Kkintakanajlakan ni kaxokgonikan tiku pulalinkgo tamakxtumit. Tatlawa la xtlawakgo xapulana kstalaninanin Cristo, kalaksakkan tiku makgatsikgo tuku taskin xlakata tlan «napuxkunanikgo[...] xtamakgstokgnin [o xcongregación]» Dios (Hechos 20:28). Uma lakgkgolotsin lu tliwakga xtakanajlakan, pulalinkgo chu kakuenta tlawakgo congregación, Dios kawani «ni kaj fuersaj, wampi xlipaks mintapaxuwankan nalitlawayatit; ni wa mpala kaj natlajaputunatit ntumin, wampi xlipaks mintakgpuwantinkan nalitlawayatit» (1 Pedro 5:1-3). ¿Tuku tlawakgo kimpalakatakan?

Kinkakuentajtlawakgoyan. Lakgkgolotsin kapulalinkgo congregación chu kamakgtayakgo xlakata tliwakga natawila xtakanajlakan. Xlakan liwana katsikgo pi wa Dios tiku kamaxkinit uma taskujut, ni kinkamafuerzajlinikgoyan tuku naktlawayaw, wata kinkamakgtayakgoyan xlakata tlan naktawilayaw chu nakpaxuwayaw (2 Corintios 1:24). Chuna la tiku liwana kakuentajtlawa putum xborregos, nachuna lakgkgolotsin chatunu chatunu liwana kalakgapasputunkgo xalak congregación (Proverbios 27:23).

Kinkamasiyanikgoyan naktlawayaw xtalakaskin Dios. Akgatunu semana lakgkgolotsin pulalinkgo tamakxtumit nema matliwakglha kintakanajlakan (Hechos 15:32). Nachuna uma lakchixkuwin pulalinankgo akxni talichuwinan Dios, na ankgo lichuwinankgo Dios chu lhuwa tuku kinkamasiyanikgoyan naktlawayaw.

Chatunu chatunu kinkamatliwakglhkgoyan. Xlakata ni nataxlajwani kintakanajlakan lakgkgolotsin kinkamakgtayakgoyan kinchatunukan, kinkalakgapaxialhnankgoyan kkinchikkan chu kinkatachuwinankgoyan kPukgalhtawakga. Na kinkalimakgtayakgoyan Biblia chu kinkawanikgoyan lakwan tachuwin (Santiago 5:14, 15).

Ni kajwatiya tlawakgo taskujut kcongregación, lhuwa lakgkgolotsin kgalhikgo xtaskujutkan, xfamiliajkan tiku kuentajtlawakgo chu kamaxkikgo tuku maklakaskinkgo. Umakgolh natalan tiku lhuwa skujkgo kaminini nakamaxkiyaw kakni (1 Tesalonicenses 5:12, 13).

• ¿Tuku taskujut tlawakgo lakgkgolotsin xalak congregación?

• ¿La chatunu chatunu kamakgtayakgo tiku xalak congregación?

Biblia lichuwinan pulaktiy lakchixkuwin tiku lakgayakgo taskujut kcongregación: «mpuxkunanin kxtaskujut Dios, chu makgamakgtayananin» (Filipenses 1:1). Kʼakgatunu congregacion lhuwa tiku chuna skujmakgolh. ¿Tukuya taskujut tlawakgo siervos ministeriales xlakata nakinkamakgtayakgoyan?

Makgtayakgo lakgkgolotsin xalak congregación. Siervos ministeriales lu tliwakga wi xtakanajlakan, xaʼakgstitum likatsikgo lu tlan skujkgo maski lakgkgawasanku o linkgoya kata. Tlawakgo taskujut nema talakaskin chu tlawakgo tuku lakkaxwilikgo lakgkgolotsin maski ni talakgpali tuku tlawakgo. Xlakata chuna makgtayanankgo, lakgkgolotsin tlan kamasiyani congregación chu tlan kakuentajtlawakgo.

Tlawakgo taskujut nema lu xlakaskinka. Makgapitsi siervos ministeriales kalakgchan nakaxwilinankgo chu kamakgamakglhtinankgo tiku ankgo ktamakxtumit. Makgapitsi lakgayakgo tatlakgni kpukgalhtawakga, makgpitsikgo likgalhtawakga, linkgo cuentas xalak congregación chu lakkaxwilikgo niku natalichuwinan Dios. Nachuna, makgtayanankgo ktaskujut xalak Pukgalhtawakga, kamakgtayakgo natalan tiku linkgoya kata chuna la lakkaxwilikgonit lakgkgolotsin. Maski tanu tanu tuku kamatlawikan xatapaxuwan tlawakgo chu uma tlawa pi lu tlan nakaʼakxilhkgo putum congregación (1 Timoteo 3:13).

Mastakgo lu tlan liʼakxilhtit xlakata la wi xtakanajlakan. Wa kalaksakkan xlakata siervos ministeriales nawankgo tiku kgalhikgo tayat chuna la xlikgalhitkan tiku skujnanikgo Dios. Matliwakglha kintakanajlakan akxni mastakgo xtaʼakgchuwinkan; xlakata lu tlan liʼakxilhtit kinkawilinikgoyan akxni lichuwinankgo Dios kinkamakgpuwantinikgoyan xlakata xatapaxuwan kataskujkgo amakgapitsin, tlawakgo pi congregación xatapaxuawan natawila chu makxtum nalakgo (Efesios 4:16). Nachan kilhtamaku akxni na tlan lakgkgolotsin nalitaxtukgo.

• ¿La likatsikgo siervos ministeriales?

• ¿La makgtayanankgo siervos ministeriales xlakata tlan natawila congregación?

Anta kTatsokgni xagriego makglhuwa lichuwinan Bernabé chu apóstol Pablo. Umakgolh, superintendentes viajantes xwankgonit, tiku xkalakgapaxialhnankgo congregaciones. ¿Tuku xtlawa pi xkalakgapaxialhnamputunkgolh? Xlakata lu xkamakgtayaputunkgo xnatalan. Pablo limasiyalh pi lu xkalakgapaxialhnamputumpara xnatalan chu xkatsiputun la xwilakgolh. Ni para tsinu xlakpuwan pi lu lhuwa kilómetros xʼama, xlakata xkalakgapaxialhnalh (Hechos 15:36). Nachuna lakpuwankgo superintendentes viajantes xala uku.

Minkgo kinkamatliwakglhkgoyan. Chatunu superintendente xla circuito max akgpuxam congregaciones kalakgapaxialhnan chu akgtum semana katatawila akgatunu congregación makgtiy akgatunu kata. Lhuwa tuku kinkamasiyanikgoyan umakgolh natalan chu xlakpuskatinkan, komo tamakgaxtokgkgonit. Xlakan kalakgapasputunkgo kamanan chu tiku linkgoya kata, chu na kinkatalichuwinamputunkgoyan Dios chu na kinkataamputunkgoyan akxni kkanaw kamakgalhtawakgeyaw latamanin. Umakgolh superintendentes na kataʼankgo lakgkgolotsin kchikkan natalan xlakata nakamatliwakglhkgo; na mastakgo taʼakgchuwin nema lu kinkamatliwakglhan kkintamakxtumitkan chu kxalaklanka tamakxtumit (Hechos 15:35).

Putum kamakgtayaputunkgo. Superintendentes xla circuito lu katsiputunkgo la wi xtakanajlakan putum congregaciones. Katatamakxtumikgo lakgkgolotsin chu siervos ministeriales xlakata naʼakxilhkgo la wi congregación chu kamaxkikgo tastakyaw xlakata lu tlan natlawakgo xtaskujutkan. Kamakgtayakgo precursores la tlakg tlan nalichuwinankgo Dios chu tlakg tlan nakakitaxtuni, chu lu lipaxawakgo akxni kalakgapaskgo tiku kajku tsukumakgolh kinkatatamakxtumikgoyan chu na lu lipaxawakgo pi stakma xtakanajlakan. Chatunu chatunu uma natalan tliwakga skujkgo xlakata “wa nkintaskujnikan nti nkinkamakgtayaman” (2 Corintios 8:23). Nachuna kakanajlaniw Dios chuna la uma natalan (Hebreos 13:7).

• ¿Tuku xlakata kalakgapaxialhnankgo congregaciones superintendentes xla circuito?

• ¿La namakgtayayan akxni superintendente viajante nalakgapaxialhnan congregación?

Akxni wi tuku masputunan, xtatayananin Jehová tunkun kputsayaw la nakkamakgtayayaw kinatalankan tiku patinamakgolh. Akxni chuna ktlawayaw klimasiyayaw pi xlikana klapaxkiyaw (Juan 13:34, 35; 1 Juan 3:17, 18). ¿La kkamakgtayayaw?

Kkamaxkiyaw tuku maklakaskinkgo. Xapulana kstalaninanin Cristo xalak Antioquía, kamalakgachanikgolh tumin xnatalankan xalak Judea akxni analh tatsinksni (Hechos 11:27-30). Nachuna, akxni kinkamakatsinikanan pi kinatalankan xala alakatanu kachikin lhuwa tuku nitlan titaxtumakgolh, kmastayaw kkincongregacionkan tuku nakkalimakgtayayaw xlakata nakamalakgachanikan tuku namaklakaskinkgo (2 Corintios 8:13-15).

Kkamakgtayayaw tiku kaʼakgspulalh tuku nitlan. Lakgkgolotsin tiku lakatsu wilakgolh niku lalh tuku nitlan kaputsakgo chatunu chatunu natalan xalak congregación asta akxni liwana katsikgo pi nitu lanikgonit. Max wa comité de socorro tiku lakkaxwilikgo la natamakgpitsi liwat, chuchut, lhakgat, la nakamakuchikan tiku wi tuku kaʼakgspulalh chu wankgo niku natamakgaxtakgkgo. Lhuwa xtatayananin Jehová tiku lu katsinikgo skujkgo ankgo makgtayanankgo maski makgat xlakata natlawakgo chiki o Pukgalhtawakga xla xTatayananin Jehová chu wa xokgokgo tuku naliʼankgo. Xlakata klismaninitaw makxtum kskujaw, tlan lakapara kkanaw makgtayananaw. Chu na kkamakgtayayaw tiku atanu xtakanajlakan pero wa pulana kkamakgtayayaw tiku na watiya kgalhikgo kintakanajlakan (Gálatas 6:10).

Kkamatliwakglhaw xtakanajlakan chu kkamakgtayayaw akxni lipuwankgo. Latamanin lakaskinkgo kakawanika lakwan tachuwin akxni wi tuku masputunan. Akxni chuna titaxtumakgolh Jehová «xmastana xlipaks ntakgtsiyajni» kamaxki litliwakga (2 Corintios 1:3, 4). Wa xlakata, tiku lipuwamakgolh kkamasiyaniyaw takgalhkgalhin nema lichuwinan Biblia, niku wan pi xTamapakgsin Dios namasputu putum tuku nitlan chu tuku makgalipuwanan (Apocalipsis 21:4).

• ¿Tuku xlakata xtatayananin Jehová tlan lakapara kmakgtayananaw akxni wi tuku masputunan?

• ¿La kkalimakgtayayaw xTachuwin Dios latamanin akxni min tuku nitlan?

Akxni xamakaja makgnikan Jesús, tsekg katachuwinalh kgalhtati xʼapóstoles: Pedro, Santiago, Juan chu Andrés. Akxni Jesús xlichuwinama tuku xlitasiyalh kxaʼawatiya kilhtamaku, tlawalh takgalhskinin: «¿Ti yama skujni, lu[...] xatalipaw, chu na lu[...] akgskgalalh? Wa nti mapuxkunilh xmalana kxchik, lakimpi akxni xkilhtamaku namaxkikgo ntu nawakgoy amakgapitsin» (Mateo 24:3, 45; Marcos 13:3, 4). Uma xtachuwin kimalanakan Jesús, kinkalimasiyaniyan pi kxkgalhsputat kilhtamaku xʼama kawili makgapitsi lakchixkuwin tiku xkamaxkilh xlakata xtakanajlakan putum kilhtamaku kstalaninanin. ¿Tiku uma lakchixkuwin?

Uma ni lhuwa kstalaninanin Cristo tiku kalilaksakkanit espíritu santo. Uma «skujni» kilhchanima Lakgkgolotsin tiku Pulalinkgo xTatayananin Jehová. Tiku xkilhtamaku kamaxki tuku xla Dios tiku akxtum katakakninanikgo Jehová. Lakaskinaw xtamakgtaykan umakgolh skujnin tiku nikxni makgxtakgo Dios xlakata «xkilhtamaku namaxkikgoy ntu nawakgoy [o xlakata xtakanajla] amakgapitsin» (Lucas 12:42).

Kuentajtlawakgo xchik Dios (1 Timoteo 3:15). Jesús kalakgayawalh umakgo skujnin pi xpulalinkgolh xkachikin Jehová unu kKatiyatni. Uma wamputun nakuentajtlawakgo putum tuku xla Dios unu kkatiyatni, napulalinkgo akxni natalichuwinan Dios chu nalimaklakaskinkgo congregaciones xlakata nakinkamasiyanikgoyan xtachuwin Dios. Xlakata nakinkamaxkikgoyan tuku klakaskinaw chu akxni kmaklakaskinaw, «skujni xalipaw chu xaskgalala» limaklakaskin likgalhtawakga xlakata nakinkamaxkikgoyan xla kintakanajlakan, nema kmaklaskinaw akxni klichuwinanaw Dios chu tuku tamaklakaskin klaktsu chu klaklanka tamakxtumit.

«Skujni» xatalipaw xlakata wa maklakaskin xaxlikana xtachuwin Dios chu makgantaxti tuku limakgxtakgkanit xlakata nalichuwinan xalakwan xalaksasti, chu xaskgalala xlakata lu katsini la kuentajtlawa tuku xla Cristo unu kKatiyatni (Hechos 10:42). Jehová sikulunatlawama xtaskujutkan xlakata tlakg talhuwima xtatayananin chu lhuwa likgalhtawakga kgalhiyaw xlakata kintakanajlakan (Isaías 60:22; 65:13).

• ¿Tiku kalakgayawalh Jesús nakamaxki kstalaninanin tuku namaklakaskinkgo kxtakanajlakan?

• ¿Tuku xlakata wanaw pi xatalipaw chu xaskgalala uma «skujni»?

Kxapulana siglo, makgapitsi «apóstoles chu lakgkgolotsin xalak Jerusalén» xpulalinankgo, chu xwankgo tuku natatlawa xlakata xkapalakachuwinankgo congregación tiku xkalaksakkanit naʼankgo kʼakgapun (Hechos 15:2). Xlakata akxtum xlakapastaknankgo akxni wi tuku xtlawakgo xlakputsananikgo xTachuwin Dios chu xmastakgo talakaskin pi xʼespíritu santo Dios xkapulalilh (Hechos 15:25). La uku nachuna tlawakgo Lakgkgolotsin tiku Pulalinkgo xTatayananin Jehová.

Wa tiku kalimaklakaskin Dios, xlakata tlawa xtalakaskin. Natalan tiku kalaksakkanit xlakata naPulalinkgo xTatayananin Jehová lu katsiputunkgo tuku wan Biblia chu lu katsinikgo la lakkaxwilikgo xlakata la nataskuja kxkachikin Dios chu tuku talakaskin xlakata takanajla. Akgatunu semana tamakxtumikgo xlakata nalakkaxwilikgo tuku maklakaskinkgo natalan xliputum kKatiyatni. Chuna la kxapulana siglo, masiyakgo tuku takilhtinit kBiblia, lakgachunin malakgachakgo cartas o superintendentes viajantes o amakgapitsi natalan. Xlakata chuna tlawakgo, xkachikin Dios akxtum tapuwan kgalhikgo chu akxtum tuku tlawakgo (Hechos 16:4, 5). Na lakkaxwilikgo tuku natamasiya ktakanajla chu makgpuwantininankgo natalichuwinan xTamapakgsin Dios, chu wankgo komo wi tiku nakalakgayawakan taskujut kcongregación.

Chuna tlawakgo la xʼespíritu Dios kapulalin. Tiku Pulalinkgo xTatayananin Jehová putsakgo nakapulalin Mapakgsina xlikalanka kakilhtamaku chu Jesús tiku litaxtu xakgxakga congregación (1 Corintios 11:3; Efesios 5:23). Xlakan ni kamakgkatsikan la komo mapakgsinanin kxkachikin Dios. Chuna la makgapitsi tiku naʼankgo kʼakgapun, «stalanitilhakgo nkalhnilu [Jesús] nkani kawa ntani an» (Apocalipsis 14:4). Lakgkgolotsin tiku Pulalinkgo xTatayananin Jehová lu paxtikatsinikgo oraciónes nema tlawayaw xpalakatakan.

• ¿Tiku xpulalinankgo kxapulana siglo?

• ¿La limasiyakgo Lakgkgolotsin tiku Pulalinkgo xTatayananin Jehová pi lakaskinkgo kakapulalilh Dios?

Betel anta takilhtinit ktachuwin hebreo, wamputun «xChik Dios» (Génesis 28:17, 19, nota). Lu minini uma tukuwani chiki xla xtatayananin Jehová nema kkgalhiyaw xliputum kKatiyatni, anta pulalinkan taskujut xlakata nalichuwinankan Dios. Lakgkgolotsin tiku Pulalinkgo xTatayananin Jehová, wilakgolh niku pulalinkan taskujut xlikalanka kkatiyatni, anta wi kʼestado de Nueva York (Estados Unidos), chu anta kapulalinkan sucursales xalak lhuwa países. Putum natalan tiku anta skujkgo kalilakgapaskan familia Betel. Xtachuna la akgtum familia, akxtum wayankgo, akxtum wilakgolh, akxtum skujkgo chu akxtum likgalhtawakgakgo Biblia (Salmo 133:1).

Tiku anta skujkgo mastakgo putum xlitliwakgakan. Kʼfamilias Betel skujkgo lakpuskatin chu lakchixkuwin tiku lu tliwakga wi xtakanajlakan chu putum kilhtamaku tamakamastanikgonit Dios chu makgtayanankgo xlakata natalichuwinan Dios (Mateo 6:33). Ni kamaskgawikan pero kamaxkikan niku natawilakgo chu kamawikan, kamaxkikan ni lhuwa tumin xlakata nalitamawakgo tuku maklakaskinkgo. Xchatunukan kamaxkikanit xtaskujutkan: makgapitsin kʼoficinas, niku tlawakan liwat o wayankan, niku tlawakan likgalhtawakga; chu makgapitsi kaxakakgo niku lhtatakan, makgapitsi chakganankgo, chu wilakgolh tiku kaxtlawakgo tuku nialh tlan kchiki, o atanu.

Lhuwa taskujut tatlawa xlakata natalichuwinan xTamapakgsin Dios. Wantuku tlakg xlakaskinka akxilhkan kBetel wa pi lhuwa latamanin nakatsikgo tuku wan Biblia. Uma folleto chuna makgtayanan. Lakgkgolotsin tiku Pulalinkgo xTatayananin Jehová akxilhkgo komo tlan tuku tatsokgnit, alistalh kamalakgachanikan tiku matitaxtikgo kʼatanu tachuwin kxliputum katiyatni, katlawakan kmakgapitsi países niku kgalhikan prensas nema lakapala tlawa likgalhtawakga chu alistalh kamalakgachanikan liwaka akgtum ciento akgkaw mil congregaciones. Putum taskujut nema tatlawa, betelitas makgtayanamakgolh ktaskujut nema tlakg xlakaskinka: natalichuwinan xlimapakgsin Dios (Marcos 13:10).

• ¿Tiku skujkgo kBetel, chu tuku kalimakgtayakan?

• ¿Tukuya taskujut lakapala xlitatlawat chu makgtayanamakgolh akgatunu Betel?

Putum familia Betel tanu tanu taskujut lakgayakgolh xlakata makgtayanankgo natalichuwinan Dios max kʼakgtum país o kmakgapitsi países; max matitaxtimakgolh kʼatanu tachuwin likgalhtawakga, makgapitsi tlawamakgo likgalhtawakga, makgapitsi makimakgolh likgalhtawa chu makgapitsi grabarlinamakgolh kʼaudio chu kvideo o atanu tuku tatlawama.

Comité de Sucursal akxilha tuku tatlawama. Lakgkgolotsin tiku Pulalinkgo xTatayananin Jehová kalakgayawakgo max kgalhtutu o tlakg lhuwa lakgkgolotsin xlakata nalakgatayakgo sucursal, kawanikan comités. Comités makatsinikgo Lakgkgolotsin tiku Pulalinkgo xTatayananin Jehová xlakata tuku tlan kitaxtuma chu taʼakglhuwit nema max natawila anta niku kalakgchan naʼakxilhkgo, uma kamakgtaya naʼakxilhkgo tukuya temas natamasiya klikgalhtawakga nema nataxtu o tuku natamasiya ktamakxtumit o kxalaklanka tamakxtumit. Lakgkgolotsin tiku Pulalinkgo xTatayananin Jehová lakkaxwilikgonit pi nakalakgankan sucursales chu wi tiku kamalakgachakgo chu kawanikgo Comités de Sucursal tuku nakamakgtaya namakgantaxtikgo xtaskujutkan (Proverbios 11:14). Akxni min tiku malakgachakgo xpulalinanin xtatayananin Jehová tlawa akgtum tamakxtumit wanikan reunión especial chu masta akgtum takgchuwin xlakata nakamakgtaya tiku lakatsu wilakgolh niku wi sucursal.

Kamakgtayakan congregaciones. Anta ksucursal wankan komo tlan natawila akgtum congregación. Na anta pulalinkan tuku tlawamakgolh precursores, misioneros chu superintendetes xla circuito tiku lichuwinamakgolh Dios niku lakgchan sucursal. Anta lakkaxwilikan laklanka tamakxtumit, chu Pukgalhtawakga xla xTatayananin Jehová chu malakgachakan likgalhtawakga kcongregaciones. Putum tuku tatlawa ksucursal makgtayanan xlakata natalichuwinan xTamapakgsin Dios chuna la lakkaxwilikanit (1 Corintios 14:33, 40).

• ¿La kamakgtayakgo Comités de Sucursales Lakgkgolotsin tiku Pulalinkgo xTatayananin Jehová?

• ¿Tukuya taskujut tatlawa kʼakgtum sucursal?

Xlakata nakalinikan «xatlan tamakatsinin, [...] wa nti lamakgo kxokgspun katuxawat», liwaka akgtujun ciento tanu tanu ktachuwin ktlawayaw likgalhtawakga (Apocalipsis 14:6). ¿La ktlawayaw lu lhuwa taskujut? Kinkamakgtayakgoyan tiku tsokgkgo likgalhtawakga xalak tanu tanu sucursales chu max akgtutu mil akgtutu ciento tiku matitaxtikgo kʼatanu tachuwin, putum xtatayananin Jehová.

Pulana tatlawa xaʼinglés. Lakgkgolotsin tiku Pulalinkgo xTatayananin Jehová akxilhkgo taskujut nema tatlawa kDepartamento niku Tsokgwilikan likgalhtawakga, anta wi niku pulalinkan taskujut xliputum katiyatni xla xtatayananin Jehová. Uma departamento kawanikgo tuku natsokgkgo tiku skujmakgo niku pulalinkan taskujut chu kʼamakgapitsi sucursales. Tanu tanu xkachikinkan tiku tsokgnankgo, uma tlawa pi pulaklhuwa natalichuwinan kilikgalhtawakgakan chu kinkamakgtayayan pi kilikgalhtawakgakan ni kaj xala akgtum kachikin natasiya.

Tuku tatsokga kamalakgachanikan tiku namatitaxtikgo kʼatanu tachuwin. Akxni tsokgwilikgokanita chu wankan pi tlan natamakgpitsi likgalhtawakga, kamalakgachanikan tiku namatitaxtikgo kʼatanu tachuwin xlikalanka kKatiyatni, liwana likgalhtawakgakgo tuku tsokgkgo chu kaxtlawakgo tuku nitlan taxtu. Tiku matitaxtikgo kʼatanu tachuwin liwana laksakkgo «xatlan tachuwin nema xaxlikana» xlakata chuna natatsokgtawila la xainglés (Eclesiastés 12:10).

Computadoras tlawakgo pi lakapala natatlawa taskujut. Akgtum computadora nila tlawa xtaskujut tiku tsokgkgo likgalhtawakga o chatum tiku matitaxti kʼatanu tachuwin. Pero, tlakg lakapala tlawakan taskujut xlakata maklakaskinkan diccionarios, amakgapitsi libros chu atanu likgalhtawakga nema wilakgolh kcomputadoras. Xtatayananin Jehová ktlawanitaw nema wanikan Sistema Electrónico de Edición Plurilingüe (MEPS, chuna wanikan xaʼinglés), uma tlawa pi tlan natatsokgtawila kcomputadora akglhuwa ciento tachuwin, chu na nawilikan xadibujos xlakata tlan naimprimirlikan.

¿Tuku xlakata lu klimaxtuyaw kilhtamaku naktlawayaw uma taskujut, maski ni lhuwa miles tiku chuwinankgo akgtum tachuwin? Xlakata xtalakaskin Jehová pi “paks latamanin nalakgapaskgo wa talulokgtat”, o xaxlikana (1 Timoteo 2:3, 4).

• ¿La xlilhuwa taskujut tawila akxni tlawakan likgalhtawakga?

• ¿Tuku xlakata klhuwa tachuwin ktlawayaw kilikgalhtawakgakan?

Kata kata xtatayananin Jehová ktlawayaw chu kmakgpitsiyaw lhuwa biblias chu lhuwa likgalhtawakga nema ni kmaxokgenanaw; na ktlawayaw kimpukgalhtawakgakan chu sucursales chu akinin kkaxtlawayaw akxni wi niku talakgalhi; kxokgoyaw tuku maklakaskinkgo betelitas chu misioneros na kmalakgachayaw tamakgtay niku la tuku nitlan. ¿Niku min tumin xlakata nataxokgo putum tuku tamaklakaskin?

Ni kmatajinanaw, ni kskinaw diezmo chu ni kpukinanaw. Maski lhuwa tumin talakaskin xlakata natalichuwinan Dios, ni kkaskiniyaw tumin latamanin. Xlimaktiy número revista Makatsinina nema titaxtulh liwakaya akgtum siglo lichuwinalh pi kkgalhiyaw xtamakgtay Jehová. Alistalh wa: «[Kintamakxtumitkan] nikxni katiskilh limosna chu ni katikaskinilh tamakgtay lakchixkuwin». Chu chuna lama (Mateo 10:8).

Litlawamaka taskujut nema xatapaxuwan tamasta tumin. Lhuwa latamanin paxtikatsinikgo pi kkamasiyaniyaw xlakata Biblia chu mastakgo tumin xlakata nalitlawakan uma taskujut. Xtatayananin Jehová klimakgtayananaw kinkilhtamakujkan, kilitliwakgakan chu kintuminkan kxtaskujut Dios xliputum kkatiyatni (1 Crónicas 29:9). Kpukgalhtawakga, chu klaklanka tamakxtumit, wilakgolh cajas niku tlan namuju xtumin tiku namastaputun. Na tlan xatapaxuwana mastakan tumin ksitio jw.org. Lhuwa tiku makgtayanankgo ni kgalhikgo tumin, xtachuna la puskat tiku nialh xkgalhi xchixku chu ni xkgalhi tumin tiku Jesucristo tlan lichuwinalh, xlakata mujulh okgxtiy tumin nema ni lu xkgalhi xtapalh kcaja xla templo (Lucas 21:1-4). Putum tiku mastaputun xtumin tlan namasta «wa lantla nchatunu mpuwa namastay kxnaku» (1 Corintios 16:2; 2 Corintios 9:7).

Liwana kkatsiyaw pi Jehová nakawilini kxnakujkan tiku likakninaniputunkgo tuku kgalhikgo, xlakata chuntiya namakgtayanankgo natalichuwinan xTamapakgsin Dios (Proverbios 3:9).

• ¿La litasiya pi kintakanajlakan ni xtachuna la amakgapitsin takanajla?

• ¿La limaklakaskinkan tumin nema xatapaxuwan mastakan?

Niku ktamakxtumiyaw kwaniyaw Pukgalhtawakga xla xTatayananin Jehová. Anta klikgalhtawakgayaw Biblia chu xtamapakgsin Dios nema Jesús tlakg lichuwinalh (Lucas 8:1).

Anta kakninanikan xaxlikana Dios. Anta lakkaxwilikan la nalichuwinankan xalakwan xalaksasti (Mateo 24:14). Pukgalhtawakga ni lakxtum la xlilaklanka chu la tasiyakgo, pero ni lhuwa tuku kgalhikgo, klhuwa pukgalhtawakga maklakaskinkgo akglhuwa congregaciones. Kata nema titaxtukgonit ktlawanitaw lhuwa miles pukgalhtawakga (max chali chali akgkitsis tatlawalh) xlakata tlakg talhuwima congregaciones. ¿La ktlawanitaw? (Mateo 19:26.)

Litatlawa tumin nema xatapaxuwan tamastanit. Tumin nema tastokga malakgachakan ksucursal niku lakgchan akgtum congregación chu uma tumin kamasakwanikan congregaciónes nema tlawaputunkgo xpukgalhtawakgakan o kaxtlawaputunkgo.

Tiku makgtlawakgo pukgalhtawakga kaniwa xalanin chu ni kaxokgonikan. Kʼlhuwa países wilakgolh nema kawanikan Tiku Tlawakgo Pukgalhtawakga. Umakgolh tiku tlawakgo pukgalhtawakga ankgo tanu tanu kcongregación maski lu makgat kamakgtayakgo congregaciones xlakata natlawakgo xpukgalhtawakgakan. Chu kmakgapitsi países xtatayananin Jehová tiku katsinikgo tlawakgo uma taskujut xlakan wankgo niku natatlawa chu niku natakaxtlawa niku kalakgchan. Akxni katlawakan pukgalhtawakga. Maski lhuwa tiku makgtayanankgo katsinikgo tlawakgo uma taskujut. Pero, tlakg makgtayanankgo tiku xalak congregación. Putum uma taskujut wa litatlawama xʼespíritu santo Jehová chu xkachikin tiku lu xatapaxuwan skujkgo (Salmo 127:1; Colosenses 3:23).

• ¿La ktlawayaw pukgalhtawakga xla xtatayananin Jehová xlikalanka kkatiyatni?

Pukgalhtawakga nema anankgo lin xasanto xtukuwani Dios, wa xlakata kilikaxakatkan chu stlan xlitasiyat. Akxni makgtayananaw akgtum talakgalhaman xlakata wa Dios tiku skujniyaw chu na likakninaniyaw, putum akinin tlan namakgtayananaw.

Katalaknuw nakaxakayaw akxni nasputa tamakxtumit. Akxni kgalhsputa akgatunu tamakxtumit, putum tiku ankgo talaknukgo xlakata nakaxakakgo kPukgalhtawakga chu makgtum akgatunu semana tlakg liwana kaxakakan. Chatum kgolotsin o chatum siervo ministerial lakkaxwili la natatlawa taskujut kPukgalhtawakga xlakata nakapalhnankan, nakaxakakan, naxakakan sillas chu nakakaxwilikan; nakachakgekan baños; nakalakaxakakan ventanas chu espejos; namakgankan palhma chu nakakaxtlawakan kkilhtin. Chu makgtum akgatunu kata, tlakg liwana kaxtlawakan Pukgalhtawakga. Nakawanikan tuku natlawakgo laktsu kamanan kamakgtaya xlakata nakatsikgo pi kimpukgalhtawakgakan lu maxkiyaw kakni (Eclesiastés 5:1).

Kamakgtayanaw akxni nakaxtlawakan. Kata kata liwana akxilhkan la wi kxpulakni chu la wi kxkilhtin pukgalhtawakga xlakata nakatsikan komo talakaskin nakaxtlawakan, chu ni lhuwa tumin nalimaklakaskinkan alistalh (2 Crónicas 24:13; 34:10). Putum tlan xlitawilat chu lu stlan xlitasiyat niku kakninaniyaw kiDioskan. Komo namakgkaxtlawayaw nalimasiyayaw pi lu xlakaskinka akxilhaw chu limasiyayaw la xlilhuwa paxkiyaw Jehová (Salmo 122:1). Chu tlan nakinkalichuwinankanan kkachikin (2 Corintios 6:3).

• ¿Tuku xlakata kuenta kilitlawatkan kimpukgalhtawakgakan?

• ¿Tukuya taskujut tatlawa xlakata lu stlan natawila Pukgalhtawakga?

¿Tlakg katsiputuna tuku wan Biblia? ¿Tlakg katsiputuna xlakata akgtum versículo, o xlakata chatum tiku lichuwinan Biblia, xlakata akgtum kachikin o tuku tilalh nema lichuwinan Biblia? Akxni kgalhiya taʼakglhuwit, ¿lakpuwana pi xTachuwin Dios namakgtayayan nalakkaxtlawaya? Komo chuna lakpuwana tlan namaklakaskina biblioteca xalak Pukgalhtawakga.

Kbiblioteca lhuwa likgalhtawakga wi xlakata naputsanankan. Max ni kgalhiya putum likgalhtawakga nema tlawakgonit xtatayananin Jehová kmintachuwin; pero, biblioteca nema wi kxpukgalhtawakgakan xTatayananin Jehová wi likgalhtawakga nema aku taxtukgonit. Max na wi tanu tanu traducciones xalak Biblia, akgtum lu tlan diccionario chu atanu libros niku tlan naputsanana. Tlan nalimaklakaskina akxni nina tsuku tamakxtumit o akxni nakgalhsputa. Komo wi computadora, max kgalhi programa Watchtower Library, nema kgalhi lhuwa likgalhtawakga chu ni tuwa putsakan xlakata akgtum tema, tachuwin o versículos.

Lu kamakgtaya tiku matitaxtikgo taʼakgchuwin ktamakxtunit Xlatamat chu xtaskujut kstalanina Cristo. Komo wix na matitaxtiya taʼakgchuwin, tlan nalimaklakaskina uma biblioteca xlakata nalakkaxtlawaya mintaʼakgchuwin. Wantiku xlikuentajtlawat biblioteca wa tiku pulalin uma tamakxtumit, xliʼakxilhat pi nakgalhi xalaksasti likgalhtawakga chu naʼakxilha pi liwana takaxtawilanit. Wa namasiyaniyan la natekgsa tuku putsapat o wa namakgtayayan tiku makgalhtawakgeman. Pero ni mastakan talakaskin namaxtuya likgalhtawakga; nachuna kilikuentajtlawatkan ni nalakalhtitkan chu nalakgatsokgkan.

Biblia wan pi xlakata natekgsaw «takatsin xlakata Dios» lu kiliputsatkan chuna la xputsaw tuku «lu lhuwa kxtapalh nema tsekg wi» (Proverbios 2:1-5). Kbiblioteca xla xPukgalhtawakgakan xla xTatayananin Jehová anta tlan natsukuya putsaya xtakatsin Dios.

• ¿Tuku natekgsa kxbiblioteca Pukgalhtawakga xla xTatayananin Jehová?

• ¿Tiku tlan namakgtayayan natekgsa tuku katsiputuna anta kbiblioteca?

Jesucristo kawanilh kstalaninanin: «Nkamakgaxkgakganalh mixkgakganatkan kxlakatin nchixkuwin lakimpi naʼukxilhkgoy wa ntu xatlan mintatlawkan, chu nalimaxkikgoy nkakni mintlatkan nti wi nkakgapun» (Mateo 5:16). Wa xlakata klimaklakaskinaw tuku xalaksasti, la Internet. Kpágina jw.org/jw-tot wa xaxlikana xpáginajkan xTatayananin Jehová niku lichuwinan xtakanajlakan chu tuku tlawakgo. ¿Tuku limin uma página?

Takgalhtin xalak Biblia nema katsiputunkgo latamanin. Natekgsa xtakgalhtin makgapitsi takgalhskinin nema lu xlakaskinka katsiputunkgo latamanin. Akgtum liʼakxilhtit, tratados ¿Namin kilhtamaku akxni nialh napatinanaw? chu ¿Tlan nalatamaparakgo tiku nikgonita?, tlawakanit kliwaka akgchaxan ciento tachuwin. Nachuna wi Traducción del Nuevo Mundo akgtum ciento puxamakaw tachuwin; lhuwa likgalhtawakga nema tlan nalimaklakaskina xlakata nalikgalhtawakgaya Biblia, wi libro ¿Tuku xlikana masiyay Biblia?, Makatsinina chu ¡Despertad! nema aku taxtumakgolh. Lhuwa umakgolh likgalhtawakga tlan nalikgalhtawakgakan o nakgaxmatkan kʼInternet o tlan namaktikan kformato MP3, PDF o EPUB. Tlan naimprimirliya makgapitsi páginas kmintachuwin xlakata tlan namasiyaniya tiku katsiputun xlakata xTamapakgsin Dios. Anan lhuwa videos ktachuwin xla señas, na tlan namaktikan kʼaudio nema wanikan talikgalhtawakga Biblia la akgtum drama chu dramas nema takilhtinit kBiblia chu tatlakgni.

Xaxlikana xlakata xtatayananin Jehová. Anta kkimpaginajkan wi xaʼawatiya tamakatsin, na wi videoclips xlakata kintaskujutkan xlikalanka kKatiyatni chu tuku latilhama kxkachikin Jehová chu la kkamakgtayayaw latamanin. Nachuna, wan tuku kilhtamaku natawila xalaklanka tamakxtumit chu wan la tlan nachuwinana ksucursales.

Xlakata anan Internet ktlawayaw pi nakatsikgo latamanin tuku xaxlikana maski lu makgat wilakgolh, chu maski ktanu tanu continentes wilakgolh asta kʼAntartida. Ktlawayaw oración «lakimpi wa xtachuwin nkimPuchinakan, [lakapala] katakgawanilh» putum kKatiyatni xlakata natamalanki Jehová (2 Tesalonicenses 3:1).

• ¿La makgtayanama kimpaginajkan jw.org/jw-tot xlakata tlakg lhuwa latamanin nakatsikgo tuku xaxlikana masiya Biblia?

• ¿Tuku katsiputuna nema tlan xputsa kkimpaginajkan?