Naʼanan talakastakwanat xlakata talakgmaxtut

Akxni natalakapastaka akxni tinilh Cristo, tlan nalilakpuwanaw tuku lu tlan nakgalhiyaw xlakata talakgmaxtut. Pulaktum wa talakastakwanat. Jehová nikxni xlakpuwanit pi xniw. Wa xlakata, tuku tlakg tuwa tuku titaxtuyaw wa akxni niy chatum tiku lu paxkiyaw (1Co 15:26). Jesús lu patinalh akxni kaʼakxilhli kstalaninanin pi xlakgtasamakgo akxni nilh Lázaro (Jn 11:33-35). Xlakata Jesús chuna likatsi la xTlat, katsiyaw pi Jehová nitlan limakgkatsi akxni kinkaʼakxilhan pi tasayaw xlakata niy tiku lu paxkiyaw (Jn 14:7). Jehová lu lakaskin pi kachalh kilhtamaku akxni nakamalakastakwani tiku ni makgxtakgkgolh chu nachuna akinin (Job 14:14, 15).

Xlakata chatum Dios tiku paxki tuku liwana talakkaxwilinit, akxni naʼanan talakastakwanat na ni kaj akglakgwa katilalh (1Co 14:33, 40). Ni kaj katitasaw xlakata nika, napaxuwayaw xlakata nakamakgamakglhtinanaw tiku nalakastakwanankgo. ¿Lilakpuwana uma takgalhkgalhin, liwaka akxni wi tiku niy? (2Co 4:17, 18). ¿Paxtikatsiniya Jehová xlakata naʼanan talakastakwanat chu xlakata kinkawaniyan kBiblia pi nalatamaparakgo tiku nikgonit? (Col 3:15).

• ¿Tiku xalak mifamilia nema tlakg akxilhputuna?

• ¿Tiku lakgapasputuna nema lichuwinan Biblia chu tachuwinamputuna?