LECCIÓN 6
Kawanti tuku xlakata texto tatalakxtumi tuku lichuwinampat
Juan 10:33-36
TUKU NATALICHUWINAN: Ni kajwatiya kalikgalhtawakga akgtum texto chu alistalh atanu tuku nalichuwinana. Kuenta katlawa pi tiku kgaxmatnimakgon naʼakxilhkgo la tatalakxtumi tuku lichuwinampat texto nema likgalhtawakgapat.
LA NATLAWAYA
Kalaksakxtu xlakaskinka tachuwin. Akxni likgalhtawakganitata akgtum texto, kalichuwinanti tachuwin nema tatalakxtumi tuku xlakaskinka lichuwinampat. Tlan chuna natlawaya komo nawamparaya umakgolh tachuwin o natlawaya akgtum takgalhskinin nema nakamakgtaya tiku kgaxmatnimakgon nakatsikgo tuku tachuwin tlakg xlakaskinka.
Tlakg kalichuwinanti tuku lakaskina nalakapastakkgo. Komo wanti tuku xlakata xpimpat likgalhtawakgaya akgtum texto, kalichuwinanti la tuku wan texto tatalakxtumi tuku wanti pulana.
Kawanti la ni tuwa namakgantaxtikan. Ni talakaskin nalichuwinana tuku ni xlakaskinka nema ni kgalhmakgtaya tuku lichuwinampat. Kalakapastakti tuku katsikgoya tiku kgaxmatnimakgon xlakata tuku lichuwinampat chu chuna kalaksakti la xlilhuwa tamakatsin talakaskin xlakata naʼakgatekgskgo tuku lichuwinampat.