Xlimapakgsin Tamapakgsin: Tlawakan tuku Dios lakaskin

AKXILHA pi mintalakatsu akxilhman chu na kaʼakxilhma mifamilia. Akxni akxilha, wix waniya tlen chuna la lismaninita. Kgalhtiyan chu makawaniyan pi kalakgtalakatsuwi. Waniyan: «Wi tuku kkgalhskimputunan. ¿Tuku tlawa pi wixin tanu la nalikatsiyatit?» Wix waniya: «¿Tuku xlakata?». Xla waniyan: «Wixin xtatayananin Jehová, ¿ni xlikana? Wixin ni chuna la amakgapitsin. Ni tlawayatit la amakgapitsin takanajla: ni tlawayatit paskua xalak kachikin, ni makgtanuyatit kpolítica chu kʼguerra. Ni xkuliyatit. Chu mifamilia tasiya pi lu akgstitum lamakgo. ¿Tuku xlakata lhuwa tuku ni tlawayatit?».

Xlakata kkgalhakgaxmataw xTamapakgsin Dios. Jesús kiMapakgsinakan chu putum kilhtamaku kinkamaskulunkiman. Xla kinkamakgtayaman naklatamayaw chuna la xla chu ni naklikatsiyaw la uma xalixkajni kakilhtamaku. Kʼuma pulaktutu, naʼakxilhaw la xTamapakgsin Mesías maskulunkinit xtakanajla xkachikin Dios, kxlatamatkan chu la talakkaxwilinit, xlakata natamalanki Jehová.