Referencias xlakata Tuku natalikgalhtawakga Xlatamat chu xtaskujut kstalanina Cristo
1-7 XLA ENERO
TUKU LHUWA XTAPALH XALAK BIBLIA | MATEO 1-3
«Tamapakgsin xalak akgapun talakatsuwinit»
(Mateo 3:1, 2) Ama kilhtamaku Juan Mununa, milh chu xlichuwinama Dios kxakaskakni xtiyat Judea, 2 chu xwan: «Kamakgxtakgtit mintalakgalhinkan, xlakata Tamapakgsin xalak akgapun talakatsuwinit».
nwtsty notas xla takgalhtawakga xlakata Mt 3:1, 2
xlichuwinama: Tachuwin xagriego wamputun «nalichuwinankan xtachuna makatsinina». Kilhchanima la makatsininankan: akxni katiwa chu kaniwa niku masiyakan, ni xtachuna akgtum taʼakgchuwin nema mastakan niku makxtum wilaka.
Tamapakgsin: Xapulana akxni tasiya tachuwin xagriego basiléia, nema kilhchani xtamapakgsin chatum mapakgsina, niku mapakgsinan chu tiku kamapakgsi. Uma tachuwin xagriego 162 wilikanit kEscrituras Griegas Cristianas, kMateo 55 tatsokgtawilanit chu makglhuwa kilhchani xTamapakgsin Dios xalak akgapun. Mateo makglhuwa maklakaskilh uma tachuwin kxʼEvangelio wa xlakata tlan xwanika «Evangelio xla Tamapakgsin».
Tamapakgsin xalak akgapun: Umakgolh tachuwin puxamakaw wilikanit, chu kajwatiya Evangelio xla Mateo. Evangelios xla Marcos chu Lucas tamaklakaskin tachuwin «xTamapakgsin Dios» tuku limasiya pi «xTamapakgsin Dios» wi kʼakgapun chu lata anta mapakgsinamacha (Mt 21:43; Mr 1:15; Lu 4:43; Da 2:44; 2Ti 4:18).
talakatsuwinit: Unu kilhchani pi tiku aku namapakgsinan kTamapakgsin xalak akgapun nialh makgas xʼama tasiya.
(Mateo 3:4) Klhakgat Juan xlitatlawanit xchixit camello chu xlitatampulakgchinit xuwa. Xtuki chu ksakgsi cera xalak kakiwin wa tuku xwa.
nwtsty multimedia
Xtalhakgan chu la xtasiya Juan tiku xMununan
Juan xwilinit lhakgat nema xlitatlawanit xchixit camello chu xlitatampulakgchi xuwa nema tlan xpulinkan tuku xalaktsu. Palakachuwina Elías xtachuna lhakganalh la Juan (2Re 1:8). Lhakgat nema xlitatlawanit xchixit camello kxakganan chu xmaklakaskinkgo tiku ni xkgalhikgo tumin. Tiku xkgalhikgo tumin xlimaklakaskinkgo lhakgat nema xlitatlawanit lino o seda (Mt 11:7-9). Xlakata Juan nazareo xwanit lata lakachilh, max nikxni xchukunikanit xchixit. Xlakata la xtasiya chu xlhakganan Juan latamanin xkatsikgo pi ni lhuwa tuku xkgalhi chu maklakaskilh xlatamat xlakata natlawa xtalakaskin Dios.
Xtuki
Anta kBiblia, tachuwin xtuki tlan kilhchani putum xtuki nema kgalhikgo laktsu xʼantena, tlakg kilhchanima nema makxtum ankgo. Akgtum takgalhtawakga nema tatlawalh kJerusalén masiyalh pi xtuki xla xakaskakni tiyat kgalhikgo 75% xla proteína. La uku, kkachikinin nema lichuwinan Biblia, akxni nina wakan maktinikan xʼakgxakga, xtantun, xpakganin chu xpokgo. Tuku akgataxtu, tlan xachan o ni xachan wakan. Wankan pi uma laktsu animales kgalhikgo lhuwa proteínas chu takgalhwanan la makgaxilh, o cangrejo.
ksakgsi cera xalak kakiwin
Unu akxilhaw niku lamakgo cera xalak kakiwin (1) chu makgtum chaw nema litsama ksakgsi cera (2). Max ksakgsi cera nema walh Juan tlawakgo cera xalak kakiwin nema kalilakgapaskan Apis mellifera syriaca, nema anan kʼama tiyat. Uma laktsu cera tlan latamakgo niku lu lhkaknan chu niku ni lu senan la xakaskakni tiyat xla Judea, pero ni la limaklakaskinkgo tiku liskujkgo cera xlakata tlawanikgo tuku nitlan latamanin. Pero kxli’akgnajatsa siglo akxni nina xmin Cristo, tiku xlamakgo kʼIsrael xliskujkgo uma chu xpuwilikgo tlamank. Lhuwa tekgskanit uma tlamank niku akgtum kachikin xwanit (la uku Tel Rehov), wi kxakaxtum tiyat xla Jordán. Ksakgsi uma cera max xtalakxtum ksakgsi nema la uku makgalakan kʼTurquía.
Kaputsaw kBiblia tuku lhuwa xtapalh
(Mateo 1:3) Xlakgkgawasan Judá xkawanikan Pérez chu Zérah, chu Tamar xtsekan xwanit; xkgawasa Pérez xwanikan Hezrón; xkgawasa Hezrón xwanikan Ram.
nwtsty nota xla takgalhtawakga xlakata Mt 1:3
Tamar: Wa xapulana puskat xlikgalhkitsis nema wilakgo kfamilia niku mincha Mesías nema tsokgli Mateo. Amakgapitsi wa: Rahab chu Rut, lakpuskatin tiku ni israelitas xwankgonit (v. 5); Batseba, «xpuskat Urías» (v. 6), chu María (v. 16). Max kawilika xtukuwanikan uma lakpuskatin xlakata tlawakgolh tuku lu xlakaskinka chu litaxtukgolh xfamilia Jesús komo ni chuna xtiwa max kaj xtiwilika xtukuwani lakchixkuwin.
(Mateo 3:11) Akit chuchut kkalimunuyan xlakata makgxtakgnitantit mintalakgalhinkan, pero tiku aku mima tlakg tliwakga nixawa akit, chu ni kiminini nakmatuxtu xtatunu. Xla nakalimunuyan espíritu santo chu lhkuyat.
nwtsty nota xla takgalhtawakga xlakata Mt 3:11
kkalimunuyan: O «kkamakgjuyan». Tachuwin xagriego baptízo wamputun «makgtsikan, makgjukan». Atanu notas xalak Biblia masiyakgo pi tamunukan kilhchani akgtuminika namakgtsikana. Akgtum kilhtamaku, Juan xmununama lakatum kxakaxtum tiyat xla Jordán, lakatsu Salim, «xlakata anta lhuwa xwi chuchut» (Jn 3:23). Akxni Felipe munulh eunuco etíope xchatiykan «akxtum ankgolh kchuchut» (Hch 8:38). Septuaginta limaklakaskin watiya tachuwin griego k2 Reyes 5:14 akxni wan pi Naamán «tsukulh taʼakgtsi makgtujun kJordán».
8-14 XLA ENERO
TUKU LHUWA XTAPALH XALAK BIBLIA | MATEO 4, 5
«Tuku kinkamasiyaniyan Taʼakgchuwin xalak Sipi»
(Mateo 5:3) Paxuwakgo tiku lakaskinkgo pi Dios kakapulalilh, xlakata xlakan wa nakalakgchan Tamapakgsin xalak akgapun.
nwtsty nota xla takgalhtawakga xlakata Mt 5:3
Paxuwakgo: Uma ni kilhchani tapaxuwan nema makgkatsikgo tiku wi tuku lipaxuwamakgo. Akxni limaklakaskinkan xlakata nalichuwinankan chatum lataman, wamputun pi Dios sikulunatlawanit chu pi tlan akxilha. Uma tachuwin nalimaklakaskinkan xlakata nalichuwinankan xlilanka Dios chu Jesús kʼakgapun (1Ti 1:11; 6:15).
tiku lakaskinkgo pi Dios kakapulalilh: Unu, tachuwin xagriego nema tamatitaxti «tiku lakaskinkgo tamakgtay», wamputun «tiku ni kgalhikgo tumin (tiku ni kgalhikgo tuku maklakaskinkgo, tiku skiwayankgo)», kilhchani tiku wi tuku maklakaskinkgo chu liwana katsikgo. Watiya uma tachuwin maklakaskinkan kLucas 16:20, 22 akxni lichuwinan tiku «kskiwayan» nema xwanikan Lázaro. Tachuwin griego nema makgapitsi matitaxtikgo «tiku ni kgalhikgo espíritu» kilhchani chatum lataman nema liwana katsi tuku maklakaskin xtakanajla chu lakaskin xtamakgtay Dios.
(Mateo 5:7) Paxuwakgo tiku lakgalhamanankgo, xlakata xlakan nakalakgalhamankan.
nwtsty nota xla takgalhtawakga xlakata Mt 5:7
lakgalhamanankgo: Tachuwin xalak Biblia nema tamatitaxti «lakgalhamanan» chu «talakgalhaman» ni kajwatiya kilhchani tapatinankan o lakgalhamanankan akxni wi tiku talakkaxlakan. Wamputun, talakgalhaman nema makgkatsi chatum lataman chu tlawa pi nakamakgtayaputun tiku maklakaskinkgo.
(Mateo 5:9) Paxuwakgo tiku wilikgo takaksni, xlakata xlakan nakalimapakuwikan «xkamanan Dios».
nwtsty nota xla takgalhtawakga xlakata Mt 5:9
tiku wilikgo takaksni: Ni kajwatiya ni tlawakgo taʼakglhuwit, wata liskujkgo xlakata naʼanan takaksni.
Kaputsaw kBiblia tuku lhuwa xtapalh
(Mateo 4:9) Chu wanilh: «Putum umakgolh nakmaxkiyan komo natatsokgostaya, chu kaj makgtum nakinkakninaniya».
nwtsty nota xla takgalhtawakga xlakata Mt 4:9
makgtum nakinkakninaniya: Tachuwin xagriego nema tamatitaxti «kakninanikan» wi kkilhtamaku aoristo, nema wamputun pi la kxkilhtamaku o kaj lakapala la. Akxni matitaxtikan «makgtum nakinkakninaniya» masiya pi Akgskgawini ni skinilh Jesús pi makglhuwa xkakninanilh, wata xkilhchanima pi «kaj makgtum xkakninanilh».
(Mateo 4:23) Chu Jesús xlapula kxlikalanka Galilea, xmasiyatilha ksinagogas chu xlichuwinantilha xatlan tamakatsinin xla Tamapakgsin chu xkamapaksama putum tajatat chu putum takatsanajwat nema xkgalhikgo latamanin.
nwtsty nota xla takgalhtawakga xlakata Mt 4:23
xmasiyatilha [...] xlichuwinantilha: Tuku ni xtachuna akxni masiyakan chu lichuwinankan wa pi tiku masiya ni kaj makatsininan: stakyawanan, lichuwinan tuku xlakata chuna wan chu wi tuku limasiya pi xlikana tuku wan.
15-21 XLA ENERO
TUKU LHUWA XTAPALH XALAK BIBLIA | MATEO 6, 7
«Chuntiya, pulana kaputsatit xTamapakgsin»
(Mateo 6:24) Nila skujnikan chatiy malana; xlakata nasitsiniya chatum chu napaxkiya achatum, namaxkiya kakni chatum chu achatum nalakgmakgana. Nila nalitaxtuyatit xlakskujnin Dios chu xlakskujnin Tumin.
nwtsty nota xla takgalhtawakga xlakata Mt 6:24
skujnikan: Tachuwin xagriego kilhchani tiku skuja la chatum skujni, uma wamputun tiku kaj chatum malana kgalhi. Unu Jesús wa pi chatum kstalanina Cristo nila maxki kakni nema lakgchan Dios chu na lhuwa tuku nakgalhiputun.
(Mateo 6:33) Chuntiya, pulana kaputsatit xTamapakgsin chu tuku xa’akgstitum akxilha Dios, chu putum uma tuku maklakaskinatit na nakamaxkikanatit.
nwtsty nota xla takgalhtawakga xlakata Mt 6:33
Chuntiya [...] kaputsatit: Kxagriego, tachuwin nema maklakaskinkan masiya pi maklhuwa chuna tlawakan chu tlan tamatitaxti «maklhuwa kaputsatit». Xaxlikana kstalaninanin Jesús ni xʼamakgo putsakgo Tamapakgsin kaj tsinu kilhtamaku chu alistalh atanu tuku xtlawakgolh. Tamapakgsin wa tuku xapulana xwilikgolh kxlatamatkan.
xTamapakgsin: Kmakgapitsi xamakgan tatsokgni xagriego wankgo: «xTamapakgsin Dios».
xa’akgstitum: Tiku putsa xa’akgstitum Dios xatapaxuwan kgalhakgaxmata chu tlawa tuku xla wan xlakata tuku tlan chu tuku ni tlan. Uma tamasiy ni xtatalakxtumi tuku xwankgo fariseos, tiku xwiliputunkgo tuku xlakan xlakpuwankgo pi xa’akgstitum (Mt 5:20).
Kaputsaw kBiblia tuku lhuwa xtapalh
(Mateo 7:28, 29) Akxni Jesús wankgolh umakgolh tachuwin, uma tlawalh pi lhuwa latamanin kaks xlilakawankgolh la xmasiya, 29 xlakata xla xkamasiyanima la tiku kgalhi limapakgsin, chu ni xtachuna la lakgtsokgkinanin.
nwtsty notas xla takgalhtawakga xlakata Mt 7:28, 29
kaks xlilakawankgolh: Tachuwin xagriego nema unu tamaklakaskin wamputun «lu kaks nalilakawankan, asta max nalimaxanankan». Uma masiya pi makglhuwa chuna la, uma masiya pi tuku Jesús wa lu kaks kamalakawanilh tiku kgaxmatnikgolh.
la xmasiya: Uma tachuwin kilhchanima la xmasiya Jesús, tuku xlimaklakaskin, tuku xkilhchani xtastakyaw, chu putum tamasiy nema wi Taʼakgchuwin xalak Sipi.
ni xtachuna la lakgtsokgkinanin: Jesús xpalakachuwinan Jehová, la tiku kgalhi limapakgsin, chu tuku xmasiya xkilhtiya kxTachuwin Dios, nixtachuna lakgtsokgkinanin tiku xmasiyakgo tuku xwankgo makgalhtawakgenanin tiku lu xkalakgapaskan (Jn 7:16).
22-28 XLA ENERO
TUKU LHUWA XTAPALH XALAK BIBLIA | MATEO 8, 9
«Jesús xkapaxki latamanin»
(Mateo 8:1-3) Akxni xla taktachi ksipi, lhuwa latamanin stalanikgolh. 2 Chu ¡kaʼakxilhti!, chatum tiku xkgalhi lepra lakgtalakatsuwilh chu lakgtakilhputalh, chu wanilh: «Malana, komo xlakaskinti, tlan xkimapaksa». 3 Wa xlakata tamakgastonkgli, xamalh chu wanilh: «¡Klakaskin! Kapaksti». Chu tunkun makgxtakgli lepra.
nwtsty nota xla takgalhtawakga xlakata Mt 8:3
xamalh: Anta xLimapakgsin Moisés xwan pi tipuxam kilhtamaku alakatanu xkawilika tiku xkgalhikgo lepra xlakata ni nalamapasikgo (Le 13:45, 46; Nú 5:1-4). Pero, tiku xpulalinkgo judíos lu xmalakatsalikgo tuku xwankgo. Akgtum liʼakxilhtit, nila xtalakatsuwinikgo akgtati codos, uma wamputun 1.8 metros, tiku xkgalhikgo lepra. Pero akxni xʼunan tlakg makgat xlitawilatkan 100 codos, max 45 metros. Uma limapakgsin xtlawa pi nitlan xkalikatsinika tiku xkgalhikgo lepra. Xtalismaninkan judíos tlan xlichuwinankgo rabino tiku xtatsekgni tiku xkgalhikgo lepra chu atanu tiku xmakani chiwix xlakata ni xtalakatsuwinikgolh. Jesús nichuna xlikatsi la judíos, xla lakgalhamalh ama chixku chu tlawalh tuku judíos ni xtitlawakgolh: xamalh. Chu xamalh maski kaj akgtum xtachuwin tlan xmakuchilh xlepra (Mt 8:5-12).
Klakaskin: Jesús ni kaj kgaxmatli tuku skinilh kaj masiyalh pi xtlawaputun, chuna limasiyalh pi xpaxkinan.
(Mateo 9:9-13) Alistalh, akxni anta xtitaxtuma Jesús akxilhli chatum chixku, tiku xwanikan Mateo, xwi kchiki niku makglhtinankan tuku lilakgaxokgonankan, chu wanilh: «Kistalanina kawanti». Wa xlakata xla tayalh chu stalanilh. 10 Alistalh, akxni xwayamakgolh kchiki, ¡kaʼakxilhti!, chalhuwa xmatajinanin lilakgaxokgon chu tiku xtlawakgo talakgalhin lakgminkgolh chu tsukukgolh tawayankgo Jesús chu xtamakgalhtawakgen. 11 Pero akxni fariseos akxilhkgolh uma, kawanikgolh xtamakgalhtawakgen: «¿Tuku xlakata mimakgalhtawakgenakan katawayamakgolh xmatajinanin lilakgaxokgon chu tiku tlawakgo talakgalhin?». 12 Jesús kgaxmatli tuku wankgolh, chu wa: «Latamanin tiku ni tatatlakgo ni maklakaskinkgo makuchina, pero tiku tatatlakgo maklakaskinkgo makuchina. 13 Kapitit, chu ka’akgatekgstit tuku wamputun umakgolh tachuwin: “Klakaskin talakgalhaman, chu ni wa tamakamastan”. Xlakata ni kminit katasani tiku xaʼakgstitum lamakgolh, wata wa tiku tlawakgo talakgalhin».
nwtsty nota xla takgalhtawakga xlakata Mt 9:10
xwayamakgolh: Akxni akxtum xtawayankan achatum xlimasiya pi tlan xtalalinkan. Wa xlakata, kxkilhtamaku Jesús, judíos nikxni xtitawayankgolh tiku ni judío xwanit.
xmatajinanin lilakgaxokgon: Lhuwa judíos xmatajinankgo lilakgaxokgon xlakata mapakgsinanin xalak Roma. Latamanin ni xkaʼakxilhputunkgo xlakata xtapakgsinikgo atanu kachikin nema xlakan lu xkajnikgo xlakata tlakg skinkgo tumin nixawa tuku xwan limapakgsin. Judíos xlakmakgankgo uma matajinanin lilakgaxokgon tiku na judíos xwankgonit, chu xkatamalakxtumikan lakgalhinanin chu lakpuskatin tiku stakgo xmaknikan (Mt 11:19; 21:32).
(Mateo 9:35-38) Chu Jesús tsukulh latapuli kxliputum kachikinin chu laktsu kachikinin, xmasiyama ksinagogas chu xlichuwinama xalakwan tamakatsin xla Tamapakgsin chu xmapaksama tipalhuwa tajatat chu tipalhuwa tuku nitlan. 36 Akxni kaʼakxilhli lhuwa latamanin, lu kalakgalhamalh, xlakata la xtamakchukutamakgonit chu niti xkakuentajtlawama la borregos nema ni kgalhikgo xmapuchwayaninakan. 37 Wa xlakata kawanilh xtamakgalhtawakgen: «Chuna, tachanan lu lhuwa, pero skujnin ni chalhuwa. 38 Wa xlakata, lu kaskinitit xMalana tachanan pi kakamalakgachalh tiku namakikgo xtachanan».
nwtsty nota xla takgalhtawakga xlakata Mt 9:36
kalakgalhamalh: Tachuwin xagriego nema tamaklakaskin (splagkjnízomai) tatalakxtumi tachuwin «pulakni» o «paluwa» (splagkjna) chu limasiya tuku makgkatsi chatum latamat xpulakni. Wa tachuwin xagriego nema tlakg tliwakga limasiya talakgalhaman.
29 XLA ENERO ASTA 4 XLA FEBRERO
TUKU LHUWA XTAPALH XALAK BIBLIA | MATEO 10, 11
«Jesús tlan mamakgkatsininalh»
(Mateo 10:29, 30) Akgtum tumin nema ni lhuwa xtapalh kalistakan tantiy laktsu tsiktsi, ¿ni xlikana? Pero minTlatkan xalak akgapun katsi asta akxni tantum xanin tamayacha kkatiyatni. 30 Pero asta minchixitkan xalak mi’akgxakgakan katsi la xlikganlhuwa.
nwtsty nota xla takgalhtawakga xlakata Mt 10:29, 30
laktsu tsiktsi: Tachuwin xagriego strouthíon makglhuwa limaklakaskinkan akxni lichuwinankan gorriones, tsiktsi nema wakan chu ni tapalaxla listakan.
Akgtum tumin nema ni lhuwa xtapalh: Wamputun «akgtum asarion» tuku xlixokgonikan chatum chixku akxni skuja tipuxamakitsis minuto (kaʼakxilhti sgd, sección 18). Ama kilhtamaku, akxni xlimakgtutu xlakgapaxialhnama Galilea, Jesús wa pi tantiy laktsu tsiktsi xlimastakan akgtum asarion. Chu max akgtum kata alistalh, akxni xlichuwinama Dios kJudea, Jesús wa pi tlan xtamawakan tankitsis laktsu tsiktsi akgtiy asarion (Lu 12:6). Akxni tamalakxtumiyaw uma akgtiy textos katsiyaw pi uma laktsu tsiktsi ni lhuwa xtapalh xwanit xpalakata stananin, chu komo xtamawakan tantati, atantum xmaskiwikan.
asta minchixitkan xalak mi’akgxakgakan katsi la xlikganlhuwa: Wankan pi x’akgxakga latamanin max kgalhi liwaka 100,000 chixit. Xlakata Jehová katsi la xlikganlhuwa chixit kgalhiyaw limasiya pi kalakgalhaman chatunu chatunu kstalanina Jesús.
nwtsty multimedia
Gorrión
Tsiktsi nema wakan ni tapalaxla listakan. Tlan xtamawakan tantiy tuku xlixokgonikan chatum chixku akxni skuja tipuxamakitsis minuto. Tachuwin xagriego nema limaklakaskinkan akxni lichuwinankan laktsu tsiktsi uma namakgtanuma gorrión (Passer domesticus biblicus) chu gorrión moruno (Passer hispaniolensis), nema ananku kʼIsrael.
(Mateo 11:28) Kakilakgtantit, putum wixin tiku lu tlakgwanitantit chu lu tsinka mintakukakan, chu akit nakkamajaxayan.
nwtsty nota xla takgalhtawakga xlakata Mt 11:28
lu tsinka mintakukakan: Jesús kawani latamanin tiku lu tsinka xtakukakan xlakata tuku lilakgaputsakgo chu xtaskujutkan. Xtakakninkan xlitaxtuma akgtum tsinka takuka xlakata talismanin nema latamanin xwilikgonit xTamapakgsin Moisés (Mt 23:4). Asta sábado kilhtamaku akxni xjaxkan, lu tuwa xmakgkatsikgo (Éx 23:12; Mr 2:23-28; Lu 6:1-11).
akit nakkamajaxayan: Tachuwin xagriego «jaxkan» max kilhchani akxni tawilakan o tamakan (Mt 26:45; Mr 6:31) o «tlan namamakgkatsinikan tiku lhuwa skujnit xlakata natatliwakglhpara» (2Co 7:13; Flm 7). Texto nema stala limasiya pi nawilikan «xmukiwi» Jesús (Mt 11:29) kilhchani naskuja chu ni najaxa. Tachuwin xagriego nema tamaklakaskin limasiya pi chuntiya tatlawama chu xlakata lichuwinankan Jesús masiya pi xla tlan kamamakgkatsini chu kamatliwakglha tiku tlakgwanit xlakata nakukanamputun xmukiwi Jesús, nema ni tuwa linkan chu ni tsinka.
(Mateo 11:29, 30) Kalipitit kimukiwi chu nachuna katlawatit la akit, xlakata akit ni xaluku chu ktaktuju, komo chuna natlawayatit natatliwakglhatit. 30 Xlakata kimukiwi ni tuwa linkan chu tuku kkaskiniyan nalipinatit ni tsinka.
nwtsty nota xla takgalhtawakga xlakata Mt 11:29
Kalipitit kimukiwi: Jesús limaklakaskilh tachuwin «mukiwi» xlakata nalichuwinan talakgachixkuwit chu nakgalhakgaxmatkan limapakgsin nema masta achatum. Komo Jesús xlichuwinama akgtum mukiwi nema tlan chatiy xlinkgo, akgtum nema Dios xmakukanilh, xkitaxtulh la xkawanilh kstalaninanin pi xtachaxkgolh chu xla xʼama kamakgtaya. Komo chuna, tlan xmatitaxtika uma tachuwin: «Akxtum kakukaw uma mukiwi». Pero komo uma mukiwi wa nema Jesús kamakuki atanu, masiyaputun pi wa nakgalhakgaxmataw chu nastalaniyaw tuku wan.