«Katijin wa kinchik xlitaxtu»

LA XAKLAMA

Lhuwa latamanin ni lakapala listaktayakgo tuku titaxtukgo kxlatamatkan. Akit chuna xakwanit. Klakachilh chu kimakgastakka kBarcelona, xliʼakgtiy kachikin nema tlakg xalanka kʼEspaña. Kifamilia xlama kSomorrostro, nema xwi kxkilhtun pupunu. Somorrostro xlilakgapaskan pi anta lu kstakan droga chu lhuwa xʼanankgo tiku lixkajni xlikatsikgo.

Akinin kinkgalhnajatsakan kamanan chu akit xapuxku. Xlakata lu limaxkgen xakwanitaw, kintlat kimalakgachalh xlakata nakkasakni xpelotajkan tiku xkgamanankgo tenis. Maski kajku 10 kata xakkgalhi, chali chali xakskuja akgkaw hora. Wa xlakata nila xakan kʼescuela chuna la amakgapitsin kamanan. Akxni xakkgalhi 14 kata, ktsukulh skuja kʼakgtum taller niku xkatlawakan laktsu liskujni xalikan.

Kkata 1975, kiwanika pi soldado xaklitaxtulh. Uma kilhtamaku kʼEspaña lu xmafuerzajlininankan soldado nalitaxtuya. Wi tuku xaktlawaputun kkilatamat, wa xlakata ktalhkatanulh kLegión española anta kMelilla, akgtum kachikin nema wi kxnorte África, chu tapakgsini España. Uma kilhtamaku na ktsukulh wa droga chu kuchu.

Akxni ktaxtulh anta, ktaspitli kBarcelona chu kkamastokgli akgtum pandilla. Kaxatukawa xakkgalhanaw chu alistalh xakstayaw xlakata xakkgalhiw tumin nema naklitamawayaw drogas. Ktsukulh wa drogas nema wanikan LSD chu anfetaminas, chu ktsukulh tlawa talakgxtumit xalimaxana, xakwa kuchu chu xakkgamanan xlakata naktlaja tumin. Chuna la xaklima kilatamat, tlawalh pi lu xaluku xakwa. Ankgalhin xaklin akgtum cuchillo, akgtum hacha o atanu tuku tlan limakgninankan chu xakama maklakaskin kaxanikawa niku xtalakaskilh.

Akgtum kilhtamaku kkgalhaw akgtum putlaw chu policía tsukukgon kinkaputsastalanikgoyan. Xtachuna la akgtum película xtasiya. Max 30 kilómetros xlilakgamat kaw asta akxni policía tsukukgon kinkalimapakganankgoyan. Alistalh kchocarliw putlaw chu ktsalataxtuw. Akxni kintlat katsilh uma, kintlakgaxtulh kxchik.

Akgkitsis kata, katijin kinchik litaxtulh. Xaklhtata kxkilhtin edificios, kcamiones, klaktawilh nema xwilakgo kparques chu kputaknun. Milh kilhtamaku, asta xaklhtata kʼakgtum lhuku. Xakmakgkatsi pi kilatamat nitu xlitaxtu chu pi niti xlilakgaputsa komo xaklamajku o xakninita. Klakapastaka pi akxni xakwa droga, xakchuku kimakapixni chu kimakxpan. Asta la uku chuntiya tasiya kixkutu.

BIBLIA LAKGPALILH KILATAMAT

Akxni xakkgalhi 28 kata, kintse milh kimputsa chu kiwanilh pi xaktaspitli kxchik. Kwanilh pi tlan, chu kmalaknunilh pi xakama lakgpali kilatamat. Pero lilh kilhtamaku xlakata xakmakgantaxtilh tuku xakwaninit.

Akgtum kakgotanun, chatiy xtatayananin Jehová minkgolh kkinchikkan. Akxni xakkatachuwinama, kintlat pixlanka wancha pi xakkamalakchuwanilh malakcha. Pero komo ni xaklakgati nakiwanikan tuku kilitlawat, ni kkgalhakgaxmatli. Xtatayananin Jehová kimalaknunikgolh maktutu laktsu libros. Xatapaxuwan kmakglhtinalh chu kkakgalhskilh niku xtamakxtumikgo. Ni lhuwa kilhtamaku alistalh, kkalh kPukgalhtawakga.

Tuku lu kaks kimalakawanilh wa pi putum lu tlan klhakganankgonit. Chu akit laklhman kinchixit xwanit, ni xaksitnit kinkgalhchixit chu xalakgwan kilhakgat xaklin. Kmakgkatsilh pi nila xaktanulh anta, wa xlakata kkilhtin ktamakgxtakgli. ¡Lu kaks kimalakawanilh akxni kakxilhli Juan, chatum tiku na xmakgtanuma kʼakgtum pandilla chu kiʼamigo xwanit! ¡Xla xwilinit xtraje! Alistalh kkatsilh pi xtitaxtunita akgtum kata lata xla xtatayana Jehová xlitaxtunit. Akxni kakxilhli, klakpuwa pi tlan xaktanulh ktamakxtumit. Lata uma kilhtamaku, kilatamat tsukulh talakgpali.

Kmakgamakglhtinalh akgtum takgalhtawakga xalak Biblia chu kakxilhli pi komo xakmakgapaxuwaputun Dios, xtalakaskin pi nialh xaluku xakwa chu nialh xaktlawalh talakgxtumit xalimaxana. Pero uma lu tuwa kitaxtulh. Kakxilhli pi xtalakaskin xaklakgpalilh kilatamat chu putuminika kintalakapastakni xlakata xakmakgapaxuwalh Jehová (Romanos 12:2). Xtalakgalhaman Dios lakgchalh kinaku. Maski lhuwa tuku nitlan xaktlawanit, kmakgkatsilh pi xla xkimaxkima talakaskin naklakgpali kilatamat. Tuku kkatsinilh xlakata Jehová lakgchalh kinaku. Kʼakgatekgsli pi wi chatum Malakatsukina tiku kililakgaputsa (1 Pedro 5:6, 7).

Uma kimakgpuwantinilh naklakgpali kilatamat. Akgtum liʼakxilhtit, akxni klichuwinaw lixkuli kkintakgalhtawakga, klakpuwa: «Komo Jehová lakaskin pi nitu kaklixkajwanalh kkilatamat, talakaskin naklakgmakgan uma cigarro» (2 Corintios 7:1). Wa xlakata kmakgalh.

Na xtalakaskin pi nialh xakwalh drogas chu nialh xakstalh. Wa uma tuku tlakg tuwa kmakgkatsilh. Xlakata tlan chuna xaktlawalh, xtalakaskin pi nialh akxtum xakkatalalh kiʼamigos. Komo chuntiya akxtum xakkatalh nila xakmatliwakglhli kintakanajla. Titaxtulh kilhtamaku, tlakg ktsukulh lipawan Dios chu xasasti amigos nema xakkatekgsnit kcongregación. Nikxni xkililakgaputsakanit chuna la xlakan xtlawakgo chu nikxni xkilimasiyanikanit tapaxkit nema xlakan xkilimasiyanikgo. Titaxtulh makgapitsi papaʼ, tlan kmakgxtakgli drogas chu klilhakganalh «xasasti tayat» nema xʼama kimakgtaya nakmakgapaxuwa Jehová (Efesios 4:24). Agosto kata 1985, ktamunulh chu xtatayana Jehová klitaxtulh.

TUKU TLAN KINKITAXTUNINIT

Biblia kimakgtayalh naklakgpali kilatamat. Kimakgtayalh naklakgmakgan latamat nema xkimakgatatatlama chu xtlawama pi xakmakgkatsilh pi nitu xaklitaxtu. Liwaka puxamakaw tiku xapulana kiʼamigos xwankgonit lakgnikgolh sida chu atanu tajatat nema chipanan akxni wakan drogas. Lu kpaxtikatsininan pi xtastakyaw Biblia kimakgtayanit nichuna nakiʼakgspula.

Klakgmakganit cuchillos chu hachas nema xaklin akxni xaluku xakwanit. Nikxni klakpuwa pi xakama kalilakgpali Biblia xlakata xakkamakgtayalh latamanin. La uku, akit chu kimpuskat lu klimaxtuyaw kilhtamaku xlakata naklichuwinanaw Dios.

Maski kinatlatni nikxni xtatayananin Jehová litaxtukgolh, liwana xkatsikgo pi Biblia lu xkimakgtayanit. Kintlat asta xkakgalhmakgtaya xtatayananin Jehová kxlakatin xʼamigos chu liwana xkatsi pi xasasti kintakanajla lu xlakgpalinit kilatamat. Kintse ankgalhin xkiwani pi lu tlan xtiwa komo akxni kgawasaku xakwanit, xaktsukulh likgalhtawakga Biblia. ¡Chu lu xlikana tuku xkiwani!

Putum tuku ktitaxtunit kimasiyaninit pi ni limin tapaxuwan akxni maklakaskinkan drogas o akxni kgalhikan atanu nixatlan talismanin. La uku tuku tlakg kimakgapaxuwa wa pi kkamakgtaya latamanin nalakgapaskgo tuku xaxlikana masiya xTachuwin Dios, tamasiy nema lakgmaxtulh kilatamat.