¿Kaj maktum libro la amakgapitsi?

«Xlipaks yuma ntatsokgnun, paks ntimapuwanikgolh Dios lantla natsokgkgoy [...], chu na lu wa tlan lakimpi chuna ni tu nakitsankganiy nchixku nti skujnaniy Dios, paks tlan nakatsiy lantla natlaway xlipaks ntu ntlan.» (2 TIMOTEO 3:16, 17)

MAKGAPITSI lakpuwankgo pi kaj malakatsalikan tuku wan 2 Timoteo 3:16, 17. ¿Tuku lakpuwana wix? Naʼakxilhaw akgtati talakapastakni, ¿tukuya talakapastakni xtachuna tuku lakpuwana?

• Kaj maktum libro nema katuwa tuku lichuwinan

• Kaj atanu libro xasanto

• Kaj cuentos nema masiyakgo tuku tlan

• Wa xTachuwin Dios

Pero ¿kgalhini kuenta nakatsiya tuku Biblia? Kaʼakxilhti tuku xlakata tsokgka: «Sampi wa nkatuwa ntu xapulana ntatsokgli, wa litsokgka mpi chuna nalikatsiniyaw wa ntu ntlan; lakimpi wa lantla nalikgalhiyaw ntapaxuwanaliyan, chu naliʼakgpuwantiyaw ntatsokgnun, nalikgalhiyaw ntakgalhkgalhitin» (Romanos 15:4). Wamputun, tsokgka xlakata nakinkalimasiyanikanan, tlan nakinkamamakgkatsiniyaw chu nakgalhiyaw takgalhkgalhin.

Wa xlakata, ¿kuenta xtlawani tuku wan Biblia komo kaj maktum libro nema katuwa tuku lichuwinan o kaj atanu libro xasanto xwa? ¿Xtlawa tuku wan? Akxni nalaksaka tuku natlawaya chu mi familia, ¿xtlawa tuku wan komo ni xtachuna tuku lakpuwana? Chu komo kaj cuentos xwa, ¿tlan xmamakgkatsinin o xmaxkin takgalhkgalhin tuku wan pi nala?

Lhuwa millón latamanin tiku likgalhtawakgakgonit Biblia katsikgonit pi xTachuwin Dios. ¿Katsiputuna tuku xlakata lakpuwankgo pi ni kaj maktum libro chuna la amakgapitsi? Artículos nema naʼakxilhaw lichuwinan pulakkitsis nema masiya tuku xlakata Biblia ni anan tuku xtachuna.