¿Lakgpalikanit tuku min kBiblia?

Nichuna. Akxni tamalakxtumikan xalakgmakgan tatsokgni akxilhkanit pi tuku wan Biblia ni talakgpalinit, maski akglhuwa mil kata copiaxtutilhaka chu maklakaskinka tuku ni xmakgapala chu xlakxla.

¿Wamputun uma pi nikxni akgtsankgakgolh tiku xcopiaxtukgo?

Tekgskanit akglhuwa mil tatsokgni xalak Biblia xalakgmakgan. Makgapitsi talakgpali tsinu, uma limasiya pi wi tuku nichuna wilika akxni xcopiaxtumaka. Atsinu ni putum ni lu xlakaskinka tuku talakgpalinit chu ni lakgpali tuku wamputun akgtum texto. Pero na tekgskanit pi kmakgapitsi copias wi tuku lu xlakaskinka lakgpalikanit. Makgapitsi umakgolh talakgpalit lu makgasata tlawakanit xlakata xlakgpaliputunkan tamakatsin nema limin Biblia. Kalichuwinaw akgtiy liʼakxilhtit.

1. Wa uma tuku wilikanit kmakgapitsi xalakgmakgan traducciones xalak Biblia anta k1 Juan 5:7: «Anta kʼakgapun: Xatlat, Tachuwin chu Espíritu Santo, umakgolh kaj chatum litaxtukgo». Pero tatsokgni xalakgmakgan masiyakgo pi kxapulana tatsokgni ni xmin umakgolh tachuwin. Uma alistalh tsokgwilika.a Wa xlakata, tatsokgni xala uku nema tlan kalipawankan ni liminkgo umakgolh tachuwin.

2. Xtukuwani Dios makglhuwa mil min kxalakgmakgan tatsokgni xalak Biblia, pero lhuwa traducciones xalak Biblia mapanukgonit chu wilikgonit tachuwin «Malana» o «Dios».

¿Chu la likatsiyaw pi nialh anan atanu tuku nitlan min kBiblia?

Xlakata la uku anan lhuwa xalakgmakgan tatsokgni, nituwa katsikan tuku nitlan wi.b ¿Tuku tekgskanit akxni lamalakxtumikan umakgolh tatsokgni? ¿Tlan nalipawanaw tuku min kBiblia la uku?

• Xpalakata Escrituras Hebreas (nema na lilakgapaskan Antiguo Testamento), erudito William Henry Green lichuwinalh: «Tlan nawanaw pi nipara maktum libro xala makgasa lu liwana matitaxtikanit chuna la Biblia».

• Wa uma tuku tsokgli biblista Frederick Bruce xpalakata Escrituras Griegas Cristianas, o Nuevo Testamento: «Tlakg lhuwa anan tuku limasiya pi xaxlikana tuku tatsokgnit kNuevo Testamento, [...] nixawa makgapitsi libros nema tsokgwilikgonit lakchixkuwin xala makgasa. Maski chuna, niti wan pi ni xlikana tuku tsokgwilikgolh umakgolh lakchixkuwin».

• Sir Frederic Kenyon, chatum chixku tiku lu lakgapasa xalakgmakgan tatsokgni xalak Biblia, wan pi chatum lataman «tlan nachipa maktum Biblia chu tlan nawan pi chipanit xaxlikana xTachuwin Dios, nema ni lakgpalikanit tuku anta min maski titaxtunit akglhuwa ciento kata».

¿Tuku atanu kinkalimasiyaniyan pi Biblia nitu lakgpalikanit?

• Judíos chu kstalaninanin Cristo tiku xcopiaxtukgo tatsokgni ni mapanukgolh niku xlichuwinan akxni xkachikin Dios xtlawakgo tuku nitlan (Números 20:12; 2 Samuel 11:2-4; Gálatas 2:11-14).c Na ni mapanukgolh niku xlichuwinan pi Dios kamalakgaxokgelh judíos xlakata ni kgalhakgaxmatnankgolh chu niku xlichuwinan nixaxlikana tamasiy nema kstalanimakgo (Oseas 4:2; Malaquías 2:8, 9; Mateo 23:8, 9; 1 Juan 5:21). Akxni liwana copiaxtukgolh tuku xmin ktatsokgni, umakgolh lakchixkuwin limasiyakgolh pi ni xʼakgsaninankgo chu pi lhuwa xtapalh xliʼakxilhkgo xTachuwin Dios.

• Putum uma limasiya pi Dios, tiku matsokgninalh Biblia, tlawanit pi ni nalakgpalikan xtamakatsinin (Isaías 40:8; 1 Pedro 1:24, 25).d Xla xlakaskin pi ni kajwatiya xlitamakgtayakgolh latamanin xala makgasa; na xlakaskin pi akinin xlitamakgtayaw (1 Corintios 10:11). Putum «tuku makgasa tsokgwilika, tsokgwilika xlakata nakinkamasiyanikanan, chu kgalhiyaw takgalhkgalhin xlakata xtachuwin Dios nema tatsokgnit kinkamaxkiyan litliwakga chu kinkamakgtayayan natayaniyaw» (Romanos 15:4).

• Jesús chu kstalaninanin maklakaskinkgolh Tatsokgni xaHebreo nema xʼanan chu nikxni wankgolh pi xʼakgtsankga tuku anta xtatsokgnit (Lucas 4:16-21; Hechos 17:1-3).