Tuku katsiputunkgo tiku likgalhtawakgakgo

¿Tuku xwamputun apóstol Pablo akxni wa: «Kninit xlakata tuku wan limapakgsin»? (Gál. 2:19).

Pablo tsokgli: «Kninit xlakata tuku wan limapakgsin, pero xlakata uma, klama xpalakata Dios» (Gál. 2:19).

Tuku Pablo tsokgli wa pulaktum tuku xlakaskinka xkamaʼakgatekgsniputun congregaciones xalak Galacia. Makgapitsi kstalaninanin Cristo xmastakgonit talakaskin pi xkaʼakgskgawikgolh ni xaxlikana makgalhtawakgenanin, tiku xmasiyakgo pi xlakata tlan xlakgtaxtuka xlitakgalhakgaxmatat xwanit putum Limapakgsin nema xmaxkikanit Moisés, pulaktum uma wa xlakata circuncisión. Pero Pablo xkatsi pi Dios nialh xkaskini xlakskujnin pi xtacircuncidarlakgolh. Pablo liwana kamaʼakgatekgsnilh chu liwana kamasiyanilh pi umakgolh tamasiy nixaxlikana xwanit chu kamatliwakglhnilh xtakanajlakan xnatalan xlakata xtamakamastan Jesucristo (Gál. 2:4; 5:2).

Biblia liwana wan pi akxni chatum lataman niy, nialhtu katsi chu maski kaxatukawa tuku kalalh xla nialh lilakgaputsa (Ecl. 9:5). Akxni Pablo wa pi xninit «xlakata tuku wan limapakgsin», xwamputun pi Limapakgsin nema xmaxkikanit Moisés nialhla tuku xtlawa xpalakata. Pero liwana xkatsi pi xlakata xkanajlani talakgmaxtut, xlama «xpalakata Dios».

Limapakgsin lakgpalilh chuna la xtatekgsa Pablo. ¿La lakgpalilh? Xla aku xlichuwinanit pi chatum lataman «ni xaʼakgstitum litaxtu kxlakatin Dios kaj xlakata makgantaxtima tuku skin limapakgsin, wata komo kanajlani Jesucristo» (Gál. 2:16). Xlikana, Limapakgsin wi tuku lu xlakaskinka xmakgantaxtinit. Pablo kawanilh natalan xalak Galacia: «Mastaka xlakata xtasiyalh talakgalhin, asta akxni xchilh xkam Abrahán, tiku xtlawanikanit tamalaknun» (Gál. 3:19). Chuna, xlakata putum latamanin makglakgalhinanin litaxtukgo, nila xmakgantaxtikgo putum Limapakgsin, wa xlakata xmaklakaskinkgo akgtum tamakamastan nema ni xkgalhi talakgalhin. Wa xlakata, Limapakgsin kamakgtayalh latamanin nakatsikgo pi Jesús wa “kam” tiku xwankanit pi xʼama min. Komo wi tiku nakanajlani Jesucristo, Dios tlan xaʼakgstitum nalimaxtu (Gál. 3:24). Pablo xaʼakgstitum limaxtuka xlakata Limapakgsin makgtayalh namakgamakglhtinan chu nakanajlani Jesús. Chu chuna xanin litaxtulh «xlakata tuku wan limapakgsin» pero latamalh «xpalakata Dios». Tiku xmapakgsi wa Dios, nialh wa Limapakgsin nema xmaxkikanit Moisés.

Pablo xtachuna wa akxni kamalakgachanilh carta natalan xalak Roma: «Pero nialh wa tapakgsiniyaw Limapakgsin» (Rom. 7:6). Wa xlakata, kʼGálatas 2:19, Pablo ni xkilhchanima naniyaw la chatum makglakgalhina kaj xlakata Limapakgsin. Wata xwamputun pi xlakgtaxtuninitaw uma Limapakgsin. Limapakgsin nialh xkaʼakgchipanit amakgapitsi kstalaninanin Cristo chu nachuna Pablo. La uku nialh xatachin xwilakgo xlakata xkanajlanikgo xtamakamastan Cristo.