LECCIÓN 18

Kalichuwinanti tuku makgtayanan

1 Corintios 9:19-23

TUKU NATALICHUWINAN: Kakamalakpuwani tiku kgaxmatnimakgon chu kamakgkatsikgolh pi katsinikgonit tuku nakamakgtaya.

Kalakapastakti tuku katsikgoya tiku kgaxmatnimakgon. Ni kajwatiya kawampara tuku kgaxmatkgonita atanu kilhtamaku, kakamakgtaya atanu la naʼakxilhkgo tema.

Tlakg kalimaxtu kilhtamaku nakalitachuwinana tuku nina katsikgo nixawa nakalitachuwinana tuku lakgapaskgoya.
Kalimaxtu kilhtamaku naputsanana chu nalilakpuwana. Komo matlaniya, kalichuwinanti tuku ni lu lakgapaskgo o tuku aku lalh xlakata nalichuwinana pulaktum tuku xlakaskinka. Liwana kalilakpuwanti uma chu la uma tatalakxtumi tuku nalichuwinana.

Akxni nalakputsananiya tuku nalichuwinana, katlawanika umakgolh takgalhskinin: ¿tuku?, ¿tuku xlakata?, ¿tuku kilhtamaku?, ¿niku?, ¿tiku? chu ¿la? Xlakata tlakg tlan namasiyaya katlawa makgapitsi umakgolh takgalhskinin chu kakakgalhtitilha chuna la naʼakgchuwinantilhaya.
Kamasiya la nalilatamakan tuku lichuwinampat. Kalichuwinanti la tastakyaw xalak Biblia nakamakgtaya kxlatamatkan tiku kgaxmatnimakgon. Kalichuwinanti tuku lama, tayat chu taskujut nema lakgapaskgo tiku kgaxmatnimakgon.