Jesús chu xtamakgalhtawakgen akgtututa tsisni wilakgo kBetania lata akxni minkgocha kJericó. Tsisa lunes 10 xla nisán taxtukgo xlakata naʼankgo kJerusalén. Xlakata Jesús tsinksma, akxni akxilha xakiwi higo, talakatsuwini. ¿Kgalhi xtawakat?

Sputmaja marzo, pero xakiwi higo masta xtawakat asta junio. Pero uma xakiwi higo kgalhiya xatuwan. Sokg akgapunit, wa xlakata Jesús lakpuwan pi max kgalhiya xtawakat, pero nichuna. Wa xlakata Jesús wan: «Nialhti kawalh mintawakat» (Marcos 11:14). Chu xakiwi higo tunkun skaka. Lichali, Jesús nalichuwinan tuku wamputun tuku tlawalh.

Alistalh, Jesús chu xtamakgalhtawakgen chinkgo kJerusalén chu xla an ktemplo, nema xʼakxilhnita likgotana. Pero la uku tlawa tuku tlawalh akgtututa kata kPascua kkata 30 (Juan 2:14-16). Uma kilhtamaku, Jesús katamakxtu stananin chu tiku tamawanankgo anta. Na kamakgpuspitni xmesajkan tiku lakgpalikgo tumin chu xlaktawilhkan tiku stakgo paloma (Marcos 11:15). Na ni masta talakaskin natitaxtukan kxtankilhtin templo xlakata tlakg lakapala wi tuku nalinkan kxaʼalakgaputu kachikin.

¿Tuku xlakata chuna katlawani tiku lakgpalikgo tumin chu tiku stakgo animales ktemplo? Jesús wan: «Tatsokgnit “Kinchik nalimapakuwikan chiki niku putum kachikinin natlawakgo oración”, pero wixin xputatsekgnikan kgalhananin limaxtupatit» (Marcos 11:17). Kalimapakuwi kgalhananin xlakata lhuwa kamatajikgo tiku tamawakgo animales xlakata nalitlawakgo tamakamastan. Jesús lakpuwan pi uma takgalhan.

Sacerdotes, lakgtsokgkinanin chu lakchixkuwin tiku xlakaskinka litaxtukgo kkachikin, katsikgo tuku tlawanit Jesús chu tlakg liskujkgo xlakata namakgnikgo. Pero anan akgtum taʼakglhuwit: ni katsikgo la natlawakgo xlakata latamanin stalanikgo Jesús xlakata nakgaxmatnikgo.

Ni kaj judíos minkgonit kPascua, na minkgonit tiku ni judíos, tiku xʼakstukan laksakkgolh nastalanikgo xtalismaninkan chu xtakanajlakan judíos. Na minkgonit griegos xlakata nakakninanikgo Dios kpaskua. Uma lakchixkuwin lakgtalakatsuwikgo Felipe, max xlakata xtukuwani xagriego, chu wanikgo pi akxilhputunkgo Jesús. Felipe ni katsi komo xlilat chuna natlawa, wa xlakata kgalhskin Andrés. Xchatiykan ankgo wanikgo Jesús, tiku antaku wi ktemplo.

Jesús katsi pi nialh makgas namakgnikan, chu ni kgalhi kilhtamaku xlakata nakawani latamanin tuku lakaskinkgo chu tlakg nalakgapaskan. Wa xlakata Jesús kalikgalhti akgtum liʼakxilhtit chatiy xʼapóstoles: «Chanit kilhtamaku xlakata xKgawasa chixku namalankikan. Xlikana kkawaniyan pi komo xtalhtsi trigo ni natakta ktiyat chu naniy, kaj akgtum talhtsi litaxtu; pero komo naniy, namasta lhuwa xtawakat» (Juan 12:23, 24).

Akgtum xtalhtsi trigo max ni xlakaskinka tasiya. Pero komo nawilikan ktiyat chu «naniy», tlan napun chu nastaka asta namasta lhuwa trigo. Na xtachuna, Jesús chatum chixku tiku ni kgalhi talakgalhin, chu komo ni namakgxtakga Dios asta akxni nani, Dios namaklakaskin xlakata nakamaxki latamat tiku na lhuwa tuku limakgxtakgkgo la Jesús. Wa xlakata Jesús wan: «Putum tiku lakgkatsan xlatamat malakgsputu, pero putum tiku namakgatsankgaputun xlatamat kʼuma kakilhtamaku nalakgmaxtu xlakata nakgalhi latamat nema ni kgalhi xlisputni» (Juan 12:25).

Jesús ni kaj xʼakstu lilakpuwamaka, xlakata xla wan: «Komo wi tiku kiskujnaniputun, kakistalanilh, chu anta niku akit naktawila na anta natawila kiskujni. Komo wi tiku kiskujnaniputun, xaTlat namalanki» (Juan 12:26). ¡Lu tlan tuku namakglhtinankgo! Tiku nakamalanki xaTlat natamapakgsinankgo Cristo kTamapakgsin.

Jesús lilakpuwan tapatin chu linin nema natitaxtu pi asta wan: «Uku kmakgkatsi pi nialhla ktayani talipuwan, ¿chu tuku nakwan? Tlat, kakilakgmaxtu kʼuma lu tuwa kilhtamaku». Pero xla makgantaxtiputun xtalakaskin Dios, wa xlakata wan: «Wa [...] kliminit kkatiyatni, tuku naktitaxtu uma kilhtamaku» (Juan 12:27). Jesús tlan akxilha putum tuku Dios lakaskin, maski uma kilhchanima pi nani.

Lunesku 10 xla nisán, Jesús wi ktemplo chu lichuwinama la namakgnikan. Lilakgaputsa tuku nawankgo latamanin xlakata Dios, wa xlakata wan: «Tlat kamalanki mintukuwani». Alistalh, takgaxmata tachuwin kʼakgapun: «Kmalankinit chu amakgtum nakmalankipara» (Juan 12:27, 28).

Latamanin tiku lakatsu yakgo kaks lakawankgo. Makgapitsi lakpuwankgo pi jililh, chu amakgapitsin wankgo: «Chatum ángel tachuwinalh» (Juan 12:29). Pero wa Jehová tiku chuwinalh. Pero ni xlimakgtumku chuwinama Jehová lata Jesús tsukulh lichuwinan Dios.

Titaxtunita akgtutu kata aitat akxni Jesús tamunulh, Juan Mununa kgaxmatli akxni Dios wa: «Uma kinKgawasa, tiku lu kpaxki, chu lu tlan kimamakgkatsini». Alistalh, akxni xtitaxtunita Pascua kkata 32, akxni Jesús talakgpalilh la xtasiya kxlakatin Santiago, Juan chu Pedro, xlakan na kgaxmatkgolh akxni Dios wa: «Wa uma kinKgawasa, tiku lu kpaxki, chu lu tlan kimamakgkatsini. Kakgaxpatnitit» (Mateo 3:17; 17:5). Pero uma kilhtamaku akxni xlimakgtutu chuwinan, lhuwa tiku kgaxmatkgonit tuku wan Jehová.

Alistalh, Jesús lichuwinan: «Uma tachuwin nema takgaxmatli, ni kimpalakata, wata mimpalakatakan» (Juan 12:30). Uma liwana limasiya pi xla, xKgawasa Dios, Mesías nema xwankanit pi xʼama min.

Jesús nikxni makgxtakgnit Dios. Chuna kinkawilinin lu tlan liʼakxilhtit xlakata la nalatamayaw chu limasiyanit pi Satanás, xmapakgsina kakilhtamaku, lakgchan namalakgsputukan. Jesús wampara: «Uku lakgchanit nalakputsananikan uma kakilhtamaku; la uku xmapakgsina uma kakilhtamaku natamakxtukan». Xlinin Jesús ni wamputun pi tlajaka, wata wa tlajanan. ¿Tuku xlakata? Jesús wan tuku xlakata: «Pero akit akxni nakimawakakan kkiwi, naktlawa pi nakilakgminkgo putum latamanin tiku tanu tanu xlakatsukutkan» (Juan 12:31, 32). Chuna, akxni Jesús naxtokgowakakan kkgantum kiwi, natlawa pi lhuwa latamanin natalakatsuwinikgo chu tlan nakgalhikgo latamat nema nikxni sputa.

Akxni latamanin kgaxmatkgo pi “namawakakan kkiwi”, kgalhskinkgo: «Limapakgsin wan pi Cristo putum kilhtamaku nalatama. ¿Tuku xlakata wix wana pi xKgawasa chixku namawakakan kkiwi? ¿Tiku uma xKgawasa chixku?» (Juan 12:34). Maski lhuwa tuku limasiya pi Jesús xKgawasa Dios, asta kgaxmatkgonit la chuwinanit Dios, lhuwa tiku ni makgamakglhtinankgo pi Jesús xlikana xKgawasa chixku, Mesías nema xwankanit pi xʼama min.

Chuna la tlawanita atanu kilhtamaku, Jesús xʼakstu limapakuwikan “makgskgot” (Juan 8:12; 9:5). Kawani latamanin: «Makgskgot nakatatawilayanku atsinu kilhtamaku. Kalatapatit xlakata kgalhiyatitku makgskgot, xlakata kapukswa ni nakaʼakgchipayan [...]. Xlakata kgalhiyatitku makgskgot, kalimasiyatit pi kanajlaniyatit makgskgot, xlakata xkamanan makgskgot nalitaxtuyatit» (Juan 12:35, 36). Alistalh, Jesús an, xlakata ni xlinit 10 xla nisán. Ama niy kPascua, 14 xla nisán, akxni naxtokgowakakan kkgantum kiwi (Gálatas 3:13).

Akxni akxilhaw putum tuku tlawalh Jesús, limasiya pi xkgantaxtuma tuku xwankanit pi judíos ni xʼamakgo kanajlanikgo. Isaías lichuwinalh pi lakgatsin xʼamakgo litaxtukgo chu lu palha xnakujkan xʼamakgo kgalhikgo chu ni xʼamakgo taspitkgo xlakata nakamapaksakan (Isaías 6:10; Juan 12:40). Lhuwa lakgmakgankgo tuku limasiya pi Jesús wa Lakgmaxtuna tiku xlichuwinankanit, tiku masta latamat.

Nicodemo, José xalak Arimatea chu lhuwa amakgapitsi mapakgsinanin kanajlanikgo Jesús. Pero ¿nalimasiyakgo pi kanajlakgo? ¿O ni katilimasiyakgolh xlakata pekuankgo pi nakatamakxtukan ksinagoga o xlakata “tlakg lakgatikgo pi latamanin tlan kakaʼakxilhkgolh”? (Juan 12:42, 43).

Jesús lichuwinan tuku kilhchanima nakanajlanikan: «Putum tiku nakinkanajlani, ni kaj xman akit kinkanajlanima wata na kanajlanima tiku kimalakgachanit; chu putum tiku kiʼakxilha, na akxilha tiku kimalakgachanit». Xaxlikana tuku Dios waninit pi kamasiyalh chu nema chuntiya lichuwinama, lu xlakaskinka, wa xlakata wan: «Putum tiku nakilakgmakgan chu ni makgamakglhtinan tuku klichuwinan, wi tiku nalakputsanani. Tachuwin nema klichuwinanit wa nalakputsanani kxaʼawatiya kilhtamaku» (Juan 12:44, 45, 48).

Xaʼawatiya Jesús wan: «Ni kiʼakstu kintapuwan tuku klichuwinanit, wata xaTlat tiku kimalakgachanit, wa tiku kilimapakgsinit tuku nakwan chu tuku nakmasiya. Chu kkatsi pi xlimapakgsin linan klatamat nema ni kgalhi xlisputni. Wa xlakata putum tuku klichuwinan, kchuwinan chuna la xaTlat kiwaninit» (Juan 12:49, 50). Jesús katsi pi nialh makgas nastajmakgan xkgalhni xpalakata latamanin tiku nakanajlanikgo (Romanos 5:8, 9).