¿Niku kgalhlit lakgapasa xtatayananin Jehová? Max makgapitsi mintalakatsu, kataskuja o katapina kʼescuela; o litachuwinankgonitan tuku wan Biblia. ¿Tiku akinin chu tuku xlakata kkalitachuwinanaw amakgapitsi tuku kkanajlayaw?

Akinin nachuna la amakgapitsi latamanin. Akinin tanu tanu la kinkamakgastakkanitan, wi tiku kgalhi tumin chu wi tiku ni kgalhi. Makgapitsi tanu takanajla xakkgalhiyaw chu amakgapitsin ni xkanajlanikgo Dios; pero, akxni nina xtatayananin Jehová xakwanaw, kimputumkan klimaxtuw kilhtamaku xlakata liwana naklikgalhtawakgayaw Biblia (Hechos 17:11). Kkanajlaw tuku kkatsiniw chu klaksakwi nakkakninaniyaw Jehová Dios.

Kinkamakgtayayan xlakata klikgalhtawakgayaw Biblia. Chuna la lhuwa latamanin, na kkgalhiyaw taʼakglhuwit chu na makglakgalhinanin akinin; pero xlakata kliskujmaw chali chali nakkgalhakgaxmataw tuku wan Biblia, tlakg tlan latamat kkgalhiyaw (Salmo 128:1, 2). Wa xlakata kkalitachuwinanaw latamanin tuku kkatsininitaw kBiblia.

Klilatamayaw tuku kinkamasiyaniyan Dios. Uma tamasiyat nema wi kBiblia, tlawa pi tlan nakmakgkatsiyaw. Nachuna, tlawa pi nakkamaxkiyaw kakni amakgapitsin, xaʼakgstitum naklinaw kilatamatkan chu tlan nakkalikatsiniyaw amakgapitsin. Uma tamasiyat tlawa pi tlan naklatamayaw, naktlawayaw tuku tlan namakgtayanan xlakata makxtum natawilakgo kifamiliajkan chu akgstitum naklatamayaw. Kkatsiyaw pi “Dios ni laksakpaxkinan”. Wa xlakata, kmakgtapakgsiyaw kxkachikin Dios nema wi xlikalanka kKatiyatni, ni kmakgtanuyaw kpolítica chu maski tanu tanu kintachuwinkan ni kinkamapitsiyan. Maski akinin chuna la amakgapitsin latamanin, kmakgtapakgsiyaw akgtum kachikin nema ni anan xtachuna (Hechos 4:13; 10:34, 35).

• ¿Tuku titaxtukgo xtatayananin Jehová chuna la amakgapitsi latamanin?

• ¿Tuku kinkamasiyaninitan Biblia xlakata la nalinkan latamat?

Lhuwa latamanin lakpuwankgo pi xTatayananin Jehová xasasti takanajla. Pero liwakaya akgtiy mil akgtujun ciento kata, xlakskujnin xaxlikana Dios kalimapakwika «xtatayananin» (Isaías 43:10-12). Akxni nina xtakgatsi kata 1931 xkinkalilakgapaskanan xLikgalhtawakganin Biblia. ¿Tuku xlakata klaksakwi nakinkalilakgapaskanan xTatayananin Jehová la uku?

Xlakata litakatsi tiku kiDioskan. Chuna la wilakgolh lhuwa tatsokgni xala makgasa, xtukuwani Dios, Jehová, akglhuwa mil tatsokgtawilanit kBiblia. Klhuwa Biblias lakgpalikanit xtukuwani chu wilikanit Señor o Dios. Akxni Dios tachuwinalh Moisés, wanilh pi xwanikan Jehová, chu wanilh: «Wa uma kintukuwani nema putum kilhtamaku nakililakgapaskan» (Éxodo 3:15). Chuna limasiyalh pi nixtachuna la amakgapitsi nixaxlikana dioses. Lu kpaxuwayaw xlakata klinaw xasanto xtukuwani Dios.

Lichuwinan tuku kinkalakgayawakanitan. Lhuwa latamanin xala makgasa limasiyakgolh pi xkanajlanikgo Jehová chu wa litsukulh Abel. Chuna la titaxtutilhalh kilhtamaku, Noé, Abrahán, Sara, Moisés, David chu amakgapitsin na «lhuwa kxlakskujnin Dios» litaxtukgolh (Hebreos 11:4–12:1, NM). Chuna la chatum tiku kgalhmakgtaya tiku nitu tlawanit kxlakatin mapakgsina, liwana klakapastaknitaw naklichuwinanaw xlakata natakatsi xaxlikana xlakata Dios.

Xlakata ktlawayaw chuna la tlawalh Jesús. Biblia limapakwi «xaʼakgstitum chu xaxlikana tatayana» (Apocalipsis [Revelación] 3:14, NM). Jesús wa pi “xmasiyanit xtukuwani” chu chuntiya “xlichuwinama tuku xaxlikana” xlakata Dios (Juan 17:26; 18:37). Wa xlakata xaxlikana kstalaninanin Cristo xlilinatkan xtukuwani Dios chu xlimasiyatkan. Wa uma tuku akinin ktlawamaw.

• ¿Tuku xlakata nialh klitapakwiyaw xLikgalhtawakganin Biblia chu la uku xTatayananin Jehová kinkawanikanan?

• ¿Tiku xapulana xtatayananin Jehová xwankgonit?

• ¿Tiku tlakg xapuxku xtatayana Jehová tiku latamanit?

Biblia xlichuwinanit pi akxni Cristo xnilh, kxlakgstipankan xaxlikana kstalaninanin Cristo xlaktaxtukgolh tiku nixaxlikana makgalhtawakgenanin chu xmasiyakgolh tuku ni xaxlikana (Hechos 20:29, 30). Chu chuna lalh: umakgolh lakchixkuwin lakgxtum tatlawakgolh xtamasiyat Cristo ni xaxlikana takanajla, chu litaxtukgolh nixaxlikana kstalaninanin Cristo (2 Timoteo 4:3, 4). Xlakata tuku lichuwinaw, ¿la liwana klikatsiyaw pi tuku kmasiyayaw wa tuku xlikana masiya Biblia?

Chalh kilhtamaku akxni Jehová masiyalh xaxlikana. Dios xlichuwinanit pi «xlikgalhsputat kilhtamaku xaxlikana takatsin tlakg natalhuwi» (Daniel 12:4). Kata 1870 makgapitsi latamanin akxtum tsukukgolh putsakgo xaxlikana, akxilhkgolh pi tuku xmasiyakgo lhuwa takanajla ni kBiblia xtakilhtinit. Wa xlakata, tsukukgolh putsanankgo kBiblia xlakata nakatsikgo xaxlikana tamasiyat chu Jehová kamasiyanilh xaxlikana.

Tiku xkatsiputunkgo xaxlikana liwana likgalhtawakgakgolh Biblia. Uma lakchixkuwin tiku liwana likgalhtawakgakgolh Biblia, limaklakaskinkgolh tuku akinin limaklakaskinawku akxni kgalhtawakgayaw: xlikgalhtawakgakgo Biblia akgatunu temas. Akxni xtekgskgo kBiblia nema lu tuwa xʼakgatekgskan, o xtamakgachakgxi, xputsakgo atanu versículos nema xkamakgtayalh, akxni akxtum xʼakgatekgskgo tuku xlikgalhtawakgakgonit chu xtatalakxtumi putum tuku wi kBiblia, xtsokgwilikgo. Xlakata mastakgolh talakaskin pi wa Biblia xkamasiyanilh, katsikgolh xaxlikana xlakata xtukuwani Dios, xTamapakgsin, tuku xlakpuwanit xlakata latamanin, Katiyatni, la wilakgo tiku nikgonit chu takgalhkgalhin xlakata lakastakwanat. Xlakata putsanankgolh kamamakgxtakgnilh nixaxlikana takanajla chu xtalismaninkan (Juan 8:31, 32).

Kkata 1879 katsikgolh pi xakchanita kilhtamaku xlakata lhuwa latamanin xkatsikgolh xaxlikana. Uma kata tsukulh tatlawa revista Makatsinina. Lichuwinan xTamapakgsin Jehová nema asta la uku tamakgpitsima. La uku k240 países kkalitachuwinanaw latamanin xaxlikana xlakata Biblia chu max kʼakgtujun ciento a itat tachuwin. ¡Nikxni chuna xtatlawanit taskujut la tatlawama uku!

• ¿Tuku lalh kxaxlikana takanajla akxni xninita Cristo?

• ¿La ktlawaw xlakata xtakatsipa xaxlikana xTachuwin Dios?

Akglhuwa kata xTatayananin Jehová kmaklakaskiw, ktlawaw chu kmakgpitsiw tipalhuwa Biblias. Pero, titaxtulh kilhtamaku kʼakxilhwi pi xtalakaskin maktum Biblia nema tlakg nituwa xlikgalhtawakgakgolh latamanin, xlakata Dios lakaskin pi “xlakgapaskgolh tuku xaxlikana” (1 Timoteo 2:3, 4). Wa xlakata, kata 1950 tsinu tsinu ktsukuw tlawayaw kiBibliajkan xaʼinglés chuna la chuwinankan la uku, putum chuna la xwi xapulana tatsokgni chuna matitaxtika kTraducción del Nuevo Mundo, liwaka akgtum ciento puxamakaw tachuwin.

Xtalakaskin Biblia nema ni tuwa xta’akgatekgsli, o xtamakgachakgxilh. Tachuwin talakgpalitilha chu lhuwa biblias liminkgo tachuwin nema xtamaklaskin makgasa chu tuwa akgatekgskan. Nachuna, tekgskanit talakgtsokgkin nema tlakg xtachuna nema pulana tikatsokgka, nema makgtayanan ni tuwa naʼakgatekgskan Biblia nema tatsokgnit ktachuwin hebreo, arameo chu griego.

Xtalakaskin Biblia nema xtatalakxtumilh la xapulana talakgtsokgkin. Tiku matitaxtikgo Biblia kʼatanu tachuwin chuna xlimatitaxtitkan la xwan xapulana tatsokgni, ni nalakgpaliputunkgo tuku matsokgninanit Dios. Pero, klhuwa biblias ni wilikgonit xtukuwani Dios, Jehová.

Xtalakaskin Biblia nema xmalankilh Tiku matsokgninalh (2 Samuel 23:2). Ktatsokgni xala makgasa atsinu ni xtakgatsi akgtujun mil la xlilhuwa tatsokgnit xtukuwani Dios, kTraducción del Nuevo Mundo nachuna xlimakglhuwa tatsokgnit, tutsu wi akgtum liʼakxilhtit (Salmo 83:18). Lhuwa kata liputsananka xlakata natatlawa uma Biblia, tlan xatapaxuwan likgalhtawakgakan xlakata nituwa akgatekgskan xtalakapastakni Dios. Komo kgalhiya Traducción del Nuevo Mundo o ni kgalhiya kkawaniyan pi chali chali kalikgalhtawakga xTachuwin Dios (Josué 1:8; Salmo 1:2, 3).

• ¿Tuku xlakata xtalakaskin atanu Biblia?

• ¿Tuku xlitlawat chali chali tiku katsiputun xtalakaskin Dios?