Referencias xlakata Tuku natalikgalhtawakga Xlatamat chu xtaskujut kstalanina Cristo
5-11 XLA MARZO
TUKU LHUWA XTAPALH XALAK BIBLIA | MATEO 20, 21
«Tiku lanka litaxtuputun kmilakgstipankan, xlilat nakaskujnani amakgapitsin»
(Mateo 20:3) Akxni taxtupa kamakgnajatsa hora tsisa, kaʼakxilhpa anta kplaza niku stanankan amakgapitsi tiku nitu xkgalhikgo xtaskujutkan;
nwtsty multimedia
Kplaza niku stanankan
Makgapitsi niku kstanankan, chuna la tasiya Tuku natalikgalhtawakga, xlilhman tiji xwilikan. Lakgachunin, stananin lhuwa listat xwilikgo ktiji chu nila xtitaxtukan. Latamanin xtamawakgo tuku tamaklakaskin kchiki, tuku lu tapalaxla nema litatlawanit vidrio chu tuku aku xtamakgalanit. Xlakata liwat ni xmakikan krefrigerador, latamanin chali chali x’ankgo tamawanankgo. Anta, tiku x’ankgo tamawanankgo xkgaxmatkgo tamakatsinin tuku xliminkgo stananin chu amakgapitsin tiku xala alakatanu, lakgskgatan xkgamanankgo chu tiku ni xkgalhikgo taskujut xkgalhkgalhikgo pi wi tiku xkasakwalh. Akxni x’an niku kstanankan, Jesús xkamakuchi tiku xtatatlakgo chu Pablo xlichuwinan Dios (Hch 17:17). Pero xalaktlankajwa escribas chu fariseos lu xlakgatikgo pi latamanin xka’akxilhkgolh chu xkamakgachipakgolh niku lhuwa xtsamakan.
(Mateo 20:20, 21) Alistalh xpuskat Zebedeo chu chatiy xlakgkgawasan talakatsuwinikgolh Jesús chu xla maxkilh kakni. Wi tuku kskiniputun. 21 Jesús wanilh: «¿Tuku lakaskina?». Xla kgalhtilh: «Kawanti pi umakgolh chatiy kilakgkgawasan napaxtutawilakgoyan, chatum kmimpakgastakat chu achatum kmimpakgxwiki anta kminTamapakgsin».
nwtsty notas xla takgalhtawakga xlakata Mt 20:20, 21
xpuskat Zebedeo: Uma wamputun xtsekan apóstoles Santiago chu Juan. Chuna la wan kxʼevangelio Marcos, wa Santiago chu Juan tiku lakgminkgolh Jesús. Liwana tasiya pi tuku kskima xatse xlakan kskimakgolh, maski limaklakaskinkgolh xtsekan, Salomé, tiku max xnapa Jesús xwanit (Mt 27:55, 56; Mr 15:40, 41; Jn 19:25).
chatum kmimpakgastakat chu achatum kmimpakgxwiki: Wamputun pi tiku chuna tawilakgo kgalhikgo kakni chu limapakgsin, pero tiku tlakg kgalhi kakni wa tiku tawila kpakgastakat (Sl 110:1; Hch 7:55, 56; Ro 8:34).
(Mateo 20:25-28) Pero Jesús katasanilh chu wa: «Wixin katsiyatit pi xmapakgsinanin kachikinin kamapakgsikgo latamanin chuna la lakaskinkgo, chu tiku xlakaskinka litaxtukgo kapuxkunanikgo latamanin. 26 Pero wixin ni chuna militlawatkan. Putum tiku lanka litaxtuputun kmilakgstipankan, xlilat nakaskujnani amakgapitsin, 27 chu putum tiku xapulana litaxtuputun kmilakgstipankan, miskujnikan xliwanat. 28 Chuna la xKgawasa chixku ni milh xlakata naskujnanikan, wata milh xlakata nakaskujnani amakgapitsin chu xlakata namasta xlatamat chu nakalilakgmaxtu lhuwa latamanin».
nwtsty notas xla takgalhtawakga xlakata Mt 20:26, 28
nakaskujnani: O «skujni». Biblia makglhuwa maklakaskin tachuwin xagriego diákonos akxni lichuwinan tiku ankgalhin kaskujnani amakgapitsin chu ni tlankajwa makgkatsikan. Uma tachuwin tamaklakaskin akxni lichuwinankan Jesucristo (Ro 15:8), xlakskujnin Cristo (1Co 3:5-7; Col 1:23) na kakilhchanima siervos ministeriales (Flp 1:1; 1Ti 3:8). Na tamaklakaskin akxni talichuwinan skujni xalak akgtum chiki (Jn 2:5, 9) chu tiku skujkgo kpumapakgsin (Ro 13:4).
Kaputsaw kBiblia tuku lhuwa xtapalh
(Mateo 21:9) Nachuna, lhuwa tiku xpulanimakgolh chu tiku kstalanimakgolh, chuntiya pixlanka xwankgo: «¡Dios, kkatasaskiniyan kalakgmaxtu xKgawasa David! ¡Tasikulunatlawanit tiku mima kxtukuwani Jehová! ¡Kalakgmaxtu, kkatasaskiniyan wix tiku wilapi katalhman!».
nwtsty nota xla takgalhtawakga xlakata Mt 21:9
kkatasaskiniyan kalakgmaxtu: Wamputun «Hosanna». Uma tachuwin xagriego minitancha ktachuwin xahebreo nema wamputun «kkatasaskiniyan kalakgmaxtu» o «kalakgmaxtu, katlawa litlan». Unu tamaklakaskin xlakata natasaskinikan Dios lakgtaxtut o natlajanankan. Nachuna tlan tamatitaxti «katlawa litlan, kalakgmaxtu». Titaxtulh kilhtamaku, uma tachuwin tamaklakaskilh kʼoraciones chu ktakilhtlin. Ktachuwin xahebreo nema min kSalmo 118:25. Uma salmo na xmin kSalmos xla Hallel, nema xlitakilhtli kPascua. Wa xlakata latamanin lu xmaklakaskinkgo uma tachuwin uma kilhtamaku. Pulaktum la kgalhtinalh Dios akxni skinika pi kalakgmaxtulh xKgawasa David wa akxni malakastakwanilh. Anta kMateo 21:42, Jesús kilhtiyalh tuku wan Salmo 118:22, 23 akxni xlichuwinama Mesías.
xKgawasa David: Wa uma tuku xlilakgapaskan xfamilia Jesús chu tuku xlakgaya la Mesías nema xlichuwinankanit pi xʼama min.
12-18 XLA MARZO
TUKU LHUWA XTAPALH XALAK BIBLIA | MATEO 22, 23
«Kakgalhakgaxmatwi pulaktiy tlakg xlakaskinka limapakgsin»
(Mateo 22:36-38) «Makgalhtawakgena, kLimapakgsin nema maxkika Moisés, ¿tuku tlakg xlakaskinka limapakgsin min?». 37 Xla kgalhtilh: «“Milipaxkit Jehová miDios xliputum minaku chu xliputum milatamat chu xliputum mintalakapastakni”. 38 Wa uma tlakg xlakaskinka chu xapulana limapakgsin.
nwtsty nota xla takgalhtawakga xlakata Mt 22:37
minaku: Uma kilhchani la likatsi chatum lataman. Pero akxni akxtum tamin tachuwin «latamat» chu «talakapastakni», kilhchani tuku makgkatsi chu tuku lakaskin chatum lataman. Akgtutu tachuwin nema tamaklakaskin unu (naku, latamat chu talakapastakni) ni tanu tanu tuku wamputunkgo, wata akxni kamalakxtumikan akxtum tuku wamputunkgo. Chuna tamasiya pi tapaxkit nema kgalhiniyaw Dios xatakgatsin xliwanat.
milatamat: O «xliputum milistakni».
mintalakapastakni: Tuku kinkamakgtayayan nalakapastaknanaw. Chatum lataman namaklakaskin xtapuwan xlakata nalakgapasa Dios chu tlakg napaxki chali chali (Jn 17:3; Ro 12:1). Kʼuma texto xla Deuteronomio 6:5, texto xahebreo limaklakaskin uma akgtutu tachuwin: naku, latamat, chu litliwakga. Pero akxni matitaxtika kxagriego tuku tsokgli Mateo, limaklakaskinka «talakapastakni» chu ni «litliwakga». Lhuwa tuku xlakata chuna matitaxtika. Xapulana, maski xamakgan hebreo ni xʼanan akgtum tachuwin xpalakata «talakapastakni», pero tachuwin hebreo «naku» chuna xmalakpuwaninan. Akxni kaj limaklakaskinkan xlakata wi tuku nalimasiyakan, kilhchani tuku makgkatsiyaw kkimpulaknikan, uma kilhchani tuku lakapastakaw, tuku makgkatsiyaw, kintapuwankan chu tuku kinkamatlawiyan tuku tlawayaw (Dt 29:4; Sl 26:2; 64:6; kaʼakxilhti nota xla takgalhtawakga minaku xlakata uma versículo). Wa xlakata akxni texto xahebreo limaklakaskin tachuwin naku, Septuaginta griega makglhuwa limaklakaskin tachuwin talakapastakni (Gé 8:21; 17:17; Pr 2:10; Is 14:13). Atanu tuku xlakata max Mateo limaklakaskilh tachuwin xagriego «talakapastakni» akxni lichuwinalh Deuteronomio 6:5, wa xlakata tachuwin hebreo nema tamatitaxti «litliwakga» max na kilhchani xlitliwakga kimaknikan, tuku lakpuwanaw o kiliskgalalakan. Xlakata tachuwin xahebreo chu xagriego wi tuku akxtum wamputunkgo, kinkamasiyaniyan tuku xlakata tiku tsokgkgolh Evangelios ni watiya tachuwin maklakaskinkgolh akxni lichuwinankgolh tuku wan Deuteronomio.
(Mateo 22:39) Xlipulaktiy nema na xtachuna, wa uma: “Milipaxkit mintalataman chuna la mi’akstu paxkikana”.
nwtsty nota xla takgalhtawakga xlakata Mt 22:39
Xlipulaktiy: Takgalhtin nema maxkika fariseo tekgsaw kMateo 22:37, pero, kʼuma versículo, Jesús ni kajwatiya kgalhtinalh tuku kgalhskinka chu lichuwinalh xlipulaktiy limapakgsin (Le 19:18). Chuna limasiyalh pi uma pulaktiy limapakgsin nila kamapitsikan chu lichuwinankgo putum tuku wan Limapakgsin chu Palakachuwinanin (Mt 22:40).
mintalataman: Tachuwin xagriego nema unu tamatitaxti «mintalataman» (wamputun: «tiku lakatsu wi») ni kaj tiku mintalakatsu. Na tlan kilhchani katiwa tiku talalinkan (Lu 10:29-37; Ro 13:8-10).
(Mateo 22:40) Limapakgsin chu xtatsokgnikan Palakachuwinanin takilhtikgonit kʼumakgolh akgtiy limapakgsin».
nwtsty nota xla takgalhtawakga xlakata Mt 22:40
Limapakgsin [...] Palakachuwinanin: «Limapakgsin» wa libros nema limin Biblia chu litsuku Génesis asta Deuteronomio. «Palakachuwinanin» wa kilhchani libros nema wankgo tuku aku xʼama la xalak Tatsokgni xaHebreo. Pero akxni uma akgtiy tachuwin akxtum minkgo tlan kilhchani putum libros xla Tatsokgni xaHebreo (Mt 7:12; 22:40; Lu 16:16).
takilhtikgonit: Tachuwin xagriego nema wamputun «kilhtikan; tiyakan», unu limaklakaskinkan «takilhtinit nak; tiyakanit nak». Chuna Jesús limasiyalh pi putum libros xalak Biblia takilhtinit ktapaxkit, ni kaj kLimapakgsin chu k’Akgkaw Limapakgsin (Ro 13:9).
Kaputsaw kBiblia tuku lhuwa xtapalh
(Mateo 22:21) Wankgolh: «Xla César». Chu Jesús kawanilh: «Wa xlakata, kaxokgonitit César tuku lakgchan César pero kamaxkitit Dios tuku lakgchan Dios».
nwtsty nota xla takgalhtawakga xlakata Mt 22:21
kaxokgonitit César tuku lakgchan César: Kajwatiya unu tekgsaw pi Jesús lichuwinan emperador romano (Mr 12:17; Lu 20:25). «Tuku lakgchan César» kilhchani nakaxokgonikan tuku kinkamaxkikgoyan mapakgsinanin chu nakamaxkiyaw kakni nema kaminini (Ro 13:1-7).
kamaxkitit Dios tuku lakgchan Dios: Uma kilhchani takaknin nema maxkiyaw xliputum kinakujkan, kintapaxkitkan chu la la liwana kgalhakgaxmatniyaw chu ni makgxtakgaw (Mt 4:10; 22:37, 38; Hch 5:29; Ro 14:8).
(Mateo 23:24) ¡Xalakgaxokgo pulalinanin wixin, xlakata laktsikiyatit ximawa pero xatantuminika kgotwayatit camello!
nwtsty nota xla takgalhtawakga xlakata Mt 23:24
laktsikiyatit ximawa pero xatantuminika kgotwayatit camello: Israelitas xli’akxilhkgo ximawa tlakg xaʼaktsu animal nema nixatlan chu camello, wa nema tlakg xalanka (Le 11:4, 21-24). Unu Jesús malakatsalilh tuku wa chu tuku kintalakapastaknikan nila malakxtumi. Wa pi tiku xpulalinkgo takanajla xlaktsikikgo tuku xwakgo xlakata ni xkgotwakgolh ximawa chu kxkajwanankgolh, pero ni kuentaj xtlawakgo tuku tlakg xlakaskinka nema xwan Limapakgsin chu uma xkitaxtu la xkgotwakgolh tantum camello.
19-25 XLA MARZO
TUKU LHUWA XTAPALH XALAK BIBLIA | MATEO 24
Kaputsaw kBiblia tuku lhuwa xtapalh
(Mateo 24:8) Putum umakgolh kajku litsukuma nawan lhuwa takatsanajwat.
nwtsty nota xla takgalhtawakga xlakata Mt 24:8
lhuwa takatsanajwat: Tachuwin xagriego nema chuna tamatitaxti kilhchani, tasipan nema makgkatsi chatum puskat akxni lakachin kskgata. Maski unu kilhchanima takatsanajwat, tasipanit chu putum tapatin nema anan, na tlan limasiya pi xtachuna la takatsan nema makgkatsi tiku kgalhi skgata, tapatin chu taʼakglhuwit nema lichuwinankanit tlakg natamakgkatsi chu nataliwakatilha akxni natsuku lanka takatsanajwat nema lichuwinanit Mateo 24:21.
(Mateo 24:20) Chuntiya kaskintit kmiʼoracioneskan xlakata ni nalonkgnan chu ni Sábado akxni natsalayatit;
nwtsty nota xla takgalhtawakga xlakata Mt 24:20
nalonkgnan: Akxni palha xsenan, akxni chuchut xmalakgatsamanan chu akxni xlonkgnan lu tuwa xtlawa natlawankan chu xtekgska taway chu niku xtamakgxtakgka (Esd 10:9, 13).
Sábado: Kkachikinin la Judea, niku limapakgsin xla sábado ni xmasta talakaskin wi tuku xtlawaka, tlakg tuwa xtlawa xtlawanka chu wi tuku xlinka. Nachuna, xmalakcha kachikin ni xmalakkikan ksábado (kaʼakxilhti Hch 1:12 chu sgd, sección 16).