, na tajukgolh kpupunu xlakata nakaputsustalaniy.

Akxni chuna tlawakgolh, Dios tsukulh kamaktini tuku litlawankgoy xputlawkan. Li Egipto snun pekuankgolh chu palha wankgolh: Jehová kamakgtayay li Israel. ¡Katakutwi! Pero nialh hora xwanit.

Alistalh Jehová wanilh Moisés pi kalimakaʼalh xlixtokgo kxkgalhni pupunu wanikan xaSpinini chuna la akxilhti kdibujo. Chu akxni Moisés chuna tlawalh chuchut nema lakatum xwi tsukuparakgolh tlawankgoy chu kaʼaktamacha li Egipto chu xputlawkan. Putum soldados xtajukgonit kpupunu. ¡Chu nitiku li Egipto lakgtaxtulh!

¡Lu lipaxuwalh xkachikin Dios xlakata lakgtaxtukgolh! Lakchixkuwin kilhtlikgolh akgtum tatlin nema lipaxtikatsinikgolh Jehová, akxni wankgolh: Jehová tlajalh akgtum xalanka guerra. Kamalakgachalh xkawayujkan chu tiku xkgewilakgolh anta kpupunu. Míriam xtala Moisés maxtulh xlitlakgni, chu amakgapitsi lakpuskatin namaxtukgolh xlitlakgnikan chu stalanikgolh. Tantlikgolh chu xkilhtlimakgolh: Jehová tlajanit akgtum lanka guerra. Kamalakgachanit xkawayu chu tiku xkgewilakgolh anta kpupunu.