Kalilakpuwanti la makgtayanan tayat nema kgalhi minchixku o mimpuskat nema ni lu lakgatiya

• Wix lakapala tuku tlawaya; pero tiku tamakgaxtokga ankgalhin lakkaxwili tuku tlawa.

• Wix lu xakakswa chu ni lu chuwinana; pero tiku tamakgaxtokga lu xakgalhchuwina chu lu xapaxuwana.

¿Wi tayat nema kgalhi minchixku o mimpuskat nema ni lakgatiya? Komo kajwatiya uma nalilakpuwana, max nalaktlawa mintamakgaxtokgat. Biblia wan: «Tiku chuntiya lichuwinan tuku tlawanika kalamamakgxtakge xatlan amigos» (Proverbios 17:9).

Ni kamasta talakaskin pi uma tayat nema ni lakgatiya natlawa pi nalakilhniyatit, wata kaʼakxilhti chuna la xlilat.

Kʼuma artículo naʼakxilhaw:

• Kalilakpuwanti la makgtayanan tuku ni lakgatiya

• Tuku wankgo amakgapitsi tamakgaxtokgat

• Tuku akxtum tlan nalichuwinanatit

Kalilakpuwanti la makgtayanan tuku ni lakgatiya

Tayat nema ni lakgatiya nema kgalhi tiku tamakgaxtokga tlan namakgtayanan komo naʼakxilha chuna la xlilat. Kalichuwinaw pulaktutu liʼakxilhtit:

«Kinchixku lu makgapala akxni tuku tlawa o akxni takaxa xlakata wi niku naʼan. Pero wa uma tuku tlawa pi lu xakgalhkgalhina nawan. Lakgachunin klisitsi pi lu lakatsuku tuku tlawa, pero wa uma xtayat nema tlakg klakgati» (Chelsea).

«Kimpuskat ankgalhin lakkaxwili tuku natlawa; lakaskin pi putum tlan kakitaxtunilh, chu uma min kilhtamaku klisitsi. Pero xlakata lakkaxwili pulakatunu tuku natlawa, nitu akglakgwa tlawa (Christopher).

«Min kilhtamaku tasiya pi kinchixku nitu kuenta tlawa, chu uma kimakgasitsi. Pero pulaktum tayat nema klakgatilh akxni klakgapasli, wa pi ni lakapala sitsi. Lu klakgati pi ni lakapala sitsi akxni lama tuku nitlan» (Danielle).

Chelsea, Christopher, chu Danielle, katsikgolh pi tayat nema ni lu xlakgatikgo nema kgalhi tiku tamakgaxtokgkgo watiya uma tayat min kilhtamaku lu kamakgtaya. Nila namapanuya kajwatiya tuku ni lakgatiya, xlakata na namakgatsankgaya tayat nema makgtayanan. Uma xtachuna la okgxtum tumin nema tanu tanu tuku tatsokgtawilanit lakgaputiy.

Xlikana pi makgapitsi tuku tlawayaw lu nitlan. Akgtum liʼakxilhtit, Biblia lichuwinan pi wi tiku «lakapala sitsi» (Proverbios 29:22). Komo chatum lataman kgalhi uma tayat, lu xliskujat xlakata nalakgmakgan «takiklhkatsa, tasitsi, lu sitsikan, takgaw, chu tachuwin nema tlawaninan tuku nitlan»a (Efesios 4:31).

Pero ¿chu komo kaj ni lakgatiya pulaktum tuku tlawa tiku tamakgaxtokga? Biblia wan: «Chuntiya kalatatayanitit […] maski wi tuku nakalimakgasitsikanatit» (Colosenses 3:13).

Nachuna, kaʼakxilhti la makgtayanan tuku makgasitsiyan. Max asta lakapastaka pi pulaktum tuku la uku ni lakgatiya nema tlawa tiku tamakgaxtokga wa tuku lakgatini akxni lakgapasti. Joseph tiku makgaxtokga, wan: «Komo kajwatiya kuenta natlawaya pulaktum tuku ni lakgatiya nema tlawa mimpuskat xtachuna la nakgalhiya akgtum diamante chu kajwatiya naʼakxilha xkilhpanin niku stakaka chu ni naʼakxilha putuminika la xlistlan».

Tuku akxtum tlan nalichuwinanatit

Pulana, miʼakstukan kalilakpuwantit umakgolh takgalhskinin, chu alistalh akxtum kalichuwinantit.

• ¿Lakpuwana pi mimpuskat o minchixku kgalhi akgtum tayat nema tlawama pi nakgalhiyatit taʼakglhuwit? Komo chuna, ¿tuku uma tayat?

• ¿Xlikana pulaktum lu nitlan tayat o kajwatiya tuku ni lakgatiya?

• ¿Makgtayanan uma tayat nema ni lakgatiya? Komo chuna, ¿la makgtayanan chu tuku xlakata lu xlakaskinka akxilha?