¿Wanilh Jesús pi kʼakgapun xʼama tawila chixku tiku lixkajni xlikatsi?

Taxtu uma takgalhskinin xlakata Jesús wanilh chixku tiku kxtokgowakakanit kxpaxtun: «Xlikana kwaniyan uku: Nakintatawilayapi kParaíso» (Lucas 23:43, TNM). Jesús ni wanilh niku xwi uma paraíso. ¿Wamputun pi uma chixku xʼama taʼan kʼakgapun?

Pulana kaʼakxilhwi komo xmakgatsi tuku xtalakaskin xlakata tlan xlatamalh kʼakgapun. Kstalaninanin Cristo tiku kgalhikgo takgalhkgalhin nalatamakgo kʼakgapun, litamunukgonit chuchut chu espíritu santo, chuna litaxtukgolh kstalaninanin Jesús chu xkamanan Dios (Juan 3:3, 5). Talakaskin na nalatamakgo chuna la wan xlimapakgsin Dios chu nalakgalhamanankgo, ni namakgxtakgnankgo chu ni naʼakgskgawinankgo (1 Corintios 6:9-11). Nachuna ni namakgxtakgkgo Dios chu Cristo asta akxni nanikgo (Lucas 22:28-30; 2 Timoteo 2:12). Kajwatiya komo namakgatsikgo uma, tlan nakamalakastakwanikan chu tlan namakgantaxtikgo lu xlakaskinka taskujut nema natlawakgo kʼakgapun: sacerdotes nawankgo chu natamapakgsinankgo Cristo akgtum mil kata xlakata nakamakgtayakgo latamanin (Apocalipsis [Revelación] 20:6).

Pero chixku tiku xwaka kxpaxtun Jesús kxlatamat tlawalh tuku nitlan asta akxni nilh (Lucas 23:32, 39-41). Xlikana pi masiyalh tlan talakapastakni akxni wanilh Jesús: «Nakilakapastaka akxni wilapi nawan kmintapakgsin» (Lucas 23:42). Maski chuna, xla ni xtamununit chu ni kstalanina Jesús xwanit, ni xlimasiyanit pi tlan xlin xlatamat chu na ni limasiyalh pi ni xmakgxtakga Dios. ¿Nalakpuwanaw pi Jesús xwanima pi xʼama katamapakgsinan kstalaninanin tiku nikxni makgxtakgkgolh Dios? (Romanos 2:6, 7.)

Kawiliw akgtum liʼakxilhtit. Komo chatum chixku kskinin pi xtapati xlakata makgkgalhan mintumin. Max tlan xtapati chu ni xlipi kxlakatin mapakgsinanin, pero ¿xmakuentajlini minegocio o mifamilia? Ni. Wix max xmaxki uma lu xlakaskinka taskujut tiku lu lipawana. Nachuna, tiku kamaxkikanit takgalhkgalhin nalatamakgo kʼakgapun talakaskin nalimasiyakgo pi tlan kalipawankan chu chuna natlawakgo chuna la wan xlimapakgsin Dios akxni nakamapakgsikgo latamanin (Apocalipsis 2:10). Maski chixku tiku lixkajni xlikatsi, masiyalh tlan talakapastakni akxni chuna skinilh Jesús, ni xlimasiyanit pi tlan xlipawankan.

Pero ¿xwaniputun Jesús chixku tiku xwaka kxpaxtun pi ama kilhtamaku xʼama tatawila kparaíso? Ni chuna xwaniputun, xlakata Jesús ni alh kʼakgapun ama kilhtamaku, wata «kxtampun tiyat», kputaknun, xtanuma akgtutu kilhtamaku (Mateo 12:40; Marcos 10:34). Chu akxni xlakastakwananita, tamakgxtakgliku tipuxum kilhtamaku chu alistalh alh kʼakgapun (Hechos 1:3, 9).

Wa xlakata, ¿ktukuya paraíso xʼama an ama chixku? Akxni nalakastakwanan nalatama kParaíso unu kKatiyatni niku namapakgsinan Jesús (Hechos 24:15; Apocalipsis 21:3, 4). Komo tlakg katsiputuna xlakata uma Paraíso chu tuku kinkaskiniyan Dios xlakata tlan anta natawilayaw, katachuwinanti chatum xtatayana Jehová.