Xtasitsi mamakgninilh xtala

Akxni Adán chu Eva xtaxtukgonita kjardín xla Edén, kgalhikgolh lhuwa kamanan. Xapulana xwanikan Caín. Xla xmakgala tawakat chu verduras. Xlichatiy xwanikan Abel chu xla xkakuentajtlawa borregos.

Akgtum kilhtamaku, Caín chu Abel makamaxkikgolh tamakamastan Jehová. ¿Katsiya tuku akgtum tamakamastan? Akgtum lu xlakaskinka tamaskiwin nema maxkikan Dios. Jehová makgapaxuwalh xtamakamastan Abel pero ni makgapaxuwalh xtamakamastan Caín. Wa xlakata Caín lu sitsilh, chu Jehová wanilh: “Komo chuntiya nasitsiya, natlawaya tuku nitlan”. Pero Caín ni kgaxmatli.

Wata Caín wanilh Abel: “Kaw kkakiwin”. Akxni xakstukan xwilakgolh, Caín makgnilh xtala. ¿Tuku tlawalh Jehová? Malakgaxokgelh Caín akxni makgat malakgachalh. Nikxni xʼamapa taspita.

¿Tuku kinkamasiyaniyan? Komo wi tuku nichuna nataxtuyacha la xlakaskinaw, max nasitsiyaw. Komo makgkatsiyaw pi tlakg sitsimaw, o komo amakgapitsin kinkaʼakxilhkgoyan pi lu sitsinitaw, kilitalakgpalitkan. Komo ni namachokgoyaw kintasitsikan, nakinkatlajayan, chu uma lu nitlan.

Abel lu xpaxki Jehová, chu tlan lilh xlatamat, wa xlakata Jehová putum kilhtamaku nalakapastaka. Dios namaxkipara xlatamat akxni katiyatni akgtum paraíso natlawa.