Chuntiya kamastakaw kintapaxkitkan

1. ¿Tuku katsini akxni xlimakgalhtawakgepaka Biblia?

¿LAKAPASTAKA pi lhuwa tuku katsini akxni xlimakgalhtawakgepaka Biblia? Max lu kaks lilakawanti akxni katsini pi Dios kgalhi xtukuwani. Chu max lu tlan limakgkatsi akxni katsini pi ni anan akgtum pupatin niku Dios kamakgapatinan latamanin. Nachuna, max lu lipaxuwa akxni katsini pi tiku nikgonita nema lu xkapaxkiyaw tlan nalatamaparakgo chu akxtum nakatalatamayaw kParaíso.

2. ¿Tuku tlawa xlakata nalimasiyaya pi kstakma mintakanajla? (Efesios 5:1, 2).

² Akxni tsuku likgalhtawakgaya xTachuwin Dios, tapaxkit nema kgalhiniya Jehová tsukulh staka. Chu uma tapaxkit makgtayan nalilatapaya tuku xkatsinipat. Xtastakyaw Biblia makgtayan nalaksaka tuku tlan. Na tsuku lakgpaliya mintalakapastakni chu tuku xtlawaya xlakata xmakgapaxuwaputuna Dios. Xtachuna la chatum aktsu kgawasa tlawa tuku tlawa xtlat, wix tsuku stalaniya xliʼakxilhtit minTlat xalak akgapun (kalikgalhtawakga Efesios 5:1, 2).

3. ¿Tuku takgalhskinin tlan nalilakpuwanaw?

³ Tlan xlilakpuwaw umakgolh takgalhskinin: «¿Tlakg kpaxki Jehová la uku nixawa akxni ktamunulh? ¿Limasiya tuku klakapastaka chu tuku ktlawa pi klikatsi chuna la Jehová, liwaka akxni kkalimasiyani kintapaxkit natalan xalak congregación?». Komo lakgmixnit tsinu tapaxkit nema xkgalhiyaw xapulana, ni kataxlajwaniw. Uma nachuna kaʼakgspulalh kstalaninanin Cristo xalak pulana siglo. Pero Jesús ni lakpuwa pi ni xʼamakgo talakgpalikgo chu na nichuna katilakpuwa kimpalakatakan (Apoc. 2:4, 7). Liwana katsi pi tlan namatliwakglhparayaw tapaxkit nema xkgalhiyaw akxni tsukuw lakgapasaw xaxlikana.

4. ¿Tuku naʼakxilhaw kʼuma artículo?

⁴ Kʼuma artículo, pulana nalichuwinanaw la tlan namatliwakglhaw tapaxkit nema kgalhiniyaw Jehová chu kintalatamankan. Chu alistalh nalichuwinanaw la tlan nalitamakgtayayaw akinin chu amakgapitsin komo chuna natlawayaw.

LU KALISKUJWI XLAKATA NAMASTAKAYAW TAPAXKIT NEMA KGALHINIYAW JEHOVÁ

5, 6. 1) ¿Tuku tuwa titaxtulh Pablo akxni xlichuwinama Dios? 2) ¿Tuku makgtayalh chuntiya naskujnani Jehová?

⁵ Apóstol Pablo lhuwa tuku lu lipaxuwalh chuna la kskujnanima Jehová, pero nachuna lhuwa tuku nitlan titaxtulh. Makglhuwa lakgamakgat niku kilalh xlakata nalichuwinan Dios, maski tuwa xwanit. Milh kilhtamaku, kalipekua tawi xlatamat kkgalhtuchokgo chu «xpalakata kgalhananin». Chu milh kilhtamaku xtalamakgasitsin lu nitlan likatsinikgolh (2 Cor. 11:23-27). Nachuna, xnatalan ni ankgalhin xpaxtikatsinikgo putum tuku xla xtlawa xlakata nakamakgtaya (2 Cor. 10:10; Filip. 4:15).

⁶ ¿Tuku makgpuwantinilh Pablo chuntiya naskujnani Dios? Xla lhuwa tuku xkatsininit xlakata xtayat Jehová akxni xlikgalhtawakga Tatsokgni chu xlakata tuku xtitaxtunit kxlatamat. Liwana xkatsi pi Jehová lu xpaxki (Rom. 8:38, 39; Efes. 2:4, 5). Chu Pablo na lu xpaxki Jehová. Limasiyalh uma tapaxkit akxni kamakgtayalh «xasantos natalan» (Heb. 6:10).

7. ¿Tuku nakinkamakgtayayan chuntiya namastakayaw tapaxkit nema kgalhiniyaw Jehová?

⁷ Xlakata chuntiya nastaka tapaxkit nema kgalhiniyaw Dios, talakaskin lu nalikgalhtawakgaputunaw xTachuwin. Akxni nalikgalhtawakgayaw Biblia, kalilakpuwaw tuku kinkamasiyaniyan xpalakata Jehová. Kalilakpuwaw umakgolh takgalhskinin: «¿La masiya umakgolh versículos pi Jehová kimpaxki? ¿La kimakgpuwantini umakgolh versículos tlakg nakpaxki Jehová?».

8. ¿La kinkamakgtayayan oración tlakg nastaka tapaxkit nema kgalhiniyaw Dios?

⁸ Atanu tuku nakinkamakgtayayan nastaka tapaxkit nema kgalhiniyaw Jehová wa pi nawaniyaw putum tuku wi kkinakujkan akxni natlawaniyaw oración chali chali (Sal. 25:4, 5). Chu Jehová nakgalhti kiʼoracioneskan (1 Juan 3:21, 22). Khanh,b chatum tala puskat tiku lama kʼAsia, lichuwinalh: «Xapulana, xakpaxki Jehová kaj xlakata tuku xakkatsininit kBiblia. Pero uma tapaxkit tsukulh staka akxni kakxilhli pi xla xkgalhti kiʼoraciones, chu uma kimakgpuwantinilh naktlawa tuku xla lakgati».

LU KALISKUJWI TLAKG NAPAXKIYAW KINTALATAMANKAN

9. ¿Tuku tayat xkgalhi Timoteo nema na tlan nakgalhiyaw?

⁹ Makgapitsi kata alistalh lata Pablo kstalanina Cristo litaxtulh, lakgapasli Timoteo, chatum kgawasa tiku xkgalhi lu laktlan tayat. Xla xpaxki Jehová chu xkapaxki latamanin. Alistalh, wa uma tuku Pablo kawanilh filipenses xlakata Timoteo: «Ni kkgalhi atanu tiku likatsi chuna la xla, [...] tiku xlikana kalilakgaputsayan» (Filip. 2:20). Pablo ni wa lichuwinalh pi Timoteo lu tlan xlakkaxtlawa tuku xlitatlawat xwanit o pi lu tlan xʼakgchuwinan, wata tuku kaks xmalakawani wa pi Timoteo lu xkapaxki natalan. Max congregaciones lu xkgalhkgalhimakgo pi Timoteo xkalakgapaxialhnalh (1 Cor. 4:17).

10. ¿La limasiyakgolh Anna chu xchixku pi xkapaxkikgo natalan?

¹⁰ Akinin na putsayaw la nakamakgtayayaw kinatalankan (Heb. 13:16). ¿Lakapastakatit Anna, tiku lichuwinaw kʼartículo nema titaxtulh? Akxni titaxtulh lanka unisen, xla chu xchixku ankgolh lakgapaxialhnankgo akgtum familia. Akxilhkgolh pi xlakxlanit xʼakgstin xchikkan. Wa xlakata, kxkajwankgonit putum klhakgatkan chu nitu tuku klhakgakgo. Anna lichuwinan tuku tlawakgolh: «Kliw klhakgatkan, kkachakgeniw chu xatachakgen kkamaspitniw. Ni lhuwa tuku ktlawaw, pero uma kinkamakgtayan lu tlan naklatalalinaw». Tapaxkit wa tuku kamakgpuwantinilh Anna chu xchixku nakamakgtayakgo natalan (1 Juan 3:17, 18).

11. 1) ¿Tuku kitaxtu komo nalimasiyayaw tapaxkit? 2) Chuna la wan Proverbios 19:17, ¿la akxilha Jehová tuku tlawayaw xpalakatakan amakgapitsin?

¹¹ Akxni kalimasiyaniyaw tapaxkit amakgapitsin, tlawamaw chuna la likatsi Jehová. Chu xlakan akxilhkgo tuku tlawayaw xpalakatakan chu putum kilhtamaku nalakapastakkgo. Khanh, tala puskat tiku lichuwinaw kpárrafo 8, kalakapastaka natalan tiku lu makgtayakgolh, xla wan: «Lu kkapaxtikatsini natalan tiku akxtum xʼankgo kintalichuwinankgo Dios. Lu tlan xlikatsikgo. Xminkgo kintiyakgo kkinchik, xkintawayankgo chu alistalh xkilimparakgo kkinchik. La uku kkatsi pi lhuwa tuku limakgxtakgkgolh xlakata nakimakgtayakgo, pero xatapaxuwan chuna tlawakgolh». Xlikana pi ni putum kintikapaxtikatsinikgon tuku tlawayaw xpalakatakan. Wa uma tuku wan Khanh xpalakata natalan tiku makgtayakgolh: «Lu tlan xwa pi tlan xakkamaspitnilh tuku tlawakgolh, pero makgapitsi nipara kkatsi niku wilakgolh la uku. Pero Jehová katsi chu kskini pi kakasikulunatlawalh». Chuna, Jehová akxilha putum tuku tlawayaw xpalakatakan amakgapitsin. La akgtum lanka tamakamastan liʼakxilha chu kinkaxokgoniputunan tuku tlawayaw (kalikgalhtawakga Proverbios 19:17).

12. ¿La tlan nalimasiyakgo tapaxkit kcongregación natalan lakgkgawasan tiku tamunukgonita? (Na kaʼakxilhti dibujos).

¹² Komo wix chatum tala kgawasa, ¿tuku tlan natlawaya xlakata nalimasiyaya tapaxkit kcongregación? Namakgtayanana. Chatum tala kgawasa tiku wanikan Jordan kgalhskilh chatum kgolotsin tuku tlan xtlawalh xlakata tlakg xkamakgtayalh natalan. Uma kgolotsin wanilh pi lu tlan taskujut xtlawama xlakata xmatliwakglhnit xtakanajla chu wanilh tuku tlakg tlan xtlawalh. Akgtum liʼakxilhtit, wanilh pi tlakg sokg xchalh kPukgalhtawakga chu xkapakgachipalh natalan, pi xmastalh xtakgalhtin ktamakxtumit, akxtum xkataʼalh xgrupo xlakata nalichuwinankgo Dios chu xputsalh la tlakg xkamakgtayalh natalan. Xlakata Jordan tlawalh tuku wanika, makgtayalh xlakata alistalh tlakg xlakgayawaka taskujut, chu makgtayalh tlakg nakapaxki natalan. Na katsinilh pi akxni chatum kgawasa siervo ministerial litaxtu, ni aku tsuku kamakgtaya amakgapitsin; wata kamakgtayamaja chu talakaskin chuntiya natlawa (1 Tim. 3:8-10, 13).

13. ¿Tuku makgtayalh Christian kgolotsin nalitaxtupara?

¹³ ¿Kgolotsin o siervo ministerial xlitaxtuya makgasa? Jehová ni patsankga putum tuku tlawanita chu tapaxkit nema limasiyanita (1 Cor. 15:58). Chu Jehová chuntiya akxilha tapaxkit nema limasiyaya. Chatum tala tiku wanikan Christian lu nitlan limakgkatsilh akxni nialh kgolotsin litaxtulh. Pero ni taxlajwanilh, xla wan: «Liwana klakkaxwililh pi maski nialh kgolotsin xaklitaxtulh, chuntiya xakkama tlawa putum tuku xakmatlanilh xlakata kpaxki Jehová». Alistalh kgolotsin limaxtuparaka. Christian wan: «Ni liwana xakkatsi komo xakmakglhtinamputumpara uma taskujut. Pero klakpuwa pi komo Jehová xkilimasiyanima xtalakgalhaman chu xkimaxkima talakaskin nakkaskujnipara kinatalan xalak congregación, xakkama makglhtinan uma taskujut xlakata kpaxki Jehová chu kkapaxki kinatalan».

14. ¿Tuku kinkamasiyaniyan tuku titaxtulh chatum tala xalak Georgia?

¹⁴ Xlakskujnin Jehová na kalimasiyaniyaw tapaxkit tiku ni xtatayananin (Mat. 22:37-39). Akgtum liʼakxilhtit, Elena, chatum tala puskat xalak república de Georgia, lichuwinan: «Xapulana, xaklichuwinan Jehová xlakata kajwatiya xla xakpaxki. Pero na ktsukulh kapaxki latamanin chuna la tlakg ktsukulh paxki Jehová. Xaklilakpuwan tuku taʼakglhuwit xtitaxtumakgo chu tuku xlakgatikgolh xakkalitachuwinalh. Uma tlawalh pi tlakg nakkamakgtayaputun» (Rom. 10:13-15).

TUKU TLAN KITAXTU AKXNI KAPAXKIYAW AMAKGAPITSIN

15, 16. Chuna la tasiya kdibujos, ¿tuku tlan kitaxtu akxni kalimasiyaniyaw tapaxkit amakgapitsin?

¹⁵ Akxni kalimasiyaniyaw tapaxkit kinatalankan, na litamakgtayakgo amakgapitsin latamanin. Akxni xʼanan pandemia xla COVID-19, Paolo chu xpuskat kamakgtayakgolh natalan lakpuskatin tiku linkgoya kata xlakata tlan xlimaklakaskinkgolh dispositivos electrónicos xlakata nalichuwinankgo Dios. Chatum tala tiku xlina kata nila xlimaklakaskin xdispositivo, pero alistalh katsinilh la limaklakaskinkan chu kaʼinvitarlilh xtalilakgapasni Akxni lakapastakkan akxni tinilh Cristo. Chu 60 tiku xkawaninit kgaxmatkgolh taʼakgchuwin kvideoconferencia. Wa xlakata uma tala chu xtalilakgapasni lu litamakgtayakgolh tuku tlawakgolh Paolo chu xpuskat. Uma tala tsokgnanilh Paolo: «Lu kkapaxtikatsiniyan xlakata kilamakgtayaw akinin tiku klinawa kata. Nikxni ktipatsankgalh xtapaxkit Jehová chu tuku wixin tlawanitantit kimpalakatakan».

¹⁶ Uma chu atanu tuku titaxtunit Paolo masiyanilh tuku lu xlakaskinka. Katsinilh pi tapaxkit tlakg xlakaskinka nixawa liskgalala o tuku katsiniyaw tlawayaw. Xla lichuwinan: «Milh kilhtamaku superintendente de circuito xaklitaxtu. Natalan max nialh lakapastakkgo taʼakgchuwin nema xakmasta, pero xlikana pi max lakapastakkgo la kkamakgtayalh».

17. ¿Tiku atanu litamakgtaya akxni limasiyayaw tapaxkit?

¹⁷ Akxni limasiyayaw tapaxkit, kiʼakstukan litamakgtayayaw chuna la nikxni xlakpuwanitaw. Chuna limasiya tuku titaxtulh chatum tala kgawasa tiku wanikan Jonathan tiku lama kNueva Zelanda. Akgtum sábado, akxilhli chatum precursor pi xʼakstu xlichuwinama Dios akxni lu xchichinama. Lakkaxwililh akxtum nataʼan uma precursor xlakata nalichuwinankgo Dios akgatunu sábado kakgotanun. Xla ni xlakpuwanit pi xʼama litamakgtaya uma tuku xtlawama. Jonathan wan: «Uma kilhtamaku ni lu xaklakgati xaklichuwinan Dios. Pero akxni kakxilhli la xmasiya uma precursor chu pi lu tlan xkitaxtuni, tlakg ktsukulh lakgati klichuwinan Dios. Nachuna, uma precursor lu tlan kiʼamigo litaxtu chu kimakgtayanit nakmatliwakglha kintakanajla, tlakg naklipaxuwa taskujut nema kinkalakgayawanitan Jehová chu tlakg tlan naktalalin Jehová».

18. ¿Tuku lakaskin Jehová pi katlawaw?

¹⁸ Jehová lakaskin pi tlakg kapaxkiw chu pi tlakg kakapaxkiw kintalatamankan. Chuna la akxilhnitaw, xlakata tlakg napaxkiyaw Jehová talakaskin nalikgalhtawakgayaw xTachuwin, nalilakpuwanaw chu natlawaniyaw oración chali chali. Chu xlakata tlakg tlan nakalimasiyaniyaw tapaxkit kinatalankan talakaskin nakamakgtayayaw. Chuna la nastaktilha kintapaxkitkan, tlakg nakatalakatsuwiniyaw Jehová chu kinatalankan. ¡Lu tlan nakatalalinaw putum kilhtamaku!