TAKGALHTAWAKGA 26
¿Tuku xlakata anan lhuwa tapatin chu tuku nitlan?
Akxni la tuku nitlan, lhuwa latamanin wankgo: «¿Tuku xlakata?». Lu tlan makgkatsiyaw akxni katsiyaw pi Biblia kgalhti uma takgalhskinin.
1. ¿Tuku tlawalh Satanás xlakata xʼanalh tuku nitlan kkakilhtamaku?
Satanás, talalakatawakalh Dios. Xlakata xkaʼakgchipaputun amakgapitsin, tlawalh pi xapulana latamanin, Adán chu Eva, na xtalalakatawakgolh Dios. Chuna tlawalh akxni akgskgawilh Eva (Génesis 3:1-5). Makanajlilh pi Jehová ni xlakaskin xlipaxuwalh xlatamat chu pi ni xlilat la xlikatsinimaka. Satanás xwamputun pi latamanin tlakg xpaxuwakgolh komo ni xkgalhakgaxmatkgolh Dios. Akxni Satanás wanilh Eva pi ni xʼama niy, xkilhwama xapulana taʼakgsanin. Wa xlakata Biblia wan pi xla «xaʼakgsanina chu xtlat taʼakgsanin» (Juan 8:44).
2. ¿Tuku tlawakgolh Adán chu Eva?
Jehová lhuwa tuku kamaxkilh Adán chu Eva. Kawanilh pi tlan xwakgolh putum xtawakat kiwi nema xyakgo kjardín xaʼEdén, kajwatiya akgatum ni xliwatkan xwanit (Génesis 2:15-17). Maski chuna xkawanikanit, xlakan wakgolh xtawakat uma kiwi. Eva puxli «tawakat chu tsukulh way». Chu alistalh, Adán na «tsukulh way» (Génesis 3:6). Wa xlakata xchatiykan ni kgalhakgaxmatkgolh Dios. Xlakata Adán chu Eva ni xkgalhikgo talakgalhin, ni tuwa xwanit xtlawakgolh tuku tlan. Pero xlakan makglakgalhinankgolh chu lakgmakgankgolh xtamapakgsin Dios akxni ni kgalhakgaxmatkgolh, maski xkatsikgo pi nitlan tuku xtlawamakgo. Uma tuku tlawakgolh kaliminilh lhuwa tapatin (Génesis 3:16-19).
3. ¿La kinkamakgstuntlawanitan tuku tlawakgolh Adán chu Eva?
Akxni Adán chu Eva ni kgalhakgaxmatnankgolh, lakgalhinanin litaxtukgolh chu kamatitaxtinikgolh talakgalhin putum xkamanankan. Akxni Biblia lichuwinan Adán, wan: «Xpalakata chatum chixku talakgalhin tanulh kkakilhtamaku, chu linin xpalakata talakgalhin, chu wa xlakata linin kaʼakgchipalh putum latamanin» (Romanos 5:12).
Tipalhuwa tuku tlawa pi napatinanaw. Min kilhtamaku, patinanaw xlakata laksakaw tuku nitlan o amakgapitsin laksakkgo tuku nitlan. Chu min kilhtamaku patinanaw xlakata wilaw niku ni kilitawilatkan chu ni katsiyaw pi wi tuku nala (kalikgalhtawakga Eclesiastés 9:11).
TLAKG KALAKPUTSANANIW
Kaʼakxilhwi tuku xlakata ni xlilat nalimawakayaw Dios tapatin nema anan kkakilhtamaku chu tuku nitlan. Na kaʼakxilhwi la makgkatsi akxni akxilha pi patinamaw.
4. ¿Tiku xkuenta pi patinanaw?
Lhuwa latamanin lakpuwankgo pi wa Dios mapakgsinama kkakilhtamaku. ¿Pero xlikana uma? Kaʼakxilhtit VIDEO.
Kalikgalhtawakgatit Santiago 1:13 chu 1 Juan 5:19 chu kalichuwinantit uma:
¿Wa xkuenta Dios pi anan tapatin chu tuku nitlan?
5. ¿Tuku kitaxtunit xlakata wa Satanás mapakgsinama?
Kalikgalhtawakgatit Génesis 3:1-6 chu kalichuwinantit uma:
¿Tuku taʼakgsanin wa Satanás? (Kaʼakxilhtit versículos 4 chu 5).
¿Tuku tachuwin maklakaskilh Satanás xlakata xmalakpuwaninalh pi Jehová ni lakaskin pi latamanin kapaxuwakgolh?
¿Maklakaskinkgo latamanin pi Dios kakamapakgsilh xlakata napaxuwakgo? ¿Tuku wan Satanás?
Kalikgalhtawakgatit Eclesiastés 8:9 chu kalichuwinantit uma:
¿La kakitaxtuninit latamanin xlakata ni wa Jehová mapakgsinama?
Adán chu Eva ni xkgalhikgo talakgalhin chu xlamakgo kParaíso, pero tlawakgolh tuku Satanás kawanilh chu talalakatawakakgolh Jehová
Akxni Adán chu Eva talalakatawakakgolh Jehová, talakgalhin tapatin chu linin, talakgatumikgolh kkakilhtamaku
Jehová namasputu talakgalhin, tapatin chu linin. Latamanin tlan nalatamakgo kParaíso chu nialh katikgalhikgolh talakgalhin
6. Jehová nitlan limakgkatsi akxni patinanaw
¿Kinkalilakgaputsayan Dios akxni patinanaw? Kaʼakxilhti tuku tsokgwilikgolh mapakgsina David chu apóstol Pedro. Kalikgalhtawakgatit Salmo 31:7 chu 1 Pedro 5:7 chu kalichuwinantit uma:
¿La limakgkatsiya xlakata katsipat pi Jehová kinkalilakgaputsayan chu nitlan limakgkatsi akxni patinanaw?
7. Dios namasputu xtapatinkan putum latamanin
Kalikgalhtawakgatit Isaías 65:17 chu Apocalipsis 21:3, 4 chu kalichuwinantit uma:
Jehová malaknu pi namasputu putum tuku kamakgapatinan latamanin chu nalakkaxtlawa tuku nitlan titaxtukgonit. ¿Tlan limakgkatsiya uma tamalaknun? ¿Tuku xlakata?
¿Xkatsiyata?
Akxni Satanás wa xapulana taʼakgsanin, limawakalh Jehová tuku nitlan. Uma wamputun pi maxkajwilh xtukuwani Jehová akxni malakpuwaninalh pi nitlan mapakgsina chu nitlan likatsi. Nialh makgas, akxni Jehová namasputu xtapatinkan latamanin, nalimasiya pi ni xlikana tuku limawakakanit. Uma wamputun pi Dios nalimasiya pi tlakg tlan mapakgsinan. Wa tuku tlakg xlakaskinka wa pi nalitasiya pi ni xlikana tuku limawakakanit Jehová (Mateo 6:9, 10).
MAKGAPITSIN WANKGO: «Wa xtalakaskin Dios pi patinanaw».
¿Tuku xwanti wix?
TUKU KATSINIW
Satanás chu xapulana chatiy latamanin wa xkuentajkan pi anan tuku nitlan kkakilhtamaku. Jehová lu nitlan limakgkatsi akxni akxilha pi patinamaw chu nialh makgas namasputu tapatin.
¿Tuku xkgalhtinanti?
¿Tuku taʼakgsanin wanilh Satanás xapulana puskat?
¿La kinkamakgstuntlawanitan xlakata Adán chu Eva ni kgalhakgaxmatnankgolh?
¿Tuku xlakata wanaw pi Jehová nitlan limakgkatsi akxni akxilha pi patinamaw?
TLAKG KAKATSINI
Kaʼakxilhti tuku kilhchanima kBiblia talakgalhin.
Kaʼakxilhti tuku limawakanalh Satanás kjardín xaʼEdén.
«¿Tuku xlakata Dios masta talakaskin kaʼanalh tapatin?» (Makatsinina, 1 xla enero kata 2014)
Kaʼakxilhti xatakgalhtin akgtum lu tuwa takgalhskinin chu la uma takgalhtin lu tlan kinkamamakgkatsiniyan.
«¿Tuku xlakata kamakgnika lhuwa judíos? ¿Tuku xlakata Dios nitu tlawalh?» (Artículo xalak jw.org)
Kaʼakxilhti tuku katsinilh chatum chixku tiku lu xpatinama.