Lhtatatawi chatum kgawasa

¡LU NITLAN, kakxilhti! ¿Tuku lama unu? ¿Max snun lanit uma aktsu kgawasa tiku ma kkatutsu? ¡Kaʼakxilhti, chatum chixku tiku na taxtuma anta kchiki wa Pablo! Timoteo na anta laya, ¿pi akxilhpat? ¿Pi kawa mokgosli kventana uma kgawasa?

Chuna, chuna lalh, uma kgawasa tamokgosli kventana. Pablo kamasiyanima xtamakgalhtawakgen Cristo nima wilakgolh kTroas. Pablo xkatsiy pi makgas kilhtamaku nialh xʼama kaʼakxilha uma kristianos, xlakata kbarco xʼama an lichali. Wa xlakata chuntiya xkamasiyanima asta chalh itat tsisni.

Uma kgawasa xtukuwani Eutico, kventana xwi chu lhtatatawi. ¡Kxlikilhaktutu piso tamokgosli! Wa xlakata uma kristianos ni katsikgoy tuku natlawakgoy. Akxni uma lakchixkuwin makikgolh uma aktsu kgawasa akxilhkgolh pi lu lanka nitlan tuku xakgspulanit. ¡Ninit!

Akxni Pablo akxilhli pi ninit uma aktsu kgawasa, laktamalh chu liswitli xmakan. Chu wan: Ni kalilakgaputsatit. ¡Nitu laninit! ¡Chu xlikana! ¡Lu nilay tamakanajla! ¡Pablo malakastakwanilh! Umakgolh kristianos tiku anta xwilakgolh lu lhuwa lipaxuwakgolh.

Xputumkan tawakaparakgolh kchiki chu wayankgolh. Pablo chuntiya chuwinama asta xkgakgalh. ¡Pero lu liwana katsiyaw pi Eutico nialh lhtatatawi! Pero Pablo, Timoteo chu tiku akxtum taʼankgoy tajukgolh kbarco. ¿Katsiya wix niku naʼankgoy?

Pablo ay makgatsputuma xlimakgtutu talakgchokgotapulit xlakata lichuwinama Cristo. Kaj kʼÉfeso makgapalalh akgtutu kata. Wa xlakata akxni xlimakgtutu alh lichuwinantapuli tlakg makgapalalh nixtachuna akxni xlimakgtiy alh.

Akxni taxtucha kTroas, ni lhuwa kilhtamaku barco tayalh kMileto. Xlakata ni akglhuwa kilómetro xlimakgat niku wi Éfeso, Pablo kamatasaninalh lakchixkuwin tiku pulalinkgoy congregación xalak Éfeso naʼankgoy kMileto xlakata xaʼawatiya nakaxakgatliy. Alistalh, akxni barco xʼamaja, ¡lu lilipuwankgolh akxni Pablo xʼamaja!

Alistalh barco champa kCesarea. Akxni Pablo tamakgxtakgli anta kxchik tamakgalhtawakgen Felipe, anta xpalakachuwina Jehová xtukuwani Agabo wan pi akxni Pablo nachan kJerusalén natamaknukan kpulachin. Chu chuna lalh la xwanit palakachuwina Agabo. Akxni akgtiya kata xtawilanit kpulachin kCesarea, Pablo malakgachaka kRoma xlakata César mapakgsina xalak Roma namakgalhapaliy. Naʼakxilhaw tuku lalh akxni linka kRoma.