Referencias xlakata Tuku natalikgalhtawakga Xlatamat chu xtaskujut kstalanina Cristo
7-13 XLA ENERO
TUKU LHUWA XTAPALH XALAK BIBLIA | HECHOS 21, 22
(Hechos 22:16) Chu la uku nialh katamakgapali. Kapit, chu katamunu, chu kalipawanti xtukuwani Jesús xlakata Dios tlan natapatiyan mintalakgalhin”.
nwtsty nota xla takgalhtawakga xlakata Hch 22:16
kalipawanti xtukuwani Jesús xlakata Dios tlan natapatiyan mintalakgalhin: O «kachakge mintalakgalhin chu kamapakuwi xtukuwani». Tuku chakge talakgalhin ni wa chuchut tuku litamunukan, wata kilhchanima mapakuwikan xtukuwani Jesús, uma wamputun, nakanajlanikan chu uma takanajla xlitasiyat akxni wi tuku tlawakan (Hch 10:43; Snt 2:14, 18).
14-20 XLA ENERO
TUKU LHUWA XTAPALH XALAK BIBLIA | HECHOS 23, 24
Kaputsaw kBiblia tuku lhuwa xtapalh
(Hechos 23:6) Chu Pablo, xlakata xkatsi pi itat saduceos xwankgonit chu itat fariseos xwankgonit, pixlanka kawanilh xanaPuxkun Jueces: «Lakchixkuwin, natalan, akit fariseo, chu kinatlatni na fariseos xwankgonit. Kilakputsananimaka xlakata kkanajla pi nalakastakwanankgo tiku nikgonita».
nwtsty nota xla takgalhtawakga xlakata Hch 23:6
akit fariseo: Makgapitsi tiku anta xwilakgo xlakgapaskgo Pablo (Hch 22:5). Akxni Pablo wa pi xnatlatni na fariseos xwankgonit, max fariseos xalak Sanedrín akgatekgskgolh pi Pablo xlitayama pi na watiya takanajla xlimakgastakkanit. Xlakan xkatsikgo pi Pablo xatapaxuwan xlichuwinan Dios, wa xlakata ni lakpuwankgolh pi kaj xkaʼakgskgawiputun. Tuku talichuwinan unu, makgatekgsninan pi Pablo fariseo xwanit. Saduceos ni xkanajlakgo pi xʼama anan talakastakwanat, pero Pablo chu fariseos xkanajlakgo uma. Akxni Pablo wa pi fariseo xwanit, makgtayalh xlakata xkalitachuwinalh tuku xlakan na xkanajlakgo. Max lichuwinalh uma xlakata makgapitsi xalak Sanedrín xtatayakgolh, chu chuna lalh (Hch 23:7-9). Alistalh nachuna tlawapa akxni kgalhmakgtayalh tuku xkanajla kxlakatin mapakgsina Agripa (Hch 26:5). Chu lichuwinampa pi xla fariseo xwanit akxni katsokgnanilh kstalaninanin Cristo xalak Filipos (Flp 3:5). Anta kHechos 15:5 na kalichuwinankan amakgapitsi kstalaninanin Cristo tiku na fariseos xwankgonit (kaʼakxilhti nota xla takgalhtawakga xlakata Hch 15:5).
nwtsty nota xla takgalhtawakga xlakata Hch 15:5
makgapitsi tiku xapulana fariseos xwankgonit: Max makgapitsi kstalaninanin Cristo chuntiya xkalilakgapaskan xlakata fariseos xwankgonit xapulana (kaʼakxilhti nota xla takgalhtawakga xlakata Hch 23:6).
(Hechos 24:24) Titaxtulh makgapitsi kilhtamaku Félix tamilh xpuskat tiku xwanikan Drusila, xla judía xwanit, chu matasaninalh Pablo chu kgaxmatnilh la lichuwinalh tuku kilhchanima kanajlanikan Cristo Jesús.
(Hechos 24:27) Pero akxni xtitaxtunita akgtiy kata, Porcio Festo tawi kxlakgxokgo Félix; chu xlakata Félix xlakaskin pi judíos tlan xliʼakxilhkgolh, antiya makgxtakgli kpulachin Pablo.
nwtsty nota xla takgalhtawakga xlakata Hch 24:24
Drusila: Herodes Agripa I kgalhtutu laktsuman xkgalhi chu Drusila tiku talichuwinan kHechos 12:1 wa tiku tlakg xaʼaktsujku xwanit. Max kkata 38 lakachilh, Agripa II chu Berenice xnatalan xwankgonit. Mapakgsina Félix xlichatiy xchixku xwanit. Pulana tatamakgaxtokgli mapakgsina sirio Aziz xalak Emesa, chu max kkata 54 akxni Drusila xkgalhi 16 kata, lakxtlawalh xtamakgaxtokgat chu tatamakgaxtokgli Félix. Max anta xwi akxni Pablo litachuwinalh Félix «tuku xaʼakgstitum chu machokgokan tuku nitlan tlawaputunkan chu talakputsan tuku aku mima» (Hch 24:25). Akxni Festo tawi la mapakgsina, Félix antiya makgxtakgli kpulachin Pablo xlakata «xlakaskin pi judíos tlan xliʼakxilhkgolh». Makgapitsi lakpuwankgo pi chuna tlawalh xlakata namakgapaxuwa xpuskat, tiku judía xwanit (Hch 24:27).
21-27 XLA ENERO
TUKU LHUWA XTAPALH XALAK BIBLIA | HECHOS 25, 26
Kaputsaw kBiblia tuku lhuwa xtapalh
(Hch 26:14) Cha nchu akxni ktitalikasnokgwi nkatiyatna nkilipakskan, ktikgaxmatli akgtum ntachuwin xkixakgatlima, na hebraica tachuwin xkilixa[kga]tlima, xwan: “Saulo, Saulo, ¿tuwan nkintalatlawaya? Lu[...] litalakgaputsiya lakgapaxtokga ntalatlawaya ntu lhtukustalaniman”.
nwtsty nota xla takgalhtawakga xlakata Hch 26:14
lakgapaxtokga ntalatlawaya ntu lhtukustalaniman: Tuku xlilhtukustalaninankan kilhchanima kgantum kiwi xakinkaslajaja nema xkalitlakgalinkan animales (Jue 3:31). Tachuwin lakgapaxtokgkan tuku lhtukustalaniman akgtum tachuwin nema xmaklakaskinkgo griegos kxtatsokgnikan. Kilhchanima tuku nitlan xʼakgspula tantum toro nema xatsakat xwanit chu xtalatlawa kiwi nema klhtukustalanima akxni xlakatayapaxtokga kiwi. Akxni Saulo nina kstalanina Cristo xwanit, nachuna xtlawama: lu nitlan xʼama kitaxtuni xlakata xkaputsastalanima kstalaninanin Cristo, tiku xkgalhikgo xtamakgtay Jehová (katamalakxtupi Hch 5:38, 39; 1Ti 1:13, 14). Anta kʼEclesiastés 12:11, wan pi xtastakyaw lakgskgalalan lakchixkuwin xtachuna lakkinkaslajajan kiwi, xlakata kamaʼakgpuwantini latamanin naʼankgo kxatlan tiji.
28 XLA ENERO ASTA 3 XLA FEBRERO
TUKU LHUWA XTAPALH XALAK BIBLIA | HECHOS 27, 28
Kaputsaw kBiblia tuku lhuwa xtapalh
(Hechos 27:9) Lhuwata kilhtamaku xtitaxtunit, chu tuwaja xwanit naʼankan, xlakata xtitaxtunita akxni ni xwayankan, kKilhtamaku akxni kxapakan Talakgalhin, wa xlakata Pablo kawanilh umakgolh tachuwin.
nwtsty nota xla takgalhtawakga xlakata Hch 27:9
akxni ni xwayankan, kKilhtamaku akxni kxapakan Talakgalhin: O «akxni ni xwayankan kkilhtamaku akxni kiwi xʼakgayujkgo» (xagriego: «akxni ni xwayankan»). Tachuwin xagriego nema tamatitaxti «akxni ni xwayankan» kajwatiya kilhchanima tuku xwan limapakgsin nema maxkika Moisés, uma wamputun, akxni ni xwayankan kKilhtamaku akxni kxapakan Talakgalhin akgatunu kata, nema na xwanikan Yom Kipur (xahebreo yohm hakkippurím, «kilhtamaku akxni akgtlapawilikan» [uma wamputun talakgalhin]) (Le 16:29-31; 23:26-32; Nú 29:7). Talakpuwan pi tachuwin makgalipuwankan latamat nema tamaklakaskin akxni lichuwinankan kKilhtamaku akxni kxapakan Talakgalhin, xlichuwinama tipalhuwa la tlan xtlawakan tamakamastan, pulaktum, wa akxni ni xwayankan (Le 16:29). Akxni kHechos 27:9 lichuwinan pi «ni xwayankan», limasiya pi ni nawayana wa tlakg xlakaskinka tamakamastan nema xtatlawa kKilhtamaku akxni kxapakan Talakgalhin, chu uma xtlawakan akxni ksputmaja septiembre o xtsukumaja octubre.
(Hechos 28:11) Akxni akgtutu papaʼ xaktamakgxtakgnitawa kʼisla, ktajuw kbarco nema kxkinkamun xtalhpittawilanit xlakapunkan xlakgkgawasan Zeus. Uma barco xalak Alejandría xwanit chu anta xtamakgxtakgnit kʼisla asta akxni titaxtulh lonkgni.
nwtsty nota xla takgalhtawakga xlakata Hch 28:11
xlakgkgawasan Zeus: Chuna la xkanajlakgo grecorromanos, Cástor chu Pólux wa chatiy «xlakgkgawasan Zeus» (griego Dióskouroi), xastiyun xlakgkgawasan Zeus (Júpiter) nema xtakgalhinit Leda, mapakgsina xalak Esparta. Pulaktum tuku xkanajlakan, wa pi umakgolh lakgkgawasan xkakuentajtlawakgo tiku xʼankgo kpupunu chu pi tlan xkalakgmaxtukgo akxni xkaʼakgspulama tuku nitlan kpupunu. Uma tuku lichuwinankan pi xkankamun barco xtalhpittawilanit xlakapunkan xlakgkgawasan Zeus, wa atanu tuku limasiya pi tiku tsokgli uma akxilhli tuku lalh.