Akxni chatum xalak familia tatatla

1, 2. ¿La limaklakaskilh Satanás tuku nitlan chu tajatat xlakata Job xmakgxtakgli Dios?

JOB chatum chixku tiku lu xpaxuwa xlakata xatapaxuwan xwi putum xfamilia. Biblia limapakuwi tiku «tlakg lhuwa xkgalhi nixawa amakgapitsi tiku xalak Oriente». Xkgalhi kgalhtujun lakgkgawasan, kgalhtutu laktsuman, xputumkan kgalhkaw xwankgonit. Nachuna xkgalhi tumin xlakata tlan xkamaxkilh tuku xmaklakaskinkgo xfamilia. Chu tuku tlakg xlakaskinka, wa xpulalin xlakata takanajla chu xlakaskin pi xkamanan tlan xtalalinkgolh Jehová. Putum uma xtlawa pi lu tlan xlatalalilh familia chu xatapaxuwan xtawilakgolh (Job 1:1-5).

² Satanás tiku nipara tsinu akxilhputun Jehová Dios akxilhli la tlan xwi Job. Satanás tiku putum kilhtamaku putsama la natlawa pi xlakskujnin Dios nialh liwana naskujnikgo, tlawalh pi xfamilia Job nialh xatapaxuwan xtawilalh. Alistalh «tlawalh pi kakgalhilh Job akgtum lu lipekuanit tajatat, xtsuku kxtantun asta xʼakgxakga». Chuna Satanás limaklakaskilh tuku nitlan chu tajatat xlakata Job xmakgxtakgli Dios (Job 2:6, 7).

3. ¿La xwanit xtajatat Job?

³ Biblia ni kinkawaniyan tukuya tajatat chipalh Job, pero kinkawaniyan tuku xmakgkatsi. Xmakni litatsamalh tsitsi, chu xtakgalhpekgxa chu tsukulh masa. Xpuksan xjaxanat chu xmakni lixkajni xkankala. Chu lipekua xkatsani (Job 7:5; 19:17; 30:17, 30). Xlakata nialh xkatsi tuku natlawa xlaktawila lhkaka chu xlimakxkilikan xatapakglhni xalu (Job 2:8). ¡Lu nitlan xtasiya tuku xlama!

4. Min kilhtamaku, ¿tuku titaxtukgo putum familias?

⁴ ¿Tuku xtlawa komo xpati akgtum lipekua tajatat la patilh Job? La uku, Satanás ni kalimapatini tajatat xlakskujni Dios chuna la tlawalh Job. Pero xlakata kgalhiyaw talakgalhin, taʼakglhuwit nema kgalhiyaw kkilatamatkan chu xlakata lu talakglakgalhima kakilhtamaku, min kilhtamaku chatum xalak kifamiliajkan tatatla. Maski lhuwa tuku tlawayaw xlakata ni natatatlayaw, putum min kilhtamaku tatatlayaw, pero kilhuwakan ni patinanaw la Job. Akxni wi tiku tatatla kkifamiliajkan, lu tuwa tamakgkatsi. Kaʼakxilhwi la kinkamakgtayayan Biblia xlakata la tlan natayaniyaw tajatat nema putum kilhtamaku wi (Eclesiastés 9:11; 2 Timoteo 3:16).

TUKU KILITLAWATKAN

5. ¿Tuku tlawakgo familia akxni chatum xalak familia ni lhuwa kilhtamaku tatatla?

⁵ Akxni talakgpali la linaw kilatamatkan, tlawa pi kakgalhiw taʼakglhuwit, tlakg chuna kitaxtu akxni anan akgtum tajatat nema lu makgapala. Asta akxni kaj tsinu tatatlayaw talakaskin wi tuku nalakgpaliyaw o max atanu tiku natlawa tuku xtlawayaw o wi tuku nalimakgxtakgaw. Max tiku ni tatatlakgo natalakaskin ni lu naʼakgaxkulikgo tiku tatatla xlakata tlan najaxa. Max natalakaskin nalimakgxtakgkgo makgapitsi tuku xtlawakgo. Atsinu ni putum familias, asta laktsu kamanan lakgalhamankgo xtala o xtlat tiku tatatla, pero min kilhtamaku talakaskin nakamalakapastakakan pi kakalakgalhamankgolh (Colosenses 3:12). Akxni kaj tsinu tatatlakgo, familia tlawa tuku talakaskin. Nachuna, chatunu chatunu xalak familia lakaskin kalakgalhamanka komo wa xtatatlalh (Mateo 7:12).

6. ¿Tuku tlawakgo makgapitsi akxni chatum xalak xfamilia kgalhi akgtum snun tajatat chu lhuwa kilhtamaku tatatla?

⁶ Pero ¿tuku la komo lu snun tajatat chipalh chu lu talakgpali la xlinkgo xlatamatkan chu makgapala lhuwa kilhtamaku, la akxni wi tiku nialh la tatsuwi, chipa Alzheimer o atanu tajatat nema tlakg masnunitilha? Atanu taʼakglhuwit wa tajatat xla akskitit la esquizofrenia. Tuku pulana makgkatsiyaw wa pi lakgalhamanaw, pero na wi atanu tuku makgkatsiyaw. Pero na wi atanu tuku makgkatsiyaw. Akxni familia tsukukgo makgkatsikgo la talakgpali xlatamatkan, akxni nialh la tuku tlawakgo xlakata kuentajtlawakgo tatatla, max wi tiku nitlan nalimakgkatsi chu nakgalhskininan: «¿Tuku xlakata chuna kiʼakgspulama?».

7. ¿Tuku wa xpuskat Job akxni xchixku xtatatla, chu tuku max ni lakapastakli?

⁷ Max xpuskat Job nachuna lakpuwa. Kalakapastakwi pi xkamanan xnikgonita. Xlakata lhuwa tuku nitlan akgspulalh tlakg makgalipuwa. Chuna alistalh akxilhli xchixku tiku lu xaskujni xwanit chu lu tliwakga xwanit, pi xlipuwan xlakata xkgalhi akgtum tajatat nema lu xkatsani chu lu lixkajni, nialh akxilhli tuku tlakg xlakaskinka xwanit nixawa putum tuku nitlan xtitaxtukgonit: wa la xtalalinkgo Dios. Biblia wan: «Xpuskat wanilh: “¿Chuntiyaku ni makgatsankgananiya Dios? ¡Kawani tuku nitlan Dios, chu kanit!”» (Job 2:9).

8. Akxni chatum xalak kifamiliajkan snun tatatla, ¿tukuya texto nakinkamakgtayayan liwana nalakapastakaw?

⁸ Lhuwa ni katsikgo tuku natlawakgo o asta lisitsikgo xlakata xtajatat achatum lu kalakgpalini xlatamatkan. Maski chuna, kstalanina Cristo xlikatsit pi chuna tlan nalimasiya pi xlikana paxkinan. Xaxlikana tapaxkit «patiy chu tlan likatsi [...] ni putsa tuku kaj xla minini. [...] Putum tapatinan, putum kanajla, putum kgalhkgalhi, putum tayani» (1 Corintios 13:4-7, TNM). Ni namastayaw talakaskin pi nitlan talakapastakni nakinkatlajayan wata nakamachokgoyaw (Proverbios 3:21).

9. ¿Tuku tlan nakamakgtaya kxtakanajlakan chu kxtalakapastaknikan familias tiku kgalhikgo tiku snun tatatla?

⁹ ¿Tuku tlan tatlawa xlakata nakuentajtlawakan xtakanajlakan chu xtalakapastaknikan familia tiku kgalhikgo chatum tatatla? Katsiyaw pi akgatunu tajatat tanu tanu tuku lipakskan chu nitlan xwa komo uma libro xwa tukuya likuchun natamaklakaskin chu la nakuentajtlawakan tatatla. Pero xlakata kintakanajlakan, Jehová wa «kamaki ti kaʼakgchipawilikanit» (Salmo 145:14). Mapakgsina David tsokgli: «Snun lipaxaw kamakglhkatsilh nama chixku ti lipuwan chatum pobre; Kintikukan Dios nalakgmaxtu akxni nakgspula tu tuwaj. Dios namakgtakgalha, nalekgawa akxni taskinij, y namaxki lipaxaw latamat. [...] Kintikukan Dios namatliwekglha [...] xlakata tlan nalatamaparaj» (Salmo 41:1-3). Jehová kamakgtaya xlakskujnin xlakata tlan natawila xtakanajlakan, asta akxni titaxtukgo lu tuwa taʼakglhuwit nema nialh la tayanikgo (2 Corintios 4:7). Lhuwa latamanin titaxtukgonit kfamilia lu tuwa tajatat nachuna wankgo la salmista: «Oh Dios, snun kakgxtakgajnamaj, kakimatliwekglhti xlakata ni nakni porque chu kiwani natlawaya» (Salmo 119:107).

WANTUKU MAPAKSANAN

10, 11. 1) ¿Tuku lu talakaskin xlakata familia natayanikgo tajatat? 2) ¿Tuku tlawalh chatum puskat xlakata xkuentajtlawalh xchixku tiku xtatatla?

¹⁰ Akgtum proverbio xalak Biblia wan: «Xatlan xtapuwan chatum chixku tlan nalitayani xtapatin, pero tiku lipuwama, ¿tiku tlan natatayani?» (Proverbios 18:14). Akxni wi tiku nitlan tuku titaxtuma ni kajwatiya masputu «xatlan xtapuwan chatum chixku», wata na chuna xla xfamilia. Pero «akgtum naku nema ni tunkun sitsi tlawa pi tlan nalatama» (Proverbios 14:30). Xlakata akgtum familia natayani akxni wi tiku tatatla, maski xasnun o ni xasnun, wa nakamakgtaya xtapuwankan xalak familia (katamalakxtupi Proverbios 17:22).

¹¹ Akxni kajku akgchaxan kata xtamakgaxtokgkgonit, chatum puskat kstalanina Cristo tuwa tuku titaxtulh akxni xchixku nialhla tatsuwilh xlakata chipalh apoplejía. Xla lakapastaka: «Kinchixku takgalana xchuwinan, chu lu tuwa xaktachuwinan. Lu tuwa xakmakgkatsi nakʼakgatekgsni tuku xkiwaniputun». Chu na kalilakapastakwi la nitlan xmakgkatsi xchixku. ¿Tuku tlawalh uma tamakgaxtokgat? Maski ni lakatsu xwilakgolh niku wi congregación, tala tlawalh putum tuku xtalakaskin xlakata ni kxlajwanalh xtakanajla chu xlikgalhtawakga putum tuku xkachikin Dios xmaxtuma chu nachuna nema maxtu akgatunu papaʼ la revista Makatsinina chu ¡Despertad! Uma matliwakglhli xtakanajla xlakata akgtati kata xkuentajtlawalh xchixku nema lu xpaxki asta akxni nilh.

12. Chuna la Job min kilhtamaku, ¿tuku na tlan nalimakgtayanan tiku tatatla?

¹² Job maski xpatinama ni xlajwanalh, kgalhskilh xpuskat: «¿Kajwatiya namakglhtinanaw wantuku xatlan kinkamaxkiyan xaxlikana Dios chu ni namakglhtinanaw wantuku nitlan?» (Job 2:10). Wa xlakata kstalanina Cristo, Santiago lichuwinalh pi lu tlan liʼakxilhtit xwanit xlakata ni xlajwanalh chu tayanilh. Santiago 5:11 wan: «Kalitakgalhchuwinankanitantit lantla patinit yama xamakgan kgolutsin xwanikan Job, na katsiyatita pi alistalh Dios lakgalhamalh pi paxuwana patilh xpaks wantu akgspulalh; wa lilakgalhamalh xampi Dios xlikana lhuwa tlan xtapuwan, chu kgayaj katsinikgoy, xawa lakgalhamankgoy». Nachuna la uku, akxni tiku tatatla ni lilipuwan xtajatat, kamakgtaya xfamilia xlakata na tlan nalakpuwankgo.

13. ¿Tuku ni xlitlawatkan familias tiku kgalhikgo chatum tatatla?

¹³ Lhuwa tiku xfamiliajkan tatatlakgonit, wankgo pi pulana nila xkanajlakgo pi chuna xtitaxtumakgolh. Na wankgo pi lu xlakaskinka la akxilhaw tuku titaxtumaw. Max pulana lu tuwa makgkatsikan la talakgpali kilatamatkan. Pero komo naliskujaw, tlan natayaniyaw tuku titaxtumaw. Akxni chuna titaxtumaw xlakaskinka ni nakatatalakxtumiyaw amakgapitsi tiku ni kgalhikgo chatum tatatla, chu ni nalakpuwanaw pi xlatamatkan tlakg tlan chu tuku akinin titaxtumaw ni xlilat. Niti katsi la xlilanka taʼakglhuwit titaxtumakgolh amakgapitsin. Uma xtachuwin Jesús lu tlan limakgkatsiyaw kstalaninanin Cristo: «Kakilakgtantit xlipaks wixin wanti skujtamakganitantit, chu nkukananitantit, lakimpi kit nakkamajaxayan» (Mateo 11:28).

TUKU TLAKG XLAKASKINKA

14. ¿Tuku tlakg xlakaskinka natalakkaxwili akxni wi tiku tatatla?

¹⁴ Akxni anan akgtum snun tajatat kfamilia, xlilakapastakatkan uma tachuwin nema Dios matsokgninalh: «Niku anan lhuwa stakyawananin tlan kitaxtu» (Proverbios 15:22). Putum familia tlan natamakxtumikgo chu nalichuwinankgo taʼakglhuwit xlakata tajatat. Lu tlan xwa komo xtlawakgolh oración chu xputsakgolh xtamakgtay xTachuwin Dios (Salmo 25:4). ¿Tuku natalichuwinan? Nalakkaxwilikgo tukuya likuchun natamaklakaskin, la xlilhuwa tumin natamaklakaskin chu xlakata familia. ¿Tiku nalitataya nakuentajtlawa tatatla? ¿La namakgtayanankgo amakgapitsi xalak familia? ¿La nakalakgpalini xlatamat familia tuku nalakkaxwilikgo natlawakgo? ¿La namatliwakglhkgo xtakanajlakan chu namaxkikan tuku namaklakaskin tiku kuentajtlawama tatatla?

15. ¿La kamakgtaya Jehová familias tiku titaxtumakgolh akgtum lu snun tajatat?

¹⁵ Naskiniyaw Jehová kakinkapulalin, nalilakapastakaw xtachuwin chu komo natlawayaw tuku Biblia kinkawaniyan nakinkaliminiyan tasikulunalin nema nipara xlakpuwanaw. Max tiku tatatla kkifamiliajkan ni katipaksli. Pero akxni lipawanaw Jehová putum kilhtamaku tlan kitaxtu (Salmo 55:22). Salmista tsokgli: «Mapakgsina Dios, wix tunkan kimakgtaya kun mintalakgalhaman. Akxni snun xakgakatuyuma nak kintapuwan, y ni xakkatsi tu naktlawaj, wix kimaktsijti y maxki tapaxawan kilistakni» (Salmo 94:18, 19; na kaʼakxilhti Salmo 63:6-8).

LA NAKAMAKGTAYAYAW KAMANAN

16, 17. ¿Tuku tlan nakawanikan kamanan akxni chatum xtalakan tatatla?

¹⁶ Akxni tawila lu snun tajatat tlawa pi linatalan kakgalhikgolh taʼakglhuwit. Lu xlakaskinka pi natlatni nakamakgtayakgo xkamanan naʼakgatekgskgo taʼakglhuwit nema anan chu la tlan namakgtayanankgo. Komo tiku tatatla wa chatum kam, nakamakgtayakan amakgapitsi xnatalan xlakata naʼakgatekgskgo pi maski natalakaskin tlakg nakuentajtlawakan tiku tatatla ni wamputun pi tlakg paxkikan. Natlatni ni namastakgo talakaskin pi nalamakgalipuwan o nalasitsini, wata nakamakgtayakgo tlakg tlan nalatalalinkgo chu nalapaxkikgo chu na namakgtayanankgo ni tuwa namakgkatsikgo taʼakglhuwit nema kgalhikgo xlakata tajatat.

¹⁷ Laktsu kamanan ni lu taʼakglhuwikgo akxni liwana katachuwinankan, nixawa lhuwa tuku nakawanikan o tuku tuwa xlakata tajatat, pero tlan kaj tsinu tuku nakawanikan xlakata tajatat nema titaxtuma xtalakan. Komo kamanan akgatekgskgo la tajatat tlawa pi tatatla lhuwa tuku nila tlawa nema xlakan lakapala tlawakgo, max uma natlawa pi tlakg “nalapaxki” chu “nalakgalhinikgo ntalakgalhaman” (1 Pedro 3:8).

18. ¿La nakamakgtayakan lakkamanan tiku laklankata xlakata naʼakgatekgskgo taʼakglhuwit nema kitaxtu akxni wi tiku tatatla, chu la nakamakgtaya uma?

¹⁸ Kamanan tiku laklankata nakamakgtayakan naʼakgatekgskgo pi xlakata titaxtumakgolh akgtum lu tuwa taʼakglhuwit talakaskin pi xputumkan wi tuku nalimakgxtakgkgo o nialh natlawakgo. Xlakata naxokgonikan makuchina chu likuchun, max nila nakamaxkikgo putum tuku maklakaskinkgo xkamanan. ¿Nalilipuwankgo chu nalakpuwankgo pi ni kamaxkimaka tuku kalakgchan? ¿O naʼakgatekgskgo tuku titaxtumakgolh chu natlawakgo tuku natalakaskin? Lu makgtayanan chuna la natalichuwinan taʼakglhuwit chu la lakpuwankgo familia. Chu lhuwa familias akxni wi tiku tatatla kamakgtayanit pi natlatni nakalistakyawakgo xkamanan xtastakyaw Pablo: «Ni tu titlawayatit wa ntu nkaj taskgawit, su ntu nalipakxatit, chi wampi wata kaj tasmalhwan kalalipaxkitit, kalataktujunitit nchatunu amakgapitsin. Tini kalakapastakli wa ntu man xakstu lakgtaxtut, wampi na kalakapastakli wa ntu xlakgtaxtut amakgapitsin» (Filipenses 2:3, 4).

LA NATALAKSAKA TUKUYA LICHUKUN NATAMAKLAKASKIN

19, 20. 1) ¿Tuku lakgaya tiku pulalin familia akxni wi tiku tatatla? 2) Maski Biblia ni akgtum libro nema lichuwinan likuchun, ¿tuku tastakyaw kinkamaxkiyan xlakata akxni wi tiku tatatla?

¹⁹ Kstalaninanin Cristo tiku ni malakatsalikgo ni lakgmakgankgo likuchun komo uma ni lakatsala xlimapakgsin Dios. Akxni chatum xalak familia tatatla, lakapala putsakgo tamakgtay xlakata tlan napaksa. Chu max natalakaskin nalaksakkgo pulaktiy likuchun nema kawanikan pi tlan nalimaklakaskinkgo. Nachuna uma xaʼawatiya kata taxtukgonit xasasti tajatat nema lhuwa nina anan likuchun. Min kilhtamaku asta tuwa nakatsikan tuku uma tajatat. ¿Tuku xlitlawat kstalanina Cristo akxni chuna titaxtuma?

²⁰ Maski chatum tiku tsokgli Biblia makuchina xwanit chu apóstol Pablo wanilh tuku tlan xlipaksli xʼamigo Timoteo, xtachuwin Dios kinkawaniyan la nalinaw kilatamatkan chu la nalinaw kintakanajlakan pero ni maktum libro niku lichuwinan likuchun (Colosenses 4:14; 1 Timoteo 5:23). Wa xlakata akxni nalaksakkan tukuya likuchun natamaklakaskin tiku pulalin familia nalaksaka pero ni namalakatsali. Max naʼakxilhputun atanu tuku lakpuwankgo makuchinanin (katamalakxtupi Proverbios 18:17). Xlikana putsakgo tlakg xatlan likuchun xlakata tiku tatatla, chu lhuwa limaklakaskinkgo likuchun nema mastakgo makuchinanin. Amakgapitsi laksakkgo atanu likuchun nema mastakgo naturistas. Pero chatunu chatunu nalaksaka tuku namaklakaskin. Akxni tatatlakgo kstalaninanin Cristo mastakgo talakaskin pi “xTachiwin Dios nalitaxtu la lampara, wa namaxkgakge xtijikan” (Salmo 119:105). Chuntiyaku makgantaxtikgo tastakyaw nema wi kBiblia (Isaías 55:8, 9). Wa xlakata ni makglhtinankgo likuchun tuku xla taskuwan o nema lakatsala xtastakyaw Biblia (Salmo 36:9; Hechos 15:28, 29; Apocalipsis 21:8).

21, 22. ¿La lilakapastakli chatum tsumat asiática xlakata tastakyaw xalak Biblia chu la makgtayalh tuku laksakli natlawa?

²¹ Kalichuwinaw chatum tsumat asiática. Akxni aku xtsukunit katalikgalhtawakga Biblia xtatayananin Jehová, kgalhilh kskgata akxni nina xlakgchan xkilhtamaku, pi xtsumat xtsinkan 1,470 gramos akxni lakachilh. Lu lilipuwa akxni makuchina wanilh pi aktsu tsumat tsinu akgwiti xʼama wan chu nikxni xʼama tlawan. Makuchina wanilh pi xmaskiwinalh niku tlan xkuentajtlawaka. Xchixku ni liwana xkatsi tuku xlitlawat. ¿Tiku tlan xlakgalh?

²² Xatse lakapastaka: «Klakapastakli pi xakkatsinit kBiblia pi “ti kakgalhi ixkamanan, nama Dios kamaskiwinit; minini nakalakgalhaman ixkamanan porque snun tamakwan [o kgalhikgo xtapalh]”» (Salmo 127:3). Wa xlakata lakpuwa nalin uma tamaskiwin kxchik chu xkuentajtlawalh. Pulana lu tuwa makgkatsilh, pero xlakata xʼamigos tiku kstalaninanin Cristo xalak congregación makgtayakgolh, uma puskat tlan kuentajtlawalh xtsumat. Titaxtulh akgkutiy kata, uma aktsu tsumat xʼana ktamakxtumit kPukgalhtawakga chu lu xlipaxuwa akxtum xkatatawila amakgapitsi kamanan. Xatse wan: «Lu kpaxtikatsini xlakata tastakyaw xalak Biblia kimakgtayalh naktlawa tuku kilitlawat xwanit. Biblia kimakgtayalh xlakata kintalakapastakni tlan xtawilalh kxlakatin Jehová Dios chu ni xaklilipuwa putum kilatamat tuku nitlan xaklaksakli naktlawa».

23. ¿Tuku lu tlan tachuwin kawani Biblia tiku tatatlakgo chu tiku kakuentajtlawakgo?

²³ Tajatat ni putum kilhtamaku natawila. Palakachuwina Isaías lichuwinalh pi namin kilhtamaku akxni «ni chatum lataman nawan: “Ktatatlay”» (Isaías 33:24). Uma tuku wankanit nakgantaxtu kxasasti kakilhtamaku nema talakatsuwimaja. Pero asta akxni nachin uma kakilhtamaku, natitaxtuyaw tajatat chu naniyaw. Pero lu paxuwayaw xlakata xTachuwin Dios kinkamakgtayayan chu kinkamaxkiyan tastakyaw nema maklakaskinaw. Limapakgsin nema kinkamaxkiyan Biblia putum kilhtamaku makgtayanankgo chu ni talakgpali maski latamanin tiku kgalhikgo talakgalhin lakgpalitilhamakgolh xtalakapastaknikan. Wa xlakata lataman tiku liwana lakapastaka nachuna lakpuwan la tsokgli salmista: «Ixtastakyaw kinTikukan Dios snun xlikanaj, y maskgalali chatum ti nitu katsij. [...] Ixtalakapastakni Dios wakg xlikana y wakg tankswa, kinkamininiyan namakgantaxtiyaj [...] ti nakamakgantaxtij, tlania taskgaw tamakglhtinan» (Salmo 19:7, 9, 11).