TAKGALHSKININ XLAKATA BIBLIA
¿Xlikana xkamalakastakwani Jesús tiku xnikgonita?
Lázaro xlina akgtati kilhtamaku akxni Jesús malakastakwanilh
Anta kBiblia lichuwinan talakastakwanat nema tlawalh Jesús. Uma tuku tatsokgnit ni kaj cuentos; lichuwinankan niku chu tuku kilhtamaku lalh. Akgtum liʼakxilhtit kata 31, a.x.J. (akxni xminita Jesús) alh kkachikin wanikan Naín chu kstalanimakgolh makgapitsi latamanin. Akxni chalh na katatanokglhli makgapitsi latamanin chu xʼamakgolh maknukgo o mujukgo chatum kgawasa. Jesús malakastakwanilh ktiji. Tlan nalipawanaw pi xlikana chuna lalh, ni kaj watiya tuku wan Biblia, xlakata lhuwa latamanin akxilhkgolh. (Kalikgalhtawakga Lucas 7:11-15.)
Titaxtulh kilhtamaku, Jesús malakastakwanilh Lázaro tiku xʼamigo xwanit, chu xlina akgtati kilhtamaku lata xninit. Nachuna xwilakgolh lhuwa latamanin tiku akxilhkgolh tuku nila tamakanajla, uma wamputun pi uma talakastakwanat xlikana kgantaxtulh. (Kalikgalhtawakga Juan 11:39-45.)
¿Tuku xlakata xkamalakastakwani tiku xnikgonita?
Jesús xkamaxkipara latamat xlakata xkapaxki. Nachuna xtlawa xlakata xlimasiya pi xTlat, tiku Malakatsuki latamat, xmaxkinit litliwakga xlakata xmalakastakwanilh tiku xnikgonit. (Kalikgalhtawakga Juan 5:21, 28, 29.)
Talakastakwanat nema tlawalh Jesús kinkamasiyaniyan pi putum namakgantaxti tuku wanit. Nakamalakastakwani millones latamanin, chu tiku ni lakgapaskgolh Dios. Ama kilhtamaku nalakgapaskgo chu napaxkikgo. (Kalikgalhtawakga Hechos 24:15.)