Tuku katsiputunkgo tiku likgalhtawakgakgo

¿Tuku lichuwinan 1 Corintios 15:29 wamputun pi makgapitsin kstalaninanin Cristo xtamunukgo xpalakatakan tiku xnikgonita?

Ni. Nipara Biblia chu nipara atanu libros masiyakgo komo xʼanan uma talismanin.

Klhuwa Biblias nema kamatitaxtikanit kʼatanu tachuwin, uma versículo maʼakgatekgsninan pi kxkilhtamaku Pablo xʼanankgo tiku xtamunukgo xpalakatakan tiku xnikgonita. Akgtum liʼakxilhtit, Nueva Traducción Viviente wan: «Komo tiku nikgonita ni katikamalakastakwanika, ¿tuku xlakata latamanin tamunukgo xpalakatakan tiku nikgonita?».

Pero kaʼakxilhwi tuku tsokgwilikgolh chatiy tiku lakputsananikgo Biblia. Gregory Lockwood lichuwinalh pi takanajla xlakata chatum lataman natamunu «xpalakata tiku ninita» akgtum «tamunut nema ni tatalakxtumi tuku masiya Biblia chu tuku kgantaxtunit kilhtamaku nema titaxtunita». Nachuna, Gordon Fee, tiku lakputsanani Biblia, tsokgli: «Ni anan kBiblia chu tuku titaxtunit nema nalimasiya pi xlitatlawat xwanit uma tamunut. NT [Nuevo Testamento] ni lichuwinan uma; ni anan akgtum talismanin xtachuna la uma kʼakgtum pusikulan o atanu siglos nema kstalakgo».

Chuna la wan Biblia, Jesús lichuwinalh: «Kakamakgtayatit latamanin xliputum kachikinin xlakata kistalaninanin nawankgo, kakamunutit [...] kakamasiyanitit namakgantaxtikgo putum tuku kkalimapakgsinitan» (Mat. 28:19, 20). Wa xlakata, xlakata chatum lataman kstalanina Cristo xlitaxtulh, xtalakaskin nakatsini xpalakata Jehová chu xpalakata Jesús, xkanajlanikgolh chu xkakgalhakgaxmatkgolh. Chu liwana tasiya pi tiku xninita chu xmaknukanit, nila xtlawalh uma chu nachuna chatum lataman nila xtlawalh xpalakata (Ecl. 9:5, 10; Juan 4:1; 1 Cor. 1:14-16).

Wa xlakata, ¿tuku xwamputun Pablo?

Anta kcongregación xalak Corinto, makgapitsin ni xkanajlanikgo talakastakwanat (1 Cor. 15:12). ¿La kastakyawalh Pablo? Xla kawanilh: «Chali chali ktatalakastuka linin». Xlikana, xla xlamajku, pero maski ankgalhin katuwa xwili xlatamat liwana xkatsi pi akxni xnilh xʼamaka malakastakwanikan chu xkgalhilh latamat la chatum tliwakga espíritu, chuna la Jesús (1 Cor. 15:30-32, 42-44).

Tiku xalak Corinto xliʼakgatekgsatkan xwanit pi, xlakata xatalaksakni xwankgonit, chali chali xʼamakgo titaxtukgo tuku tuwa chu xʼamakgolh nikgo. Tamunukan kxtukuwani «Cristo Jesús» kilhchanima pi na tamunukan xlakata na natanikan Jesús (Rom. 6:3). Uma tamunut nema wi tuku xkilhchanima xwamputun pi, xtachuna la Jesús, na xʼamakgolh titaxtukgo tuku tuwa chu xʼamakgolh nikgo xlakata tlan xlakastakwanankgolh kʼakgapun.

Liwaka akgtiy kata lata tamunulh Jesús kchuchut, kawanilh chatiy xʼapóstoles: «Tamunut nema kilimunumaka, na nakalimunukanatit» (Mar. 10:38, 39). Xlikana, Jesús nitu xtajuma kchuchut uma kilhtamaku. Tuku xwamputun wa pi tiku ni xmakgxtakgkgolh Dios na xʼamakgolh nikgo. Pablo tsokgli pi tiku xatalaksakni xʼamakgo patinankgo chuna la patinalh Cristo xlakata na xkamasantujlika chuna la xla (Rom. 8:16, 17; 2 Cor. 4:17). Uma wamputun pi xlakan na pulana xʼamakgolh nikgo xlakata xlakastakwanankgolh kʼakgapun.

Wa xlakata, xtachuwin Pablo tlan chuna namatitaxtikan: «Komo tiku nikgonita ni katikamalakastakwanika, ¿la nakakitaxtuni tiku kamunumaka xlakata nanikgo? ¿Tuku tamakgtay namakglhtinankgo?».