¿Tuku xlakata nakgalhskininanaw?

«¿Tlan wila kmilatamat xlakata nitu Dios? Lhuwa latamanin tlan kakitaxtuninit.» Chuna xwan kʼakgtum lanka letrero, nema xtlawakgonit tiku ni kanajlakgo pi wi Dios. Xlakan liwana limasiyakgo pi nitu Dios chu ni lakaskinkgo xtamakgtay.

Pero, na wilakgolh lhuwa latamanin tiku wankgo pi kanajlanikgo Dios, pero ni limasiyakgo kxlatamatkan. Salvatore Fisichella, arzobispo xla takanajla católico, wa: «Tuwa kmakgkatsi nakwan pi akinin kstalaninanin Cristo, xlakata nachuna klamaw la tiku ni kanajlakgo».

Makgapitsi ni kgalhikgo kilhtamaku nalakapastakkgo Dios. Lakpuwankgo pi lu makgat wi chu ni kalilakgaputsakgo. Lhuwa latamanin putsakgo Dios akxni kgalhikgo taʼakglhuwit; akxilhkgo la chatum skujni tiku natlawa putum tuku lakaskinkgo.

Makgapitsi ni kanajlakgo pi nakamakgtaya xtamasiyat takanajla o ni tlawakgo tuku kamasiyanikan kxtakanajlakan. Akgtum liʼakxilhtit 76% católicos xalak Alemania tlan akxilhkgo natatawilakgo tiku ni tatamakgaxtokgkgonit, uma talismanin ni wa masiya xtakanajlakan chu Biblia (1 Corintios 6:18; Hebreos 13:4). Tlan nawanaw pi ni kajwatiya católicos akxilhkgo tuku tlawakgo xcompañeroskan. Xpulalinanin makgapitsi takanajla nachuna wankgo, xlakata kanajlanin ni lilatamakgo tuku katsinikgo kxtakanajlakan.

Pero tawila akgtum takgalhskinin: ¿xlikana lakaskinaw xtamakgtay Dios? Uma takgalhskinin ni xasasti. Uma tatlawalh akxni xkilhtsukumakgo latamanin. Xlakata nakatsiyaw xtakgalhtin, kaʼakxilhwi makgapitsi takgalhskinin nema lichuwinan libro xla Génesis.