TAKGALHTAWAKGA 42
¿Tuku wan Biblia xlakata tiku tamakgaxtokgkgonit chu tiku ni tamakgaxtokgkgonit?
Lhuwa latamanin lakpuwankgo pi xlakata napaxuwakgo talakaskin natamakgaxtokgkgo. Pero ni putum tiku makgaxtokgkgo paxuwakgo chu nila wanaw pi putum tiku ni makgaxtokgkgo ni paxuwakgo. Biblia wan pi tamakgaxtokgat akgtum xtamaskiwin Dios chu ni tamakgaxtokgkan na akgtum xtamaskiwin.
1. ¿Tuku tlan kitaxtu akxni ni tamakgaxtokgkan?
Biblia wan: «Putum tiku natamakgaxtokga tlan tuku tlawama, pero tiku ni natamakgaxtokga tlakg tlan tuku natlawa» (kalikgalhtawakga 1 Corintios 7:32, 33, 38). ¿Tuku wamputun pi chatum lataman «tlakg tlan tuku natlawa» komo ni natamakgaxtokga? Kstalaninanin Cristo tiku ni makgaxtokgkgo, ni lilakgaputsakgo nakuentajtlawakgo chatum chixku o chatum puskat. Xlakan ni lu lhuwa talakgatay kgalhikgo. Makgapitsi ni tuwa makgkatsikgo tlakg naskujnanikgo Jehová, akgtum liʼakxilhtit, tlan ankgo alakatanu kachikin xlakata nalichuwinankgo xatlan tamakatsinin. Chu tuku tlakg xlakaskinka, wa pi tlan limaxtukgo lhuwa kilhtamaku xlakata namatliwakglhkgo la talalinkgo Jehová.
2. ¿Tuku tlan kitaxtu akxni tamakgaxtokgkan kxlakatin mapakgsinanin?
Tamakgaxtokgat na limin tuku tlan. Biblia wan pi «tlakg tlan chatiy nixawa kaj chatum» (Eclesiastés 4:9). Umakgolh tachuwin kgantaxtu akxni akgtum tamakgaxtokgat lilatamakgo xtastakyaw Biblia. Tiku tamakgaxtokgkgo kxlakatin mapakgsinanin lamalaknunikgo nalapaxkikgo, nalalimasiyanikgo kakni chu nalakuentajtlawakgo. Wa xlakata tlakg tlan makgkatsikgo nixawa tiku akxtum wilakgolh, pero ni makgaxtokgkgo. Nachuna, tamakgaxtokgat tlawa pi tlan nakamakgastakkan kamanan.
3. ¿Tuku lakpuwan Jehová xlakata tamakgaxtokgat?
Akxni Jehová lakkaxwililh xapulana tamakgaxtokgat, wa: «Chixku namakgxtakga xtlat chu xtse chu akxtum natatawila xpuskat» (Génesis 2:24). Jehová lakaskin pi chixku chu puskat nalapaxkikgo chu akxtum natawilakgo. Chu kajwatiya masta talakaskin nalakxtlawakan tamakgaxtokgat komo chatum tlawa talakgxtumit nema ni xlitatlawat. Akxni chuna la, Dios masta talakaskin pi tiku akgskgawika nalaksaka komo nalakxtlawa xtamakgaxtokgat o ni (Mateo 19:9).a Jehová ni masta talakaskin pi kstalanina Cristo chalhuwa tiku natatamakgaxtokga (1 Timoteo 3:2).
TLAKG KALAKPUTSANANIW
Kaʼakxilhwi tuku namakgtayayan napaxuwaya chu namakgapaxuwaya Jehová maski nina tamakgaxtokga o tamakgaxtokgnitata.
4. Komo nina tamakgaxtokga liwana kamaklakaskinti uma tamaskiwin
Jesús xlakpuwan pi akgtum tamaskiwin akxni nina tamakgaxtokgkan (Mateo 19:11, 12). Kalikgalhtawakgatit Mateo 4:23 chu kalichuwinantit uma:
Xlakata Jesús ni tamakgaxtokgli, ¿la maklakaskilh xkilhtamaku xlakata naskujnani xTlat chu nakamakgtaya amakgapitsin?
Kstalaninanin Cristo tiku nina tamakgaxtokgkgo, tlan napaxuwakgo komo liwana namaklakaskinkgo xkilhtamakujkan chuna la tlawalh Jesús. Kaʼakxilhtit VIDEO chu kalichuwinantit uma:
¿Tuku tlan natlawakgo kstalaninanin Cristo tiku ni tamakgaxtokgkgonit xlakata tlakg tlan namaklakaskinkgo xkilhtamakujkan?
¿Xkatsiyata?
Biblia ni wan tuku kata xlikgalhit chatum kgawasa o chatum tsumat xlakata natamakgaxtokga. Pero kinkawaniyan pi kakgalhkgalhilh asta akxni «akchanita xkata», uma wamputun akxni titaxtunita kilhtamaku akxni lu talakgxtumiputun, xlakata uma tlawa pi ni liwana nalakapastaknan (1 Corintios 7:36).
5. Liwana kalaksakti tiku natatamakgaxtokga
Pulaktum tuku lu xlakaskinka laksakkan klatamat wa tiku natatamakgaxtokga. Kalikgalhtawakgatit Mateo 19:4-6, 9 chu kalichuwinantit uma:
¿Tuku xlakata chatum kstalanina Cristo pulana liwana xlilakapastakat komo tamakgaxtokgputun?
Biblia namakgtayayan nakatsiya tuku tlan tayat xlikgalhit chatum tlan chixku o chatum tlan puskat. Pero wa tuku tlakg xlakaskinka, kaputsa chatum tiku xlikana paxki Jehová.b Kalikgalhtawakgatit 1 Corintios 7:39 chu 2 Corintios 6:14. Alistalh kalichuwinantit uma:
Komo chatum kstalanina Cristo lakpuwama natamakgaxtokga, ¿tuku xlakata xlilaksakat chatum tiku na watiya takanajla kgalhi la xla?
Komo natatamakgaxtokga chatum tiku ni paxki Jehová, ¿la lakpuwana pi namakgkatsi Jehová?
Akxni tantiy tanu tanu animales akxtum kamalinikan akgtum mukiwi, xtantiykan patinankgo. Nachuna, kstalanina Cristo tiku natatamakgaxtokga tiku ni paxki Jehová, nakgalhi lhuwa taʼakglhuwit
6. Kaʼakxilhti tamakgaxtokgat chuna la akxilha Jehová
Kxamakgan Israel, makgapitsi lakchixkuwin xmakgxtakgkgo xpuskatkan xlakata xʼakstu xkalilakgaputsakan. Kalikgalhtawakgatit Malaquías 2:13, 14, 16 chu kalichuwinantit uma:
¿Tuku xlakata Jehová ni lakgati akxni chatum lataman kaxatukawa tuku lilakxtlawa xtamakgaxtokgat?
Akxni tlawakan talakgxtumit nema ni xlitatlawat chu lakxtlawakan tamakgaxtokgat, ni kajwatiya makgalipuwan tiku akgskgawika, wata na kamakgalipuwan kamanan
Kaʼakxilhtit VIDEO chu kalichuwinantit uma:
Komo wix tamakgaxtokga chatum tiku ni paxki Jehová, ¿tuku tlan natlawaya xlakata xatapaxuwan natawila mintamakgaxtokgat?
7. Kakgalhakgaxpatti xlimapakgsin Jehová xlakata tamakgaxtokgat
Makgapitsin lu tuwa makgkatsikgo nakgalhakgaxmatkgo tuku Jehová limapakgsinan xlakata tamakgaxtokgat.c Pero xla kasikulunatlawa tiku liskujkgo nakgalhakgaxmatkgo. Kaʼakxilhtit VIDEO.
Kalikgalhtawakgatit Hebreos 13:4 chu kalichuwinantit uma:
¿Lakpuwana wix pi Jehová malakatsali tuku skin xlakata tamakgaxtokgat? ¿Tuku xlakata chuna lakpuwana?
Jehová lakaskin pi kstalaninanin Cristo karegistrarlikgolh xtamakgaxtokgatkan o akxni lakxtlawakgo xtamakgaxtokgatkan, xlakata chuna lakkaxwilikgonit mapakgsinanin. Kalikgalhtawakgatit Tito 3:1 chu kalichuwinantit uma:
Komo wix tamakgaxtokgnitata, ¿liwana katsiya pi mapakgsinanin registrarlikgonit mintamakgaxtokgat?
MAKGAPITSIN KGALHSKININANKGO: «¿Lu talakaskin natamakgaxtokgkan? ¿Xlikana talakaskin maktum kapsnat?».
¿Tuku xkgalhtinanti wix?
TUKU KATSINIW
Akgtum xtamaskiwin Jehová tamakgaxtokgkan chu ni tamakgaxtokgkan. Maski makgaxtokgaw o ni makgaxtokgaw, tlan napaxuwayaw komo natlawayaw tuku Dios lakgati.
¿Tuku xkgalhtinanti?
¿La tlan liwana namaklakaskin xkilhtamaku tiku ni tamakgaxtokgnit?
¿Tuku xlakata Biblia wan pi kstalaninanin Cristo kajwatiya xlitatamakgaxtokgatkan tiku watiya takanajla kgalhi la xlakan?
Biblia wan pi kajwatiya pulaktum tuku tlan nalilakxtlawakan tamakgaxtokgat, ¿tuku uma?
TLAKG KAKATSINI
¿Tuku kilhchanima tatamakgaxtokgkan «kajwatiya tiku kstalanina Malana»?
«Tuku katsiputunkgo tiku likgalhtawakgakgo» (Makatsinina, 1 xla julio kata 2004)
Kaʼakxilhti pulaktiy liʼakxilhtit xlakata kgalhikan litatawilat o liit chu tamakgaxtokgat. Uma namakgtayayan nalaksaka tuku tlan.
Kaʼakxilhti tuku xlakata chatum tala liwana katsi pi Jehová tlakg lhuwa tuku maxkinit nixawa tuku makgxtakglhli.
¿Tuku xlikatsit chatum kstalanina Cristo komo lakpuwama nalakxtlawa xtamakgaxtokgat o namakgxtakga tiku tamakgaxtokga?
«Kamaxkiw kakni “wa ntu Dios makxtum tlawalh”» (Makatsinina, diciembre kata 2018)
a Knota 4 tlakg lichuwinan xlakata akxni lamakgxtakgkan pero nitu tlawakanit talakgxtumit nema ni xlitatlawat.
b Kmakgapitsi kachikinin, talismani pi natlatni nalaksakkgo tiku natatamakgaxtokga xkgawasa o xtsumat. Akxni chuna la, xatlan natlatni pulana akxilhkgo komo tiku natamamakgaxtokga xkgawasa o xtsumat paxki Jehová. Wa tuku tlakg xlakaskinka xliʼakxilhatkan natlatni ni wa komo kgalhi tumin o komo xfamilia lu xlakaskinka o lu lakgapaskan.
c Komo wix wi tiku tawila pero ni tamakgaxtokga, miʼakstu mililaksakat komo namakgxtakga o natatamakgaxtokga.