LECCIÓN 4

Liwana kawanti tuku xlakata namaklakaskina akgtum texto

Mateo 22:41-45

TUKU NATALICHUWINAN: Akxni nina likgalhtawakgaya akgtum texto xalak Biblia, kakamakgtaya tiku kgaxmatnimakgon nalakkaxwilikgo xtalakapastaknikan.

Kalakpuwanti tuku xlakata nalikgalhtawakgaya akgtum texto. Akxni nalikgalhtawakgaya akgtum texto, katlawa pi tiku kgaxmatnimakgon nakatsikgo tuku tlakg xlakaskinka lichuwinamputuna xla uma texto.

Kuenta katlawa tuku talichuwinan xapulana chu alistalh ktexto nema nalikgalhtawakgaya. Komo akxni nalikgalhtawakgaya akgtum texto nawana tiku chuwinama o tiku tsokgli uma libro xalak Biblia, liwana kakatsi komo xlikana tuku lichuwinampat.
Kalimasiya pi Biblia kgalhi limapakgsin. Akxni katachuwinampat latamanin tiku kanajlanikgo Dios, liwana kamasiya pi Biblia «xTachuwin Dios». Chuna nalimasiyaya pi anta kBiblia wi tlakg xatlan liskgalala.
Katlawa pi nakatsiputunkgo tuku wan texto. Katlawa akgtum takgalhskinin nema natakgalhti ktexto, kalichuwinanti akgtum taʼakglhuwit nema texto namakgtayanan nalakkaxtlawakan, o kalichuwinanti tuku tastakyaw tlakg liwana nakinkamaʼakgatekgsniyan uma texto.

Kalakapastakti tuku katsikgoya tiku kgaxmatnimakgon xlakata texto chu tuku lichuwinampat. Kalichuwinanti chuna la tlakg nakatsiputunkgo maski lakgapaskgoyata uma texto, chu kakamakgtaya tlakg liwana naʼakgatekgskgo.