Carta xla Lakgkgolotsin tiku Pulalinkgo xtatayananin Jehová 2017

Natalan tiku lu kkapaxkiyan:

Ksiglo akgtujun akxni nina xmin Jesús, palakachuwina Ezequiel ma’akxilhnika tuku lu kaks malakawaninan. Akxilhli akgtum lanka putlaw, akgtum putlaw xalak akgapun, xpulalima Tiku lakgchan namapakgsinan xlikalanka kakilhtamaku. Chu tuku tlakg kaks malakawaninan wa la tatsuwi. Xtatsuwi chuna la xlilakapala an xkgakganat, asta akxni tanu tiji xtiya, chu tlan chuna xtlawa maski ni xmaktuju la xlilakapala x’an chu na ni xtalakaskin natalakgspita (Ezeq. 1:4, 9, 12, 14, 16-27).

Uma tuku ma’akxilhnika kinkamalakapastakayan pi pulaktu xkachikin Jehová nema wi k’akgapun putum kilhtamaku tatsuwima. ¿Chu tuku tlan nawanaw xlakata xkachikin xalak katiyatni? Kata nema titaxtulh liwana litasiya pi Jehová na lakapala matsuwima xkachikin kkatiyatni.

Unu k’Estados Unidos, tiku wilakgolh kBetel lu lhuwa skujmakgolh xlakata talakxijmakgolh, taxtumakgolh kBrooklyn chu amakgolh kxasasti niku napulalinkan taskujut xlikalanka katiyatni, kWarwick, Nueva York, makgapitsi amakgolh k’alakatanu chu amakgapitsi kamalakgachamaka xlakata nalichuwinankgo Dios. Betelitas xla lakalhuwa sucursales xlikalanka katiyatni na lhuwa skujmakgolh xlakata tlawamakgolh, kaxtlawamakgolh o talakxijmakgolh alakatanu kBetel. ¿Chu wix? Maski nitu talakxijpat, xlikana pi wi atanu tuku tlawapat chu lhuwa tuku liskujpat.

Lakgkgolotsin tiku Pulalinankgo lu tlan limakgkatsikgo chu litatliwakglhkgo akxni akxilhkgo la xkachikin Dios xlikalanka katiyatni tlakg lhuwa skujma chu tlawamakgolh chuna la lakapala ama xkachikin Jehová. Lhuwa ankgonit makgtayanankgo niku tlakg talakaskin tamakgtay. Amakgapitsin ankgonit makgtayanankgo k’atanu tachuwin. Chu lhuwa xasasti la lichuwinamakgolh Dios o nichuna la xlismanikgonit. Chu amakgapitsin tlakg skujnanimakgolh Dios chu pulaklhuwa la tlawamakgolh. Chu putum kstalaninanin Cristo tiku ni makgxtakgkgo Dios, tiku linkgoya kata chu tatatlakgo, liskujmakgolh xlakata namakglhtinankgo latamat, chuntiya skujnanimakgolh Jehová chu makgtayanamakgolh xlakata nalitasiya pi Satanás lu xa’akgsanina (1 Cor. 9:24).

Liwana kakatsi pi Jehová akxilha putum tuku tlawapat (Heb. 6:10). Xlakata lu skujnaniputunatit Dios kinkamalakapastakayan Abrahán chu Sara. Akxni xkgalhi max 70 kata taxtulh k’Ur k’akgtum kachikin xalak Caldea chu kalilh xfamilia kCanaán k’akgtum kachikin nema makgat xwi, niku tawilalh klaktsu chiki akgtum ciento kata nema latamalh. Abrahán chu xpuskat limasiyakgolh akgtum lu tlan talakapastakni (Gén. 11:31; Hech. 7:2, 3).

¿Na limasiyapat uma talakapastakni? Putum wixin tiku tayanipatit chu ni makgxtakgatit Dios k’uma xatuwa kakilhtamaku, tlawapatit tuku Jesús kinkawanin natlawayaw. Xla wa: «Wa xlakata kapitit chu kakamakgtayatit latamanin xliputum kachikinin xlakata kistalaninanin nawankgo, kakamunutit kxtukuwani xaTlat chu xaKgawasa chu kxtukuwani espíritu santo» (Mat. 28:19, Traducción del Nuevo Mundo, TNM).

Asta tachuwin «kapitit», nema limaklakaskilh Jesús, limasiya pi talakaskin natatsuwiyaw, naskujaw. Lu lipaxuw akxni akxilhaw pi kstalaninanin Cristo lhuwa skujkgonit kata nema titaxtulh. Liwana tasiya pi xatliwakga xmakan Jehová sikulunatlawama taskujut xlakata kalitachuwinamaka xalakwan tamakatsin xla Tamapakgsin putum kachikinin (Mar. 13:10).

Chu lhuwa makgamakglhtinamakgo uma tamakatsin. Katata 8,340,847 tiku lichuwinankgolh Dios chu akgatunu papaʼ liwaka 10,115,264 tiku kalimakgalhtawakgeka Biblia. Liwana tasiya pi putlaw xalak akgapun tatsuwima chu wix nachuna. Chuntiya katlawa uma lu tlan taskujut kʼuma ni xalhuwa kilhtamaku nema Jehová mastama xlakata nina malakchuwa malakcha xla lakgtaxtut.

Lu tlan texto xla uma kata 2017: «Kalipawanti Jehová chu katlawa tuku tlan» (Sal. 37:3). Akxni wix kgalhakgaxpata uma tachuwin, tlawaya tuku tlan akxni skujnaniya Jehová, limasiya pi lipawana. Katlawa litlan, putum kilhtamaku kalakapastakti pi ni miʼakstu wila. Xtachuwin Jesús putum kilhtamaku xlikana nakgantaxtu kimpalakatakan: «¡Ka’akxilhtit!, kkatawilan chali chali asta xlisputni kakilhtamaku» (Mat. 28:20, TNM).

Liwana kakatsitit pi Jehová chuntiya nasikulunatlawa taskujut nema tlawapatit. Maski ni lhuwa o lhuwa tuku tlawapatit, tuku Jehová xlakaskinka akxilha wa komo tlawapatit putum tuku matlaniyatit chu pi xlikana tlawaputunatit. Uma tamaskiwin tlan mamakgkatsini chu xatapaxuwan nakinkamakgamakglhtinanan (2 Cor. 9:6, 7). Chuntiya tlakg katalakatsuwini xapaxkina minTlat, akxni natlawaya oración, nalikgalhtawakgaya xTachuwin, napina ktamakxtumit chu ni kamakgxtakgti la lichuwinana Dios.

Asta akxni uma «nialh lhuwa kilhtamaku» nema maxkikanit Akgskgawini nasputa, xla nalimaklakasin putum tuku kgalhi xlakata natlawa pi nialh xaʼakgstitum naskujnaniyaw Jehová (Apoc. 12:12). Ni kamakgxtakgti Jehová, chu Akgskgawini nila tuku katitlawanin (Sal. 16:8). Kakatsitit pi lu kkapaxkiyan chu lu kkapaxtikatsiniyan putum tuku tlawayatit xpalakata xTamapakgsin kiMalanakan k’uma x’awatiya kilhtamaku.

Minatalankan,

Lakgkgolotsin tiku Pulalinkgo xtatayananin Jehová