Tantum burra chuwinan

¿KGAXMATNITA wix nachuwinan tantum burra? Nikxni, max nawana. Animales ni chuwinankgoy. Pero Biblia wan pi makgtum chuwinalh tantum burra. Naʼakxilhaw la tilalh.

Atsinu li Israel xʼamakgolh tanukgoy kkatiyatni xalak Canaán. Balac, mapakgsina xalak Moab, kapekuani li Israel. Wa xlakata, maputsinan chatum chixku tiku lhuwa tuku xkatsi, xtukuwani Balaam, xlakata namin nakamawakaniy li Israel tachuwin nema ni xatlan tuku kakaʼakgspulalh. Lhuwa tumin malaknuniy, wa xlakata Balaam kgetawi xburra chu alh akxilha Balac.

Jehová ni lakaskin pi Balaam naʼan kamawakaniy tachuwin nema nixatlan kakaʼakgspulalh Xkachikin. Wa xlakata malakgacha chatum ángel chu lin lanka espada, xlakata katayalh kxitat ktiji chu kamachokgolh Balaam. Balaam nila akxilha ángel, pero xburra tlan akxilha ángel. Burra tsalanima ángel, chu alistalh tamalh ktiji. Balaam snun sitsilh, chu nikli xburra.

Alistalh Jehová tlawalh pi Balaam kakgaxmatli pi xburra xtachuwinama. ¿Tuku xlakata kiwilinipat, wi tuku nitlan ktlawaninitan? Kgalhskilh burra.

Balaam kgalhtinan: Wix tlawapat pi la chatum tonto naktasiyay. ¡Komo xakkgalhilh akgtum espada, xakmakgnin!

¿Wi kilhtamaku akxni tuku ktlawaninitan?, kgalhskininalh burra.

Nikxni, kgalhtinalh Balaam.

Alistalh Jehová tlawalh pi Balaam kaʼakxilhli ángel nema chipanit xespada anta ktiji. Ángel wan: ¿Tuku xlakata nikti mi burra? Kminit lakgapaxtokgan unu ktiji, xlakata ni napina kamawakaniya nitlan tachuwin nema nakaʼakgspulay li Israel. Xlakata mi burra nixtimachokgon akit xakmakgnin, chu mi burra nitu xaktlawanilh.

Balaam wa: Nitlan tuku ktlawanit. Ni xakkatsiy pi anta ktiji xyat. Ángel makgxtakgli naʼan Balaam, chu Balaam ni tachokgolh lakgalh Balac. Chunaku lakpuwanit nakamawakaniy tuku nitlan nakaʼakgspulay li Israel, pero Jehová tlawalh pi Balaam makgtutu kakasikulanatlawalh li Israel.