¿Tuku lakaskin Dios kimpalakatakan?
ANTA kperiódicos, ktelevisión, kradio chu kʼInternet, lu lichuwinankan xlakata lhuwa tiku kgalhanankgo, lamakgnikan chu xlakata guerras. Max nachuna wix kgalhiya akgtum tajatat nema lu makgapatinanan o max wi tiku nilh xalak mifamilia.
Kalilakpuwanti uma:
¿Wa uma tuku lakaskin Dios kimpalakata chu xpalakata kifamilia?
¿Niku naktekgsa tamakgtay xlakata tlan naktayani kintaʼakglhuwit?
¿Namin kilhtamaku akxni naʼanan takaksni unu kKatiyatni?
Biblia kinkamaxkiyan lu xatlan takgalhtin chu tlan nalipawanaw.
BIBLIA MASIYA PI DIOS LHUWA TUKU TLAN NATLAWA KKIMPALAKATAKAN
Latamanin nialh katipatinankgolh, nialh katikgolonkgolh chu nialh katinikgolh (Apocalipsis 21:4).
«Tiku nila tlawan natlawan» (Isaías 35:6).
«Tiku nila lakawanankgo nalakawanamparakgo» (Isaías 35:5).
Tiku wilakgolh kputaknun nalakastakwanamparakgo (Juan 5:28, 29).
Nialhti katitatatlalh (Isaías 33:24).
Naʼanan lhuwa liwat (Salmo 72:16).
BIBLIA TLAN NAMAKGTAYAYAN
Max nalakpuwana pi nixlikana katikgantaxtulh tuku likgalhtawakga kxapulana páginas xla uma libro maski lu tlan takgaxmata. Pero Dios kinkamalaknuniyan pi nialh makgas namakgantaxti putum uma unu kKatiyatni, chu Biblia kinkawaniyan la namakgantaxti.
Biblia nachuna kinkawaniyan tuku kilitlawatkan xlakata tlan nakgalhiyaw tapaxuwan la uku. Kalilakpuwanti putum tuku lilakgaputsaya. Max kgalhiya taʼakglhuwit kmifamilia, xlakata ni anan tumin o xlakata tajatat. O max wi tiku nilh xalak mifamilia. Biblia tlan namakgtayayan xlakata tlan natayaniya. Nachuna tlan namakgoxamixiyan, xlakata kinkamaxkiyan xatakgalhtin umakgolh takgalhskinin:
¿Tuku xlakata patinanaw?
¿La tlan natayaniyaw kintaʼakglhuwitkan?
¿Tuku tlan natlawayaw xlakata xatapaxuwan natawila kifamiliajkan?
¿Tuku kinkaʼakgspulayan akxni niyaw?
¿Tlan nakaʼakxilhparayaw tiku nikgonita?
¿Tuku xlakata tlan nakanajlayaw pi Dios namakgantaxti putum tuku malaknunit?
Xlakata wix likgalhtawakgapat uma libro, limasiya pi katsiputuna tuku masiya Biblia. Uma libro namakgtayayan. Takgalhskinin nema limin akgatunu párrafos namakgtayakgoyan xlakata tlakg liwana naʼakgatekgsa Biblia. Lhuwa latamanin lu lakgatikgo pi xtatayananin Jehová kalitachuwinankgo Biblia. Max wix nachuna lu nalakgatiya tuku namasiyanikgoyan. ¡Dios kasikulunatlawan xlakata lu liskujpat nalakgapasa tuku masiya xTachuwin!