Lhuwa latamanin nialh ankgo kxtakanajlakan xlakata ni kamakgtayakan nakatsikgo xlakata Dios chu ni kawanikan tuku tlan nakamamakgkatsini. ¿Tuku xlakata milianat kxtamakxtumitkan xtatayananin Jehová? ¿Tuku nakatsiniya?

Xatapaxuwan nakatatawilaya tiku lu tlan likatsikgo. Kxapulana siglo kstalaninanin Cristo liwana xtalakkaxwilikgonit congregaciones, chu xtamakxtumikgo xlakata nakakninanikgo Dios, xlikgalhtawakgakgo xTachuwin chu xlamatliwakglhkgo (Hebreos 10:24, 25). Akxni akxtum xkatatawilakgo xnatalankan xmakgkatsikgo pi xaxlikana amigos xkatawilakgolh chu lu xlapaxkikgo (2 Tesalonicenses 1:3; 3 Juan 14). Akinin nachuna ktlawayaw la xapulana kstalaninanin Cristo chu na lu kpaxuwayaw.

Tlan kitaxtu akxni tlawayaw tuku wan Biblia. Chuna la xtlawakgo xapulana kstalaninanin Cristo, lakchixkuwin, lakpuskatin chu kamanan ktamakxtumiyaw xlakata nakkakgaxmatniyaw tiku liwana katsinikgo masiyakgo ktamakxtumit chu kinkamakgtayakgoyan xlakata chali chali naktlawayaw tastakyaw Biblia (Deuteronomio 31:12; Nehemías 8:8). Putum tiku anta wilakgolh tlan nakgalhtinankgo akxni tlawakan takgalhskinin chu tlan nakilhtlikgo akxni kilhtlikan, chuna limasiyakgo xtakanajlakan (Hebreos 10:23).

Kinkamakgtayayan xlakata tlakg nakkakninaniyaw Dios. Apóstol Pablo katsokgnanilh akgtum congregación kxapulana siglo: «Kkaʼukxilhputunan [...] mpi makxtum nalamakgpuwantiniyaw lantla [...] ntakanajla ntu nkgalhiyaw» (Romanos 1:11, 12). Akxni akxtum kkatatawilayaw kinatalankan kkintamakxtumitkan matliwakglha kintakanajlakan chu tlawa pi naklilatamayaw tuku kkatsiniyaw.

¿Tlan xtat kkintamakxtumitkan chu xʼakxilhti pi chuna? Lu tlan nakkamakgamakglhtinanan. Tamakxtumit ni taxokgo chu ni pukikan tumin.

• ¿Niku takilhtinit la ktlawayaw kintamakxtumitkan?

• ¿La kinkamakgtayayan tamakxtumit?

Maski naktitaxtuyaw klanka kakiwin o lu nitlan wi kilhtamaku kanaw kkintamakxtumitkan. ¿Tuku xlakata lu xlakaskinka kakxilhaw nakkatatamakxtumiyaw kinatalankan maski lhuwa tuku nitlan ktitaxtuyaw kkilatamatkan chu maski ktlakgwanitaw, o kakgxuninitaw xlakata taskujut?

Tlawa pi tlan naktawilayaw. Uma tuku wa apóstol Pablo xlakata tamakxtumit: “nalalimakgpuwantiniyaw nchatunu amakgapitsin” (Hebreos 10:24). Tachuwin, nalamakgpuwantiniyaw akxni tsokgka Biblia xwamputun «wi tuku liwana akxilhkan». Apóstol kinkawaniyan pi liwana naklalakgapasaw chu naklamakgtayapunaw. Akxni klakagapasaw makgapitsi tiku xalak kincongregacionkan kinkawanikgoyan la tayanikgonit makgapitsi takglhuwit nema na kkgalhiyaw chu kinkamakgtayakgoyan xlakata na naktayaniyaw.

Tlawa pi tlan naklatalalinaw putum kilhtamaku. Ktamakxtumit lhuwa tiku tlan kkatalalinaw, ni kajwatiya klalakgapasaw, xlikana lu tlan klatalalinaw. Min kilhtamaku klakgastananaw, kkgamananaw o atanu. ¿La kinkamakgtayayan xlakata chuna ktlawayaw? Tlawa pi lu xlakaskinka naklaʼakxilhaw chu tlawa pi tlakg naklapaxkiyaw. Akxni kinatalankan titaxtukgo taʼakglhuwit, tunkun kkamakgtayayaw xlakata lu xlikana kkapaxkiyaw (Proverbios 17:17). Akxni putum klatalalinaw klimasiyayaw pi “klamakgtayaputunaw” (1 Corintios 12:25, 26).

Kkawaniyan pi wa miamigos kakatlawa tiku tlawamakgo xtalakaskin Dios. Kxkachikin Jehová nakatekgsa tiku chuna likatsikgo. Ni kamasta talakaskin pi wi tuku natlawa ni nakilatatamakxtumiyaw.

• ¿Tuku xlakata lu tlan nakinkakitaxtuniyan komo nakatalalinaw natalan xalak congregación?

• ¿Tukuya kilhtamaku lakgapasputuna kinconkgregacionkan?

Akxni xtamakxtumikgo xapulana kstalaninanin Cristo, xtlawakgo oraciones, xkilhtlikgo, xlikgalhtawakgakgo xTachuwin Dios, chu ni xtlawakgo tuku ni xlimapakgsinan (1 Corintios 14:26). Akxni natana kkintamakxtumitkan, naʼakxilha pi nachuna ktlawayaw.

Tamasiya tuku lu xlakaskinka nema takilhtinit kBiblia. Sábados o domingos, putum congregaciones tamakxtumikgo xlakata nakgaxmatkgo taʼakgchuwin xalak Biblia nema tamasta puxamakaw minuto, masiyakan pi tuku wan Biblia lu xlakaskinka kkilatamatkan chu kkilhtamaku nema lamaw. Kawanikan tiku tamakxtumikgonit pi na kaputsakgolh textos. Alistalh akgtum hora talikgalhtawakga Makatsinina, chu kawanikan tiku tamakxtumikgonit kamastakgolh xtakgalhtinkan. Uma revista pulaklhuwa kinkamasiyaniyan la naklilatamayaw xTachuwin Dios. Xliputum kKatiyatni liwaka akgtum ciento akgkaw mil congregaciones anan pero ni talakgpali tuku klikgalhtawakgayaw.

Tlakg kkatsiniyaw la nakmasiyayaw. Na ktamakxtumiyaw kakgotanun kxʼitat semana chu pulaktutu tlawakanit. Limapakuwikan Xlatamat chu xtaskujut kstalanina Cristo; takilhtinit klikgalhtawakga Xlatamat chu xtaskujut kstalanina Cristo Tuku natalikgalhtawakga. Xapulana tamakxtumit wa Tuku lhuwa xtapalh xalak Biblia nema kinkamakgtayayan tlakg nakatsiniyaw tuku xalak Biblia nema talikgalhtawakgalh ama semana. Alistalh, ktamakxtumit Tlakg liwana kamakgalhtawakgenaw, matitaxtikan liʼakxilhtit xlakata la nalichuwinanaw Biblia, tiku stakyawanan wan la tlakg tlan nakkgalhtawakgayaw chu nakʼakgchuwinanaw (1 Timoteo 4:13). Chu xaʼawatiya, ktamakxtumit Kilatamatkan la kstalaninanin Cristo, lichuwinankan la tlan nalilatamayaw xtastakyaw Biblia chali chali. Tlawakan takgalhskinin chu kmastayaw takgalhtin xlakata tuku kʼakgatekgsninitaw Biblia.

Akxni napina kkintamakxtumitkan, lu nalakgatiya xlakata lu tlan tuku masiyakan xalak Biblia (Isaías 54:13).

• ¿Tuku naʼakxilha akxni napina kxtamakxtumitkan xtatayananin Jehová?

• ¿Tukuya tamakxtumit pimputuna nema ktlawayaw akgatunu semana?

¿Akxilha fotografías xla uma folleto la lu tlan ktakaxtayayaw xtatayananin Jehová akxni kkanaw ktamakxtumit? ¿Tuku xlakata lu kkuentajtlawayaw la klhakgananaw?

Xlakata kmaxkiyaw kakni kiDioskan. Xlikana, Dios ni wa akxilha la lhakganankan (1 Samuel 16:7). Pero, akxni ktamakxtumiyaw xlakata nakkakninaniyaw lu kmasiyaniputunaw Dios pi kkakninaniyaw chu na kkamaxkiyaw kakni kinatalankan. Komo xlakgaw chatum juez xlikana pi xkuentajtlawaw la xtasiyaw xlakata lu xlakaskinka ama chixku. Chuna la klhakgananaw akxni kkanaw ktamakxtumit klimasiyayaw pi lu kpaxkiyaw «Juez xliputum kKatiyatni» chu na lu xlakaskinka kkakxilhaw niku kkakninaniyaw (Génesis 18:25).

Klimasiyayaw tuku kkatsininitaw. Biblia kawani kstalaninanin Cristo pi «lakatitum nalhakganankgoy» (1 Timoteo 2:9, 10). Komo nalakaskinaw lhuwa nakinkakxilhputunkanan o lu xataparaxla tuku nawilikan chu lu lhtank nakinkatawilaniyan lhakgat uma ni «lakatitum» talhakgan. Akxni «lakatitum» lhakganankan tlan tasiyakan, ni lixkajni o ni akglakgwa nalhakganankan. Maski lu kilikuentajtlawatkan la naklhakgananaw tipalhuwa anan la chatunu chatunu nalaksaka tuku nawili. Akxni tlan klhakgananaw, «[stlan masiya] xtamasiyun xlilakgapaskan nkimakgaputaxtinakan Dios» chu kmalankiyaw maski nitu kwanaw (Tito 2:10; 1 Pedro 2:12). Komo liwana naktakaxtayayaw akxni nakkanaw ktamakxtumit natlawa pi tiku nakinkaʼakxilhkgoyan nakatsikgo la latamakgo xkachikin Jehová.

Xlakata tlan natasiyakan ni talakaskin xatapalaxla lhakgat o lu stlan nawan. Wa xlakata, ni kamasta talakaskin pi kaj lhakgat natlawa ni napina kPukgalhtawakga xla xTatayananin Jehová.

• ¿Tuku xlakata lu xlakaskinka la lhakgananaw akxni anaw kakninaniyaw Dios?

• ¿Tukuya tastakyaw nakinkamakgtayayan akxni nalaksakaw tuku nalhakgayaw?

Komo makgalhtawakgeman chatum xtatayana Jehová, xlikana pi max pulana likgalhtawakgaya tu naʼakxilhatit. Komo pulana nalikgalhtawakgaya tuku natalichuwinan ktamakxtumit tlakg namakgtayayan. Komo liwana nalakkaxwiliya akxni nakgalhtawakgaya lu namakgtayayan.

Kalakkaxwili niku chu tuku hora nakgalhtawakgaya. ¿Tukuya hora niti katimalaktlawin akxni nakgalhtawakgaya? ¿Akxni nina pina skuja, tsisa o katsisni akxni lhtatamakgolha laktsu minkamanan? Asta komo ni lhuwa kilhtamaku kgalhiya, kalakkaxwili la xlilhuwa nakgalhtawakgaya chu ni kamasta talakaskin pi wi tuku natlawa ni nakgalhtawakgaya. Kaputsa niku nitu naʼakgaxkuliyan, kamamixi televisión, radio chu teléfono. Komo natlawaya oración akxni nina matsukiya mintakgalhtawakga namakgtayayan xlakata kajwatiya nakuentajtlawaniya xTachuwin Dios (Filipenses 4:6, 7).

Kalhtitti tachuwin nema tlakg xlakaskinka chu tlan nakgalhtinana. Pulana kalakpuwanti tukuya tema natalichuwinan. Kaʼakxilhti xtítulo tuku likgalhtawakgapat, na kaʼakxilhti la xsubtítulos na watiya lichuwinan tema, kaʼakxilhti dibujos chu kalikgalhtawakga takgalhskinin xla repaso nema lichuwinan tuku tlakg xlakaskinka. Alistalh, kalikgalhtawakga akgatunu párrafo chu kaputsa xtakgalhtin akgatunu takgalhskinin. Kaputsa textos xalak Biblia nema ni tsokgxtukanit chu kaʼakxilhti la kgalhmakgtayakgo xtema (Hechos 17:11). Akxni natekgsa xtakgalhtin, kalhtitti o na tlan nalhtita kaj makgapitsi tachuwin nema tlakg xlakaskinka xlakata namakgtayayan nalakapastaka. Akxni natawilaya ktamakxtumit komo nalakaskina tlan nachaxa mi makan chu namastaya mintakgalhtin chuna la akgatekgsti maski ni lhuwa tuku nawana.

Akxni liwana naʼakxilha temas nema talikgalhtawakga akgatunu semana ktamakxtumit, tlakg nataliwaka tuku nakatsiya xalak Biblia nema «lanka xtapalh» (Mateo 13:51, 52, NM).

• ¿La tlan nalakkaxwiliya xlakata pulana nalikgalhtawakgaya tuku nataʼakxilha ktamakxtumit?

• ¿Tuku tlan natlawaya xlakata namastaya mintakgalhtin ktamakxtumit?

Putum kilhtamaku nema titaxtunit, Jehová limasiyanit pi familias xlimaxtutkan kilhtamaku xlakata namatliwakglhkgo xtakanajlakan chu tlakg nalapaxkikgo (Deuteronomio 6:6, 7). Wa xlakata, xtatayananin Jehová klimaxtuyaw akgtum kilhtamaku akgatunu semana xlakata nakkakninaniyaw Dios kfamilia, chu kakxilhaw tuku nakamakgtaya chatunu chatunu chu ni kkgalhtawakgayaw la tlawakan ktamakxtumit. Asta maski tiku kaj xakstukan wilakgolh tlan namaklakaskinkgo uma kilhtamaku xlakata nalakputsakgo temas xalak Biblia nema nalaksakkgo.

Uma tlawa pi tlakg natalakatsuwinikan Jehová. «Dios nti nkatalakatsuwinitit, na nakatalakatsuwiniyan.» (Santiago 4:8.) Tlakg lakgapasaw Jehová akxni tlakg katsiniyaw xtayat chu tuku tlawanit nema tatsokgnit kBiblia. Pulaktum la tlan natsukukan kakninanikan Dios kfamilia wa makxtum nalikgalhtawakgayatit Biblia, max wa nastalaniyatit programa Xlatamat chu xtaskujut kstalanina Cristo. Chatunu chatunu tlan nalikgalhtawakga pulakatunu; alistalh nawankgo tuku katsinikgolh.

Makgtayanan xlakata tlakg tlan nalatalalinkan kFamilia. Tiku tamakgaxtokgkgonit, natlatni chu kamanan, tlakg tlan latalalinkgo akxni akxtum likgalhtawakgakgo Biblia. Akxni kakninanikan Dios kFamilia putum xatapaxawan xlitawilatkan chu xatapaxuwan xlikgalhkgalhitkan ama kilhtamaku. Max natlatni nakatalikgalhtawakgaputunkgo temas nema takilhtinit krevista Makatsinina chu ¡Despertad! o kisitiojkan xla Internet jw.org/jw-tot, naʼakxilha la xlilaklankata xkamanan, o max natalichuwinankgo tuku tuwa titaxtumakgolh kʼescuela chu la nalakkaxtlawakgo. ¿Tuku xlakata ni akxilhkgo programa xla JW Broadcasting (tv.jw.org) chu alistalh akxtum nalichuwinankgo? Na tlan nalikilhtlikgo tuku natalikilhtli ktamakxtumit chu asta tlan wi tuku nawakgo akxni namakgalhsputukgo.

Kilhtamaku nema kmaklakaskinaw akgatunu semana xlakata nakkakninaniyaw Jehová makgtayanan xlakata lu lipaxuw naklikgalhtawakgayaw xTachuwin, chu kinkasikulunatlawayan xlakata chuna ktlawamaw (Salmo 1:1-3).

• ¿Tuku xlakata klimaxtuyaw kilhtamaku nakkakninaniyaw Dios kfamilia?

• ¿Tuku tlan natlawakgo natlatni xlakata putum xfamiliajkan xatapaxuwan nakakninanikgo Dios?

¿Akxilha pi lu paxuwakgo tiku wilakgo kdibujo? Xlakan minkgonit klanka tamakxtumit. Xtachuna la xlakskujnin Dios xala makgasa, xkalimapakgsikanit makgtutu natamakxtumikgo akgtum kata, na lu klipaxuwayaw akxni lu kilhuwakan ktamakxtumiyaw (Deuteronomio 16:16). Akgatunu kata ktlawayaw akgtutu tamakxtumit la umakgolh: makgtiy tawila tamakxtumit xaʼakgtum kilhtamaku wanikan asamblea de circuito chu asamblea regional xaʼakgtutu kilhtamaku. ¿La kinkamakgtayayan?

Tlawa pi tlakg tlan naklatalalinaw. Israelitas lu xlipaxuwakgo akxni «makxtum [x]lakgachixkuwimakaj» Jehová chu akinin na lu klipaxuwayaw akxni lhuwa natalan kkatakakninaniyaw Jehová (Salmo 26:12; 111:1). Umakgolh tamakxtumit tlawa pi tlan naklalakgapasaw xtatayananin Jehová xala amakgapitsi congregaciones chu asta xala alakatanu países. Akxni tastunu makxtum kwayanaw anta niku tatlawa tamakxtumit, chu kkatachuwinanaw amakgapitsin (Hechos 2:42). Anta litasiya pi «xlipaks natalanin» xlikalanka kkatiyatni klapaxkiyaw (1 Pedro 2:17).

Tlawa pi tlakg natatliwakglha kintakanajalakan. Israelitas lu xlipaxuwakgo akxni «[xkatsinikgo tuku xwamputun] xTachuwin» Dios nema xkamasiyanikan (Nehemías 8:8, 12). Akinin na lu xlakaskinka kaʼakxilhaw tuku kinkamasiyanikanan klaklanka tamakxtumit. Pulakatunu taʼakgchuwin takilhtinit kBiblia. Matitaxtikan taʼakgchuwin nema makgtayanan chu liʼakxilhtit nema kinkamasiyaniyan la naktlawayaw xtalakaskin Dios. Kinkamatliwakglhan akxni kkgaxmataw tiku tayanikgonit tuku tuwa titaxtukgo xlakskujnin Dios la uku. Kʼasamblea regional matitaxtikan dramas nema lhakganankgo la xlhakganankgo akxni xlamakgolh tiku talichuwinan kBiblia chu wi tuku lu tlan kinkamasiyaniyan. Chu putum ktamakxtumit anan tamunut xlakata tiku nalimasiyaputunkgo pi tamakamastanikgonita Dios.

• ¿Tuku xlakata klaklanka tamakxtumit lu tawila tapaxuwan?

• ¿La namakgtayayan napina kxalanka tamakxtumit nema ktlawayaw?

Akxni atsinu xtsankga namakgnikan Jesús wa: «Na [...] taliʼakgchuwinanit nawan xlikatlanka nkatuxawat yuma xatlan tamakatsin xla tapakgsin; lakimpi paks nakgaxmatkgoy yuma ntalulokgtat xlipaks akgmakgat chixkuwin; akxniku nchu nachin xlikgatsputni» (Mateo 24:14). ¿La xʼama tatlawa uma taskujut xliputum kkatiyatni? Chuna la tlawalh Jesús akxni xlama unu kKatiyatni (Lucas 8:1).

Kkalakganaw latamanin kxchikkan. Jesús kamasiyanilh kstalaninanin nalichuwinankgo xalakwan xalaksasti kʼakgatunu chiki (Mateo 10:11-13; Hechos 5:42; 20:20). Umakgolh xapulana kstalaninanin liwana kawanika niku xlichuwinankgolh Dios (Mateo 10:5, 6; 2 Corintios 10:13). Nachuna uku liwana talakkaxwilinit la klichuwinanaw Dios, chu akgatunu congregación talhkawilinit niku nalichuwinankgo Dios. Chuna kmakgantaxtiyaw tuku mapakgsinalh Jesús pi «nakkakgchuwinanikgoyaw [«putum», NM] ntachixkuwitat» (Hechos 10:42).

Kanaw kkaputsayaw putum latamanin. Jesús wililh liʼakxilhtit xlakata lichuwinankan Dios niku lhuwa anankgo latamanin, la kxkilhtun pupunu o niku xkgatnankgokan (Marcos 4:1; Juan 4:5-15). Akinin nachuna kkalitachuwinanaw latamanin xlakata Biblia niku kkanaw: la ktiji, kpustan, kparques o klimaklakaskinaw teléfono. Na kkalitachuwinanaw kintakanajlakan kintalakatsujkan, tiku kkataskujaw, tiku kkataanaw kʼescuela chu kimparienteskan akxni kinkakgaxmatnikgoyan. Xlakata chuna tatlawama lhuwa millones latamanin kgaxmatmakgolh xliputum kKatiyatni xlakata “talichuwinama la lakgmaxtunan” Dios (Salmo 96:2).

Kalakpuwanti tiku tlan xlitachuwinanti xTamapakgsin Dios chu tuku tlan namakglhtinan. Ni kaj miakstu kakatsi uma lu tlan takgalhkgalhin nema kgalhiya. Tunkun kakawani amakgapitsin.

• ¿Tukuya «xatlan tamakatsin xla tapakgsin» kilichuwinatkan?

• ¿La nachuna ktlawayaw xtatayananin Jehová chuna la xtlawa Jesús akxni klichuwinanaw Dios?

Tachuwin precursor wamputun tiku pakanantilha xlakata anta natlawankgo tiku stalanimakgolh. Tlan nawanaw pi Jesús precursor litaxtulh xlakata makaminka kKatiyatni chu lichuwinalh xtachuwin Dios nema masta latamat chu malakkilh tiji nema malakgtaxtinan (Mateo 20:28). Uku na ktlawayaw tuku tlawalh Jesús, lhuwa klimaxtuyaw kilhtamaku xlakata nakkamasiyaniyaw latamanin (Mateo 28:19, 20). Makgapitsi putum kilhtamaku skujnanikgo Dios chu kkalilakgapasaw precursores.

Tiku putum kilhtamaku skujnani Dios. Putum xtatayananin Jehová klichuwinanaw xalakwan xalaksasti. Pero, makgapitsi lakkaxwilkgonit xkilhtamakujkan xlakata precursores regulares nawankgo chu 70 horas lichuwinankgo Dios akgatunu papaʼ. Wa xlakata putsakgo taskujut niku kaj itat kilhtamaku naskujkgo. Makgapitsi kalaksakkan xlakata precursores especiales nawankgo chu kamalakgachakan niku ni lu anan tiku lichuwinankgo Dios; xlakan akgtum ciento a puxamakaw horas o liwaka lichuwinankgo Dios akgatunu papaʼ. Ni lakpuwankgo pi lhuwa tuku nakgalhikgo, katsikgo pi Jehová nakamaxki tuku maklakaskinkgo (Mateo 6:31-33; 1 Timoteo 6:6-8). Tiku nila precursores regulares o especiales wankgo tlan precursores auxiliares nawankgo, tiku puxamakaw horas o tipuxamakaw horas lichuwinankgo Dios akgatunu papaʼ.

Precursor lichuwinan Dios xlakata paxki chu na kapaxki latamanin. Chuna la Jesús, akxilhaw pi xtakanajlakan latamanin lu nitlan wi (Marcos 6:34). Pero kkgalhiyaw tamakatsin nema nakamakgtaya la uku chu nakamaxki tlakg tlan takgalhkgalhin. Tapaxkit nema kakgalhini latamanin tlawa pi namaklakaskin xkilhtamaku chu xlitliwakga xlakata nakamasiyani tuku xla Dios (Mateo 22:39; 1 Tesalonicenses 2:8). Uma matliwakglha xtakanajla chu tlakg tlan talalin Dios chu makgapaxuwa (Hechos 20:35).

• ¿Tuku tlawa chatum precursor?

• ¿Tuku tlawa pi lu nalichuwinanputun Dios chatum precursor?

Akglhuwata kata xTatayananin Jehová kalilakgapaskan pi kamakgalhtawakgakan. Uma lu tlan takgalhtawakga kamaxkikan tiku xliputum kilhtamaku skujnanikgo Dios chu lichuwinankgo Tamapakgsin xlakata tlan “namakgantaxtikgo xtaskujutkan” (2 Timoteo 4:5).

Escuela xla Precursor. Akxni chatum precursor makgatsi akgtum kata, precursor o precursora tlan katsokgwilikan xlakata naʼankgo kʼescuela akgchaxan kilhtamaku kʼakgtum Pukgalhtawakga nema tlakg lakatsu wi. Uma escuela makgtaya precursor tlakg natalakatsuwini Jehová, chu tlakg tlan nalichuwinan chu chuntiyaku kaskujnanilh Dios.

Escuela xla Tiku Lichuwinankgo xTamapakgsin Dios. Uma escuela nema makgapala akgtiy papaʼ lakkaxwilikanit xlakata nakamakgtayakan precursores tiku akglhuwata kata chuna liskujmakgolh chu amputunkgo makgtayanankgo niku tlakg talakaskin. Xlakan wankgo: «¡Unu kwi! Akit kakimalakgacha», chuna wankgo la Jesucristo tiku tlakg lhuwa lichuwinalh Dios xliputum katiyatni (Isaías 6:8; Juan 7:29). Akxni lakgamakgat ankgo talakgpali la linkgo xlatamatkan chu tlakg ni lhuwa tuku kgalhikgo. Xtalismaninkan, max lonkgnan o lhkaknan, liwat lu tanu nixawa niku wi xchikkan. Asta min kilhtamaku talakaskin nakatsinikgo atanu tachuwin. Kʼuma escuela tlan ankgo lakgkgawasan chu laktsuman tiku nina tamakgaxtokgkgo chu tiku tamakgaxtokgkgonit tiku kgalhikgo 23 asta 65 kata, na talakaskin naliskujkgo nakgalhikgo lakwan tayat nema namaklakaskinkgo niku nakamalakgachakan chu wi tuku nakatsinikgo tlawakgo xlakata tlakg nakalimaklakaskinkan kxkachikin Dios.

Escuela Bíblica de Galaad xla Watchtower. Galaad wamputun xahebreo «akglhuwa chiwix nema wi tuku nalilakapastakkan». Kata 1943 asta la uku, liwaka akgtsayan mil misioneros tiku kamakgalhtawakgeka kʼescuela de Galaad, nema kamalakgachakanit xlakata nalichuwinankgo Dios «asta kxtankgana tiyat» chu lu tlan kakitaxtuninit (Hechos 13:47). Akxni tichankgolh xapulana misioneros kPerú ni xʼanan congregación pero la uku anan liwaka akgtum milh. Akxni chankgolh kJapón nipara kgalhakaw xTatayananin Jehová xʼanan pero la uku anan liwaka akgtiy ciento mil. Akgkitsis papaʼ nema makgapala escuela xla Galaad lhuwa likgalhtawakgakgo xTachuwin Dios. Tiku liskujkgo la precursores especiales o misioneros, tiku wilakgolh ksucursales o superintendentes xla circuito tlan ankgo kʼuma escuela xlakata nakamakgalhtawakgakan chu namatliwakglhkgo taskujut nema tatlawana xlikalanka katiyatni.

• ¿Tuku xlakata tlawakan Escuela xla Precursor?

• ¿Tiku tlan ankgo Escuela xla Tiku Lichuwinankgo xTamapakgsin Dios?