1, 2. ¿Tuku akxilhkgonit lhuwa superintendentes de circuito?

SUPERINTENDENTE de circuito makgalhsputuma akgtum tamakxtumit nema katakgalhilh lakgkgolotsin xlakata lakgapaxialhnama congregación. Xla lu kapaxki xlakata lu lhuwa skujmakgo. Nachuna, lhuwa tiku linkgoya kata chu max tlan xtlatkan xlitaxtukgolh. Pero wi tuku lu xlakaskinka nema lilakgaputsa. Akxni xaʼawatiya kalakgapaxialhnalh kawanilh pi kakamasiyanikgolh amakgapitsin natalan. Wa xlakata kakgalhskin: «Natalan, ¿tuku tlawanitantit xlakata tlakg lhuwa tiku nakamasiyaniyatit kcongregación?». Chatum kgolotsin kgalhtinan: «Ni lhuwa tuku ktlawanitaw xlakata nakkamakgtayayaw». Chu amakgapitsi lakgkgolotsin nachuna wankgo.

² Komo wix kgolotsin xalak congregación, max nachuna xkgalhtinanti. Lhuwa superintendentes de circuito akxilhkgonit pi klhuwa congregaciones, lakgkgolotsin ni limaxtumakgo lhuwa kilhtamaku xlakata nakamasiyanikgo amakgapitsin natalan wi tuku nalakgatayakgo kcongregación. Kaʼakxilhwi tuku xlakata.

3. 1) ¿Tukuya versículos xalak Biblia masiya pi lu xlakaskinka nakamasiyanikan amakgapitsin? 2) ¿Tuku xlakata lu xlakaskinka kiliʼakxilhatkan uma artículo chu tuku aku mima? (Kaʼakxilhti nota.) 3) ¿Tuku xlakata makgapitsi lakgkgolotsin tuwa makgkatsikgo nalimaxtukgo kilhtamaku nakamasiyanikgo amakgapitsin?

³ Xlakata wix kgolotsin, katsiya pi lu xlakaskinka nakamasiyanikan amakgapitsin.a (Kalikgalhtawakga nota.) Na katsiya pi tlakg talakaskin natalan tiku namakgtayanankgo kcongregaciones la uku chu kxasasti congregaciones nema naʼanan (kalikgalhtawakga Isaías 60:22). Biblia wan pi lakgkgolotsin xlimasiyanitkan amakgapitsin wi tuku nalakgatayakgo (kalikgalhtawakga 2 Timoteo 2:2). Maski chuna, max tuwa makgkatsiya nalimaxtuya kilhtamaku xlakata nakamasiyaniya. ¿Tuku xlakata? Xlakata milimakgtakgalhat mifamilia chu miliskujat. Na milikuentajtlawat tuku lakgayat kcongregación chu atanu tuku lu xlakaskinka. Pero chuna la nakatsiyaw, lu xlakaskinka nalimaxtuya kilhtamaku nakamasiyaniya amakgapitsin.

KAKAMASIYANI AMAKGAPITSIN

4. ¿Tuku lakpuwankgo makgapitsi lakgkgolotsin?

⁴ ¿Tuku xlakata makgapitsi lakgkgolotsin ni limaxtukgo lhuwa kilhtamaku nakamasiyanikgo amakgapitsin? Max lakpuwankgo pi wi tuku tlakg xlakaskinka nema talakaskin lakapala nalakkaxtlawakan. O max lakpuwankgo pi congregación ni tuku katilanilh komo ni nakamasiyanikgo amakgapitsin la uku. Pero, ¿xlikana uma? Xlikana wi tuku talakaskin lakapala nalakkaxtlawakan. Pero komo wix ni nakamasiyaniya la uku amakgapitsin, max tlawanipat tuku nitlan congregación.

5, 6. 1) ¿Tuku nala komo ni nalakgpalinikan xʼaceite akgtum putlaw? 2) ¿Tuku nala komo lakgkgolotsin ni nakamasiyanikgo amakgapitsi natalan?

⁵ Kalilakpuwanti uma liʼakxilhtit. Xlakata akgtum putlaw tlan natlawan, ¿tuku tlakg xlakaskinka? ¿Namujunikan gasolina? ¿O nalakgpalinikan aceite? Max wi tiku nalakpuwan pi tlakg xlakaskinka namujunikan gasolina, xlakata komo ni namujuniya, putlaw nialhla katitlawalh. Pero akxni chuna lakpuwankan max nitlan nakitaxtu. Komo ni nalakgpalinikan aceite, namin kilhtamaku nalakxla. Chu alistalh tlakg lhuwa kilhtamaku chu tlakg lhuwa tumin natalakaskin xlakata nakaxtlawakan. ¿La natamalakxtumiyaw uma liʼakxilhtit congregación?

⁶ ¿Tuku tlakg xlakaskinka? ¿Namakgantaxtiyaw tuku lakgayaw kcongregación? O ¿nakamasiyaniyaw amakgapitsin? Makgapitsi lakgkgolotsin max nalakpuwankgo pi tlakg xlakaskinka lakapala namakgantaxtikgo tuku lakgayakgo congregación, xlakata komo ni chuna natlawakgo max nitlan katikitaxtunilh congregación. Xlakata Biblia wan pi wa natlawayaw tuku tlakg xlakaskinka (Filip. 1:10). Pero komo lakgkgolotsin lhuwa tuku tlawamakgo chu ni kgalhikgo kilhtamaku xlakata nakamasiyanikgo amakgapitsin, ¿tuku nala? Namin kilhtamaku kcongregación ni katiʼanalh natalan tiku putum tlan natlawakgo tuku xlitatlawat kcongregación.

7. ¿La kiliʼakxilhatkan lakgkgolotsin tiku limaxtukgo kilhtamaku nakamasiyanikgo amakgapitsin?

⁷ Nikxni kalakpuwanti pi ni lu xlakaskinka nakamasiyaniya amakgapitsin. Lakgkgolotsin tiku lakpuwankgo la nakitaxtuni congregación, limaxtukgo kilhtamaku nakamasiyanikgo amakgapitsin. Tiku chuna tlawakgo, lu tlan lakgkgolotsin litaxtukgo chu lu xlakaskinka litaxtukgo kcongregación (kalikgalhtawakga 1 Pedro 4:10). ¿La litamakgtaya congregación akxni lakgkgolotsin limaxtukgo kilhtamaku nakamasiyanikgo amakgapitsin?

LIWANA KAMAKLAKASKINTI KILHTAMAKU

8. 1) ¿Tuku xlakata lakgkgolotsin xlimasiyanitkan amakgapitsin? 2) ¿Tukuya taskujut nema lakapala xlitlawatkan lakgkgolotsin tiku ankgonit makgtayanankgo alakatanu? (Kaʼakxilhti recuadro «Akgtum taskujut nema xlitatlawat la uku».)

⁸ ¿Tuku xlakata lakgkgolotsin xlimasiyanitkan amakgapitsin? Asta lakgkgolotsin tiku lu katsinikgo, xlitaktujutkan chu xliʼakgatekgsatkan pi chuna la natitaxtutilha kata, nialhla katitlawakgolh tuku tlan tlawakgo la uku (Miq. 6:8). Lakgkgolotsin na xlikatsitkan pi namin kilhtamaku max nakgalhikgo taʼakglhuwit chu nila katimakgantaxtikgolh tuku lakgayakgo (Ecl. 9:11, 12; Sant. 4:13, 14). Nachuna, xlakata lu kapaxkikgo natalan xalak congregación, kamasiyanikgo amakgapitsin tuku katsinikgonit chuna la titaxtutilhanit kilhtamaku (kalikgalhtawakga Salmo 71:17, 18).

9. ¿Tukuya kilhtamaku lu natalakaskin natalan tiku kamasiyanikanit la natlawakgo taskujut kcongregación?

⁹ Lakgkgolotsin tiku kamasiyanikgo amakgapitsin lu tlan tuku tlawakgo xlakata makgtayanankgo natatliwakglha congregación. Makgtayanankgo naʼanan natalan tiku namakgtayakgo congregación makxtum natawila chu ni namakgatsankgananikgo Dios. Chu uma lu xlakaskinka uma kxaʼawatiya kilhtamaku. Pero tlakg xlakaskinka nawan kilhtamaku nema aku mima akxni lama nawan lanka takatsanajwat (Ezeq. 38:10-12; Miq. 5:5, 6). Wa xlakata, lakgkgolotsin, komo ninatu limaxtupatit kilhtamaku xlakata nakamasiyaniyatit amakgapitsin wi tuku nalakgatayakgo, kamatsukitit la uku.

10. Xlakata nakgalhikgo kilhtamaku nakamasiyanikgo amakgapitsin, ¿tuku xlitlawatkan lakgkgolotsin?

¹⁰ Kkatsiyaw pi lu liskujpat xlakata natlawaya tuku lakgayat kcongregación. Pero max natalakaskin nialh lu lhuwa kilhtamaku nalimaxtuya xlakata natlawaya tuku lakgayat chu nalimaklakaskina minkilhtamaku xlakata nakamasiyaniya amakgapitsin (Ecl. 3:1). Komo chuna natlawaya liwana limaklakaskimpat nawan minkilhtamaku chu namakgtayaya congregación.

KALAKKAXWILI LA NAMAKGTAYAYA TALA

11. 1) ¿Tuku xlakata lu xlakaskinka tuku wankgolh makgapitsi lakgkgolotsin xalak tanu tanu países? 2) Chuna la wan Proverbios 15:22, ¿tuku xlakata namakgtayanan naʼakxilhaw tuku wankgo amakgapitsi lakgkgolotsin?

¹¹ Lhuwa lakgkgolotsin xalak lakalhuwa países lu tlan kakitaxtuninit akxni kamasiyanikgo amakgapitsin. Nina makgas kakgalhskinka makgapitsi la tlawakgo.b (Kalikgalhtawakga nota.) Chu maski tanu tanu la wilakgolh xcongregacionkan, putum watiya tuku wankgolh. Uma limasiya pi tastakyaw nema masta Biblia lu makgtayanan xlakata nakamasiyanikan amakgapitsin kputum congregaciones xlikalanka katiyatni (1 Cor. 4:17). Proverbios 15:22 wan pi komo ni kakgalhskinkan makgapitsin tuku tlawaputunkan, nitlan kitaxtu. Wa xlakata, kʼuma artículo chu nema aku mima nalichuwinanaw makgapitsi tuku wankgolh uma lakgkgolotsin. Chu naʼakxilhaw la tlan namakgantaxti umakgolh tastakyaw chatum kgolotsin.

12. ¿Tuku pulana xlitlawat kgolotsin xalak congregación chu tuku xlakata?

¹² Tuku pulana xlitlawat kgolotsin, nalakkaxwili la namasiyani tala. ¿Tuku xlakata? Akgtum liʼakxilhtit, chuna la chatum chanana akxni champutun talhtsi, pulana lakkaxwili tiyat xlakata chuna tlakg tlan nastaka xtachanan. Nachuna akxni chatum kgolotsin masiyaniputun chatum tala, pulana talakaskin nalakkaxwili la namasiyani. Xlakata chuna tala tlan nakatsini. ¿La natlawa xlakata nalakkaxwili la namasiyani? Tlan natlawa chuna la chatum lu tlan makgalhtawakgena xala makgasa, wa palakachuwina Samuel.

13-15. 1) ¿Tuku wanilh Jehová Samuel? 2) ¿Tuku tlawalh Samuel xlakata makgtayalh Saúl? (Kaʼakxilhti xapulana dibujo.) 3) ¿Tuku xlakata lakgkgolotsin xliʼakxilhatkan la Samuel makgtayalh Saúl?

¹³ Liwaka akgtutu mil kata titaxtunit, Jehová wanilh Samuel pi xʼama malakgachani chatum chixku tiku xalak xtribu Benjamín xlakata xlaksakli wa xpulalilh kachikin Israel (1 Sam. 9:15, 16). Samuel akgatekgsli pi nialh wa xʼama pulalin kachikin Israel xlakata Jehová xlaksaknit atanu chixku. Xlakata xmakgtayalh uma chixku, Samuel lakkaxwililh tuku natlawa.

¹⁴ Lichali Samuel lakgapasli Saúl. Chu Jehová wanilh: «Uwi chixku tiku klitachuwinan». Samuel tunkun tlawalh tuku xlakkaxwilinit xlakata tlan xtachuwinalh Saúl. Wanilh pi akxtum xtawayalh chu maxkilh tlakg xlakaskinka putawilh kmesa. Alistalh, Samuel wanilh Saúl pi xmakgataxtinit tlakg xatlan liway. Akxni xwayankgonita wanilh Saúl pi xtaʼalh kxchik chu xatapaxuwan xkgalhchuwinantilhakgo ktiji. Akxni chankgolh, tawakakgolh kxakgstin chiki chu chuntiya xkgalhchuwinamakgo asta akxni ankgolh lhtatakgo. Lichali Samuel akmawakalh aceite Saúl xlakata nalimasiya pi Jehová xlaksaknit. Alistalh tsukli o sputli chu tlakg wanilh tuku xlitlawat. Wa xlakata, Saúl alh chu liwana xkatsi tuku xlitlawat xwanit (1 Sam. 9:17-27; 10:1).

¹⁵ Samuel liyawalh Saúl xlakata xpulalilh akgtum país. Xlikana pi uma ni xtachuna la akxni namasiyanikan chatum tala xlakata kgolotsin o siervo ministerial nalitaxtu kcongregación. Pero komo lakgkgolotsin xalak congregación naʼakxilhkgo la Samuel lakkaxwililh la namasiyani Saúl, lhuwa tuku nakamasiyani. Kaʼakxilhwi pulaktiy.

AKGTIY TAYAT NEMA LU XLAKASKINKA

16. 1) Akxni Samuel katsilh pi israelitas xlakaskinkgo chatum mapakgsina, ¿tuku makgkatsilh? 2) ¿Tuku tlawalh akxni Jehová wanilh pi mapakgsina xliyawalh Saúl?

¹⁶ Kakamasiyani amakgapitsin chu xatapaxuwan katlawa. Akxni Samuel katsilh pi israelitas xlakaskinkgo chatum chixku tiku xkamapakgsilh, lilipuwa chu makgkatsilh pi xlakgmakgankanit (1 Sam. 8:4-8). Samuel ni xkamaxkiputun chatum mapakgsina. Wa xlakata Jehová makgtutu wanilh pi xkakgaxmatnilh israelitas (1 Sam. 8:7, 9, 22). Maski chuna, Samuel ni sitsinilh tiku xʼama tawila xlakgxokgo. Akxni Jehová wanilh Samuel, xatapaxuwan chuna tlawalh. Kgalhakgaxmatli Jehová xlakata xpaxki, chu ni kaj xlakata chuna xlitlawat xwanit.

17. 1) ¿La nachuna tlawakgo la Samuel lhuwa lakgkgolotsin tiku lu katsinikgo? 2) ¿La makgkatsikgo umakgolh lakgkgolotsin?

¹⁷ La uku, lhuwa natalan tiku lu katsinikgo, tlawakgo chuna la Samuel chu xatapaxuwan kamasiyanikgo amakgapitsin (1 Ped. 5:2). Xlakata lu tlan likatsikgo, ni lakpuwankgo pi ni xlilat nakalakgayawakgo amakgapitsin tuku xlakan lakgayakgo kcongregación. Lu tlan xmakgtayananin kaʼakxilhkgo umakgolh natalan (2 Cor. 1:24; Heb. 13:16). Chu lipaxuwakgo akxni akxilhkgo la umakgolh natalan limaklakaskinkgo tuku katsinikgo xlakata namakgtayakgo congregación (Hech. 20:35).

18, 19. 1) ¿Tuku xlitlawat kgolotsin xlakata namakgtaya chatum tala, akxni nina masiyani xlakata wi tuku nalakgataya? 2) ¿Tuku xlakata xlakaskinka chuna natlawa?

¹⁸ Amigo kawanti, ni kaj chatum makgalhtawakgena kalitaxtu. Akxni Samuel lakgapasli Saúl, tlan lakapala mapakgsina xliyawalh chu xʼakmawakalh aceite. Chuna Saúl mapakgsina xlitaxtulh, pero ni xkatsilh tuku xlitlawat xwanit. Wa xlakata Samuel lakpuwa tuku natlawa xlakata pulana namasiyani Saúl. ¿Tuku tlawalh? Akxni nina mapakgsina xliyawa, akxtum wayankgolh, akxtum tlawankgolh, lhuwa chuwinankgolh chu akxtum jaxkgolh. Samuel kgalhkgalhilh asta akxni Saúl tlan xtlawalh tuku xʼamaka lakgayawakan, chu alistalh mapakgsina liyawalh.

¹⁹ Wix nachuna militlawat. Akxni nina masiyaniya chatum tala wi tuku nalakgataya kcongregación, xʼamigo kawanti. Chuna namakgtayaya tala pi xla tlan namakgkatsi. Tuku talismani niku lapat namakgtayayan xlakata tlan natalalipina. Maski lhuwa tuku militlawat, kalimaxtu kilhtamaku xlakata natachuwinana tala. Lu xlakaskinka chuna natlawaya xlakata chuna nalimasiyaniya pi lu xlakaskinka akxilha tala (kalikgalhtawakga Romanos 12:10). Xlikana pi tala lu napaxtikatsini xlakata nalimasiyaya pi xlakaskinka akxilha chu paxkiya.

20, 21. 1) ¿Tuku tlawa chatum kgolotsin tiku katsini masiya? 2) ¿Tuku naʼakxilhaw kʼartículo nema aku mima?

²⁰ Chatum kgolotsin tiku tlan likatsi ni kajwatiya nakamasiyani amakgapitsin natalan, wata na kapaxki (natekgsa tuku na wa lichuwinan kJuan 5:20). ¿Tuku xlakata lu xlakaskinka uma? Xlakata komo natalan naʼakxilhkgo pi xlakaskinka kaʼakxilha, tlakg nakatsiniputunkgo (Prov. 17:17; Juan 15:15).

²¹ Akxni lakkaxwilinita kgolotsin la namasiyani chatum tala, tlan natsuku masiyani. ¿La natlawa? Kʼartículo nema aku mima naʼakxilhaw tuku tlan natlawakan xlakata nakamasiyanikan natalan chu lu tlan kitaxtu.

1. 1) ¿Tuku katsikgo kskujnin Jehová xlakata akxni wi tuku tlawaputunkan? 2) ¿Tuku xlakata lu xlakaskinka uma kimpalakatakan? 3) ¿Tuku naʼakxilhaw kʼuma artículo?

KSKUJNIN Jehová katsikgo pi tlan taxtuyacha tuku tlawakan akxni liwana masiyanikanit tiku natlawa. Akgtum liʼakxilhtit, akxni Abrahán katalatlawalh xtalamakgasitsin, maklakaskilh lakchixkuwin tiku liwana xkamasiyanikanit la natalatlawanankgo chu chuna lakgmaxtulh Lot (Gén. 14:14-16). Kxkilhtamaku David xʼanan lhuwa tiku liwana xkamasiyanikanit xlakata xkilhtlinikgolh Jehová (1 Crón. 25:7). ¿Tuku xlakata lu xlakaskinka uma la uku? Pulana, xlakata talakaskin natalatlawayaw Satanás chu xkakilhtamaku (Efes. 6:11-13). Xlipulaktiy, xlakata kilimalankitkan Jehová akxni kalitachuwinanaw latamanin xpalakata (Heb. 13:15, 16). Chuna la kskujnin Dios xala makgasa, talakaskin nakinkamasiyanikanan tuku kilitlawatkan xlakata tlan nakinkakitaxtuniyan. Anta kcongregación, Jehová kalakgayawanit lakgkgolotsin nakamasiyanikgo amakgapitsin natalan (2 Tim. 2:2). Kʼuma artículo naʼakxilhaw tuku tlawakgonit makgapitsi.

KAMAKGTAYA TALA TLAKG NAPAXKI JEHOVÁ

2. Akxni chatum kgolotsin namasiyani chatum tala, ¿tuku tlan natlawa chu tuku xlakata?

² Chatum kgolotsin xtachuna chatum chanana. Akxni nina chan talhtsi, chanana tlan nawilini abono tiyat xlakata xtachanan liwana nastaka. Na chuna akxni chatum kgolotsin namasiyani chatum tala, tlan nalitachuwinan makgapitsi versículos xalak Biblia. ¿Tuku xlakata? Xlakata chuna namakgtaya namakgantaxti tuku nakatsini alistalh (1 Tim. 4:6).

3. 1) ¿Akxni kgolotsin natachuwinan tala, ¿la tlan nalimaklakaskin Marcos 12:29, 30? 2) ¿Tuku max nala akxni tala nakgaxmata pi kgolotsin palakaskima kxʼoración?

³ Komo wix kgolotsin, xlakaskinka nakatsiya la makgtayama tala tuku xaxlikana chu tuku makgkatsi. Xlakata nakatsiya, tlan natalikgalhtawakgaya Marcos 12:29, 30 (kalikgalhtawakga). Chu kakgalhskinti la makgtayanit nalaksaka tuku natlawa kxlatamat xlakata tamakamastaninit Jehová. Uma takgalhskinin max natlawa pi nalichuwinanatit la naskujnikan Jehová xliputum naku. Na tlan akxtum natatlawaya oración chu naskiniya Jehová pi kamaxkilh xʼespíritu santo xlakata namakgantaxti taskujut tuku nalakgayawakan. Akxni tala nakgaxmata pi palakaskimpat, max tlakg naskujputun kcongregación.

4. 1) Kalichuwinanti makgapitsi tiku lichuwinan Biblia nema nakamakgtaya natalan nastaka xtakanajlakan. 2) ¿Tuku xlilakpuwanatkan lakgkgolotsin akxni kamasiyanikgo amakgapitsin?

⁴ Akxni natsukuya masiyaniya chatum tala, kalitachuwinanti tiku lichuwinan Biblia la tuku tatsokgnit 1 Reyes 19:19-21, Nehemías 7:2, Nehemías 13:13 chu Hechos 18:24-26. Uma chu amakgapitsi tiku kalichuwinan Biblia namakgtaya naʼakxilha pi lu xlakaskinka nakamakgtaya amakgapitsi, nalipawankan chu nataktuju. Makgapitsi tuku lanit, tatekgsa Umakgolh tayat xtachuna abono nema chanana wilini tiyat. Namakgtaya tala tlakg lakapala nastaka xtakanajla. Chatum kgolotsin xalak Francia wan pi akxni masiyani chatum tala, tuku lakaskin wa pi tala nakatsini nalaksaka tuku natlawa chu kBiblia nakilhtiy. Xla wan pi lakputsa kilhtamaku xlakata nalikgalhtawakgani versículos nema namakgtaya naʼakgatekgsa makgapitsi tuku lu lakglilakgatit min kBiblia (Sal. 119:18). ¿Tuku atanu tlan nakalimakgtayakgo lakgkgolotsin natalan xlakata tlakg napaxkikgo Jehová?

KAMAKGPUWANTINI TLAKG NASKUJA CHU KAWANI TUKU XLAKATA

5. 1) ¿Tuku xlakata xlakaskinka nalitachuwinankan tala xlakata tuku lakgatayaputun kcongregación? 2) ¿Tuku xlakata xlakaskinka pi lakgkgolotsin namasiyanikgo natalan akxni lakgkgawasanku? (Kaʼakxilhti nota.)

⁵ Kakgalhskinti tala tuku lakgatayaputun kcongregación. Komo ni tuku lakpuwanit natlawa. Kamakgtaya wi tuku nalakgatayaputun chu chuna natlawa. Xatapaxuwan kalitachuwinanti xlakata tuku wix xlakgatayaputuna chu kalitachuwinanti la lu tlan limakgkatsi akxni makgantaxti tuku xlakpuwanita. Nituwa chuna natlawaya chu lu tlan kitaxtu. Anta kʼÁfrica chatum kgolotsin xalak congregación, chu precursor litaxtu, wan pi lu xlakaskinka chuna tlawakan. Xla wan pi akxni kgawasaku xwanit, chatum kgolotsin kgalhskilh tuku xlakgatayaputun kcongregación. Uma makgtayalh tlakg xlakaskinka naʼakxilha la kskujnanima Dios. Lhuwa lakgkgolotsin na wankgo pi lu xlakaskinka natsukukan kamasiyanikan natalan akxni kajku lakgkgawasan, tlan chuna natlawakan akxni stakmakgolhku. Tlan nakamatlawikan taskujut kcongregación tuku xlakan tlan tlawakgo. ¿Tuku xlakata lu xlakaskinka pi lakgkgolotsin nakamasiyanikgo natalan akxni kajku lakgkgawasan? Xlakata uma max nakamakgtaya ni atanu tuku nalakapastakkgo akxni nastakkgo chu atanu tuku natlawaputunkgo (kalikgalhtawakga Salmo 71:5, 17).a (Kalikgalhtawakga nota.)

6. ¿Tuku limaklakaskilh Jesús xlakata xkamasiyanilh amakgapitsi?

⁶ Xlakata namakgtayaya tala tlakg naskujputun, ni kajwatiya miliwanit tuku natlawa. Na talakaskin nawaniya tuku xlakata xlakaskinka chuna natlawa. Wa uma tuku Jesús limaklakaskilh xlakata nakamasiyani amakgapitsin. Xla kalimapakgsilh xʼapóstoles nalichuwinankgo Dios. Pero pulana kawanilh tuku xlakata xlikgalhakgaxmatatkan xwanit. Kawanilh: «Xlipaks limapakgsin, kintamaxkinit nakkgalhiy nkakgapun, chu nkatiyatna. Chuna mpi kapitit, na kamasiyunikgotit xlipaks akgmakgat chixkuwin» (Mat. 28:18, 19). ¿La tlan natlawaya chuna la Jesús?

7, 8. 1) ¿La tlan natlawakgo lakgkgolotsin chuna la Jesús? 2) ¿Tuku xlakata xlakaskinka nawanikan tala pi tlan tuku tlawama? 3) ¿Tuku tastakyaw nakamakgtaya lakgkgolotsin nakamasiyanikgo amakgapitsin? (Kaʼakxilhti recuadro: «Tastakyaw xlakata la nakamasiyanikan amakgapitsin».)

⁷ Akxni nawaniya tala pi wi tuku katlawalh, kalimaklakaskinti Biblia xlakata nawaniya tuku xlakata xlakaskinka chuna natlawa. Chuna namasiyaniya wi tuku natlawa xlakata Biblia chuna wan chu ni kaj xlakata wi tiku chuna wan. Akgtum liʼakxilhtit, komo naskiniya chatum tala pi kakaxakalh niku laktanukan kPukgalhtawakga, tlan nalikgalhtawakganiya Tito 2:10. Kawani pi komo kaskulunku namakgxtakga niku laktanukan, natlawa pi tlakg lilakgatit nawan tamakatsin xla xTamapakgsin Dios. Na tlan nawaniya pi kalakpuwa la nalitamakgtayakgo natalan tiku linkgoya kata, komo nakaxaka chu kaskakni natawila niku laktanukan. Uma namakgtaya nalakpuwan tuku maklakaskinkgo amakgapitsin chu ni kaj nalakpuwan pi chuna xlitlawat. Akxni naʼakxilha pi xtaskujut kamakgtaya natalan, tlan nalimakgkatsi xlakata kaskujnima amakgapitsin.

⁸ Nachuna, akxni tala namakgantaxti tastakyaw nema wani, kawani pi lu tlan tlawama. ¿Tuku xlakata xlakaskinka chuna tlawakan? Xlakata chuna namakgtayaya natatliwakglha xtakanajla. Akxni nawaniya tala pi tlan tuku tlawama, xtachuna akxni munuwilikan tachanan xlakata nastaka (natekgsa tuku na wa lichuwinan kMateo 3:17).

ATANU TAʼAKGLHUWIT

9. 1) ¿Tuku la kmakgapitsi países niku lu anan tumin? 2) ¿Tuku xlakata makgapitsi lakgkgawasan ni lu xlakaskinka akxilhkgo skujnanikan Dios?

⁹ Kmakgapitsi países niku lu anan tumin, lakgkgolotsin tuwa tekgskgo natalan tiku kajku lakgkgawasan tiku tlakg naskujputunkgo kcongregación. Makgapitsi natalan xalak 20 países tiku lhuwa kata lakgkgolotsin litaxtukgo, kakgalhskinka tuku xlakata chuna la. Atsinu ni putum wankgolh pi akxni umakgolh natalan tlakg lakgkgawasanku xwankgonit, xnatlatnikan ni kamakgpuwantinikgolh wi tuku nalakgatayaputunkgo xlakata tlakg naskujnanikgo Jehová. Chu akxni makgapitsi chuna xtlawaputunkgo xnatlatnikan kamakgpuwantinikgolh tlakg nakgalhtawakgakgo xlakata tlakg natlajakgo tumin. Wa xlakata nikxni lu xlakaskinka akxilhkgolh naskujnanikgo Dios (Mat. 10:24).

10, 11. 1) ¿La tlan namakgtaya kgolotsin chatum tala xlakata tsinu tsinu nalakgpali xtapuwan? 2) ¿Tukuya versículos tlan nalikgalhtawakgani kgolotsin tala, chu tuku xlakata? (Kaʼakxilhti nota.)

¹⁰ Tuwa kitaxtu nalakgpalinikan xtalakpuwan chatum tala tiku ni tlakg skujputun kcongregación. Talakaskin lhuwa naliskujkan chu ni natlakgwankan o akgxunikan, pero tlan namakgtayakan uma tala. Kalilakpuwaw xliʼakxilhtit chanana. Xlakata tachanan aktsa nastaka, chanana tsinu tsinu maktsaja. Nachuna tlan tsinu tsinu namakgtayaya chatum tala nalakgpali xtapuwan chu tlakg nalakgataya taskujut. ¿La natlawaya?

¹¹ Kalimaxtu kilhtamaku xlakata xʼamigo nawana. Kawani pi congregación lakaskin xtamakgtay. Akxtum katatawila chu kamasiyani versículos xalak Biblia nema namakgtaya nalilakpuwan akxni tamakamastanilh Jehová (Ecl. 5:4; Is. 6:8; Mat. 6:24, 33; Luc. 9:57-62; 1 Cor. 15:58; 2 Cor. 5:15; 13:5). Katlawani la umakgolh takgalhskinin xlakata nalakgchipina kxnaku: «¿Tuku malaknuni Jehová akxni tamakamastani? ¿La lakpuwana pi makgkatsilh akxni tamunu?» (Prov. 27:11). «¿La makgkatsilh Satanás?» (1 Ped. 5:8.) Lu xlakaskinka nalikgalhtawakgayaw umakgolh versículos, xlakata tlan nalakgpali tuku lakpuwan tala chu nachan kxnaku (kalikgalhtawakga Hebreos 4:12).b (Kaʼakxilhti nota.)

KGAWASA, KALIMASIYA PI TLAN LIPAWANKANA

12, 13. 1) ¿Tuku lu tlan tayat limasiyalh Eliseo akxni Elías xmasiyanima? 2) ¿La sikulunatlawalh Jehová Eliseo xlakata ni makgxtakgli Elías?

¹² Kgawasa, congregación lakaskin mintamakgtay. ¿Tuku namakgtayayan tlan nakitaxtuniyan akxni naskujnaniya Jehová? Xlakata nakatsiyaw, kalichuwinaw xliʼakxilhtit chatum kskujni Dios xalamakgasa xwanikan Eliseo.

¹³ Titaxtunita max 3,000 kata, palakachuwina Elías wanilh Eliseo pi xmakgtayana xlitaxtulh. Eliseo lakapala chuna tlawalh. Ni makgatsankgananilh Dios chu xtlawa makgapitsi ni laktuwa taskujut xlakata namakgtaya palakachuwina (2 Rey. 3:11). Elías masiyanilh Eliseo akgchaxan kata. Akxni Elías xʼamaja masputu xtaskujut kʼIsrael, wanilh Eliseo pi nialh xmakgtayana xlitaxtulh. Pero Eliseo makgtutu wanilh: «Ni ktimakgxtakgni». Xla liwana xlakpuwanit ni namakgxtakga Elías. Chu Jehová sikulunatlawalh xlakata ni makgxtakgli. ¿La sikulunatlawalh? Tlawalh pi tlan naʼakxilha Elías akxni linka «kxlakgstipan lanka un» (2 Rey. 2:1-12).

14. 1) ¿Tuku tlan natlawakgo lakgkgawasan chuna la Eliseo? 2) ¿Tuku xlakata xlakaskinka pi lakgkgawasan namakgantaxtikgo taskujut nema kamaxkikan?

¹⁴ ¿La tlan nachuna natlawaya la Eliseo? Xatapaxuwan katlawa katuwa taskujut nema namaxkikana, maski ni lu xlakaskinka. Kalakapastakti pi kgolotsin tiku masiyaniman, miʼamigo. Kawani pi lu xlakaskinka akxilha tuku tlawama mimpalakata chu tlakg katsiniputuna tuku masiyaniman. Chu tuku tlakg xlakaskinka, kamakgantaxti taskujut nema namaxkikana. ¿Tuku xlakata? Chuna lakgkgolotsin liwana nakatsikgo pi Jehová lakaskin tlakg nalakgayawakana taskujut kcongregación (Sal. 101:6; kalikgalhtawakga 2 Timoteo 2:2).

KAKAMAXKI KAKNI LAKGKGOLOTSIN

15, 16. 1) ¿La limasiyalh Eliseo pi xmaxki kakni xmakgalhtawakgena? (Kaʼakxilhti xapulana dibujo.) 2) ¿Tuku xlakata amakgapitsi palakachuwinanin xlipawankgo Eliseo?

¹⁵ Tuku talichuwinan xlakata Eliseo, na masiya pi xlakaskinka nakamaxkiya kakni lakgkgolotsin xlakata tlakg katsikgo. Akxni xkilakgapaxiʼalhnankgonita makgapitsi palakachuwinanin xalak Jericó, Elías chu Eliseo ankgolh kkgalhtuchokgo Jordán. Alistalh «Elías tiyalh lhakgat nema xlimasiya pi profeta chu makgchilh chu lakgsnokgli chuchut, chu chuchut [...] tsukulh tapitsi». Alistalh xchatiykan titaxtukgolh niku xakaskakni. Chu akxni xtlawamakgolh, Eliseo liwana xkgaxmatma chu xkatsinima tuku Elías xwanima. Eliseo nikxni lakpuwa pi putum xkatsi. Akxni Jehová xlinita Elías «kxlakgstipan lanka un», Eliseo taspitli kkgalhtuchokgo. Lilakgsnokgli chuchut xlhakgat Elías chu skinilh xtamakgtay Jehová xDios Elías. Chuchut amakgtum tapitsiparakgolh (2 Rey. 2:8-14).

¹⁶ Chuna la akxilha, xapulana milagro nema Eliseo tlawalh, xtachuna milagro nema xaʼawatiya tlawalh Elías. Eliseo ni lakpuwa pi komo xkgalhi limapakgsin, tlan xtlawalh tuku xla xlakpuwan. Xla chuntiya tlawalh tuku Elías xtlawa. Chuna limasiyalh pi xmaxki kakni xmakgalhtawakgena. Uma tlawalh pi amakgapitsi palakachuwinanin xlipawankgolh Eliseo (2 Rey. 2:15). Eliseo palakachuwina litaxtulh max 60 kata, chu Jehová maxkilh litliwakga xlakata tlakg lhuwa milagros xtlawalh nixawa Elías. ¿Tuku masiyaniyan uma?

17. 1) ¿La nachuna natlawakgo lakgkgawasan chuna la Eliseo? 2) Chuna la natitaxtutilha kilhtamaku ¿tuku tlan natlawakgo lakgkgawasan?

¹⁷ Komo tlakg nalakgayawakana taskujut kcongregación, ni kalakpuwanti pi tunkun mililakgpalit la tlawakan taskujut. Kalakapastakti pi kaj akxni wi tuku mililakgpalit komo kcongregación maklakaskin o akxni xkachikin Jehová kinkawaniyan pi chuna natlawayaw. Ni mililakgpalit kaj xlakata chuna lakaskina. Kalakapastakti pi Eliseo chuntiya tlawalh la xtlawa Elías. Chuna limasiyalh pi xmaxki kakni xmakgalhtawakgena. Chu uma kamakgtayalh amakgapitsi palakachuwinanin pi xlipawankgolh. Komo chuntiya natlawaya tuku masiyanikgonitan lakgkgolotsin nema takilhtiy Biblia, nalimasiyaya pi kamaxkiya kakni. Nachuna, natalan xalak congregación nalipawankgoyan (kalikgalhtawakga 1 Corintios 4:17). Akxni tlakg nakatsiniya, tlan wi tuku nalakgpaliya nema namakgtaya congregación chuntiya akxtum nataskuja xkachikin Jehová nema lakapala skujma. Chu chuna la natitaxtu kilhtamaku, Jehová namakgtayayan tlakg lhuwa tuku natlawaya nixawa tuku tlawakgolh tiku masiyanikgon, chuna la Eliseo (Juan 14:12).

18. ¿Tuku xlakata lu xlakaskinka nakamasiyanikan natalan xalak congregación la uku?

¹⁸ Klakaskinaw pi tastakyaw nema liminkgo uma akgtiy artículos kakamakgpuwantinilh lakgkgolotsin tlakg nalimaxtukgo kilhtamaku nakamasiyanikgo amakgapitsin. Kskiniyaw Jehová xlakata lhuwa natalan nakatsiniputunkgo la nakuentajtlawakgo congregación. Uma natlawa pi congregaciones xlikalanka katiyatni tlakg natatliwakglhkgo. Na chuna nakinkamakgtayayan chatunu chatunu akinin xlakata ni namakgatsankgananiyaw Dios kkilhtamaku nema aku mima.